| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. து³தியபண்ணாஸகங்
2. Dutiyapaṇṇāsakaṃ
(6) 1. கோ³தமீவக்³கோ³
(6) 1. Gotamīvaggo
1-3. கோ³தமீஸுத்தாதி³வண்ணனா
1-3. Gotamīsuttādivaṇṇanā
51-53. ச²ட்ட²ஸ்ஸ பட²மே (ஸாரத்த²॰ டீ॰ சூளவக்³க³ 3.402) கோ³தமீதி கொ³த்தங். நாமகரணதி³வஸே பனஸ்ஸா லத்³த⁴ஸக்காரா ப்³ராஹ்மணா லக்க²ணஸம்பத்திங் தி³ஸ்வா ‘‘ஸசே அயங் தீ⁴தரங் லபி⁴ஸ்ஸதி, சக்கவத்திரஞ்ஞோ மஹேஸீ ப⁴விஸ்ஸதி. ஸசே புத்தங் லபி⁴ஸ்ஸதி, சக்கவத்திராஜா ப⁴விஸ்ஸதீதி உப⁴யதா²பி மஹதீயேவஸ்ஸா பஜா ப⁴விஸ்ஸதீ’’தி ப்³யாகரிங்ஸு. அத²ஸ்ஸா ‘‘மஹாபஜாபதீ’’தி நாமங் அகங்ஸு. தேனாஹ ‘‘புத்தபஜாய சேவ தீ⁴துபஜாய ச மஹந்தத்தா ஏவங்லத்³த⁴னாமா’’தி.
51-53. Chaṭṭhassa paṭhame (sārattha. ṭī. cūḷavagga 3.402) gotamīti gottaṃ. Nāmakaraṇadivase panassā laddhasakkārā brāhmaṇā lakkhaṇasampattiṃ disvā ‘‘sace ayaṃ dhītaraṃ labhissati, cakkavattirañño mahesī bhavissati. Sace puttaṃ labhissati, cakkavattirājā bhavissatīti ubhayathāpi mahatīyevassā pajā bhavissatī’’ti byākariṃsu. Athassā ‘‘mahāpajāpatī’’ti nāmaṃ akaṃsu. Tenāha ‘‘puttapajāya ceva dhītupajāya ca mahantattā evaṃladdhanāmā’’ti.
‘‘அத்தத³ண்டா³ ப⁴யங் ஜாதங், ஜனங் பஸ்ஸத² மேத⁴க³ங்;
‘‘Attadaṇḍā bhayaṃ jātaṃ, janaṃ passatha medhagaṃ;
ஸங்வேக³ங் கித்தயிஸ்ஸாமி, யதா² ஸங்விஜிதங் மயா’’தி. (ஸு॰ நி॰ 941; மஹானி॰ 170) –
Saṃvegaṃ kittayissāmi, yathā saṃvijitaṃ mayā’’ti. (su. ni. 941; mahāni. 170) –
ஆதி³னா அத்தத³ண்ட³ஸுத்தங் கதே²ஸி. தங்தங்பலோப⁴னகிரியா காயவாசாஹி பரக்கமந்தியோ உக்கண்ட²ந்தூதி ஸாஸனங் பேஸெந்தி நாமாதி கத்வா வுத்தங் ‘‘ஸாஸனங் பேஸெத்வா’’தி. குணாலத³ஹந்தி குணாலத³ஹதீரங். அனபி⁴ரதிங் வினோதெ³த்வாதி இத்தீ²னங் தோ³ஸத³ஸ்ஸனமுகே²ன காமானங் வோகாரஸங்கிலேஸவிபா⁴வனேன அனபி⁴ரதிங் வினோதெ³த்வா.
Ādinā attadaṇḍasuttaṃ kathesi. Taṃtaṃpalobhanakiriyā kāyavācāhi parakkamantiyo ukkaṇṭhantūti sāsanaṃ pesenti nāmāti katvā vuttaṃ ‘‘sāsanaṃ pesetvā’’ti. Kuṇāladahanti kuṇāladahatīraṃ. Anabhiratiṃ vinodetvāti itthīnaṃ dosadassanamukhena kāmānaṃ vokārasaṃkilesavibhāvanena anabhiratiṃ vinodetvā.
ஆபாதி³காதி ஸங்வத்³த⁴கா, தும்ஹாகங் ஹத்த²பாதே³ஸு கிச்சங் அஸாதெ⁴ந்தேஸு ஹத்தே² ச பாதே³ ச வட்³டெ⁴த்வா படிஜக்³கி³தாதி அத்தோ². போஸிகாதி தி³வஸஸ்ஸ த்³வே தயோ வாரே நஹாபெத்வா போ⁴ஜெத்வா பாயெத்வா தும்ஹே போஸேஸி. த²ஞ்ஞங் பாயேஸீதி நந்த³குமாரோ கிர போ³தி⁴ஸத்ததோ கதிபாஹேனேவ த³ஹரோ, தஸ்மிங் ஜாதே மஹாபஜாபதீ அத்தனோ புத்தங் தா⁴தீனங் த³த்வா ஸயங் போ³தி⁴ஸத்தஸ்ஸ தா⁴திகிச்சங் ஸாத⁴யமானா அத்தனோ த²ஞ்ஞங் பாயேஸி. தங் ஸந்தா⁴ய தே²ரோ ஏவமாஹ. த³ஹரோதி தருணோ. யுவாதி யொப்³ப³ஞ்ஞே டி²தோ. மண்ட³னகஜாதிகோதி அலங்காரஸபா⁴வோ. தத்த² கோசி தருணோபி யுவா ந ஹோதி யதா² அதிதருணோ. கோசி யுவாபி மண்ட³னகஜாதிகோ ந ஹோதி யதா² உபஸந்தஸபா⁴வோ, ஆலஸியப்³யஸனாதீ³ஹி வா அபி⁴பூ⁴தோ. இத⁴ பன த³ஹரோ சேவ யுவா ச மண்ட³னகஜாதிகோ ச அதி⁴ப்பேதோ, தஸ்மா ஏவமாஹ. உப்பலாதீ³னி மண்ட³னகஜாதிகோ ச லோகஸம்மதத்தா வுத்தானி.
Āpādikāti saṃvaddhakā, tumhākaṃ hatthapādesu kiccaṃ asādhentesu hatthe ca pāde ca vaḍḍhetvā paṭijaggitāti attho. Posikāti divasassa dve tayo vāre nahāpetvā bhojetvā pāyetvā tumhe posesi. Thaññaṃ pāyesīti nandakumāro kira bodhisattato katipāheneva daharo, tasmiṃ jāte mahāpajāpatī attano puttaṃ dhātīnaṃ datvā sayaṃ bodhisattassa dhātikiccaṃ sādhayamānā attano thaññaṃ pāyesi. Taṃ sandhāya thero evamāha. Daharoti taruṇo. Yuvāti yobbaññe ṭhito. Maṇḍanakajātikoti alaṅkārasabhāvo. Tattha koci taruṇopi yuvā na hoti yathā atitaruṇo. Koci yuvāpi maṇḍanakajātiko na hoti yathā upasantasabhāvo, ālasiyabyasanādīhi vā abhibhūto. Idha pana daharo ceva yuvā ca maṇḍanakajātiko ca adhippeto, tasmā evamāha. Uppalādīni maṇḍanakajātiko ca lokasammatattā vuttāni.
மாதுகா³மஸ்ஸ பப்³ப³ஜிதத்தாதி இத³ங் பஞ்சவஸ்ஸஸததோ உத்³த⁴ங் அட்ட²த்வா பஞ்சஸுயேவ வஸ்ஸஸதேஸு ஸத்³த⁴ம்மட்டி²தியா காரணனித³ஸ்ஸனங். படிஸம்பி⁴தா³பபே⁴த³ப்பத்தகீ²ணாஸவவஸேனேவ வுத்தந்தி எத்த² படிஸம்பி⁴தா³ப்பத்தகீ²ணாஸவக்³க³ஹணேன ஜா²னானிபி க³ஹிதானேவ ஹொந்தி. ந ஹி நிஜ்ஜா²னகானங் ஸப்³ப³ப்பகாரஸம்பத்தி இஜ்ஜ²தீதி வத³ந்தி. ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸந்திஆதி³னா ச யங் வுத்தங், தங் க²ந்த⁴கபா⁴ணகானங் மதேன வுத்தந்தி வேதி³தப்³ப³ங். வினயட்ட²கதா²யம்பி (சூளவ॰ அட்ட²॰ 403) இமினாவ நயேன வுத்தங்.
Mātugāmassa pabbajitattāti idaṃ pañcavassasatato uddhaṃ aṭṭhatvā pañcasuyeva vassasatesu saddhammaṭṭhitiyā kāraṇanidassanaṃ. Paṭisambhidāpabhedappattakhīṇāsavavaseneva vuttanti ettha paṭisambhidāppattakhīṇāsavaggahaṇena jhānānipi gahitāneva honti. Na hi nijjhānakānaṃ sabbappakārasampatti ijjhatīti vadanti. Sukkhavipassakakhīṇāsavavasena vassasahassantiādinā ca yaṃ vuttaṃ, taṃ khandhakabhāṇakānaṃ matena vuttanti veditabbaṃ. Vinayaṭṭhakathāyampi (cūḷava. aṭṭha. 403) imināva nayena vuttaṃ.
தீ³க⁴னிகாயட்ட²கதா²யங் (தீ³॰ நி॰ அட்ட²॰ 3.161) பன ‘‘படிஸம்பி⁴தா³ப்பத்தேஹி வஸ்ஸஸஹஸ்ஸங் அட்டா²ஸி, ச²ளபி⁴ஞ்ஞேஹி வஸ்ஸஸஹஸ்ஸங், தேவிஜ்ஜேஹி வஸ்ஸஸஹஸ்ஸங், ஸுக்க²விபஸ்ஸகேஹி வஸ்ஸஸஹஸ்ஸங், பாதிமொக்கே²ன வஸ்ஸஸஹஸ்ஸங் அட்டா²ஸீ’’தி வுத்தங். இதா⁴பி ஸாஸனந்தரதா⁴னகதா²யங் (அ॰ நி॰ அட்ட²॰ 1.1.130) ‘‘பு³த்³தா⁴னஞ்ஹி பரினிப்³பா³னதோ வஸ்ஸஸஹஸ்ஸமேவ படிஸம்பி⁴தா³ நிப்³ப³த்தேதுங் ஸக்கொந்தி, ததோ பரங் ச² அபி⁴ஞ்ஞா, ததோ தாபி நிப்³ப³த்தேதுங் அஸக்கொந்தா திஸ்ஸோ விஜ்ஜா நிப்³ப³த்தெந்தி, க³ச்ச²ந்தே க³ச்ச²ந்தே காலே தாபி நிப்³ப³த்தேதுங் அஸக்கொந்தா ஸுக்க²விபஸ்ஸகா ஹொந்தி. ஏதேனேவ உபாயேன அனாகா³மினோ, ஸகதா³கா³மினோ, ஸோதாபன்னா’’தி வுத்தங்.
Dīghanikāyaṭṭhakathāyaṃ (dī. ni. aṭṭha. 3.161) pana ‘‘paṭisambhidāppattehi vassasahassaṃ aṭṭhāsi, chaḷabhiññehi vassasahassaṃ, tevijjehi vassasahassaṃ, sukkhavipassakehi vassasahassaṃ, pātimokkhena vassasahassaṃ aṭṭhāsī’’ti vuttaṃ. Idhāpi sāsanantaradhānakathāyaṃ (a. ni. aṭṭha. 1.1.130) ‘‘buddhānañhi parinibbānato vassasahassameva paṭisambhidā nibbattetuṃ sakkonti, tato paraṃ cha abhiññā, tato tāpi nibbattetuṃ asakkontā tisso vijjā nibbattenti, gacchante gacchante kāle tāpi nibbattetuṃ asakkontā sukkhavipassakā honti. Eteneva upāyena anāgāmino, sakadāgāmino, sotāpannā’’ti vuttaṃ.
