| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. དུཏིཡཔཎྞཱསཀཾ
2. Dutiyapaṇṇāsakaṃ
(༦) ༡. གོཏམཱིཝགྒོ
(6) 1. Gotamīvaggo
༡. གོཏམཱིསུཏྟཾ
1. Gotamīsuttaṃ
༥༡. ཨེཀཾ སམཡཾ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཨཐ ཁོ མཧཱཔཛཱཔཏཱི 1 གོཏམཱི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏཱི གོཏམཱི བྷགཝནྟཾ ཨེཏདཝོཙ – ‘‘སཱདྷུ, བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཨལཾ, གོཏམི! མཱ ཏེ རུཙྩི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཱ’’ཏི།
51. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho mahāpajāpatī 2 gotamī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpatī gotamī bhagavantaṃ etadavoca – ‘‘sādhu, bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti. ‘‘Alaṃ, gotami! Mā te rucci mātugāmassa tathāgatappavedite dhammavinaye agārasmā anagāriyaṃ pabbajjā’’ti.
དུཏིཡམྤི ཁོ མཧཱཔཛཱཔཏཱི གོཏམཱི བྷགཝནྟཾ ཨེཏདཝོཙ – ‘‘སཱདྷུ, བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཨལཾ, གོཏམི! མཱ ཏེ རུཙྩི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཱ’’ཏི། ‘‘ཏཏིཡམྤི ཁོ མཧཱཔཛཱཔཏཱི གོཏམཱི བྷགཝནྟཾ ཨེཏདཝོཙ – ‘‘སཱདྷུ བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཨལཾ, གོཏམི! མཱ ཏེ རུཙྩི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཱ’’ཏི།
Dutiyampi kho mahāpajāpatī gotamī bhagavantaṃ etadavoca – ‘‘sādhu, bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti. ‘‘Alaṃ, gotami! Mā te rucci mātugāmassa tathāgatappavedite dhammavinaye agārasmā anagāriyaṃ pabbajjā’’ti. ‘‘Tatiyampi kho mahāpajāpatī gotamī bhagavantaṃ etadavoca – ‘‘sādhu bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti. ‘‘Alaṃ, gotami! Mā te rucci mātugāmassa tathāgatappavedite dhammavinaye agārasmā anagāriyaṃ pabbajjā’’ti.
ཨཐ ཁོ མཧཱཔཛཱཔཏཱི གོཏམཱི ‘‘ན བྷགཝཱ ཨནུཛཱནཱཏི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི དུཀྑཱི དུམྨནཱ ཨསྶུམུཁཱི རུདམཱནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།
Atha kho mahāpajāpatī gotamī ‘‘na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajja’’nti dukkhī dummanā assumukhī rudamānā bhagavantaṃ abhivādetvā padakkhiṇaṃ katvā pakkāmi.
ཨཐ ཁོ བྷགཝཱ ཀཔིལཝཏྠུསྨིཾ ཡཐཱབྷིརནྟཾ ཝིཧརིཏྭཱ ཡེན ཝེསཱལཱི ཏེན ཙཱརིཀཾ པཀྐཱམི ། ཨནུཔུབྦེན ཙཱརིཀཾ ཙརམཱནོ ཡེན ཝེསཱལཱི ཏདཝསརི། ཏཏྲ སུདཾ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ ། ཨཐ ཁོ མཧཱཔཛཱཔཏཱི གོཏམཱི ཀེསེ ཚེདཱཔེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ སམྦཧུལཱཧི སཱཀིཡཱནཱིཧི སདྡྷིཾ ཡེན ཝེསཱལཱི ཏེན པཀྐཱམི། ཨནུཔུབྦེན ཡེན ཝེསཱལཱི མཧཱཝནཾ ཀཱུཊཱགཱརསཱལཱ ཏེནུཔསངྐམི། ཨཐ ཁོ མཧཱཔཛཱཔཏཱི གོཏམཱི སཱུནེཧི པཱདེཧི རཛོཀིཎྞེན གཏྟེན དུཀྑཱི དུམྨནཱ ཨསྶུམུཁཱི རུདམཱནཱ བཧིདྭཱརཀོཊྛཀེ ཨཊྛཱསི།
Atha kho bhagavā kapilavatthusmiṃ yathābhirantaṃ viharitvā yena vesālī tena cārikaṃ pakkāmi . Anupubbena cārikaṃ caramāno yena vesālī tadavasari. Tatra sudaṃ bhagavā vesāliyaṃ viharati mahāvane kūṭāgārasālāyaṃ . Atha kho mahāpajāpatī gotamī kese chedāpetvā kāsāyāni vatthāni acchādetvā sambahulāhi sākiyānīhi saddhiṃ yena vesālī tena pakkāmi. Anupubbena yena vesālī mahāvanaṃ kūṭāgārasālā tenupasaṅkami. Atha kho mahāpajāpatī gotamī sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake aṭṭhāsi.
