| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. ගොරූපඞ්‌ගපඤ්‌හො
8. Gorūpaṅgapañho
8. ‘‘භන්‌තෙ නාගසෙන, ‘ගොරූපස්‌ස චත්‌තාරි අඞ්‌ගානි ගහෙතබ්‌බානී’ති යං වදෙසි, කතමානි තානි චත්‌තාරි අඞ්‌ගානි ගහෙතබ්‌බානී’’ති? ‘‘යථා, මහාරාජ, ගොරූපො සකං ගෙහං න විජහති, එවමෙව ඛො, මහාරාජ, යොගිනා යොගාවචරෙන සකො කායො න විජහිතබ්‌බො ‘අනිච්‌චුච්‌ඡාදනපරිමද්‌දනභෙදනවිකිරණවිද්‌ධංසනධම්‌මො අයං කායො’ති. ඉදං, මහාරාජ, ගොරූපස්‌ස පඨමං අඞ්‌ගං ගහෙතබ්‌බං.
8. ‘‘Bhante nāgasena, ‘gorūpassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, gorūpo sakaṃ gehaṃ na vijahati, evameva kho, mahārāja, yoginā yogāvacarena sako kāyo na vijahitabbo ‘aniccucchādanaparimaddanabhedanavikiraṇaviddhaṃsanadhammo ayaṃ kāyo’ti. Idaṃ, mahārāja, gorūpassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, ගොරූපො ආදින්‌නධුරො සුඛදුක්‌ඛෙන ධුරං වහති, එවමෙව ඛො, මහාරාජ, යොගිනා යොගාවචරෙන ආදින්‌නබ්‍රහ්‌මචරියෙන සුඛදුක්‌ඛෙන යාව ජීවිතපරියාදානා ආපාණකොටිකං බ්‍රහ්‌මචරියං චරිතබ්‌බං. ඉදං, මහාරාජ, ගොරූපස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, gorūpo ādinnadhuro sukhadukkhena dhuraṃ vahati, evameva kho, mahārāja, yoginā yogāvacarena ādinnabrahmacariyena sukhadukkhena yāva jīvitapariyādānā āpāṇakoṭikaṃ brahmacariyaṃ caritabbaṃ. Idaṃ, mahārāja, gorūpassa dutiyaṃ aṅgaṃ gahetabbaṃ.
‘‘පුන චපරං, මහාරාජ, ගොරූපො ඡන්‌දෙන ඝායමානො පානීයං පිවති, එවමෙව ඛො, මහාරාජ, යොගිනා යොගාවචරෙන ආචරියුපජ්‌ඣායානං අනුසිට්‌ඨි ඡන්‌දෙන පෙමෙන පසාදෙන ඝායමානෙන පටිග්‌ගහෙතබ්‌බා. ඉදං, මහාරාජ, ගොරූපස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, gorūpo chandena ghāyamāno pānīyaṃ pivati, evameva kho, mahārāja, yoginā yogāvacarena ācariyupajjhāyānaṃ anusiṭṭhi chandena pemena pasādena ghāyamānena paṭiggahetabbā. Idaṃ, mahārāja, gorūpassa tatiyaṃ aṅgaṃ gahetabbaṃ.
‘‘පුන චපරං, මහාරාජ, ගොරූපො යෙන කෙනචි වාහියමානො වහති, එවමෙව ඛො, මහාරාජ, යොගිනා යොගාවචරෙන ථෙරනවමජ්‌ඣිමභික්‌ඛූනම්‌පි ගිහිඋපාසකස්‌සාපි ඔවාදානුසාසනී සිරසා සම්‌පටිච්‌ඡිතබ්‌බා. ඉදං, මහාරාජ, ගොරූපස්‌ස චතුත්‌ථං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
‘‘Puna caparaṃ, mahārāja, gorūpo yena kenaci vāhiyamāno vahati, evameva kho, mahārāja, yoginā yogāvacarena theranavamajjhimabhikkhūnampi gihiupāsakassāpi ovādānusāsanī sirasā sampaṭicchitabbā. Idaṃ, mahārāja, gorūpassa catutthaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘තදහු පබ්‌බජිතො සන්‌තො, ජාතියා සත්‌තවස්‌සිකො;
‘‘‘Tadahu pabbajito santo, jātiyā sattavassiko;
‘‘‘තිබ්‌බං ඡන්‌දඤ්‌ච පෙමඤ්‌ච, තස්‌මිං දිස්‌වා උපට්‌ඨපෙ;
‘‘‘Tibbaṃ chandañca pemañca, tasmiṃ disvā upaṭṭhape;
ඨපෙය්‍යාචරියට්‌ඨානෙ, සක්‌කච්‌ච නං පුනප්‌පුන’’’න්‌ති.
Ṭhapeyyācariyaṭṭhāne, sakkacca naṃ punappuna’’’nti.
ගොරූපඞ්‌ගපඤ්‌හො අට්‌ඨමො.
Gorūpaṅgapañho aṭṭhamo.
Footnotes:
