| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৬. গোপালৰিমানৰণ্ণনা
6. Gopālavimānavaṇṇanā
দিস্ৰান দেৰং পটিপুচ্ছি ভিক্খূতি গোপালৰিমানং। তস্স কা উপ্পত্তি? ভগৰা রাজগহে ৰিহরতি ৰেল়ুৰনে। তেন সমযেন রাজগহৰাসী অঞ্ঞতরো গোপালকো পাতরাসত্থায পিলোতিকায পুটবদ্ধং কুম্মাসং গহেত্ৰা নগরতো নিক্খমিত্ৰা গাৰীনং চরণট্ঠানভূতং গোচরভূমিং সম্পাপুণি। তং আযস্মা মহামোগ্গল্লানো ‘‘অযং ইদানেৰ কালং করিস্সতি, ময্হঞ্চ কুম্মাসং দত্ৰা তাৰতিংসেসু উপ্পজ্জিস্সতী’’তি চ ঞত্ৰা তস্স সমীপং অগমাসি। সো ৰেলং ওলোকেত্ৰা থেরস্স কুম্মাসং দাতুকামো অহোসি। তেন চ সমযেন গাৰিযো মাসক্খেত্তং পৰিসন্তি। অথ সো গোপালো চিন্তেসি ‘‘কিং নু খো থেরস্স কুম্মাসং দদেয্যং, উদাহু গাৰিযো মাসক্খেত্ততো নীহরেয্য’’ন্তি। অথস্স এতদহোসি ‘‘মাসসামিকা মং যং ইচ্ছন্তি, তং করোন্তু, থেরে পন গতে কুম্মাসদানন্তরাযো মে সিযা, হন্দাহং পঠমং অয্যস্স কুম্মাসং দস্সামী’’তি তং থেরস্স উপনেসি। পটিগ্গহেসি থেরো অনুকম্পং উপাদায।
Disvānadevaṃ paṭipucchi bhikkhūti gopālavimānaṃ. Tassa kā uppatti? Bhagavā rājagahe viharati veḷuvane. Tena samayena rājagahavāsī aññataro gopālako pātarāsatthāya pilotikāya puṭabaddhaṃ kummāsaṃ gahetvā nagarato nikkhamitvā gāvīnaṃ caraṇaṭṭhānabhūtaṃ gocarabhūmiṃ sampāpuṇi. Taṃ āyasmā mahāmoggallāno ‘‘ayaṃ idāneva kālaṃ karissati, mayhañca kummāsaṃ datvā tāvatiṃsesu uppajjissatī’’ti ca ñatvā tassa samīpaṃ agamāsi. So velaṃ oloketvā therassa kummāsaṃ dātukāmo ahosi. Tena ca samayena gāviyo māsakkhettaṃ pavisanti. Atha so gopālo cintesi ‘‘kiṃ nu kho therassa kummāsaṃ dadeyyaṃ, udāhu gāviyo māsakkhettato nīhareyya’’nti. Athassa etadahosi ‘‘māsasāmikā maṃ yaṃ icchanti, taṃ karontu, there pana gate kummāsadānantarāyo me siyā, handāhaṃ paṭhamaṃ ayyassa kummāsaṃ dassāmī’’ti taṃ therassa upanesi. Paṭiggahesi thero anukampaṃ upādāya.