ཨདྡསཱ ཁོ ཨཱཡསྨཱ ཨཱནནྡོ མཧཱཔཛཱཔཏིཾ གོཏམིཾ སཱུནེཧི པཱདེཧི རཛོཀིཎྞེན གཏྟེན དུཀྑིཾ དུམྨནཾ ཨསྶུམུཁིཾ རུདམཱནཾ བཧིདྭཱརཀོཊྛཀེ ཋིཏཾ། དིསྭཱན མཧཱཔཛཱཔཏིཾ གོཏམིཾ ཨེཏདཝོཙ – ‘‘ཀིཾ ནུ ཏྭཾ, གོཏམི, སཱུནེཧི པཱདེཧི རཛོཀིཎྞེན གཏྟེན དུཀྑཱི དུམྨནཱ ཨསྶུམུཁཱི རུདམཱནཱ བཧིདྭཱརཀོཊྛཀེ ཋིཏཱ’’ཏི? ‘‘ཏཐཱ ཧི པན, བྷནྟེ ཨཱནནྡ, ན བྷགཝཱ ཨནུཛཱནཱཏི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཏེན ཧི ཏྭཾ, གོཏམི, མུཧུཏྟཾ ཨིདྷེཝ ཏཱཝ ཧོཧི, ཡཱཝཱཧཾ བྷགཝནྟཾ ཡཱཙཱམི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི།
Addasā kho āyasmā ānando mahāpajāpatiṃ gotamiṃ sūnehi pādehi rajokiṇṇena gattena dukkhiṃ dummanaṃ assumukhiṃ rudamānaṃ bahidvārakoṭṭhake ṭhitaṃ. Disvāna mahāpajāpatiṃ gotamiṃ etadavoca – ‘‘kiṃ nu tvaṃ, gotami, sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake ṭhitā’’ti? ‘‘Tathā hi pana, bhante ānanda, na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajja’’nti. ‘‘Tena hi tvaṃ, gotami, muhuttaṃ idheva tāva hohi, yāvāhaṃ bhagavantaṃ yācāmi mātugāmassa tathāgatappavedite dhammavinaye agārasmā anagāriyaṃ pabbajja’’nti.
ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘ཨེསཱ, བྷནྟེ, མཧཱཔཛཱཔཏཱི གོཏམཱི སཱུནེཧི པཱདེཧི རཛོཀིཎྞེན གཏྟེན དུཀྑཱི དུམྨནཱ ཨསྶུམུཁཱི རུདམཱནཱ བཧིདྭཱརཀོཊྛཀེ ཋིཏཱ – ‘ན བྷགཝཱ ཨནུཛཱནཱཏི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’ནྟི། སཱདྷུ, བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཨལཾ, ཨཱནནྡ! མཱ ཏེ རུཙྩི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཱ’’ཏི།
Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘esā, bhante, mahāpajāpatī gotamī sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake ṭhitā – ‘na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajja’nti. Sādhu, bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti. ‘‘Alaṃ, ānanda! Mā te rucci mātugāmassa tathāgatappavedite dhammavinaye agārasmā anagāriyaṃ pabbajjā’’ti.
