| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
14. கோ³தமத்தே²ரகா³தா²வண்ணனா
14. Gotamattheragāthāvaṇṇanā
ஸங்ஸரந்தி ஆயஸ்மதோ கோ³தமத்தே²ரஸ்ஸ கா³தா². கா உப்பத்தி? அயங் கிர புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி கரொந்தோ ஸிகி²ம்ஹி ப⁴க³வதி பரினிப்³பு³தே தஸ்ஸ சிதகங் தே³வமனுஸ்ஸேஸு பூஜெந்தேஸு அட்ட²ஹி சம்பகபுப்பே²ஹி சிதகங் பூஜேஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸக்யராஜகுலே நிப்³ப³த்தித்வா கோ³தமோதி கொ³த்தவஸேனேவ அபி⁴லக்கி²தனாமோ வயப்பத்தோ ஸத்து² ஞாதிஸமாக³மே படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மங் கரொந்தோ ச²ளபி⁴ஞ்ஞோ அஹோஸி. தேன வுத்தங் அபதா³னே (அப॰ தே²ர 2.47.6-10) –
Saṃsaranti āyasmato gotamattherassa gāthā. Kā uppatti? Ayaṃ kira purimabuddhesu katādhikāro tattha tattha bhave puññāni karonto sikhimhi bhagavati parinibbute tassa citakaṃ devamanussesu pūjentesu aṭṭhahi campakapupphehi citakaṃ pūjesi. So tena puññakammena devamanussesu saṃsaranto imasmiṃ buddhuppāde sakyarājakule nibbattitvā gotamoti gottavaseneva abhilakkhitanāmo vayappatto satthu ñātisamāgame paṭiladdhasaddho pabbajitvā vipassanāya kammaṃ karonto chaḷabhiñño ahosi. Tena vuttaṃ apadāne (apa. thera 2.47.6-10) –
‘‘ஜா²யமானஸ்ஸ ப⁴க³வதோ, ஸிகி²னோ லோகப³ந்து⁴னோ;
‘‘Jhāyamānassa bhagavato, sikhino lokabandhuno;
அட்ட² சம்பகபுப்பா²னி, சிதகங் அபி⁴ரோபயிங்.
Aṭṭha campakapupphāni, citakaṃ abhiropayiṃ.
‘‘ஏகதிங்ஸே இதோ கப்பே, யங் புப்ப²மபி⁴ரோபயிங்;
‘‘Ekatiṃse ito kappe, yaṃ pupphamabhiropayiṃ;
து³க்³க³திங் நாபி⁴ஜானாமி, சிதபூஜாயித³ங் ப²லங்.
Duggatiṃ nābhijānāmi, citapūjāyidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
ச²ளபி⁴ஞ்ஞோ பன ஹுத்வா விமுத்திஸுகே²ன விஹரந்தோ ஏகதி³வஸங் ஞாதகேஹி ‘‘கஸ்மா, ப⁴ந்தே, அம்ஹே பஹாய பப்³ப³ஜிதோ’’தி புட்டோ² ஸங்ஸாரே அத்தனா அனுபூ⁴தது³க்க²ஞ்சேவ இதா³னி அதி⁴க³தங் நிப்³பா³னஸுக²ஞ்ச பகாஸெந்தோ –
Chaḷabhiñño pana hutvā vimuttisukhena viharanto ekadivasaṃ ñātakehi ‘‘kasmā, bhante, amhe pahāya pabbajito’’ti puṭṭho saṃsāre attanā anubhūtadukkhañceva idāni adhigataṃ nibbānasukhañca pakāsento –
258.
258.
‘‘ஸங்ஸரஞ்ஹி நிரயங் அக³ச்சி²ஸ்ஸங், பேதலோகமக³மங் புனப்புனங்;
‘‘Saṃsarañhi nirayaṃ agacchissaṃ, petalokamagamaṃ punappunaṃ;
து³க்க²மம்ஹிபி திரச்சா²னயோனியங், நேகதா⁴ ஹி வுஸிதங் சிரங் மயா.
Dukkhamamhipi tiracchānayoniyaṃ, nekadhā hi vusitaṃ ciraṃ mayā.
259.
259.
‘‘மானுஸோபி ச ப⁴வோபி⁴ராதி⁴தோ, ஸக்³க³காயமக³மங் ஸகிங் ஸகிங்;
‘‘Mānusopi ca bhavobhirādhito, saggakāyamagamaṃ sakiṃ sakiṃ;
ரூபதா⁴துஸு அரூபதா⁴துஸு, நேவஸஞ்ஞிஸு அஸஞ்ஞிஸுட்டி²தங்.
Rūpadhātusu arūpadhātusu, nevasaññisu asaññisuṭṭhitaṃ.
260.
260.
‘‘ஸம்ப⁴வா ஸுவிதி³தா அஸாரகா, ஸங்க²தா பசலிதா ஸதே³ரிதா;
‘‘Sambhavā suviditā asārakā, saṅkhatā pacalitā saderitā;
தங் விதி³த்வா மஹமஹத்தஸம்ப⁴வங், ஸந்திமேவ ஸதிமா ஸமஜ்ஜ²க³’’ந்தி. –
Taṃ viditvā mahamahattasambhavaṃ, santimeva satimā samajjhaga’’nti. –
தீஹி கா³தா²ஹி தேஸங் த⁴ம்மங் தே³ஸேஸி.
Tīhi gāthāhi tesaṃ dhammaṃ desesi.
தத்த² ஸங்ஸரந்தி அனாதி³மதி ஸங்ஸாரே ஸங்ஸரந்தோ கம்மகிலேஸேஹி பஞ்சஸு க³தீஸு சவனுபபாதவஸேன அபராபரங் ஸங்ஸரந்தோதி அத்தோ². ஹீதி நிபாதமத்தங். நிரயங் அக³ச்சி²ஸ்ஸந்தி ஸஞ்ஜீவாதி³கங் அட்ட²வித⁴ங் மஹானிரயங், குக்குளாதி³கங் ஸோளஸவித⁴ங் உஸ்ஸத³னிரயஞ்ச படிஸந்தி⁴வஸேன உபக³ச்சி²ங் . ‘‘புனப்புன’’ந்தி இத³ங் இதா⁴பி ஆனேதப்³ப³ங் . பேதலோகந்தி பெத்திவிஸயங், கு²ப்பிபாஸாதி³பே⁴த³ங் பேதத்தபா⁴வந்தி அத்தோ². அக³மந்தி படிஸந்தி⁴வஸேன உபக³ச்சி²ங் உபபஜ்ஜிங். புனப்புனந்தி அபராபரங். து³க்க²மம்ஹிபீதி அஞ்ஞமஞ்ஞங் திகி²ணகஸாபதோதா³பி⁴கா⁴தாதி³து³க்கே²ஹி து³ஸ்ஸஹாயபி. லிங்க³விபல்லாஸேன ஹேதங் வுத்தங் ‘‘து³க்க²மம்ஹிபீ’’தி. திரச்சா²னயோனியந்தி மிக³பக்கி²ஆதி³பே⁴தா³ய திரச்சா²னயோனியங். நேகதா⁴ ஹீதி ஒட்ட²கோ³ணக³த்³ரபா⁴தி³வஸேன சேவ காகப³லாககுலலாதி³வஸேன ச அனேகப்பகாரங் அனேகவாரஞ்ச சிரங் தீ³க⁴மத்³தா⁴னங் மயா வுஸிதங் நிச்சங் உத்ரஸ்தமானஸதாதி³வஸேன து³க்க²ங் அனுபூ⁴தங். திரச்சா²னயோனியங் நிப்³ப³த்தஸத்தோ மஹாமூள்ஹதாய சிரதரங் தத்தே²வ அபராபரங் பரிவத்ததீதி த³ஸ்ஸனத்த²ங் இத⁴ ‘‘சிர’’ந்தி வுத்தங்.
Tattha saṃsaranti anādimati saṃsāre saṃsaranto kammakilesehi pañcasu gatīsu cavanupapātavasena aparāparaṃ saṃsarantoti attho. Hīti nipātamattaṃ. Nirayaṃ agacchissanti sañjīvādikaṃ aṭṭhavidhaṃ mahānirayaṃ, kukkuḷādikaṃ soḷasavidhaṃ ussadanirayañca paṭisandhivasena upagacchiṃ . ‘‘Punappuna’’nti idaṃ idhāpi ānetabbaṃ . Petalokanti pettivisayaṃ, khuppipāsādibhedaṃ petattabhāvanti attho. Agamanti paṭisandhivasena upagacchiṃ upapajjiṃ. Punappunanti aparāparaṃ. Dukkhamamhipīti aññamaññaṃ tikhiṇakasāpatodābhighātādidukkhehi dussahāyapi. Liṅgavipallāsena hetaṃ vuttaṃ ‘‘dukkhamamhipī’’ti. Tiracchānayoniyanti migapakkhiādibhedāya tiracchānayoniyaṃ. Nekadhā hīti oṭṭhagoṇagadrabhādivasena ceva kākabalākakulalādivasena ca anekappakāraṃ anekavārañca ciraṃ dīghamaddhānaṃ mayā vusitaṃ niccaṃ utrastamānasatādivasena dukkhaṃ anubhūtaṃ. Tiracchānayoniyaṃ nibbattasatto mahāmūḷhatāya cirataraṃ tattheva aparāparaṃ parivattatīti dassanatthaṃ idha ‘‘cira’’nti vuttaṃ.
