| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. கோ³தமகசேதியஸுத்தவண்ணனா
3. Gotamakacetiyasuttavaṇṇanā
126. ததியே கோ³தமகே சேதியேதி கோ³தமகயக்க²ஸ்ஸ ப⁴வனே. ததா²க³தோ ஹி பட²மபோ³தி⁴யங் வீஸதி வஸ்ஸானி கதா³சி சாபாலே சேதியே, கதா³சி ஸாரந்த³தே³, கதா³சி ப³ஹுபுத்தே, கதா³சி கோ³தமகேதி ஏவங் யேபு⁴ய்யேன தே³வகுலேஸுயேவ விஹாஸி. இமஸ்மிங் பன காலே வேஸாலிங் உபனிஸ்ஸாய கோ³தமகஸ்ஸ யக்க²ஸ்ஸ ப⁴வனட்டா²னே விஹாஸி. தேன வுத்தங் – ‘‘கோ³தமகே சேதியே’’தி. ஏதத³வோசாதி ஏதங் ‘‘அபி⁴ஞ்ஞாயாஹ’’ந்திஆதி³கங் ஸுத்தங் அவோச.
126. Tatiye gotamake cetiyeti gotamakayakkhassa bhavane. Tathāgato hi paṭhamabodhiyaṃ vīsati vassāni kadāci cāpāle cetiye, kadāci sārandade, kadāci bahuputte, kadāci gotamaketi evaṃ yebhuyyena devakulesuyeva vihāsi. Imasmiṃ pana kāle vesāliṃ upanissāya gotamakassa yakkhassa bhavanaṭṭhāne vihāsi. Tena vuttaṃ – ‘‘gotamake cetiye’’ti. Etadavocāti etaṃ ‘‘abhiññāyāha’’ntiādikaṃ suttaṃ avoca.
இத³ஞ்ச ப⁴க³வதா ஸுத்தங் அத்து²ப்பத்தியங் வுத்தந்தி வேதி³தப்³ப³ங். கதரஅத்து²ப்பத்தியந்தி? மூலபரியாயஅத்து²ப்பத்தியங் (ம॰ நி॰ 1.1 ஆத³யோ). ஸம்ப³ஹுலா கிர ப்³ராஹ்மணபப்³ப³ஜிதா அத்தனா உக்³க³ஹிதபு³த்³த⁴வசனங் நிஸ்ஸாய ஜானநமத³ங் உப்பாதெ³த்வா த⁴ம்மஸ்ஸவனக்³க³ங் ந க³ச்ச²ந்தி – ‘‘ஸம்மாஸம்பு³த்³தோ⁴ கதெ²ந்தோ அம்ஹேஹி ஞாதமேவ கதெ²ஸ்ஸதி, நோ அஞ்ஞாத’’ந்தி. பி⁴க்கூ² ததா²க³தஸ்ஸ ஆரோசேஸுங். ஸத்தா² தே பி⁴க்கூ² பக்கோஸாபெத்வா முக²படிஞ்ஞங் க³ஹெத்வா மூலபரியாயங் தே³ஸேஸி. தே பி⁴க்கூ² தே³ஸனாய நேவ ஆக³தட்டா²னங், ந க³தட்டா²னங் அத்³த³ஸங்ஸு. அபஸ்ஸந்தா ‘‘ஸம்மாஸம்பு³த்³தோ⁴ ‘மய்ஹங் கதா² நிய்யாதீ’தி முக²ஸம்பத்தமேவ கதே²தீ’’தி சிந்தயிங்ஸு. ஸத்தா² தேஸங் மனங் ஜானித்வா இமங் ஸுத்தந்தங் ஆரபி⁴.
Idañca bhagavatā suttaṃ atthuppattiyaṃ vuttanti veditabbaṃ. Kataraatthuppattiyanti? Mūlapariyāyaatthuppattiyaṃ (ma. ni. 1.1 ādayo). Sambahulā kira brāhmaṇapabbajitā attanā uggahitabuddhavacanaṃ nissāya jānanamadaṃ uppādetvā dhammassavanaggaṃ na gacchanti – ‘‘sammāsambuddho kathento amhehi ñātameva kathessati, no aññāta’’nti. Bhikkhū tathāgatassa ārocesuṃ. Satthā te bhikkhū pakkosāpetvā mukhapaṭiññaṃ gahetvā mūlapariyāyaṃ desesi. Te bhikkhū desanāya neva āgataṭṭhānaṃ, na gataṭṭhānaṃ addasaṃsu. Apassantā ‘‘sammāsambuddho ‘mayhaṃ kathā niyyātī’ti mukhasampattameva kathetī’’ti cintayiṃsu. Satthā tesaṃ manaṃ jānitvā imaṃ suttantaṃ ārabhi.
தத்த² அபி⁴ஞ்ஞாயாதி ‘‘இமே பஞ்சக்க²ந்தா⁴, த்³வாத³ஸாயதனானி, அட்டா²ரஸ தா⁴துயோ, பா³வீஸதிந்த்³ரியானி, சத்தாரி ஸச்சானி, நவ ஹேதூ, ஸத்த ப²ஸ்ஸா, ஸத்த வேத³னா, ஸத்த சேதனா, ஸத்த ஸஞ்ஞா, ஸத்த சித்தானீ’’தி ஜானித்வா படிவிஜ்ஜி²த்வா பச்சக்க²ங் கத்வா, ததா² – ‘‘இமே சத்தாரோ ஸதிபட்டா²னா’’திஆதி³னா நயேன தே தே த⁴ம்மே ஜானித்வா படிவிஜ்ஜி²த்வா பச்சக்க²மேவ கத்வாதி அத்தோ². ஸனிதா³னந்தி ஸப்பச்சயமேவ கத்வா கதே²மி, நோ அப்பச்சயங். ஸப்பாடிஹாரியந்தி பச்சனீகபடிஹரணேன ஸப்பாடிஹாரியமேவ கத்வா கதே²மி, நோ அப்பாடிஹாரியங். அலஞ்ச பன வோதி யுத்தஞ்ச பன தும்ஹாகங். துட்டி²யாதி ‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி தீணி ரதனானி கு³ணதோ அனுஸ்ஸரந்தானங் தும்ஹாகங் யுத்தமேவ துட்டி²ங் காதுந்தி அத்தோ². ஸேஸபத³த்³வயேபி ஏஸேவ நயோ.
Tattha abhiññāyāti ‘‘ime pañcakkhandhā, dvādasāyatanāni, aṭṭhārasa dhātuyo, bāvīsatindriyāni, cattāri saccāni, nava hetū, satta phassā, satta vedanā, satta cetanā, satta saññā, satta cittānī’’ti jānitvā paṭivijjhitvā paccakkhaṃ katvā, tathā – ‘‘ime cattāro satipaṭṭhānā’’tiādinā nayena te te dhamme jānitvā paṭivijjhitvā paccakkhameva katvāti attho. Sanidānanti sappaccayameva katvā kathemi, no appaccayaṃ. Sappāṭihāriyanti paccanīkapaṭiharaṇena sappāṭihāriyameva katvā kathemi, no appāṭihāriyaṃ. Alañca pana voti yuttañca pana tumhākaṃ. Tuṭṭhiyāti ‘‘sammāsambuddho bhagavā, svākkhāto dhammo, suppaṭipanno saṅgho’’ti tīṇi ratanāni guṇato anussarantānaṃ tumhākaṃ yuttameva tuṭṭhiṃ kātunti attho. Sesapadadvayepi eseva nayo.
அகம்பித்தா²தி ச²ஹி ஆகாரேஹி அகம்பித்த². ஏவரூபோ ஹி பத²விகம்போ போ³தி⁴மண்டே³பி அஹோஸி. போ³தி⁴ஸத்தே கிர த³க்கி²ணதி³ஸாபா⁴கே³ன போ³தி⁴மண்ட³ங் அபி⁴ருள்ஹே த³க்கி²ணதி³ஸாபா⁴கோ³ ஹெட்டா² அவீசிங் பாபுணந்தோ விய அஹோஸி, உத்தரபா⁴கோ³ உக்³க³ந்த்வா ப⁴வக்³க³ங் அபி⁴ஹனந்தோ விய. பச்சி²மதி³ஸங் க³தே பச்சி²மபா⁴கோ³ ஹெட்டா² அவீசிங் பாபுணந்தோ விய அஹோஸி, பாசீனபா⁴கோ³ உக்³க³ந்த்வா ப⁴வக்³க³ங் அபி⁴ஹனந்தோ விய. உத்தரதி³ஸங் க³தே உத்தரதி³ஸாபா⁴கோ³ ஹெட்டா² அவீசிங் பாபுணந்தோ விய, த³க்கி²ணதி³ஸாபா⁴கோ³ உக்³க³ந்த்வா ப⁴வக்³க³ங் அபி⁴ஹனந்தோ விய. பாசீனதி³ஸங் க³தே பாசீனதி³ஸாபா⁴கோ³ ஹெட்டா² அவீசிங் பாபுணந்தோ விய, பச்சி²மபா⁴கோ³ உக்³க³ந்த்வா ப⁴வக்³க³ங் அபி⁴ஹனந்தோ விய. போ³தி⁴ருக்கோ²பி ஸகிங் ஹெட்டா² அவீசிங் பாபுணந்தோ விய, ஸகிங் உக்³க³ந்த்வா ப⁴வக்³க³ங் அபி⁴ஹனந்தோ விய. தஸ்மிம்பி தி³வஸே ஏவங் ச²ஹி ஆகாரேஹி சக்கவாளஸஹஸ்ஸீ மஹாபத²வீ அகம்பித்த².
Akampitthāti chahi ākārehi akampittha. Evarūpo hi pathavikampo bodhimaṇḍepi ahosi. Bodhisatte kira dakkhiṇadisābhāgena bodhimaṇḍaṃ abhiruḷhe dakkhiṇadisābhāgo heṭṭhā avīciṃ pāpuṇanto viya ahosi, uttarabhāgo uggantvā bhavaggaṃ abhihananto viya. Pacchimadisaṃ gate pacchimabhāgo heṭṭhā avīciṃ pāpuṇanto viya ahosi, pācīnabhāgo uggantvā bhavaggaṃ abhihananto viya. Uttaradisaṃ gate uttaradisābhāgo heṭṭhā avīciṃ pāpuṇanto viya, dakkhiṇadisābhāgo uggantvā bhavaggaṃ abhihananto viya. Pācīnadisaṃ gate pācīnadisābhāgo heṭṭhā avīciṃ pāpuṇanto viya, pacchimabhāgo uggantvā bhavaggaṃ abhihananto viya. Bodhirukkhopi sakiṃ heṭṭhā avīciṃ pāpuṇanto viya, sakiṃ uggantvā bhavaggaṃ abhihananto viya. Tasmimpi divase evaṃ chahi ākārehi cakkavāḷasahassī mahāpathavī akampittha.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. கோ³தமகசேதியஸுத்தங் • 3. Gotamakacetiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. கோ³தமகசேதியஸுத்தவண்ணனா • 3. Gotamakacetiyasuttavaṇṇanā
