| Library / Tipiṭaka / তিপিটক • Tipiṭaka / বুদ্ধৰংসপাল়ি • Buddhavaṃsapāḷi |
২৭. গোতমবুদ্ধৰংসো
27. Gotamabuddhavaṃso
১.
1.
পধানং পদহিত্ৰান, পত্তো সম্বোধিমুত্তমং॥
Padhānaṃ padahitvāna, patto sambodhimuttamaṃ.
২.
2.
ব্রহ্মুনা যাচিতো সন্তো, ধম্মচক্কং পৰত্তযিং।
Brahmunā yācito santo, dhammacakkaṃ pavattayiṃ;
অট্ঠারসন্নং কোটীনং, পঠমাভিসমযো অহু॥
Aṭṭhārasannaṃ koṭīnaṃ, paṭhamābhisamayo ahu.
৩.
3.
ততো পরঞ্চ দেসেন্তে, নরদেৰসমাগমে।
Tato parañca desente, naradevasamāgame;
গণনায ন ৰত্তব্বো, দুতিযাভিসমযো অহু॥
Gaṇanāya na vattabbo, dutiyābhisamayo ahu.
৪.
4.
ইধেৰাহং এতরহি, ওৰদিং মম অত্রজং।
Idhevāhaṃ etarahi, ovadiṃ mama atrajaṃ;
গণনায ন ৰত্তব্বো, ততিযাভিসমযো অহু॥
Gaṇanāya na vattabbo, tatiyābhisamayo ahu.
৫.
5.
একোসি সন্নিপাতো মে, সাৰকানং মহেসিনং।
Ekosi sannipāto me, sāvakānaṃ mahesinaṃ;
অড্ঢতেল়সসতানং, ভিক্খূনাসি সমাগমো॥
Aḍḍhateḷasasatānaṃ, bhikkhūnāsi samāgamo.
৬.
6.
ৰিরোচমানো ৰিমলো, ভিক্খুসঙ্ঘস্স মজ্ঝগো।
Virocamāno vimalo, bhikkhusaṅghassa majjhago;
দদামি পত্থিতং সব্বং, মণীৰ সব্বকামদো॥
Dadāmi patthitaṃ sabbaṃ, maṇīva sabbakāmado.
৭.
7.
ফলমাকঙ্খমানানং , ভৰচ্ছন্দজহেসিনং।
Phalamākaṅkhamānānaṃ , bhavacchandajahesinaṃ;
চতুসচ্চং পকাসেমি, অনুকম্পায পাণিনং॥
Catusaccaṃ pakāsemi, anukampāya pāṇinaṃ.
৮.
8.
দসৰীসসহস্সানং, ধম্মাভিসমযো অহু।
Dasavīsasahassānaṃ, dhammābhisamayo ahu;
একদ্ৰিন্নং অভিসমযো, গণনাতো অসঙ্খিযো॥
Ekadvinnaṃ abhisamayo, gaṇanāto asaṅkhiyo.
৯.
9.
ৰিত্থারিকং বাহুজঞ্ঞং, ইদ্ধং ফীতং সুফুল্লিতং।
Vitthārikaṃ bāhujaññaṃ, iddhaṃ phītaṃ suphullitaṃ;
ইধ ময্হং সক্যমুনিনো, সাসনং সুৰিসোধিতং॥
Idha mayhaṃ sakyamunino, sāsanaṃ suvisodhitaṃ.
১০.
10.
অনাসৰা ৰীতরাগা, সন্তচিত্তা সমাহিতা।
Anāsavā vītarāgā, santacittā samāhitā;
ভিক্খূনেকসতা সব্বে, পরিৰারেন্তি মং সদা॥
Bhikkhūnekasatā sabbe, parivārenti maṃ sadā.
১১.
11.
ইদানি যে এতরহি, জহন্তি মানুসং ভৰং।
Idāni ye etarahi, jahanti mānusaṃ bhavaṃ;
অপ্পত্তমানসা সেখা, তে ভিক্খূ ৰিঞ্ঞুগরহিতা॥
Appattamānasā sekhā, te bhikkhū viññugarahitā.
১২.
12.
অরিযঞ্চ সংথোমযন্তা, সদা ধম্মরতা জনা।
Ariyañca saṃthomayantā, sadā dhammaratā janā;
বুজ্ঝিস্সন্তি সতিমন্তো, সংসারসরিতং গতা॥
Bujjhissanti satimanto, saṃsārasaritaṃ gatā.
১৩.
13.
নগরং কপিলৰত্থু মে, রাজা সুদ্ধোদনো পিতা।
Nagaraṃ kapilavatthu me, rājā suddhodano pitā;
ময্হং জনেত্তিকা মাতা, মাযাদেৰীতি ৰুচ্চতি॥
Mayhaṃ janettikā mātā, māyādevīti vuccati.
১৪.
14.
একূনতিংসৰস্সানি , অগারং অজ্ঝহং ৰসিং।
Ekūnatiṃsavassāni , agāraṃ ajjhahaṃ vasiṃ;
রম্মো সুরম্মো সুভকো, তযো পাসাদমুত্তমা॥
Rammo surammo subhako, tayo pāsādamuttamā.
১৫.
15.
চত্তারীসসহস্সানি, নারিযো সমলঙ্কতা।
Cattārīsasahassāni, nāriyo samalaṅkatā;
ভদ্দকঞ্চনা নাম নারী, রাহুলো নাম অত্রজো॥
Bhaddakañcanā nāma nārī, rāhulo nāma atrajo.
১৬.
16.
নিমিত্তে চতুরো দিস্ৰা, অস্সযানেন নিক্খমিং।
Nimitte caturo disvā, assayānena nikkhamiṃ;
ছব্বস্সং পধানচারং, অচরিং দুক্করং অহং॥
Chabbassaṃ padhānacāraṃ, acariṃ dukkaraṃ ahaṃ.
১৭.
17.
বারাণসিযং ইসিপতনে, চক্কং পৰত্তিতং মযা।
Bārāṇasiyaṃ isipatane, cakkaṃ pavattitaṃ mayā;
অহং গোতমসম্বুদ্ধো, সরণং সব্বপাণিনং॥
Ahaṃ gotamasambuddho, saraṇaṃ sabbapāṇinaṃ.
১৮.
18.
কোলিতো উপতিস্সো চ, দ্ৰে ভিক্খূ অগ্গসাৰকা।
Kolito upatisso ca, dve bhikkhū aggasāvakā;
আনন্দো নামুপট্ঠাকো, সন্তিকাৰচরো মম।
Ānando nāmupaṭṭhāko, santikāvacaro mama;
খেমা উপ্পলৰণ্ণা চ, ভিক্খুনী অগ্গসাৰিকা॥
Khemā uppalavaṇṇā ca, bhikkhunī aggasāvikā.
১৯.
19.
চিত্তো হত্থাল়ৰকো চ, অগ্গুপট্ঠাকুপাসকা।
Citto hatthāḷavako ca, aggupaṭṭhākupāsakā;
নন্দমাতা চ উত্তরা, অগ্গুপট্ঠিকুপাসিকা॥
Nandamātā ca uttarā, aggupaṭṭhikupāsikā.
২০.
20.
অহং অস্সত্থমূলম্হি, পত্তো সম্বোধিমুত্তমং।
Ahaṃ assatthamūlamhi, patto sambodhimuttamaṃ;
ব্যামপ্পভা সদা ময্হং, সোল়সহত্থমুগ্গতা॥
Byāmappabhā sadā mayhaṃ, soḷasahatthamuggatā.
২১.
21.
অপ্পং ৰস্সসতং আযু, ইদানেতরহি ৰিজ্জতি।
Appaṃ vassasataṃ āyu, idānetarahi vijjati;
তাৰতা তিট্ঠমানোহং, তারেমি জনতং বহুং॥
Tāvatā tiṭṭhamānohaṃ, tāremi janataṃ bahuṃ.
২২.
22.
ঠপযিত্ৰান ধম্মুক্কং, পচ্ছিমং জনবোধনং।
Ṭhapayitvāna dhammukkaṃ, pacchimaṃ janabodhanaṃ;
অহম্পি নচিরস্সেৰ, সদ্ধিং সাৰকসঙ্ঘতো।
Ahampi nacirasseva, saddhiṃ sāvakasaṅghato;
ইধেৰ পরিনিব্বিস্সং, অগ্গী ৰাহারসঙ্খযা॥
Idheva parinibbissaṃ, aggī vāhārasaṅkhayā.
২৩.
23.
অযঞ্চ গুণধারণো দেহো, দ্ৰত্তিংসৰরলক্খণৰিচিত্তো॥
Ayañca guṇadhāraṇo deho, dvattiṃsavaralakkhaṇavicitto.
২৪.
24.
দস দিসা পভাসেত্ৰা, সতরংসীৰ ছপ্পভা।
Dasa disā pabhāsetvā, sataraṃsīva chappabhā;
সব্বং তমন্তরহিস্সন্তি, ননু রিত্তা সব্বসঙ্খারাতি॥
Sabbaṃ tamantarahissanti, nanu rittā sabbasaṅkhārāti.
গোতমস্স ভগৰতো ৰংসো পঞ্চৰীসতিমো।
Gotamassa bhagavato vaṃso pañcavīsatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / বুদ্ধৰংস-অট্ঠকথা • Buddhavaṃsa-aṭṭhakathā / ২৭. গোতমবুদ্ধৰংসৰণ্ণনা • 27. Gotamabuddhavaṃsavaṇṇanā