மானுஸோபி ச ப⁴வோபி⁴ராதி⁴தோதி மனுஸ்ஸத்தபா⁴வோபி மயா தாதி³ஸேன குஸலகம்முனா ஸமவாயேன அபி⁴ராதி⁴தோ ஸாதி⁴தோ அதி⁴க³தோ. காணகச்ச²போபமஸுத்தமெத்த² (ம॰ நி॰ 3.252; ஸங்॰ நி॰ 5.1117) உதா³ஹரிதப்³ப³ங். ஸக்³க³காயமக³மங் ஸகிங் ஸகிந்தி ஸக்³க³க³திஸங்கா²தங் காமாவசரதே³வகாயங் ஸகிங் ஸகிங் கதா³சி கதா³சி உபபஜ்ஜனவஸேன அக³ச்சி²ங். ரூபதா⁴துஸூதி புது²ஜ்ஜனப⁴வக்³க³பரியோஸானேஸு ரூபப⁴வேஸு அரூபதா⁴துஸூதி அரூபப⁴வேஸு. நேவஸஞ்ஞிஸு அஸஞ்ஞிஸுட்டி²தந்தி ரூபாரூபதா⁴தூஸு ச ந கேவலங் ஸஞ்ஞீஸு ஏவ, அத² கோ² நேவஸஞ்ஞீனாஸஞ்ஞீஸு அஸஞ்ஞீஸு ச உபபஜ்ஜ டி²தங் மயாதி ஆனெத்வா யோஜேதப்³ப³ங். நேவஸஞ்ஞிக்³க³ஹணேன ஹெத்த² நேவஸஞ்ஞீனாஸஞ்ஞீப⁴வோ க³ஹிதோ. யதி³பிமே த்³வே ப⁴வா ரூபாரூபதா⁴துக்³க³ஹணேனேவ க³ய்ஹந்தி, யே பன இதோ பா³ஹிரகா தத்த² நிச்சஸஞ்ஞினோ ப⁴வவிமொக்க²ஸஞ்ஞினோ ச, தேஸங் தஸ்ஸா ஸஞ்ஞாய மிச்சா²பா⁴வத³ஸ்ஸனத்த²ங் விஸுங் க³ஹிதாதி த³ட்ட²ப்³ப³ங்.
Mānusopi ca bhavobhirādhitoti manussattabhāvopi mayā tādisena kusalakammunā samavāyena abhirādhito sādhito adhigato. Kāṇakacchapopamasuttamettha (ma. ni. 3.252; saṃ. ni. 5.1117) udāharitabbaṃ. Saggakāyamagamaṃ sakiṃ sakinti saggagatisaṅkhātaṃ kāmāvacaradevakāyaṃ sakiṃ sakiṃ kadāci kadāci upapajjanavasena agacchiṃ. Rūpadhātusūti puthujjanabhavaggapariyosānesu rūpabhavesu arūpadhātusūti arūpabhavesu. Nevasaññisu asaññisuṭṭhitanti rūpārūpadhātūsu ca na kevalaṃ saññīsu eva, atha kho nevasaññīnāsaññīsu asaññīsu ca upapajja ṭhitaṃ mayāti ānetvā yojetabbaṃ. Nevasaññiggahaṇena hettha nevasaññīnāsaññībhavo gahito. Yadipime dve bhavā rūpārūpadhātuggahaṇeneva gayhanti, ye pana ito bāhirakā tattha niccasaññino bhavavimokkhasaññino ca, tesaṃ tassā saññāya micchābhāvadassanatthaṃ visuṃ gahitāti daṭṭhabbaṃ.
ஏவங் த்³வீஹி கா³தா²ஹி ப⁴வமூலஸ்ஸ அனுபச்சி²ன்னத்தா அனாதி³மதி ஸங்ஸாரே அத்தனோ வட்டது³க்கா²னுப⁴வங் த³ஸ்ஸெத்வா இதா³னி தது³பச்சே²தே³ன விவட்டஸுகா²னுப⁴வங் த³ஸ்ஸெந்தோ ‘‘ஸம்ப⁴வா’’திஆதி³னா ததியங் கா³த²மாஹ. தத்த² ஸம்ப⁴வாதி ப⁴வா. காமப⁴வாத³யோ ஏவ ஹி ஹேதுபச்சயஸமவாயேன ப⁴வந்தீதி இத⁴ ஸம்ப⁴வாதி வுத்தா. ஸுவிதி³தாதி விபஸ்ஸனாபஞ்ஞாஸஹிதாய மக்³க³பஞ்ஞாய ஸுட்டு² விதி³தா. அஸாரகாதிஆதி³ தேஸங் விதி³தாகாரத³ஸ்ஸனங். தத்த² அஸாரகாதி நிச்சஸாராதி³ஸாரரஹிதா. ஸங்க²தாதி ஸமேச்ச ஸம்பு⁴ய்ய பச்சயேஹி கதா. பசலிதாதி ஸங்க²தத்தா ஏவ உப்பாத³ஜராதீ³ஹி பகாரதோ சலிதா அனவட்டி²தா. ஸதே³ரிதாதி ஸதா³ ஸப்³ப³காலங் ப⁴ங்கே³ன ஏரிதா, இத்தரா ப⁴ங்க³கா³மினோ பப⁴ங்கு³னோதி அத்தோ². தங் விதி³த்வா மஹமத்தஸம்ப⁴வந்தி தங் யதா²வுத்தங் ஸங்க²தஸபா⁴வங் அத்தஸம்ப⁴வங் அத்தனி ஸம்பூ⁴தங் அத்தாயத்தங் இஸ்ஸராதி³வஸேன அபராயத்தங் பரிஞ்ஞாபி⁴ஸமயவஸேன அஹங் விதி³த்வா தப்படிபக்க²பூ⁴தங் ஸந்திமேவ நிப்³பா³னமேவ மக்³க³பஞ்ஞாஸதியா ஸதிமா ஹுத்வா ஸமஜ்ஜ²க³ங் அதி⁴க³ச்சி²ங் அரியமக்³க³பா⁴வனாய அனுப்பத்தோதி. ஏவங் தே²ரோ ஞாதகானங் த⁴ம்மதே³ஸனாமுகே²ன அஞ்ஞங் ப்³யாகாஸி.
Evaṃ dvīhi gāthāhi bhavamūlassa anupacchinnattā anādimati saṃsāre attano vaṭṭadukkhānubhavaṃ dassetvā idāni tadupacchedena vivaṭṭasukhānubhavaṃ dassento ‘‘sambhavā’’tiādinā tatiyaṃ gāthamāha. Tattha sambhavāti bhavā. Kāmabhavādayo eva hi hetupaccayasamavāyena bhavantīti idha sambhavāti vuttā. Suviditāti vipassanāpaññāsahitāya maggapaññāya suṭṭhu viditā. Asārakātiādi tesaṃ viditākāradassanaṃ. Tattha asārakāti niccasārādisārarahitā. Saṅkhatāti samecca sambhuyya paccayehi katā. Pacalitāti saṅkhatattā eva uppādajarādīhi pakārato calitā anavaṭṭhitā. Saderitāti sadā sabbakālaṃ bhaṅgena eritā, ittarā bhaṅgagāmino pabhaṅgunoti attho. Taṃ viditvāmahamattasambhavanti taṃ yathāvuttaṃ saṅkhatasabhāvaṃ attasambhavaṃ attani sambhūtaṃ attāyattaṃ issarādivasena aparāyattaṃ pariññābhisamayavasena ahaṃ viditvā tappaṭipakkhabhūtaṃ santimeva nibbānameva maggapaññāsatiyā satimā hutvā samajjhagaṃ adhigacchiṃ ariyamaggabhāvanāya anuppattoti. Evaṃ thero ñātakānaṃ dhammadesanāmukhena aññaṃ byākāsi.
கோ³தமத்தே²ரகா³தா²வண்ணனா நிட்டி²தா.
Gotamattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 14. கோ³தமத்தே²ரகா³தா² • 14. Gotamattheragāthā