অথ নং গাৰিযো নিৰত্তেতুং পরিস্সযং অনোলোকেত্ৰা ৰেগেন উপধাৰন্তং পাদেন ফুট্ঠো আসীৰিসো ডংসি। থেরোপি তং অনুকম্পমানো তং কুম্মাসং পরিভুঞ্জিতুং আরভি। গোপালকোপি গাৰিযো নিৰত্তেত্ৰা আগতো থেরং কুম্মাসং পরিভুঞ্জন্তং দিস্ৰা পসন্নচিত্তো উল়ারং পীতিসোমনস্সং পটিসংৰেদেন্তো নিসীদি। তাৰদেৰস্স সকলসরীরং ৰিসং অজ্ঝোত্থরি। মুহুত্তমেৰ ৰেগে মুদ্ধপত্তে কালমকাসি, কালকতো চ তাৰতিংসেসু দ্ৰাদসযোজনিকে কনকৰিমানে নিব্বত্তি। তং আযস্মা মহামোগ্গল্লানো দিস্ৰা ইমাহি গাথাহি পটিপুচ্ছি –
Atha naṃ gāviyo nivattetuṃ parissayaṃ anoloketvā vegena upadhāvantaṃ pādena phuṭṭho āsīviso ḍaṃsi. Theropi taṃ anukampamāno taṃ kummāsaṃ paribhuñjituṃ ārabhi. Gopālakopi gāviyo nivattetvā āgato theraṃ kummāsaṃ paribhuñjantaṃ disvā pasannacitto uḷāraṃ pītisomanassaṃ paṭisaṃvedento nisīdi. Tāvadevassa sakalasarīraṃ visaṃ ajjhotthari. Muhuttameva vege muddhapatte kālamakāsi, kālakato ca tāvatiṃsesu dvādasayojanike kanakavimāne nibbatti. Taṃ āyasmā mahāmoggallāno disvā imāhi gāthāhi paṭipucchi –
১১৫৯.
1159.
‘‘দিস্ৰান দেৰং পটিপুচ্ছি ভিক্খু, উচ্চে ৰিমানম্হি চিরট্ঠিতিকে।
‘‘Disvāna devaṃ paṭipucchi bhikkhu, ucce vimānamhi ciraṭṭhitike;
আমুত্তহত্থাভরণং যসস্সিং, দিব্বে ৰিমানম্হি যথাপি চন্দিমা॥
Āmuttahatthābharaṇaṃ yasassiṃ, dibbe vimānamhi yathāpi candimā.
১১৬০.
1160.
‘‘অলঙ্কতো মল্যধরো সুৰত্থো, সুকুণ্ডলী কপ্পিতকেসমস্সু।
‘‘Alaṅkato malyadharo suvattho, sukuṇḍalī kappitakesamassu;
আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা॥
Āmuttahatthābharaṇo yasassī, dibbe vimānamhi yathāpi candimā.
১১৬১.
1161.
‘‘দিব্বা চ ৰীণা পৰদন্তি ৰগ্গুং। অট্ঠট্ঠকা সিক্খিতা সাধুরূপা।
‘‘Dibbā ca vīṇā pavadanti vagguṃ; Aṭṭhaṭṭhakā sikkhitā sādhurūpā;
দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি॥
Dibbā ca kaññā tidasacarā uḷārā, naccanti gāyanti pamodayanti.
১১৬২.
1162.
‘‘দেৰিদ্ধিপত্তোসি মহানুভাৰো…পে॰…
‘‘Deviddhipattosi mahānubhāvo…pe…
ৰণ্ণো চ তে সব্বদিসা পভাসতী’’তি॥
Vaṇṇo ca te sabbadisā pabhāsatī’’ti.
সোপি তস্স ব্যাকাসি –
Sopi tassa byākāsi –
১১৬৩. ‘‘সো দেৰপুত্তো অত্তমনো…পে॰…যস্স কম্মস্সিদং ফলং’’॥
1163. ‘‘So devaputto attamano…pe…yassa kammassidaṃ phalaṃ’’.
১১৬৪.
1164.
‘‘অহং মনুস্সেসু মনুস্সভূতো, সঙ্গম্ম রক্খিস্সং পরেসং ধেনুযো।
‘‘Ahaṃ manussesu manussabhūto, saṅgamma rakkhissaṃ paresaṃ dhenuyo;
ততো চ আগা সমণো মমন্তিকে, গাৰো চ মাসে অগমংসু খাদিতুং॥
Tato ca āgā samaṇo mamantike, gāvo ca māse agamaṃsu khādituṃ.
১১৬৫.
1165.
‘‘দ্ৰযজ্জ কিচ্চং উভযঞ্চ কারিযং, ইচ্চেৰহং ভন্তে তদা ৰিচিন্তযিং।
‘‘Dvayajja kiccaṃ ubhayañca kāriyaṃ, iccevahaṃ bhante tadā vicintayiṃ;
ততো চ সঞ্ঞং পটিলদ্ধ যোনিসো, ‘দদামি ভন্তে’তি খিপিং অনন্তকং॥
Tato ca saññaṃ paṭiladdha yoniso, ‘dadāmi bhante’ti khipiṃ anantakaṃ.
১১৬৬.
1166.
‘‘সো মাসখেত্তং তুরিতো অৰাসরিং, পুরা অযং ভঞ্জতি যস্সিদং ধনং।
‘‘So māsakhettaṃ turito avāsariṃ, purā ayaṃ bhañjati yassidaṃ dhanaṃ;
ততো চ কণ্হো উরগো মহাৰিসো, অডংসি পাদে তুরিতস্স মে সতো॥
Tato ca kaṇho urago mahāviso, aḍaṃsi pāde turitassa me sato.
১১৬৭.
1167.
‘‘স্ৰাহং অট্টোম্হি দুক্খেন পীল়িতো, ভিক্খু চ তং সামং মুঞ্চিত্ৰানন্তকং।
‘‘Svāhaṃ aṭṭomhi dukkhena pīḷito, bhikkhu ca taṃ sāmaṃ muñcitvānantakaṃ;
অহাসি কুম্মাসং মমানুকম্পযা, ততো চুতো কালকতোম্হি দেৰতা॥
Ahāsi kummāsaṃ mamānukampayā, tato cuto kālakatomhi devatā.
১১৬৮.
1168.
‘‘তদেৰ কম্মং কুসলং কতং মযা, সুখঞ্চ কম্মং অনুভোমি অত্তনা।
‘‘Tadeva kammaṃ kusalaṃ kataṃ mayā, sukhañca kammaṃ anubhomi attanā;
তযা হি ভন্তে অনুকম্পিতো ভুসং, কতঞ্ঞুতায অভিৰাদযামি তং॥
Tayā hi bhante anukampito bhusaṃ, kataññutāya abhivādayāmi taṃ.
১১৬৯.
1169.
‘‘সদেৰকে লোকে সমারকে চ, অঞ্ঞো মুনি নত্থি তযানুকম্পকো।
‘‘Sadevake loke samārake ca, añño muni natthi tayānukampako;
তযা হি ভন্তে অনুকম্পিতো ভুসং, কতঞ্ঞুতায অভিৰাদযামি তং॥
Tayā hi bhante anukampito bhusaṃ, kataññutāya abhivādayāmi taṃ.
১১৭০.
1170.
‘‘ইমস্মিং লোকে পরস্মিং ৰা পন, অঞ্ঞো মুনী নত্থি তযানুকম্পকো।
‘‘Imasmiṃ loke parasmiṃ vā pana, añño munī natthi tayānukampako;
তযা হি ভন্তে অনুকম্পিতো ভুসং, কতঞ্ঞুতায অভিৰাদযামি ত’’ন্তি॥
Tayā hi bhante anukampito bhusaṃ, kataññutāya abhivādayāmi ta’’nti.
অথাযস্মা মহামোগ্গল্লানো অত্তনা চ দেৰতায চ কথিতনিযামেনেৰ তং ভগৰতো আরোচেসি। সত্থা তমত্থং পচ্চনুভাসিত্ৰা তং অট্ঠুপ্পত্তিং কত্ৰা সম্পত্তপরিসায ধম্মং দেসেতুং ‘‘দিস্ৰান দেৰং পটিপুচ্ছি ভিক্খূ’’তিআদিমাহ।
Athāyasmā mahāmoggallāno attanā ca devatāya ca kathitaniyāmeneva taṃ bhagavato ārocesi. Satthā tamatthaṃ paccanubhāsitvā taṃ aṭṭhuppattiṃ katvā sampattaparisāya dhammaṃ desetuṃ ‘‘disvāna devaṃ paṭipucchi bhikkhū’’tiādimāha.
