| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༨. གོརཱུཔངྒཔཉྷོ
8. Gorūpaṅgapañho
༨. ‘‘བྷནྟེ ནཱགསེན, ‘གོརཱུཔསྶ ཙཏྟཱརི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཙཏྟཱརི ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, གོརཱུཔོ སཀཾ གེཧཾ ན ཝིཛཧཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སཀོ ཀཱཡོ ན ཝིཛཧིཏབྦོ ‘ཨནིཙྩུཙྪཱདནཔརིམདྡནབྷེདནཝིཀིརཎཝིདྡྷཾསནདྷམྨོ ཨཡཾ ཀཱཡོ’ཏི། ཨིདཾ, མཧཱརཱཛ, གོརཱུཔསྶ པཋམཾ ཨངྒཾ གཧེཏབྦཾ།
8. ‘‘Bhante nāgasena, ‘gorūpassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, gorūpo sakaṃ gehaṃ na vijahati, evameva kho, mahārāja, yoginā yogāvacarena sako kāyo na vijahitabbo ‘aniccucchādanaparimaddanabhedanavikiraṇaviddhaṃsanadhammo ayaṃ kāyo’ti. Idaṃ, mahārāja, gorūpassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, གོརཱུཔོ ཨཱདིནྣདྷུརོ སུཁདུཀྑེན དྷུརཾ ཝཧཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱདིནྣབྲཧྨཙརིཡེན སུཁདུཀྑེན ཡཱཝ ཛཱིཝིཏཔརིཡཱདཱནཱ ཨཱཔཱཎཀོཊིཀཾ བྲཧྨཙརིཡཾ ཙརིཏབྦཾ། ཨིདཾ, མཧཱརཱཛ, གོརཱུཔསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, gorūpo ādinnadhuro sukhadukkhena dhuraṃ vahati, evameva kho, mahārāja, yoginā yogāvacarena ādinnabrahmacariyena sukhadukkhena yāva jīvitapariyādānā āpāṇakoṭikaṃ brahmacariyaṃ caritabbaṃ. Idaṃ, mahārāja, gorūpassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, གོརཱུཔོ ཚནྡེན གྷཱཡམཱནོ པཱནཱིཡཾ པིཝཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱཙརིཡུཔཛ྄ཛྷཱཡཱནཾ ཨནུསིཊྛི ཚནྡེན པེམེན པསཱདེན གྷཱཡམཱནེན པཊིགྒཧེཏབྦཱ། ཨིདཾ, མཧཱརཱཛ, གོརཱུཔསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, gorūpo chandena ghāyamāno pānīyaṃ pivati, evameva kho, mahārāja, yoginā yogāvacarena ācariyupajjhāyānaṃ anusiṭṭhi chandena pemena pasādena ghāyamānena paṭiggahetabbā. Idaṃ, mahārāja, gorūpassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, གོརཱུཔོ ཡེན ཀེནཙི ཝཱཧིཡམཱནོ ཝཧཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཐེརནཝམཛ྄ཛྷིམབྷིཀྑཱུནམྤི གིཧིཨུཔཱསཀསྶཱཔི ཨོཝཱདཱནུསཱསནཱི སིརསཱ སམྤཊིཙྪིཏབྦཱ། ཨིདཾ, མཧཱརཱཛ, གོརཱུཔསྶ ཙཏུཏྠཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, ཐེརེན སཱརིཔུཏྟེན དྷམྨསེནཱཔཏིནཱ –
‘‘Puna caparaṃ, mahārāja, gorūpo yena kenaci vāhiyamāno vahati, evameva kho, mahārāja, yoginā yogāvacarena theranavamajjhimabhikkhūnampi gihiupāsakassāpi ovādānusāsanī sirasā sampaṭicchitabbā. Idaṃ, mahārāja, gorūpassa catutthaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ཏདཧུ པབྦཛིཏོ སནྟོ, ཛཱཏིཡཱ སཏྟཝསྶིཀོ།
‘‘‘Tadahu pabbajito santo, jātiyā sattavassiko;
‘‘‘ཏིབྦཾ ཚནྡཉྩ པེམཉྩ, ཏསྨིཾ དིསྭཱ ཨུཔཊྛཔེ།
‘‘‘Tibbaṃ chandañca pemañca, tasmiṃ disvā upaṭṭhape;
ཋཔེཡྻཱཙརིཡཊྛཱནེ, སཀྐཙྩ ནཾ པུནཔྤུན’’’ནྟི༎
Ṭhapeyyācariyaṭṭhāne, sakkacca naṃ punappuna’’’nti.
གོརཱུཔངྒཔཉྷོ ཨཊྛམོ།
Gorūpaṅgapañho aṭṭhamo.
Footnotes:
