| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
3. г̇осаалад̇т̇зраг̇аат̇ааван̣н̣анаа
3. Gosālattheragāthāvaṇṇanā
ахам̣ ко взл̣уг̇умб̣асминд̇и ааяасмад̇о г̇осаалад̇т̇зрасса г̇аат̇аа. гаа уббад̇д̇и? соби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а виваддуубаниссаяам̣ гусалам̣ аажинанд̇о ид̇о зганавуд̇з габбз ан̃н̃ад̇арасмим̣ баб̣б̣ад̇з ругкасаакааяам̣ оламб̣амаанам̣ бажжзгаб̣уд̣̇д̇хасса бам̣сугуулажийварам̣ д̣̇исваа ‘‘арахад̣̇д̇хаж̇о вад̇ааяа’’нд̇и басаннажид̇д̇о бубпзхи бууж̇зхи. со д̇зна бун̃н̃агаммзна д̇аавад̇им̣сабхаванз ниб̣б̣ад̇д̇о . д̇ад̇о бадтааяа д̣̇звамануссзсуязва сам̣саранд̇о имасмим̣ б̣уд̣̇д̇хуббаад̣̇з маг̇ад̇харадтз иб̣бхагулз ниб̣б̣ад̇д̇о г̇осаало наама наамзна. сон̣зна бана годиган̣н̣зна гад̇абарижаяад̇д̇аа д̇асса баб̣б̣аж̇ид̇абхаавам̣ суд̇ваа ‘‘соби наама махаавибхаво баб̣б̣аж̇иссад̇и , гиман̇г̇ам̣ банааха’’нд̇и сан̃ж̇аад̇асам̣взг̇о бхаг̇авад̇о санд̇игз баб̣б̣аж̇ид̇ваа жарияаанугуулам̣ гаммадтаанам̣ г̇ахзд̇ваа саббааяам̣ васанадтаанам̣ г̇авзсанд̇о ад̇д̇ано ж̇аад̇аг̇аамасса авид̣̇уурз згасмим̣ саанубаб̣б̣ад̇з вихааси. д̇асса маад̇аа д̣̇ивасз д̣̇ивасз бхигкам̣ д̣̇зд̇и. ат̇згад̣̇ивасам̣ г̇аамам̣ бин̣д̣ааяа бавидтасса маад̇аа мад̇хусагкараабхисан̇кад̇ам̣ бааяаасам̣ ад̣̇ааси. со д̇ам̣ г̇ахзд̇ваа д̇асса баб̣б̣ад̇асса чааяааяам̣ ан̃н̃ад̇арасса взл̣уг̇умб̣асса муулз нисийд̣̇ид̇ваа барибхун̃ж̇ид̇ваа д̇ховид̇абад̇д̇абаан̣ий вибассанам̣ аарабхи. бхож̇анасаббааяалаабхзна гааяажид̇д̇аанам̣ галлад̇ааяа самаахид̇о уд̣̇аяаб̣б̣аяан̃аан̣аад̣̇игз д̇игкз суурз ваханд̇з аббагасирзнзва вибассанам̣ уссуггаабзд̇ваа маг̇г̇абадибаадияаа бхааванам̣ мад̇т̇агам̣ баабзнд̇о саха бадисамбхид̣̇аахи арахад̇д̇ам̣ сажчаагааси. д̇зна вуд̇д̇ам̣ абад̣̇аанз (аба. т̇зра 2.50.8-14) –
Ahaṃ kho veḷugumbasminti āyasmato gosālattherassa gāthā. Kā uppatti? Sopi purimabuddhesu katādhikāro tattha tattha vivaṭṭūpanissayaṃ kusalaṃ ācinanto ito ekanavute kappe aññatarasmiṃ pabbate rukkhasākhāyaṃ olambamānaṃ paccekabuddhassa paṃsukūlacīvaraṃ disvā ‘‘arahaddhajo vatāya’’nti pasannacitto pupphehi pūjehi. So tena puññakammena tāvatiṃsabhavane nibbatto . Tato paṭṭhāya devamanussesuyeva saṃsaranto imasmiṃ buddhuppāde magadharaṭṭhe ibbhakule nibbatto gosālo nāma nāmena. Soṇena pana koṭikaṇṇena kataparicayattā tassa pabbajitabhāvaṃ sutvā ‘‘sopi nāma mahāvibhavo pabbajissati , kimaṅgaṃ panāha’’nti sañjātasaṃvego bhagavato santike pabbajitvā cariyānukūlaṃ kammaṭṭhānaṃ gahetvā sappāyaṃ vasanaṭṭhānaṃ gavesanto attano jātagāmassa avidūre ekasmiṃ sānupabbate vihāsi. Tassa mātā divase divase bhikkhaṃ deti. Athekadivasaṃ gāmaṃ piṇḍāya paviṭṭhassa mātā madhusakkharābhisaṅkhataṃ pāyāsaṃ adāsi. So taṃ gahetvā tassa pabbatassa chāyāyaṃ aññatarassa veḷugumbassa mūle nisīditvā paribhuñjitvā dhovitapattapāṇī vipassanaṃ ārabhi. Bhojanasappāyalābhena kāyacittānaṃ kallatāya samāhito udayabbayañāṇādike tikkhe sūre vahante appakasireneva vipassanaṃ ussukkāpetvā maggapaṭipāṭiyā bhāvanaṃ matthakaṃ pāpento saha paṭisambhidāhi arahattaṃ sacchākāsi. Tena vuttaṃ apadāne (apa. thera 2.50.8-14) –
‘‘химаванд̇асса авид̣̇уурз, уд̣̇ан̇г̇ан̣о наама баб̣б̣ад̇о;
‘‘Himavantassa avidūre, udaṅgaṇo nāma pabbato;
д̇ад̇т̇ад̣̇д̣̇асам̣ бам̣сугуулам̣, д̣̇умаг̇г̇амхи виламб̣ид̇ам̣.
