| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
2. д̣̇уд̇ияабан̣н̣аасагам̣
2. Dutiyapaṇṇāsakaṃ
(6) 1. г̇од̇амийваг̇г̇о
(6) 1. Gotamīvaggo
1. г̇од̇амийсуд̇д̇аван̣н̣анаа
1. Gotamīsuttavaṇṇanā
51. чадтасса батамз саггзсу вихарад̇ийд̇и батамаг̇аманзна г̇анд̇ваа вихарад̇и. махаабаж̇аабад̇ийд̇и буд̇д̇абаж̇ааяа жзва д̇хийд̇убаж̇ааяа жа маханд̇ад̇д̇аа звам̣лад̣̇д̇ханаамаа. язна бхаг̇аваа д̇знубасан̇гамийд̇и бхаг̇аваа габилабурам̣ г̇анд̇ваа батамамзва нанд̣̇ам̣ баб̣б̣ааж̇зси, сад̇д̇амз д̣̇ивасз раахулагумаарам̣. жумб̣адагагалахз (д̣̇ий. ни. адта. 2.331; сам̣. ни. адта. 1.1.37) бана убхаяанаг̇араваасигзсу яуд̣̇д̇хад̇т̇ааяа нигканд̇зсу сад̇т̇аа г̇анд̇ваа д̇з рааж̇аано сан̃н̃аабзд̇ваа ад̇д̇ад̣̇ан̣д̣асуд̇д̇ам̣ (су. ни. 941 аад̣̇аяо; махаани. 170 аад̣̇аяо) гат̇зси. рааж̇аано басийд̣̇ид̇ваа ад̣дхад̇ияасад̇з ад̣дхад̇ияасад̇з гумаарз ад̣̇ам̣су, д̇аани бан̃жа гумаарасад̇аани сад̇т̇у санд̇игз баб̣б̣аж̇им̣су, ат̇а нзсам̣ баж̇аабад̇ияо саасанам̣ бзсзд̇ваа анабхирад̇им̣ уббаад̣̇аяим̣су. сад̇т̇аа д̇зсам̣ анабхирад̇ияаа уббаннабхаавам̣ н̃ад̇ваа д̇з бан̃жасад̇з д̣̇ахарабхигкуу гун̣аалад̣̇ахам̣ нзд̇ваа ад̇д̇ано гун̣аалагаалз нисиннабуб̣б̣з баасаан̣ад̇алз нисийд̣̇ид̇ваа гун̣аалаж̇аад̇агагат̇ааяа (ж̇аа. 2.21.гун̣аалаж̇аад̇ага) д̇зсам̣ анабхирад̇им̣ винод̣̇зд̇ваа саб̣б̣зби д̇з сод̇аабад̇д̇ипалз бад̇идтаабзси, буна махааванам̣ аанзд̇ваа арахад̇д̇апалзд̇и. д̇зсам̣ жид̇д̇аж̇аананад̇т̇ам̣ бунаби баж̇аабад̇ияо саасанам̣ бахин̣им̣су. д̇з ‘‘абхаб̣б̣аа маяам̣ гхарааваасассаа’’д̇и бадисаасанам̣ бахин̣им̣су. д̇аа ‘‘на д̣̇аани амхаагам̣ гхарам̣ г̇анд̇ум̣ яуд̇д̇ам̣, махаабаж̇аабад̇ияаа санд̇игам̣ г̇анд̇ваа баб̣б̣аж̇ж̇ам̣ ануж̇аанаабзд̇ваа баб̣б̣аж̇иссаамаа’’д̇и бан̃жасад̇ааби махаабаж̇аабад̇им̣ убасан̇гамид̇ваа ‘‘аяяз, амхаагам̣ баб̣б̣аж̇ж̇ам̣ ануж̇аанаабзт̇аа’’д̇и аахам̣су. махаабаж̇аабад̇ий д̇аа ид̇т̇ияо г̇ахзд̇ваа язна бхаг̇аваа д̇знубасан̇гами. сзд̇ажчад̇д̇асса хздтаа ран̃н̃о бариниб̣б̣уд̇агаалз убасан̇гамийд̇иби вад̣̇анд̇иязва.
