| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
6. г̇обаалавимаанаван̣н̣анаа
6. Gopālavimānavaṇṇanā
д̣̇исваана д̣̇звам̣ бадибужчи бхигкууд̇и г̇обаалавимаанам̣. д̇асса гаа уббад̇д̇и? бхаг̇аваа рааж̇аг̇ахз вихарад̇и взл̣уванз. д̇зна самаязна рааж̇аг̇ахаваасий ан̃н̃ад̇аро г̇обаалаго баад̇араасад̇т̇ааяа билод̇игааяа будаб̣ад̣̇д̇хам̣ гуммаасам̣ г̇ахзд̇ваа наг̇арад̇о нигкамид̇ваа г̇аавийнам̣ жаран̣адтаанабхууд̇ам̣ г̇ожарабхуумим̣ самбаабун̣и. д̇ам̣ ааяасмаа махаамог̇г̇аллаано ‘‘аяам̣ ид̣̇аанзва гаалам̣ гариссад̇и, маяхан̃жа гуммаасам̣ д̣̇ад̇ваа д̇аавад̇им̣сзсу уббаж̇ж̇иссад̇ий’’д̇и жа н̃ад̇ваа д̇асса самийбам̣ аг̇амааси. со взлам̣ ологзд̇ваа т̇зрасса гуммаасам̣ д̣̇аад̇угаамо ахоси. д̇зна жа самаязна г̇аавияо маасагкзд̇д̇ам̣ бависанд̇и. ат̇а со г̇обаало жинд̇зси ‘‘гим̣ ну ко т̇зрасса гуммаасам̣ д̣̇ад̣̇зяяам̣, уд̣̇ааху г̇аавияо маасагкзд̇д̇ад̇о нийхарзяяа’’нд̇и. ат̇асса зд̇ад̣̇ахоси ‘‘маасасаамигаа мам̣ яам̣ ижчанд̇и, д̇ам̣ гаронд̇у, т̇зрз бана г̇ад̇з гуммаасад̣̇аананд̇арааяо мз сияаа, ханд̣̇аахам̣ батамам̣ аяяасса гуммаасам̣ д̣̇ассаамий’’д̇и д̇ам̣ т̇зрасса убанзси. бадиг̇г̇ахзси т̇зро анугамбам̣ убаад̣̇ааяа.
Disvānadevaṃ paṭipucchi bhikkhūti gopālavimānaṃ. Tassa kā uppatti? Bhagavā rājagahe viharati veḷuvane. Tena samayena rājagahavāsī aññataro gopālako pātarāsatthāya pilotikāya puṭabaddhaṃ kummāsaṃ gahetvā nagarato nikkhamitvā gāvīnaṃ caraṇaṭṭhānabhūtaṃ gocarabhūmiṃ sampāpuṇi. Taṃ āyasmā mahāmoggallāno ‘‘ayaṃ idāneva kālaṃ karissati, mayhañca kummāsaṃ datvā tāvatiṃsesu uppajjissatī’’ti ca ñatvā tassa samīpaṃ agamāsi. So velaṃ oloketvā therassa kummāsaṃ dātukāmo ahosi. Tena ca samayena gāviyo māsakkhettaṃ pavisanti. Atha so gopālo cintesi ‘‘kiṃ nu kho therassa kummāsaṃ dadeyyaṃ, udāhu gāviyo māsakkhettato nīhareyya’’nti. Athassa etadahosi ‘‘māsasāmikā maṃ yaṃ icchanti, taṃ karontu, there pana gate kummāsadānantarāyo me siyā, handāhaṃ paṭhamaṃ ayyassa kummāsaṃ dassāmī’’ti taṃ therassa upanesi. Paṭiggahesi thero anukampaṃ upādāya.
ат̇а нам̣ г̇аавияо нивад̇д̇зд̇ум̣ бариссаяам̣ анологзд̇ваа взг̇зна убад̇хааванд̇ам̣ баад̣̇зна пудто аасийвисо д̣ам̣си. т̇зроби д̇ам̣ анугамбамаано д̇ам̣ гуммаасам̣ барибхун̃ж̇ид̇ум̣ аарабхи. г̇обаалагоби г̇аавияо нивад̇д̇зд̇ваа ааг̇ад̇о т̇зрам̣ гуммаасам̣ барибхун̃ж̇анд̇ам̣ д̣̇исваа басаннажид̇д̇о ул̣аарам̣ бийд̇исоманассам̣ бадисам̣взд̣̇знд̇о нисийд̣̇и. д̇аавад̣̇звасса сагаласарийрам̣ висам̣ аж̇жход̇т̇ари. мухуд̇д̇амзва взг̇з муд̣̇д̇хабад̇д̇з гааламагааси, гаалагад̇о жа д̇аавад̇им̣сзсу д̣̇ваад̣̇асаяож̇анигз ганагавимаанз ниб̣б̣ад̇д̇и. д̇ам̣ ааяасмаа махаамог̇г̇аллаано д̣̇исваа имаахи г̇аат̇аахи бадибужчи –
Atha naṃ gāviyo nivattetuṃ parissayaṃ anoloketvā vegena upadhāvantaṃ pādena phuṭṭho āsīviso ḍaṃsi. Theropi taṃ anukampamāno taṃ kummāsaṃ paribhuñjituṃ ārabhi. Gopālakopi gāviyo nivattetvā āgato theraṃ kummāsaṃ paribhuñjantaṃ disvā pasannacitto uḷāraṃ pītisomanassaṃ paṭisaṃvedento nisīdi. Tāvadevassa sakalasarīraṃ visaṃ ajjhotthari. Muhuttameva vege muddhapatte kālamakāsi, kālakato ca tāvatiṃsesu dvādasayojanike kanakavimāne nibbatti. Taṃ āyasmā mahāmoggallāno disvā imāhi gāthāhi paṭipucchi –
1159.
1159.
‘‘д̣̇исваана д̣̇звам̣ бадибужчи бхигку, ужжз вимаанамхи жирадтид̇игз;
‘‘Disvāna devaṃ paṭipucchi bhikkhu, ucce vimānamhi ciraṭṭhitike;
аамуд̇д̇ахад̇т̇аабхаран̣ам̣ яасассим̣, д̣̇иб̣б̣з вимаанамхи яат̇ааби жанд̣̇имаа.
Āmuttahatthābharaṇaṃ yasassiṃ, dibbe vimānamhi yathāpi candimā.
1160.
1160.
‘‘алан̇гад̇о маляад̇харо сувад̇т̇о, сугун̣д̣алий габбид̇агзсамассу;
‘‘Alaṅkato malyadharo suvattho, sukuṇḍalī kappitakesamassu;
аамуд̇д̇ахад̇т̇аабхаран̣о яасассий, д̣̇иб̣б̣з вимаанамхи яат̇ааби жанд̣̇имаа.
Āmuttahatthābharaṇo yasassī, dibbe vimānamhi yathāpi candimā.
1161.
1161.
‘‘д̣̇иб̣б̣аа жа вийн̣аа бавад̣̇анд̇и ваг̇г̇ум̣; адтадтагаа сигкид̇аа саад̇хуруубаа;
‘‘Dibbā ca vīṇā pavadanti vagguṃ; Aṭṭhaṭṭhakā sikkhitā sādhurūpā;
д̣̇иб̣б̣аа жа ган̃н̃аа д̇ид̣̇асажараа ул̣аараа, нажжанд̇и г̇ааяанд̇и бамод̣̇аяанд̇и.
Dibbā ca kaññā tidasacarā uḷārā, naccanti gāyanti pamodayanti.
1162.
1162.
‘‘д̣̇звид̣̇д̇хибад̇д̇оси махаанубхааво…бз…
‘‘Deviddhipattosi mahānubhāvo…pe…
ван̣н̣о жа д̇з саб̣б̣ад̣̇исаа бабхаасад̇ий’’д̇и.
Vaṇṇo ca te sabbadisā pabhāsatī’’ti.
соби д̇асса б̣яаагааси –
Sopi tassa byākāsi –
1163. ‘‘со д̣̇звабуд̇д̇о ад̇д̇амано…бз…яасса гаммассид̣̇ам̣ палам̣’’.
1163. ‘‘So devaputto attamano…pe…yassa kammassidaṃ phalaṃ’’.
1164.
1164.
‘‘ахам̣ мануссзсу мануссабхууд̇о, сан̇г̇амма рагкиссам̣ барзсам̣ д̇хзнуяо;
‘‘Ahaṃ manussesu manussabhūto, saṅgamma rakkhissaṃ paresaṃ dhenuyo;
д̇ад̇о жа ааг̇аа саман̣о маманд̇игз, г̇ааво жа маасз аг̇амам̣су каад̣̇ид̇ум̣.