ஸங்யுத்தனிகாயட்ட²கதா²யங் (ஸங்॰ நி॰ அட்ட²॰ 2.2.156) பன ‘‘பட²மபோ³தி⁴யஞ்ஹி பி⁴க்கூ² படிஸம்பி⁴தா³ப்பத்தா அஹேஸுங். அத² காலே க³ச்ச²ந்தே படிஸம்பி⁴தா³ பாபுணிதுங் ந ஸக்கி²ங்ஸு, ச²ளபி⁴ஞ்ஞா அஹேஸுங். ததோ ச² அபி⁴ஞ்ஞா பத்துங் அஸக்கொந்தா திஸ்ஸோ விஜ்ஜா பாபுணிங்ஸு. இதா³னி காலே க³ச்ச²ந்தே திஸ்ஸோ விஜ்ஜா பாபுணிதுங் அஸக்கொந்தா ஆஸவக்க²யமத்தங் பாபுணிஸ்ஸந்தி, தம்பி அஸக்கொந்தா அனாகா³மிப²லங், தம்பி அஸக்கொந்தா ஸகதா³கா³மிப²லங், தம்பி அஸக்கொந்தா ஸோதாபத்திப²லங், க³ச்ச²ந்தே காலே ஸோதாபத்திப²லம்பி பத்துங் ந ஸக்கி²ஸ்ஸந்தீ’’தி வுத்தங். யஸ்மா சேதங் ஸப்³ப³ங் அஞ்ஞமஞ்ஞப்படிவிருத்³த⁴ங், தஸ்மா தேஸங் தேஸங் பா⁴ணகானங் மதமேவ ஆசரியேன தத்த² தத்த² த³ஸ்ஸிதந்தி க³ஹேதப்³ப³ங். அஞ்ஞதா² ஹி ஆசரியஸ்ஸேவ புப்³பா³பரவிரோத⁴ப்பஸங்கோ³ ஸியாதி.
Saṃyuttanikāyaṭṭhakathāyaṃ (saṃ. ni. aṭṭha. 2.2.156) pana ‘‘paṭhamabodhiyañhi bhikkhū paṭisambhidāppattā ahesuṃ. Atha kāle gacchante paṭisambhidā pāpuṇituṃ na sakkhiṃsu, chaḷabhiññā ahesuṃ. Tato cha abhiññā pattuṃ asakkontā tisso vijjā pāpuṇiṃsu. Idāni kāle gacchante tisso vijjā pāpuṇituṃ asakkontā āsavakkhayamattaṃ pāpuṇissanti, tampi asakkontā anāgāmiphalaṃ, tampi asakkontā sakadāgāmiphalaṃ, tampi asakkontā sotāpattiphalaṃ, gacchante kāle sotāpattiphalampi pattuṃ na sakkhissantī’’ti vuttaṃ. Yasmā cetaṃ sabbaṃ aññamaññappaṭiviruddhaṃ, tasmā tesaṃ tesaṃ bhāṇakānaṃ matameva ācariyena tattha tattha dassitanti gahetabbaṃ. Aññathā hi ācariyasseva pubbāparavirodhappasaṅgo siyāti.
தானியேவாதி தானியேவ பஞ்சவஸ்ஸஸஹஸ்ஸானி. பரியத்திமூலகங் ஸாஸனந்தி ஆஹ ‘‘ந ஹி பரியத்தியா அஸதி படிவேதோ⁴ அத்தீ²’’திஆதி³. பரியத்தியா ஹி அந்தரஹிதாய படிபத்திஅந்தரதா⁴யதி, படிபத்தியா அந்தரஹிதாய அதி⁴க³மோ அந்தரதா⁴யதி. கிங்காரணா? அயஞ்ஹி பரியத்தி படிபத்தியா பச்சயோ ஹோதி, படிபத்தி அதி⁴க³மஸ்ஸ. இதி படிபத்திதோபி பரியத்தியேவ பமாணங். து³தியததியேஸு நத்தி² வத்தப்³ப³ங்.
Tāniyevāti tāniyeva pañcavassasahassāni. Pariyattimūlakaṃ sāsananti āha ‘‘na hi pariyattiyāasati paṭivedho atthī’’tiādi. Pariyattiyā hi antarahitāya paṭipattiantaradhāyati, paṭipattiyā antarahitāya adhigamo antaradhāyati. Kiṃkāraṇā? Ayañhi pariyatti paṭipattiyā paccayo hoti, paṭipatti adhigamassa. Iti paṭipattitopi pariyattiyeva pamāṇaṃ. Dutiyatatiyesu natthi vattabbaṃ.
கோ³தமீஸுத்தாதி³வண்ணனா நிட்டி²தா.
Gotamīsuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. கோ³தமீஸுத்தங் • 1. Gotamīsuttaṃ
2. ஓவாத³ஸுத்தங் • 2. Ovādasuttaṃ
3. ஸங்கி²த்தஸுத்தங் • 3. Saṃkhittasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. கோ³தமீஸுத்தவண்ணனா • 1. Gotamīsuttavaṇṇanā
2. ஓவாத³ஸுத்தவண்ணனா • 2. Ovādasuttavaṇṇanā
3. ஸங்கி²த்தஸுத்தவண்ணனா • 3. Saṃkhittasuttavaṇṇanā