དུཏིཡམྤི ཁོ…པེ॰… ཏཏིཡམྤི ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘སཱདྷུ, བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ‘‘ཨལཾ, ཨཱནནྡ! མཱ ཏེ རུཙྩི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཱ’’ཏི།
Dutiyampi kho…pe… tatiyampi kho āyasmā ānando bhagavantaṃ etadavoca – ‘‘sādhu, bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti. ‘‘Alaṃ, ānanda! Mā te rucci mātugāmassa tathāgatappavedite dhammavinaye agārasmā anagāriyaṃ pabbajjā’’ti.
ཨཐ ཁོ ཨཱཡསྨཏོ ཨཱནནྡསྶ ཨེཏདཧོསི – ‘‘ན བྷགཝཱ ཨནུཛཱནཱཏི མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཾ། ཡཾནཱུནཱཧཾ ཨཉྙེནཔི པརིཡཱཡེན བྷགཝནྟཾ ཡཱཙེཡྻཾ མཱཏུགཱམསྶ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི། ཨཐ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘བྷབྦོ ནུ ཁོ, བྷནྟེ, མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛིཏྭཱ སོཏཱཔཏྟིཕལཾ ཝཱ སཀདཱགཱམིཕལཾ ཝཱ ཨནཱགཱམིཕལཾ ཝཱ ཨརཧཏྟཕལཾ ཝཱ སཙྪིཀཱཏུ’’ནྟི? ‘‘བྷབྦོ, ཨཱནནྡ, མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛིཏྭཱ སོཏཱཔཏྟིཕལམྤི སཀདཱགཱམིཕལམྤི ཨནཱགཱམིཕལམྤི ཨརཧཏྟཕལམྤི སཙྪིཀཱཏུ’’ནྟི། ‘‘སཙེ, བྷནྟེ, བྷབྦོ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛིཏྭཱ སོཏཱཔཏྟིཕལམྤི…པེ॰… ཨརཧཏྟཕལམྤི སཙྪིཀཱཏུཾ, བཧུཀཱརཱ, བྷནྟེ, མཧཱཔཛཱཔཏཱི གོཏམཱི བྷགཝཏོ མཱཏུཙྪཱ ཨཱཔཱདིཀཱ པོསིཀཱ ཁཱིརསྶ དཱཡིཀཱ; བྷགཝནྟཾ ཛནེཏྟིཡཱ ཀཱལངྐཏཱཡ ཐཉྙཾ པཱཡེསི། སཱདྷུ, བྷནྟེ, ལབྷེཡྻ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫ’’ནྟི།
Atha kho āyasmato ānandassa etadahosi – ‘‘na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajjaṃ. Yaṃnūnāhaṃ aññenapi pariyāyena bhagavantaṃ yāceyyaṃ mātugāmassa tathāgatappavedite dhammavinaye agārasmā anagāriyaṃ pabbajja’’nti. Atha kho āyasmā ānando bhagavantaṃ etadavoca – ‘‘bhabbo nu kho, bhante, mātugāmo tathāgatappavedite dhammavinaye agārasmā anagāriyaṃ pabbajitvā sotāpattiphalaṃ vā sakadāgāmiphalaṃ vā anāgāmiphalaṃ vā arahattaphalaṃ vā sacchikātu’’nti? ‘‘Bhabbo, ānanda, mātugāmo tathāgatappavedite dhammavinaye agārasmā anagāriyaṃ pabbajitvā sotāpattiphalampi sakadāgāmiphalampi anāgāmiphalampi arahattaphalampi sacchikātu’’nti. ‘‘Sace, bhante, bhabbo mātugāmo tathāgatappavedite dhammavinaye agārasmā anagāriyaṃ pabbajitvā sotāpattiphalampi…pe… arahattaphalampi sacchikātuṃ, bahukārā, bhante, mahāpajāpatī gotamī bhagavato mātucchā āpādikā posikā khīrassa dāyikā; bhagavantaṃ janettiyā kālaṅkatāya thaññaṃ pāyesi. Sādhu, bhante, labheyya mātugāmo tathāgatappavedite dhammavinaye agārasmā anagāriyaṃ pabbajja’’nti.