১১৫৯. তত্থ দেৰন্তি গোপালদেৰপুত্তং। ভিক্খূতি আযস্মন্তং মহামোগ্গল্লানং সন্ধায সত্থা ৰদতি। সো হি সব্বসো ভিন্নকিলেসতায ভিক্খু। ৰিমানস্স বহুকালাৰট্ঠাযিতায কপ্পট্ঠিতিকতায এৰ ৰা ‘‘চিরট্ঠিতিকে’’তি ৰুত্তং, ‘‘চিরট্ঠিতিক’’ন্তিপি কেচি পঠন্তি। তঞ্হি ‘‘দেৰ’’ন্তি ইমিনা সম্বন্ধিতব্বং। সোপি হি সট্ঠিসতসহস্সাধিকা তিস্সো ৰস্সকোটিযো তত্থ অৰট্ঠানতো ‘‘চিরট্ঠিতিকে’’তি ৰত্তব্বতং লভতি। যথাপি চন্দিমাতি যথা চন্দিমা দেৰপুত্তো কন্তসীতলমনোহরকিরণজালসমুজ্জলে অত্তনো দিব্বে ৰিমানম্হি ৰিরোচতি, এৰং ৰিরোচমানন্তি ৰচনসেসা।
1159. Tattha devanti gopāladevaputtaṃ. Bhikkhūti āyasmantaṃ mahāmoggallānaṃ sandhāya satthā vadati. So hi sabbaso bhinnakilesatāya bhikkhu. Vimānassa bahukālāvaṭṭhāyitāya kappaṭṭhitikatāya eva vā ‘‘ciraṭṭhitike’’ti vuttaṃ, ‘‘ciraṭṭhitika’’ntipi keci paṭhanti. Tañhi ‘‘deva’’nti iminā sambandhitabbaṃ. Sopi hi saṭṭhisatasahassādhikā tisso vassakoṭiyo tattha avaṭṭhānato ‘‘ciraṭṭhitike’’ti vattabbataṃ labhati. Yathāpi candimāti yathā candimā devaputto kantasītalamanoharakiraṇajālasamujjale attano dibbe vimānamhi virocati, evaṃ virocamānanti vacanasesā.
১১৬০. অলঙ্কতোতিআদি তস্স দেৰপুত্তস্স থেরেন পুচ্ছিতাকারদস্সনং, তং হেট্ঠা ৰুত্তত্থমেৰ।
1160.Alaṅkatotiādi tassa devaputtassa therena pucchitākāradassanaṃ, taṃ heṭṭhā vuttatthameva.
১১৬৪. সঙ্গম্মাতি সঙ্গমেত্ৰা, সঙ্গম্মাতি ৰা সঙ্গহেত্ৰা। হেত্ৰত্থোপি হি ইধ অন্তোনীতো, বহূ একতো হুত্ৰাতি অত্থো। আগাতি আগঞ্ছি। মাসেতি মাসসস্সানি।
1164.Saṅgammāti saṅgametvā, saṅgammāti vā saṅgahetvā. Hetvatthopi hi idha antonīto, bahū ekato hutvāti attho. Āgāti āgañchi. Māseti māsasassāni.
১১৬৫. দ্ৰযজ্জাতি দ্ৰযং অজ্জ এতরহি কিচ্চং কাতব্বং। উভযঞ্চ কারিযন্তি ৰুত্তস্সেৰত্থস্স পরিযাযৰচনং। সঞ্ঞন্তি ধম্মসঞ্ঞং। তেনাহ ‘‘যোনিসো’’তি পটিলদ্ধাতি পটিলভিত্ৰা। খিপিন্তি পনিগ্গাহাপনৰসেন হত্থে খিপিং। অনন্তকন্তি নন্তকং কুম্মাসং পক্খিপিত্ৰা বন্ধিত্ৰা ঠপিতং পিলোতিকং। অ-কারো চেত্থ নিপাতমত্তং।
1165.Dvayajjāti dvayaṃ ajja etarahi kiccaṃ kātabbaṃ. Ubhayañca kāriyanti vuttassevatthassa pariyāyavacanaṃ. Saññanti dhammasaññaṃ. Tenāha ‘‘yoniso’’ti paṭiladdhāti paṭilabhitvā. Khipinti paniggāhāpanavasena hatthe khipiṃ. Anantakanti nantakaṃ kummāsaṃ pakkhipitvā bandhitvā ṭhapitaṃ pilotikaṃ. A-kāro cettha nipātamattaṃ.
১১৬৬. সোতি সো অহং। তুরিতোতি তুরিতো সম্ভমন্তো। অৰাসরিন্তি উপগচ্ছি, পাৰিসিং ৰা। পুরা অযং ভঞ্জতি যস্সিদং ধনন্তি যস্স খেত্তসামিকস্স ইদং মাসসস্সং ধনং, তং অযং গোগণো ভঞ্জতি পুরা তস্স ভঞ্জনতো, আমদ্দনতো পুরেতরমেৰাতি অত্থো। ততোতি তত্থ। তুরিতস্স মে সতোতি সম্ভমন্তস্স মে সমানস্স, সহসা গমনেন মগ্গে কণ্হসপ্পং অনোলোকেত্ৰা গতস্সাতি অধিপ্পাযো।
1166.Soti so ahaṃ. Turitoti turito sambhamanto. Avāsarinti upagacchi, pāvisiṃ vā. Purā ayaṃ bhañjati yassidaṃ dhananti yassa khettasāmikassa idaṃ māsasassaṃ dhanaṃ, taṃ ayaṃ gogaṇo bhañjati purā tassa bhañjanato, āmaddanato puretaramevāti attho. Tatoti tattha. Turitassa me satoti sambhamantassa me samānassa, sahasā gamanena magge kaṇhasappaṃ anoloketvā gatassāti adhippāyo.
১১৬৭. অট্টোম্হি দুক্খেন পীল়িতোতি তেন আসীৰিসডংসনেন অট্টো অট্টিতো উপদ্দুতো মরণদুক্খেন বাধিতো ভৰামি। অহাসীতি অজ্ঝোহরি, পরিভুঞ্জীতি অত্থো। ততো চুতো কালকতোম্হি দেৰতাতি ততো মনুস্সত্তভাৰতো চুতো মরণকালপ্পত্তিযা, তত্থ ৰা আযুসঙ্খারস্স খেপনসঙ্খাতস্স কালস্স কতত্তা কালকতো, তদনন্তরমেৰ চ অম্হি দেৰতা দেৰত্তভাৰপ্পত্তিযা দেৰতা হোমীতি অত্থো।
1167.Aṭṭomhi dukkhena pīḷitoti tena āsīvisaḍaṃsanena aṭṭo aṭṭito upadduto maraṇadukkhena bādhito bhavāmi. Ahāsīti ajjhohari, paribhuñjīti attho. Tato cuto kālakatomhi devatāti tato manussattabhāvato cuto maraṇakālappattiyā, tattha vā āyusaṅkhārassa khepanasaṅkhātassa kālassa katattā kālakato, tadanantarameva ca amhi devatā devattabhāvappattiyā devatā homīti attho.
১১৬৯. তযাতি তযা সদিসো অঞ্ঞো মুনি মোনেয্যগুণযুত্তো ইসি নত্থি। তযাতি ৰা নিস্সক্কে ইদং করণৰচনং। সেসং ৰুত্তনযমেৰ।
1169.Tayāti tayā sadiso añño muni moneyyaguṇayutto isi natthi. Tayāti vā nissakke idaṃ karaṇavacanaṃ. Sesaṃ vuttanayameva.
গোপালৰিমানৰণ্ণনা নিট্ঠিতা।
Gopālavimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ৬. গোপালৰিমানৰত্থু • 6. Gopālavimānavatthu