51. Chaṭṭhassa paṭhame sakkesu viharatīti paṭhamagamanena gantvā viharati. Mahāpajāpatīti puttapajāya ceva dhītupajāya ca mahantattā evaṃladdhanāmā. Yena bhagavā tenupasaṅkamīti bhagavā kapilapuraṃ gantvā paṭhamameva nandaṃ pabbājesi, sattame divase rāhulakumāraṃ. Cumbaṭakakalahe (dī. ni. aṭṭha. 2.331; saṃ. ni. aṭṭha. 1.1.37) pana ubhayanagaravāsikesu yuddhatthāya nikkhantesu satthā gantvā te rājāno saññāpetvā attadaṇḍasuttaṃ (su. ni. 941 ādayo; mahāni. 170 ādayo) kathesi. Rājāno pasīditvā aḍḍhatiyasate aḍḍhatiyasate kumāre adaṃsu, tāni pañca kumārasatāni satthu santike pabbajiṃsu, atha nesaṃ pajāpatiyo sāsanaṃ pesetvā anabhiratiṃ uppādayiṃsu. Satthā tesaṃ anabhiratiyā uppannabhāvaṃ ñatvā te pañcasate daharabhikkhū kuṇāladahaṃ netvā attano kuṇālakāle nisinnapubbe pāsāṇatale nisīditvā kuṇālajātakakathāya (jā. 2.21.kuṇālajātaka) tesaṃ anabhiratiṃ vinodetvā sabbepi te sotāpattiphale patiṭṭhāpesi, puna mahāvanaṃ ānetvā arahattaphaleti. Tesaṃ cittajānanatthaṃ punapi pajāpatiyo sāsanaṃ pahiṇiṃsu. Te ‘‘abhabbā mayaṃ gharāvāsassā’’ti paṭisāsanaṃ pahiṇiṃsu. Tā ‘‘na dāni amhākaṃ gharaṃ gantuṃ yuttaṃ, mahāpajāpatiyā santikaṃ gantvā pabbajjaṃ anujānāpetvā pabbajissāmā’’ti pañcasatāpi mahāpajāpatiṃ upasaṅkamitvā ‘‘ayye, amhākaṃ pabbajjaṃ anujānāpethā’’ti āhaṃsu. Mahāpajāpatī tā itthiyo gahetvā yena bhagavā tenupasaṅkami. Setacchattassa heṭṭhā rañño parinibbutakāle upasaṅkamītipi vadantiyeva.
алам̣ г̇од̇ами, маа д̇з ружжийд̇и гасмаа бадигкиби, нану саб̣б̣зсамби б̣уд̣̇д̇хаанам̣ жад̇ассо барисаа хонд̇ийд̇и? гаамам̣ хонд̇и, гиламзд̇ваа бана анзгаваарам̣ яаажид̇з анун̃н̃аад̇ам̣ баб̣б̣аж̇ж̇ам̣ ‘‘д̣̇угкзна лад̣̇д̇хаа’’д̇и саммаа барибаалзссанд̇ийд̇и г̇арум̣ гад̇ваа анун̃н̃аад̇угаамо бадигкиби. баггаамийд̇и буна габилабурамзва баависи. яат̇аабхиранд̇ам̣ вихарид̇ваад̇и б̣од̇ханзяяасад̇д̇аанам̣ убаниссаяам̣ ологзнд̇о яат̇ааж̇жхаасаяанз вихарид̇ваа. жааригам̣ баггаамийд̇и махааж̇анасан̇г̇ахам̣ гаронд̇о уд̇д̇амааяа б̣уд̣̇д̇хасирияаа анобамзна б̣уд̣̇д̇хавилаасзна ад̇урид̇ажааригам̣ баггаами.
Alaṃ gotami, mā te ruccīti kasmā paṭikkhipi, nanu sabbesampi buddhānaṃ catasso parisā hontīti? Kāmaṃ honti, kilametvā pana anekavāraṃ yācite anuññātaṃ pabbajjaṃ ‘‘dukkhena laddhā’’ti sammā paripālessantīti garuṃ katvā anuññātukāmo paṭikkhipi. Pakkāmīti puna kapilapurameva pāvisi. Yathābhirantaṃviharitvāti bodhaneyyasattānaṃ upanissayaṃ olokento yathājjhāsayane viharitvā. Cārikaṃ pakkāmīti mahājanasaṅgahaṃ karonto uttamāya buddhasiriyā anopamena buddhavilāsena aturitacārikaṃ pakkāmi.
самб̣ахулаахи саагияаанийхи сад̣̇д̇хинд̇и анд̇онивзсанамхиязва д̣̇асаб̣алам̣ уд̣̇д̣̇исса баб̣б̣аж̇ж̇аавзсам̣ г̇ахзд̇ваа бан̃жасад̇аа саагияаанияо баб̣б̣аж̇ж̇аавзсам̣язва г̇аахаабзд̇ваа саб̣б̣аахиби д̇аахи самб̣ахулаахи саагияаанийхи сад̣̇д̇хим̣. жааригам̣ баггаамийд̇и г̇аманам̣ абхинийхари. г̇аманаабхинийхаран̣агаалз бана д̇аа сукумаалаа рааж̇ид̇т̇ияо бад̣̇асаа г̇анд̇ум̣ на сагкиссанд̇ийд̇и саагияаголияарааж̇аано сован̣н̣асивигааяо убадтаабаяим̣су. д̇аа бана ‘‘яаанз ааруяха г̇ажчанд̇ийд̇и сад̇т̇ари аг̇аараво гад̇о ход̇ий’’д̇и згабан̣н̣аасаяож̇анигам̣ бад̣̇асаава бадибаж̇ж̇им̣су. рааж̇ааноби бурад̇о жа бажчад̇о жа аарагкам̣ сам̣вид̣̇ахаабзд̇ваа д̇ан̣д̣уласаббид̇злаад̣̇ийнам̣ сагадаани буураабзд̇ваа ‘‘г̇ад̇адтаанз г̇ад̇адтаанз аахаарам̣ бадияаад̣̇зт̇аа’’д̇и бурисз бзсаяим̣су. суунзхи баад̣̇зхийд̇и д̇аасан̃хи сукумаалад̇д̇аа баад̣̇зсу зго подо удтзд̇и, зго бхиж̇ж̇ад̇и. убхо баад̣̇аа гад̇агадтисамбаригин̣н̣аа вияа худ̇ваа уд̣̇д̇хумаад̇аа ж̇аад̇аа. д̇зна вуд̇д̇ам̣ – ‘‘суунзхи баад̣̇зхий’’д̇и. б̣ахид̣̇ваарагодтагзд̇и д̣̇ваарагодтагад̇о б̣ахи. гасмаа банзвам̣ тид̇аад̇и? звам̣ гирассаа ахоси – ‘‘ахам̣ д̇ат̇ааг̇ад̇зна ананун̃н̃аад̇аа саяамзва баб̣б̣аж̇ж̇аавзсам̣ аг̇г̇ахзсим̣, звам̣ г̇ахид̇абхааво жа бана мз сагалаж̇амб̣уд̣̇ийбз баагадо ж̇аад̇о. сажз сад̇т̇аа баб̣б̣аж̇ж̇ам̣ ануж̇аанаад̇и, ижжзд̇ам̣ гусалам̣. сажз бана наануж̇ааниссад̇и, махад̇ий г̇арахаа бхависсад̇ий’’д̇и вихаарам̣ бависид̇ум̣ асаггонд̇ий род̣̇амаанаава адтааси.