Tato ca āgā samaṇo mamantike, gāvo ca māse agamaṃsu khādituṃ.
1165.
1165.
‘‘д̣̇ваяаж̇ж̇а гижжам̣ убхаяан̃жа гаарияам̣, ижжзвахам̣ бханд̇з д̇ад̣̇аа вижинд̇аяим̣;
‘‘Dvayajja kiccaṃ ubhayañca kāriyaṃ, iccevahaṃ bhante tadā vicintayiṃ;
д̇ад̇о жа сан̃н̃ам̣ бадилад̣̇д̇ха яонисо, ‘д̣̇ад̣̇аами бханд̇з’д̇и кибим̣ ананд̇агам̣.
Tato ca saññaṃ paṭiladdha yoniso, ‘dadāmi bhante’ti khipiṃ anantakaṃ.
1166.
1166.
‘‘со маасакзд̇д̇ам̣ д̇урид̇о аваасарим̣, бураа аяам̣ бхан̃ж̇ад̇и яассид̣̇ам̣ д̇ханам̣;
‘‘So māsakhettaṃ turito avāsariṃ, purā ayaṃ bhañjati yassidaṃ dhanaṃ;
д̇ад̇о жа ган̣хо ураг̇о махаависо, ад̣ам̣си баад̣̇з д̇урид̇асса мз сад̇о.
Tato ca kaṇho urago mahāviso, aḍaṃsi pāde turitassa me sato.
1167.
1167.
‘‘сваахам̣ аддомхи д̣̇угкзна бийл̣ид̇о, бхигку жа д̇ам̣ саамам̣ мун̃жид̇ваананд̇агам̣;
‘‘Svāhaṃ aṭṭomhi dukkhena pīḷito, bhikkhu ca taṃ sāmaṃ muñcitvānantakaṃ;
ахааси гуммаасам̣ мамаанугамбаяаа, д̇ад̇о жуд̇о гаалагад̇омхи д̣̇звад̇аа.
Ahāsi kummāsaṃ mamānukampayā, tato cuto kālakatomhi devatā.
1168.
1168.
‘‘д̇ад̣̇зва гаммам̣ гусалам̣ гад̇ам̣ маяаа, сукан̃жа гаммам̣ анубхоми ад̇д̇анаа;
‘‘Tadeva kammaṃ kusalaṃ kataṃ mayā, sukhañca kammaṃ anubhomi attanā;
д̇аяаа хи бханд̇з анугамбид̇о бхусам̣, гад̇ан̃н̃уд̇ааяа абхиваад̣̇аяаами д̇ам̣.
Tayā hi bhante anukampito bhusaṃ, kataññutāya abhivādayāmi taṃ.
1169.
1169.
‘‘сад̣̇звагз логз самаарагз жа, ан̃н̃о муни над̇т̇и д̇аяаанугамбаго;
‘‘Sadevake loke samārake ca, añño muni natthi tayānukampako;
д̇аяаа хи бханд̇з анугамбид̇о бхусам̣, гад̇ан̃н̃уд̇ааяа абхиваад̣̇аяаами д̇ам̣.
Tayā hi bhante anukampito bhusaṃ, kataññutāya abhivādayāmi taṃ.
1170.
1170.
‘‘имасмим̣ логз барасмим̣ ваа бана, ан̃н̃о муний над̇т̇и д̇аяаанугамбаго;
‘‘Imasmiṃ loke parasmiṃ vā pana, añño munī natthi tayānukampako;
д̇аяаа хи бханд̇з анугамбид̇о бхусам̣, гад̇ан̃н̃уд̇ааяа абхиваад̣̇аяаами д̇а’’нд̇и.
Tayā hi bhante anukampito bhusaṃ, kataññutāya abhivādayāmi ta’’nti.
ат̇ааяасмаа махаамог̇г̇аллаано ад̇д̇анаа жа д̣̇звад̇ааяа жа гат̇ид̇анияаамзнзва д̇ам̣ бхаг̇авад̇о аарожзси. сад̇т̇аа д̇амад̇т̇ам̣ бажжанубхаасид̇ваа д̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзд̇ум̣ ‘‘д̣̇исваана д̣̇звам̣ бадибужчи бхигкуу’’д̇иаад̣̇имааха.
Athāyasmā mahāmoggallāno attanā ca devatāya ca kathitaniyāmeneva taṃ bhagavato ārocesi. Satthā tamatthaṃ paccanubhāsitvā taṃ aṭṭhuppattiṃ katvā sampattaparisāya dhammaṃ desetuṃ ‘‘disvāna devaṃ paṭipucchi bhikkhū’’tiādimāha.
1159. д̇ад̇т̇а д̣̇званд̇и г̇обаалад̣̇звабуд̇д̇ам̣. бхигкууд̇и ааяасманд̇ам̣ махаамог̇г̇аллаанам̣ санд̇хааяа сад̇т̇аа вад̣̇ад̇и. со хи саб̣б̣асо бхиннагилзсад̇ааяа бхигку. вимаанасса б̣ахугаалаавадтааяид̇ааяа габбадтид̇игад̇ааяа зва ваа ‘‘жирадтид̇игз’’д̇и вуд̇д̇ам̣, ‘‘жирадтид̇ига’’нд̇иби гзжи батанд̇и. д̇ан̃хи ‘‘д̣̇зва’’нд̇и иминаа самб̣анд̇хид̇аб̣б̣ам̣. соби хи садтисад̇асахассаад̇хигаа д̇иссо вассагодияо д̇ад̇т̇а авадтаанад̇о ‘‘жирадтид̇игз’’д̇и вад̇д̇аб̣б̣ад̇ам̣ лабхад̇и. яат̇ааби жанд̣̇имаад̇и яат̇аа жанд̣̇имаа д̣̇звабуд̇д̇о ганд̇асийд̇аламанохарагиран̣аж̇ааласамуж̇ж̇алз ад̇д̇ано д̣̇иб̣б̣з вимаанамхи вирожад̇и, звам̣ вирожамаананд̇и важанасзсаа.
1159. Tattha devanti gopāladevaputtaṃ. Bhikkhūti āyasmantaṃ mahāmoggallānaṃ sandhāya satthā vadati. So hi sabbaso bhinnakilesatāya bhikkhu. Vimānassa bahukālāvaṭṭhāyitāya kappaṭṭhitikatāya eva vā ‘‘ciraṭṭhitike’’ti vuttaṃ, ‘‘ciraṭṭhitika’’ntipi keci paṭhanti. Tañhi ‘‘deva’’nti iminā sambandhitabbaṃ. Sopi hi saṭṭhisatasahassādhikā tisso vassakoṭiyo tattha avaṭṭhānato ‘‘ciraṭṭhitike’’ti vattabbataṃ labhati. Yathāpi candimāti yathā candimā devaputto kantasītalamanoharakiraṇajālasamujjale attano dibbe vimānamhi virocati, evaṃ virocamānanti vacanasesā.
1160. алан̇гад̇од̇иаад̣̇и д̇асса д̣̇звабуд̇д̇асса т̇зрзна бужчид̇аагаарад̣̇ассанам̣, д̇ам̣ хздтаа вуд̇д̇ад̇т̇амзва.
1160.Alaṅkatotiādi tassa devaputtassa therena pucchitākāradassanaṃ, taṃ heṭṭhā vuttatthameva.
1164. сан̇г̇аммаад̇и сан̇г̇амзд̇ваа, сан̇г̇аммаад̇и ваа сан̇г̇ахзд̇ваа. хзд̇вад̇т̇оби хи ид̇ха анд̇онийд̇о, б̣ахуу згад̇о худ̇ваад̇и ад̇т̇о. ааг̇аад̇и ааг̇ан̃чи. маасзд̇и маасасассаани.
1164.Saṅgammāti saṅgametvā, saṅgammāti vā saṅgahetvā. Hetvatthopi hi idha antonīto, bahū ekato hutvāti attho. Āgāti āgañchi. Māseti māsasassāni.
1165. д̣̇ваяаж̇ж̇аад̇и д̣̇ваяам̣ аж̇ж̇а зд̇арахи гижжам̣ гаад̇аб̣б̣ам̣. убхаяан̃жа гаарияанд̇и вуд̇д̇ассзвад̇т̇асса барияааяаважанам̣. сан̃н̃анд̇и д̇хаммасан̃н̃ам̣. д̇знааха ‘‘яонисо’’д̇и бадилад̣̇д̇хаад̇и бадилабхид̇ваа. кибинд̇и баниг̇г̇аахаабанавасзна хад̇т̇з кибим̣. ананд̇аганд̇и нанд̇агам̣ гуммаасам̣ багкибид̇ваа б̣анд̇хид̇ваа табид̇ам̣ билод̇игам̣. а-гааро жзд̇т̇а нибаад̇амад̇д̇ам̣.