‘‘སཙེ, ཨཱནནྡ, མཧཱཔཛཱཔཏཱི གོཏམཱི ཨཊྛ གརུདྷམྨེ པཊིགྒཎྷཱཏི, སཱཝསྶཱ ཧོཏུ ཨུཔསམྤདཱ –
‘‘Sace, ānanda, mahāpajāpatī gotamī aṭṭha garudhamme paṭiggaṇhāti, sāvassā hotu upasampadā –
‘‘ན བྷིཀྑུནིཡཱ ཨབྷིཀྑུཀེ ཨཱཝཱསེ ཝསྶཾ ཨུཔགནྟབྦཾ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Na bhikkhuniyā abhikkhuke āvāse vassaṃ upagantabbaṃ. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘ཨནྭཌྜྷམཱསཾ བྷིཀྑུནིཡཱ བྷིཀྑུསངྒྷཏོ དྭེ དྷམྨཱ པཙྩཱསཱིསིཏབྦཱ 7 – ཨུཔོསཐཔུཙྪཀཉྩ, ཨོཝཱདཱུཔསངྐམནཉྩ ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Anvaḍḍhamāsaṃ bhikkhuniyā bhikkhusaṅghato dve dhammā paccāsīsitabbā 8 – uposathapucchakañca, ovādūpasaṅkamanañca . Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘ཝསྶཾཝུཊྛཱཡ བྷིཀྑུནིཡཱ ཨུབྷཏོསངྒྷེ ཏཱིཧི ཋཱནེཧི པཝཱརེཏབྦཾ – དིཊྛེན ཝཱ སུཏེན ཝཱ པརིསངྐཱཡ ཝཱ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Vassaṃvuṭṭhāya bhikkhuniyā ubhatosaṅghe tīhi ṭhānehi pavāretabbaṃ – diṭṭhena vā sutena vā parisaṅkāya vā. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘གརུདྷམྨཾ ཨཛ྄ཛྷཱཔནྣཱཡ བྷིཀྑུནིཡཱ ཨུབྷཏོསངྒྷེ པཀྑམཱནཏྟཾ ཙརིཏབྦཾ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Garudhammaṃ ajjhāpannāya bhikkhuniyā ubhatosaṅghe pakkhamānattaṃ caritabbaṃ. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ སིཀྑམཱནཱཡ ཨུབྷཏོསངྒྷེ ཨུཔསམྤདཱ པརིཡེསིཏབྦཱ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Dve vassāni chasu dhammesu sikkhitasikkhāya sikkhamānāya ubhatosaṅghe upasampadā pariyesitabbā. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘ན ཀེནཙི པརིཡཱཡེན བྷིཀྑུནིཡཱ བྷིཀྑུ ཨཀྐོསིཏབྦོ པརིབྷཱསིཏབྦོ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Na kenaci pariyāyena bhikkhuniyā bhikkhu akkositabbo paribhāsitabbo. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘ཨཛྫཏགྒེ ཨོཝཊོ བྷིཀྑུནཱིནཾ བྷིཀྑཱུསུ ཝཙནཔཐོ, ཨནོཝཊོ བྷིཀྑཱུནཾ བྷིཀྑུནཱིསུ ཝཙནཔཐོ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ།
‘‘Ajjatagge ovaṭo bhikkhunīnaṃ bhikkhūsu vacanapatho, anovaṭo bhikkhūnaṃ bhikkhunīsu vacanapatho. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo.
‘‘སཙེ, ཨཱནནྡ, མཧཱཔཛཱཔཏཱི གོཏམཱི ཨིམེ ཨཊྛ གརུདྷམྨེ པཊིགྒཎྷཱཏི, སཱཝསྶཱ ཧོཏུ ཨུཔསམྤདཱ’’ཏི།
‘‘Sace, ānanda, mahāpajāpatī gotamī ime aṭṭha garudhamme paṭiggaṇhāti, sāvassā hotu upasampadā’’ti.