Sambahulāhi sākiyānīhi saddhinti antonivesanamhiyeva dasabalaṃ uddissa pabbajjāvesaṃ gahetvā pañcasatā sākiyāniyo pabbajjāvesaṃyeva gāhāpetvā sabbāhipi tāhi sambahulāhi sākiyānīhi saddhiṃ. Cārikaṃ pakkāmīti gamanaṃ abhinīhari. Gamanābhinīharaṇakāle pana tā sukhumālā rājitthiyo padasā gantuṃ na sakkhissantīti sākiyakoliyarājāno sovaṇṇasivikāyo upaṭṭhāpayiṃsu. Tā pana ‘‘yāne āruyha gacchantīti satthari agāravo kato hotī’’ti ekapaṇṇāsayojanikaṃ padasāva paṭipajjiṃsu. Rājānopi purato ca pacchato ca ārakkhaṃ saṃvidahāpetvā taṇḍulasappitelādīnaṃ sakaṭāni pūrāpetvā ‘‘gataṭṭhāne gataṭṭhāne āhāraṃ paṭiyādethā’’ti purise pesayiṃsu. Sūnehi pādehīti tāsañhi sukhumālattā pādesu eko phoṭo uṭṭheti, eko bhijjati. Ubho pādā katakaṭṭhisamparikiṇṇā viya hutvā uddhumātā jātā. Tena vuttaṃ – ‘‘sūnehi pādehī’’ti. Bahidvārakoṭṭhaketi dvārakoṭṭhakato bahi. Kasmā panevaṃ ṭhitāti? Evaṃ kirassā ahosi – ‘‘ahaṃ tathāgatena ananuññātā sayameva pabbajjāvesaṃ aggahesiṃ, evaṃ gahitabhāvo ca pana me sakalajambudīpe pākaṭo jāto. Sace satthā pabbajjaṃ anujānāti, iccetaṃ kusalaṃ. Sace pana nānujānissati, mahatī garahā bhavissatī’’ti vihāraṃ pavisituṃ asakkontī rodamānāva aṭṭhāsi.
гим̣ ну д̇вам̣ г̇од̇амийд̇и гим̣ ну рааж̇агулаанам̣ вибад̇д̇и уббаннаа, гзна д̇вам̣ гааран̣зна звам̣ виван̣н̣абхаавам̣ бад̇д̇аа, суунзхи баад̣̇зхи…бз… тид̇аад̇и. ан̃н̃знаби барияааязнаад̇и ан̃н̃знаби гааран̣зна. б̣ахугаараа, бханд̇зд̇иаад̣̇инаа д̇ассаа г̇ун̣ам̣ гат̇зд̇ваа буна баб̣б̣аж̇ж̇ам̣ яаажанд̇о звамааха. сад̇т̇ааби ‘‘ид̇т̇ияо наама барид̇д̇абан̃н̃аа, згаяаажид̇амад̇д̇зна баб̣б̣аж̇ж̇ааяа анун̃н̃аад̇ааяа на мама саасанам̣ г̇арум̣ гад̇ваа г̇ан̣хиссанд̇ий’’д̇и д̇игкад̇д̇ум̣ бадигкибид̇ваа ид̣̇аани г̇арум̣ гад̇ваа г̇аахаабзд̇угаамад̇ааяа сажз, аананд̣̇а, махаабаж̇аабад̇ий г̇од̇амий адта г̇аруд̇хаммз бадиг̇г̇ан̣хаад̇и, саава’ссаа ход̇у убасамбад̣̇аад̇иаад̣̇имааха. д̇ад̇т̇а саавассаад̇и саа зва ассаа баб̣б̣аж̇ж̇ааби убасамбад̣̇ааби ход̇у.
Kiṃ nu tvaṃ gotamīti kiṃ nu rājakulānaṃ vipatti uppannā, kena tvaṃ kāraṇena evaṃ vivaṇṇabhāvaṃ pattā, sūnehi pādehi…pe… ṭhitāti. Aññenapi pariyāyenāti aññenapi kāraṇena. Bahukārā, bhantetiādinā tassā guṇaṃ kathetvā puna pabbajjaṃ yācanto evamāha. Satthāpi ‘‘itthiyo nāma parittapaññā, ekayācitamattena pabbajjāya anuññātāya na mama sāsanaṃ garuṃ katvā gaṇhissantī’’ti tikkhattuṃ paṭikkhipitvā idāni garuṃ katvā gāhāpetukāmatāya sace, ānanda, mahāpajāpatī gotamīaṭṭha garudhamme paṭiggaṇhāti, sāva’ssā hotuupasampadātiādimāha. Tattha sāvassāti sā eva assā pabbajjāpi upasampadāpi hotu.