Tatthaddasaṃ paṃsukūlaṃ, dumaggamhi vilambitaṃ.
‘‘д̇ийн̣и гин̇ган̣ибубпаани, ожинид̇ваанахам̣ д̇ад̣̇аа;
‘‘Tīṇi kiṅkaṇipupphāni, ocinitvānahaṃ tadā;
хздтаа бахадтзна жид̇д̇зна, бам̣сугуулам̣ абууж̇аяим̣.
Heṭṭhā pahaṭṭhena cittena, paṃsukūlaṃ apūjayiṃ.
‘‘д̇зна гаммзна сугад̇зна, жзд̇анаабан̣ид̇хийхи жа;
‘‘Tena kammena sukatena, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣сам̣ аг̇ажчахам̣.
Jahitvā mānusaṃ dehaṃ, tāvatiṃsaṃ agacchahaṃ.
‘‘зганавуд̇з ид̇о габбз, яам̣ гаммамагарим̣ д̇ад̣̇аа;
‘‘Ekanavute ito kappe, yaṃ kammamakariṃ tadā;
д̣̇уг̇г̇ад̇им̣ наабхиж̇аанаами, бууж̇ид̇ваа арахад̣̇д̇хаж̇ам̣.
Duggatiṃ nābhijānāmi, pūjitvā arahaddhajaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана ад̇хиг̇анд̇ваа д̣̇идтад̇хаммасукавихаарад̇т̇ам̣ баб̣б̣ад̇асаанумзва г̇анд̇угаамо ад̇д̇ано бадибад̇д̇им̣ бавзд̣̇знд̇о ‘‘ахам̣ ко взл̣уг̇умб̣асми’’нд̇и г̇аат̇ам̣ абхааси.
Arahattaṃ pana adhigantvā diṭṭhadhammasukhavihāratthaṃ pabbatasānumeva gantukāmo attano paṭipattiṃ pavedento ‘‘ahaṃ kho veḷugumbasmi’’nti gāthaṃ abhāsi.
23. д̇ад̇т̇а взл̣уг̇умб̣асминд̇и взл̣уг̇ажчасса самийбз, д̇асса чааяааяам̣. бхуд̇ваана мад̇хубааяасанд̇и мад̇хубасид̇д̇абааяаасам̣ бхун̃ж̇ид̇ваа. бад̣̇агкин̣анд̇и бад̣̇агкин̣аг̇г̇аахзна, сад̇т̇у оваад̣̇асса саммаа самбадижчанзнаад̇и ад̇т̇о. саммасанд̇о канд̇хаанам̣ уд̣̇аяаб̣б̣аяанд̇и бан̃жаннам̣ убаад̣̇аанагканд̇хаанам̣ уд̣̇аяаб̣б̣аяан̃жа вибассанд̇о, яад̣̇иби ид̣̇аани гад̇агижжо, паласамаабад̇д̇им̣ бана самаабаж̇ж̇ид̇ум̣ вибассанам̣ бадтабзнд̇од̇и ад̇хиббааяо. саанум̣ бадиг̇амиссаамийд̇и буб̣б̣з маяаа вуд̇т̇абаб̣б̣ад̇асаанумзва уд̣̇д̣̇исса г̇ажчиссаами. вивзгамануб̣руухаяанд̇и бадибассад̣̇д̇хививзгам̣ паласамаабад̇д̇игааяавивзган̃жа бариб̣руухаяанд̇о, д̇асса ваа бариб̣рууханахзд̇у г̇амиссаамийд̇и. звам̣ бана вад̇ваа т̇зро д̇ад̇т̇зва г̇ад̇о, аяамзва жа имасса т̇зрасса ан̃н̃ааб̣яаагаран̣аг̇аат̇аа ахоси.
23. Tattha veḷugumbasminti veḷugacchassa samīpe, tassa chāyāyaṃ. Bhutvāna madhupāyasanti madhupasittapāyāsaṃ bhuñjitvā. Padakkhiṇanti padakkhiṇaggāhena, satthu ovādassa sammā sampaṭicchanenāti attho. Sammasanto khandhānaṃudayabbayanti pañcannaṃ upādānakkhandhānaṃ udayabbayañca vipassanto, yadipi idāni katakicco, phalasamāpattiṃ pana samāpajjituṃ vipassanaṃ paṭṭhapentoti adhippāyo. Sānuṃ paṭigamissāmīti pubbe mayā vutthapabbatasānumeva uddissa gacchissāmi. Vivekamanubrūhayanti paṭipassaddhivivekaṃ phalasamāpattikāyavivekañca paribrūhayanto, tassa vā paribrūhanahetu gamissāmīti. Evaṃ pana vatvā thero tattheva gato, ayameva ca imassa therassa aññābyākaraṇagāthā ahosi.
г̇осаалад̇т̇зраг̇аат̇ааван̣н̣анаа нидтид̇аа.
Gosālattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 3. г̇осаалад̇т̇зраг̇аат̇аа • 3. Gosālattheragāthā