ཨཐ ཁོ ཨཱཡསྨཱ ཨཱནནྡོ བྷགཝཏོ སནྟིཀེ ཨིམེ ཨཊྛ གརུདྷམྨེ ཨུགྒཧེཏྭཱ ཡེན མཧཱཔཛཱཔཏཱི གོཏམཱི ཏེནུཔསངྐམི; ཨུཔསངྐམིཏྭཱ མཧཱཔཛཱཔཏིཾ གོཏམིཾ ཨེཏདཝོཙ –
Atha kho āyasmā ānando bhagavato santike ime aṭṭha garudhamme uggahetvā yena mahāpajāpatī gotamī tenupasaṅkami; upasaṅkamitvā mahāpajāpatiṃ gotamiṃ etadavoca –
‘‘སཙེ ཁོ ཏྭཾ, གོཏམི, ཨཊྛ གརུདྷམྨེ པཊིགྒཎྷེཡྻཱསི, སཱཝ ཏེ བྷཝིསྶཏི ཨུཔསམྤདཱ –
‘‘Sace kho tvaṃ, gotami, aṭṭha garudhamme paṭiggaṇheyyāsi, sāva te bhavissati upasampadā –
‘‘ཝསྶསཏཱུཔསམྤནྣཱཡ བྷིཀྑུནིཡཱ ཏདཧཱུཔསམྤནྣསྶ བྷིཀྑུནོ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀཏྟབྦཾ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ…པེ॰…།
‘‘Vassasatūpasampannāya bhikkhuniyā tadahūpasampannassa bhikkhuno abhivādanaṃ paccuṭṭhānaṃ añjalikammaṃ sāmīcikammaṃ kattabbaṃ. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo…pe….
‘‘ཨཛྫཏགྒེ ཨོཝཊོ བྷིཀྑུནཱིནཾ བྷིཀྑཱུསུ ཝཙནཔཐོ, ཨནོཝཊོ བྷིཀྑཱུནཾ བྷིཀྑུནཱིསུ ཝཙནཔཐོ། ཨཡམྤི དྷམྨོ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཡཱཝཛཱིཝཾ ཨནཏིཀྐམནཱིཡོ། སཙེ ཁོ ཏྭཾ, གོཏམི, ཨིམེ ཨཊྛ གརུདྷམྨེ པཊིགྒཎྷེཡྻཱསི, སཱཝ ཏེ བྷཝིསྶཏི ཨུཔསམྤདཱ’’ཏི།
‘‘Ajjatagge ovaṭo bhikkhunīnaṃ bhikkhūsu vacanapatho, anovaṭo bhikkhūnaṃ bhikkhunīsu vacanapatho. Ayampi dhammo sakkatvā garuṃ katvā mānetvā pūjetvā yāvajīvaṃ anatikkamanīyo. Sace kho tvaṃ, gotami, ime aṭṭha garudhamme paṭiggaṇheyyāsi, sāva te bhavissati upasampadā’’ti.
‘‘སེཡྻཐཱཔི , བྷནྟེ ཨཱནནྡ, ཨིཏྠཱི ཝཱ པུརིསོ ཝཱ དཧརོ ཡུཝཱ མཎྜནཀཛཱཏིཀོ 9 སཱིསཾནྷཱཏོ 10 ཨུཔྤལམཱལཾ ཝཱ ཝསྶིཀམཱལཾ ཝཱ ཨདྷིམུཏྟཀམཱལཾ 11 ཝཱ ལབྷིཏྭཱ ཨུབྷོཧི ཧཏྠེཧི པཊིགྒཧེཏྭཱ ཨུཏྟམངྒེ སིརསྨིཾ པཏིཊྛཱཔེཡྻ; ཨེཝམེཝཾ ཁོ ཨཧཾ, བྷནྟེ ཨཱནནྡ, ཨིམེ ཨཊྛ གརུདྷམྨེ པཊིགྒཎྷཱམི ཡཱཝཛཱིཝཾ ཨནཏིཀྐམནཱིཡེ’’ཏི།
‘‘Seyyathāpi , bhante ānanda, itthī vā puriso vā daharo yuvā maṇḍanakajātiko 12 sīsaṃnhāto 13 uppalamālaṃ vā vassikamālaṃ vā adhimuttakamālaṃ 14 vā labhitvā ubhohi hatthehi paṭiggahetvā uttamaṅge sirasmiṃ patiṭṭhāpeyya; evamevaṃ kho ahaṃ, bhante ānanda, ime aṭṭha garudhamme paṭiggaṇhāmi yāvajīvaṃ anatikkamanīye’’ti.
ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘པཊིགྒཧིཏཱ, བྷནྟེ, མཧཱཔཛཱཔཏིཡཱ གོཏམིཡཱ ཨཊྛ གརུདྷམྨཱ ཡཱཝཛཱིཝཾ ཨནཏིཀྐམནཱིཡཱ’’ཏི།
Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘paṭiggahitā, bhante, mahāpajāpatiyā gotamiyā aṭṭha garudhammā yāvajīvaṃ anatikkamanīyā’’ti.
‘‘སཙེ, ཨཱནནྡ, ནཱལབྷིསྶ མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛྫཾ, ཙིརཊྛིཏིཀཾ, ཨཱནནྡ, བྲཧྨཙརིཡཾ ཨབྷཝིསྶ, ཝསྶསཧསྶམེཝ སདྡྷམྨོ ཏིཊྛེཡྻ། ཡཏོ ཙ ཁོ, ཨཱནནྡ, མཱཏུགཱམོ ཏཐཱགཏཔྤཝེདིཏེ དྷམྨཝིནཡེ ཨགཱརསྨཱ ཨནགཱརིཡཾ པབྦཛིཏོ, ན དཱནི, ཨཱནནྡ, བྲཧྨཙརིཡཾ ཙིརཊྛིཏིཀཾ བྷཝིསྶཏི། པཉྩེཝ དཱནི, ཨཱནནྡ, ཝསྶསཏཱནི སདྡྷམྨོ ཋསྶཏི།
‘‘Sace, ānanda, nālabhissa mātugāmo tathāgatappavedite dhammavinaye agārasmā anagāriyaṃ pabbajjaṃ, ciraṭṭhitikaṃ, ānanda, brahmacariyaṃ abhavissa, vassasahassameva saddhammo tiṭṭheyya. Yato ca kho, ānanda, mātugāmo tathāgatappavedite dhammavinaye agārasmā anagāriyaṃ pabbajito, na dāni, ānanda, brahmacariyaṃ ciraṭṭhitikaṃ bhavissati. Pañceva dāni, ānanda, vassasatāni saddhammo ṭhassati.
‘‘སེཡྻཐཱཔི, ཨཱནནྡ, ཡཱནི ཀཱནིཙི ཀུལཱནི བཧུཏྠིཀཱནི 15 ཨཔྤཔུརིསཀཱནི, ཏཱནི སུཔྤདྷཾསིཡཱནི ཧོནྟི ཙོརེཧི ཀུམྦྷཏྠེནཀེཧི; ཨེཝམེཝཾ ཁོ, ཨཱནནྡ, ཡསྨིཾ དྷམྨཝིནཡེ ལབྷཏི མཱཏུགཱམོ ཨགཱརསྨཱ ཨནགཱརིཡཾ པབྦཛྫཾ, ན ཏཾ བྲཧྨཙརིཡཾ ཙིརཊྛིཏིཀཾ ཧོཏི།
‘‘Seyyathāpi, ānanda, yāni kānici kulāni bahutthikāni 16 appapurisakāni, tāni suppadhaṃsiyāni honti corehi kumbhatthenakehi; evamevaṃ kho, ānanda, yasmiṃ dhammavinaye labhati mātugāmo agārasmā anagāriyaṃ pabbajjaṃ, na taṃ brahmacariyaṃ ciraṭṭhitikaṃ hoti.
‘‘སེཡྻཐཱཔི , ཨཱནནྡ, སམྤནྣེ སཱལིཀྑེཏྟེ སེཏཊྛིཀཱ ནཱམ རོགཛཱཏི ནིཔཏཏི, ཨེཝཾ ཏཾ སཱལིཀྑེཏྟཾ ན ཙིརཊྛིཏིཀཾ ཧོཏི; ཨེཝམེཝཾ ཁོ, ཨཱནནྡ, ཡསྨིཾ དྷམྨཝིནཡེ ལབྷཏི མཱཏུགཱམོ ཨགཱརསྨཱ ཨནགཱརིཡཾ པབྦཛྫཾ, ན ཏཾ བྲཧྨཙརིཡཾ ཙིརཊྛིཏིཀཾ ཧོཏི།
‘‘Seyyathāpi , ānanda, sampanne sālikkhette setaṭṭhikā nāma rogajāti nipatati, evaṃ taṃ sālikkhettaṃ na ciraṭṭhitikaṃ hoti; evamevaṃ kho, ānanda, yasmiṃ dhammavinaye labhati mātugāmo agārasmā anagāriyaṃ pabbajjaṃ, na taṃ brahmacariyaṃ ciraṭṭhitikaṃ hoti.
‘‘སེཡྻཐཱཔི , ཨཱནནྡ, སམྤནྣེ ཨུཙྪུཀྑེཏྟེ མཉྫིཊྛིཀཱ 17 ནཱམ རོགཛཱཏི ནིཔཏཏི, ཨེཝཾ ཏཾ ཨུཙྪུཀྑེཏྟཾ ན ཙིརཊྛིཏིཀཾ ཧོཏི; ཨེཝམེཝཾ ཁོ, ཨཱནནྡ, ཡསྨིཾ དྷམྨཝིནཡེ ལབྷཏི མཱཏུགཱམོ ཨགཱརསྨཱ ཨནགཱརིཡཾ པབྦཛྫཾ, ན ཏཾ བྲཧྨཙརིཡཾ ཙིརཊྛིཏིཀཾ ཧོཏི།
‘‘Seyyathāpi , ānanda, sampanne ucchukkhette mañjiṭṭhikā 18 nāma rogajāti nipatati, evaṃ taṃ ucchukkhettaṃ na ciraṭṭhitikaṃ hoti; evamevaṃ kho, ānanda, yasmiṃ dhammavinaye labhati mātugāmo agārasmā anagāriyaṃ pabbajjaṃ, na taṃ brahmacariyaṃ ciraṭṭhitikaṃ hoti.
‘‘སེཡྻཐཱཔི , ཨཱནནྡ, པུརིསོ མཧཏོ ཏལཱ༹ཀསྶ པཊིཀཙྩེཝ 19 ཨཱལི༹ཾ བནྡྷེཡྻ ཡཱཝདེཝ ཨུདཀསྶ ཨནཏིཀྐམནཱཡ; ཨེཝམེཝཾ ཁོ, ཨཱནནྡ, མཡཱ པཊིཀཙྩེཝ བྷིཀྑུནཱིནཾ ཨཊྛ གརུདྷམྨཱ པཉྙཏྟཱ ཡཱཝཛཱིཝཾ ཨནཏིཀྐམནཱིཡཱ’’ཏི། པཋམཾ།
‘‘Seyyathāpi , ānanda, puriso mahato taḷākassa paṭikacceva 20 āḷiṃ bandheyya yāvadeva udakassa anatikkamanāya; evamevaṃ kho, ānanda, mayā paṭikacceva bhikkhunīnaṃ aṭṭha garudhammā paññattā yāvajīvaṃ anatikkamanīyā’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. གོཏམཱིསུཏྟཝཎྞནཱ • 1. Gotamīsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༣. གོཏམཱིསུཏྟཱདིཝཎྞནཱ • 1-3. Gotamīsuttādivaṇṇanā