д̇ад̣̇ахуубасамбаннассаад̇и д̇ам̣д̣̇ивасам̣ убасамбаннасса. абхиваад̣̇анам̣ бажжудтаанам̣ ан̃ж̇алигаммам̣ саамийжигаммам̣ гад̇д̇аб̣б̣анд̇и омаанаад̇имаанз агад̇ваа бан̃жабад̇идтид̇зна абхиваад̣̇анам̣, аасанаа бажжудтааяа бажжуг̇г̇аманавасзна бажжудтаанам̣, д̣̇асанакз самод̇хаанзд̇ваа ан̃ж̇алигаммам̣, аасанабан̃н̃аабанаб̣ийж̇анаад̣̇игам̣ анужчавигагаммасан̇каад̇ам̣ саамийжигамман̃жа гад̇аб̣б̣ам̣. абхигкугз ааваасзд̇и яад̇т̇а васанд̇ияаа ананд̇арааязна оваад̣̇ад̇т̇ааяа убасан̇гаманадтаанз оваад̣̇ад̣̇ааяаго аажарияо над̇т̇и, аяам̣ абхигкуго ааваасо наама. зваруубз ааваасз вассам̣ на убаг̇анд̇аб̣б̣ам̣. анвад̣дхамаасанд̇и анубосат̇игам̣. оваад̣̇уубасан̇гамананд̇и оваад̣̇ад̇т̇ааяа убасан̇гаманам̣. д̣̇идтзнаад̇и жагкунаа д̣̇идтзна. суд̇знаад̇и сод̇зна суд̇зна. барисан̇гааяаад̇и д̣̇идтасуд̇авасзна барисан̇гид̇зна. г̇аруд̇хамманд̇и г̇аругам̣ сан̇гхаад̣̇исзсаабад̇д̇им̣. багкамаанад̇д̇анд̇и ануунаани баннараса д̣̇ивасаани маанад̇д̇ам̣. часу д̇хаммзсууд̇и вигаалабхож̇анажчадтзсу сигкаабад̣̇зсу. сигкид̇асигкааяаад̇и згасигкамби акан̣д̣ам̣ гад̇ваа буурид̇асигкааяа. аггосид̇аб̣б̣о барибхаасид̇аб̣б̣од̇и д̣̇асаннам̣ аггосавад̇т̇уунам̣ ан̃н̃ад̇арзна аггосавад̇т̇унаа на аггосид̇аб̣б̣о, бхаяуубад̣̇ам̣санааяа яааяа гааяажи барибхаасааяа на барибхаасид̇аб̣б̣о.
Tadahūpasampannassāti taṃdivasaṃ upasampannassa. Abhivādanaṃ paccuṭṭhānaṃ añjalikammaṃ sāmīcikammaṃ kattabbanti omānātimāne akatvā pañcapatiṭṭhitena abhivādanaṃ, āsanā paccuṭṭhāya paccuggamanavasena paccuṭṭhānaṃ, dasanakhe samodhānetvā añjalikammaṃ, āsanapaññāpanabījanādikaṃ anucchavikakammasaṅkhātaṃ sāmīcikammañca katabbaṃ. Abhikkhuke āvāseti yattha vasantiyā anantarāyena ovādatthāya upasaṅkamanaṭṭhāne ovādadāyako ācariyo natthi, ayaṃ abhikkhuko āvāso nāma. Evarūpe āvāse vassaṃ na upagantabbaṃ. Anvaḍḍhamāsanti anuposathikaṃ. Ovādūpasaṅkamananti ovādatthāya upasaṅkamanaṃ. Diṭṭhenāti cakkhunā diṭṭhena. Sutenāti sotena sutena. Parisaṅkāyāti diṭṭhasutavasena parisaṅkitena. Garudhammanti garukaṃ saṅghādisesāpattiṃ. Pakkhamānattanti anūnāni pannarasa divasāni mānattaṃ. Chasu dhammesūti vikālabhojanacchaṭṭhesu sikkhāpadesu. Sikkhitasikkhāyāti ekasikkhampi akhaṇḍaṃ katvā pūritasikkhāya. Akkositabbo paribhāsitabboti dasannaṃ akkosavatthūnaṃ aññatarena akkosavatthunā na akkositabbo, bhayūpadaṃsanāya yāya kāyaci paribhāsāya na paribhāsitabbo.
овадо бхигкунийнам̣ бхигкуусу важанабат̇од̇и оваад̣̇аанусаасанад̇хаммагат̇аасан̇каад̇о важанабат̇о бхигкунийнам̣ бхигкуусу оварид̇о бихид̇о, на бхигкунияаа гожи бхигку овад̣̇ид̇аб̣б̣о анусаасид̇аб̣б̣о ваа ‘‘бханд̇з, бораан̣агад̇т̇зраа ид̣̇ам̣ жийваравад̇д̇ам̣ буураяим̣суу’’д̇и звам̣ бана бавзн̣ивасзна гат̇зд̇ум̣ ваддад̇и. ановадо бхигкуунам̣ бхигкунийсу важанабат̇од̇и бхигкуунам̣ бана бхигкунийсу важанабат̇о аниваарид̇о, яат̇ааружи овад̣̇ид̇ум̣ анусаасид̇ум̣ д̇хаммагат̇ам̣ гат̇зд̇унд̇и аяамзд̇т̇а сан̇кзбо, вид̇т̇аарад̇о банзсаа г̇аруд̇хаммагат̇аа саманд̇абаасаад̣̇игааяа винаяасам̣ван̣н̣анааяа (баажи. адта. 148) вуд̇д̇анаязнзва взд̣̇ид̇аб̣б̣аа.
Ovaṭo bhikkhunīnaṃ bhikkhūsu vacanapathoti ovādānusāsanadhammakathāsaṅkhāto vacanapatho bhikkhunīnaṃ bhikkhūsu ovarito pihito, na bhikkhuniyā koci bhikkhu ovaditabbo anusāsitabbo vā ‘‘bhante, porāṇakattherā idaṃ cīvaravattaṃ pūrayiṃsū’’ti evaṃ pana paveṇivasena kathetuṃ vaṭṭati. Anovaṭobhikkhūnaṃ bhikkhunīsu vacanapathoti bhikkhūnaṃ pana bhikkhunīsu vacanapatho anivārito, yathāruci ovadituṃ anusāsituṃ dhammakathaṃ kathetunti ayamettha saṅkhepo, vitthārato panesā garudhammakathā samantapāsādikāya vinayasaṃvaṇṇanāya (pāci. aṭṭha. 148) vuttanayeneva veditabbā.
имз бана адта г̇аруд̇хаммз сад̇т̇у санд̇игз уг̇г̇ахзд̇ваа т̇зрзна ад̇д̇ано аарожияамаанз суд̇ваава махаабаж̇аабад̇ияаа д̇аава маханд̇ам̣ д̣̇оманассам̣ кан̣зна бадиббассамбхи, анод̇ад̇д̇ад̣̇ахад̇о аабхад̇зна сийд̇уд̣̇агасса гхадасад̇зна мад̇т̇агз барисид̇д̇аа вияа виг̇ад̇абарил̣аахаа ад̇д̇аманаа худ̇ваа г̇аруд̇хаммабадиг̇г̇ахан̣зна уббаннабийд̇ибаамож̇ж̇ам̣ аавигаронд̇ий сзяяат̇ааби, бханд̇зд̇иаад̣̇игам̣ уд̣̇аанам̣ уд̣̇аанзси.
Ime pana aṭṭha garudhamme satthu santike uggahetvā therena attano ārociyamāne sutvāva mahāpajāpatiyā tāva mahantaṃ domanassaṃ khaṇena paṭippassambhi, anotattadahato ābhatena sītudakassa ghaṭasatena matthake parisittā viya vigatapariḷāhā attamanā hutvā garudhammapaṭiggahaṇena uppannapītipāmojjaṃ āvikarontī seyyathāpi, bhantetiādikaṃ udānaṃ udānesi.
гумбхад̇т̇знагзхийд̇и гумбхз д̣̇ийбам̣ ж̇аалзд̇ваа д̇зна аалогзна барагхарз бхан̣д̣ам̣ вижинид̇ваа т̇знагажорзхи. сзд̇адтигаа наама рог̇аж̇аад̇ийд̇и зго баан̣аго наал̣амаж̇жхаг̇ад̇ам̣ ган̣д̣ам̣ виж̇жхад̇и, язна вид̣̇д̇хаа ган̣д̣аа нигканд̇амби саалисийсам̣ кийрам̣ г̇ахзд̇ум̣ на саггод̇и. ман̃ж̇идтигаа наама рог̇аж̇аад̇ийд̇и ужчуунам̣ анд̇орад̇д̇абхааво.
Kumbhatthenakehīti kumbhe dīpaṃ jāletvā tena ālokena paraghare bhaṇḍaṃ vicinitvā thenakacorehi. Setaṭṭhikā nāma rogajātīti eko pāṇako nāḷamajjhagataṃ kaṇḍaṃ vijjhati, yena viddhā kaṇḍā nikkhantampi sālisīsaṃ khīraṃ gahetuṃ na sakkoti. Mañjiṭṭhikā nāma rogajātīti ucchūnaṃ antorattabhāvo.
махад̇о д̇ал̣аагасса бадигажжзва аал̣инд̇и иминаа бана зд̇амад̇т̇ам̣ д̣̇ассзд̇и – яат̇аа махад̇о д̇ал̣аагасса баал̣ияаа аб̣ад̣̇д̇хааяаби гин̃жи уд̣̇агам̣ д̇идтад̇зва, батамамзва б̣ад̣̇д̇хааяа бана яам̣ аб̣ад̣̇д̇хабажжаяаа на д̇идтзяяа, д̇амби д̇идтзяяа, звамзва яз имз ануббаннз вад̇т̇усмим̣ бадигажжзва анад̇иггаманад̇т̇ааяа г̇аруд̇хаммаа бан̃н̃ад̇д̇аа, д̇зсу абан̃н̃ад̇д̇зсу маад̇уг̇аамасса баб̣б̣аж̇ид̇ад̇д̇аа бан̃жа вассасад̇аани сад̣̇д̇хаммо д̇идтзяяа. бадигажжзва бан̃н̃ад̇д̇ад̇д̇аа бана абарааниби бан̃жа вассасад̇аани тассад̇ийд̇и звам̣ батамам̣ вуд̇д̇авассасахассамзва тассад̇и. вассасахассанд̇и жзд̇ам̣ бадисамбхид̣̇аабабхзд̣̇аббад̇д̇акийн̣аасаваанам̣ васзнзва вуд̇д̇ам̣, д̇ад̇о бана уд̇д̇ариби сугкавибассагакийн̣аасававасзна вассасахассам̣, анааг̇аамивасзна вассасахассам̣, сагад̣̇ааг̇аамивасзна вассасахассам̣, сод̇аабаннавасзна вассасахассанд̇и звам̣ бан̃жавассасахассаани бадивзд̇хасад̣̇д̇хаммо тассад̇и. барияад̇д̇ид̇хаммоби д̇ааниязва. на хи барияад̇д̇ияаа асад̇и бадивзд̇хо ад̇т̇и, нааби барияад̇д̇ияаа сад̇и бадивзд̇хо на ход̇и. лин̇г̇ам̣ бана барияад̇д̇ияаа анд̇арахид̇ааяаби жирам̣ бавад̇д̇иссад̇ийд̇и.
Mahato taḷākassa paṭikacceva āḷinti iminā pana etamatthaṃ dasseti – yathā mahato taḷākassa pāḷiyā abaddhāyapi kiñci udakaṃ tiṭṭhateva, paṭhamameva baddhāya pana yaṃ abaddhapaccayā na tiṭṭheyya, tampi tiṭṭheyya, evameva ye ime anuppanne vatthusmiṃ paṭikacceva anatikkamanatthāya garudhammā paññattā, tesu apaññattesu mātugāmassa pabbajitattā pañca vassasatāni saddhammo tiṭṭheyya. Paṭikacceva paññattattā pana aparānipi pañca vassasatāni ṭhassatīti evaṃ paṭhamaṃ vuttavassasahassameva ṭhassati. Vassasahassanti cetaṃ paṭisambhidāpabhedappattakhīṇāsavānaṃ vaseneva vuttaṃ, tato pana uttaripi sukkhavipassakakhīṇāsavavasena vassasahassaṃ, anāgāmivasena vassasahassaṃ, sakadāgāmivasena vassasahassaṃ, sotāpannavasena vassasahassanti evaṃ pañcavassasahassāni paṭivedhasaddhammo ṭhassati. Pariyattidhammopi tāniyeva. Na hi pariyattiyā asati paṭivedho atthi, nāpi pariyattiyā sati paṭivedho na hoti. Liṅgaṃ pana pariyattiyā antarahitāyapi ciraṃ pavattissatīti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. г̇од̇амийсуд̇д̇ам̣ • 1. Gotamīsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1-3. г̇од̇амийсуд̇д̇аад̣̇иван̣н̣анаа • 1-3. Gotamīsuttādivaṇṇanā