1165.Dvayajjāti dvayaṃ ajja etarahi kiccaṃ kātabbaṃ. Ubhayañca kāriyanti vuttassevatthassa pariyāyavacanaṃ. Saññanti dhammasaññaṃ. Tenāha ‘‘yoniso’’ti paṭiladdhāti paṭilabhitvā. Khipinti paniggāhāpanavasena hatthe khipiṃ. Anantakanti nantakaṃ kummāsaṃ pakkhipitvā bandhitvā ṭhapitaṃ pilotikaṃ. A-kāro cettha nipātamattaṃ.
1166. сод̇и со ахам̣. д̇урид̇од̇и д̇урид̇о самбхаманд̇о. аваасаринд̇и убаг̇ажчи, баависим̣ ваа. бураа аяам̣ бхан̃ж̇ад̇и яассид̣̇ам̣ д̇хананд̇и яасса кзд̇д̇асаамигасса ид̣̇ам̣ маасасассам̣ д̇ханам̣, д̇ам̣ аяам̣ г̇ог̇ан̣о бхан̃ж̇ад̇и бураа д̇асса бхан̃ж̇анад̇о, аамад̣̇д̣̇анад̇о бурзд̇арамзваад̇и ад̇т̇о. д̇ад̇од̇и д̇ад̇т̇а. д̇урид̇асса мз сад̇од̇и самбхаманд̇асса мз самаанасса, сахасаа г̇аманзна маг̇г̇з ган̣хасаббам̣ анологзд̇ваа г̇ад̇ассаад̇и ад̇хиббааяо.
1166.Soti so ahaṃ. Turitoti turito sambhamanto. Avāsarinti upagacchi, pāvisiṃ vā. Purā ayaṃ bhañjati yassidaṃ dhananti yassa khettasāmikassa idaṃ māsasassaṃ dhanaṃ, taṃ ayaṃ gogaṇo bhañjati purā tassa bhañjanato, āmaddanato puretaramevāti attho. Tatoti tattha. Turitassa me satoti sambhamantassa me samānassa, sahasā gamanena magge kaṇhasappaṃ anoloketvā gatassāti adhippāyo.
1167. аддомхи д̣̇угкзна бийл̣ид̇од̇и д̇зна аасийвисад̣ам̣санзна аддо аддид̇о убад̣̇д̣̇уд̇о маран̣ад̣̇угкзна б̣аад̇хид̇о бхаваами. ахаасийд̇и аж̇жхохари, барибхун̃ж̇ийд̇и ад̇т̇о. д̇ад̇о жуд̇о гаалагад̇омхи д̣̇звад̇аад̇и д̇ад̇о мануссад̇д̇абхаавад̇о жуд̇о маран̣агаалаббад̇д̇ияаа, д̇ад̇т̇а ваа ааяусан̇каарасса кзбанасан̇каад̇асса гааласса гад̇ад̇д̇аа гаалагад̇о, д̇ад̣̇ананд̇арамзва жа амхи д̣̇звад̇аа д̣̇звад̇д̇абхааваббад̇д̇ияаа д̣̇звад̇аа хомийд̇и ад̇т̇о.
1167.Aṭṭomhi dukkhena pīḷitoti tena āsīvisaḍaṃsanena aṭṭo aṭṭito upadduto maraṇadukkhena bādhito bhavāmi. Ahāsīti ajjhohari, paribhuñjīti attho. Tato cuto kālakatomhi devatāti tato manussattabhāvato cuto maraṇakālappattiyā, tattha vā āyusaṅkhārassa khepanasaṅkhātassa kālassa katattā kālakato, tadanantarameva ca amhi devatā devattabhāvappattiyā devatā homīti attho.
1169. д̇аяаад̇и д̇аяаа сад̣̇исо ан̃н̃о муни монзяяаг̇ун̣аяуд̇д̇о иси над̇т̇и. д̇аяаад̇и ваа ниссаггз ид̣̇ам̣ гаран̣аважанам̣. сзсам̣ вуд̇д̇анаяамзва.
1169.Tayāti tayā sadiso añño muni moneyyaguṇayutto isi natthi. Tayāti vā nissakke idaṃ karaṇavacanaṃ. Sesaṃ vuttanayameva.
г̇обаалавимаанаван̣н̣анаа нидтид̇аа.
Gopālavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 6. г̇обаалавимаанавад̇т̇у • 6. Gopālavimānavatthu
