| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༢. དུཏིཡཔཎྞཱསཀཾ
2. Dutiyapaṇṇāsakaṃ
(༦) ༡. གོཏམཱིཝགྒོ
(6) 1. Gotamīvaggo
༡. གོཏམཱིསུཏྟཝཎྞནཱ
1. Gotamīsuttavaṇṇanā
༥༡. ཚཊྛསྶ པཋམེ སཀྐེསུ ཝིཧརཏཱིཏི པཋམགམནེན གནྟྭཱ ཝིཧརཏི། མཧཱཔཛཱཔཏཱིཏི པུཏྟཔཛཱཡ ཙེཝ དྷཱིཏུཔཛཱཡ ཙ མཧནྟཏྟཱ ཨེཝཾལདྡྷནཱམཱ། ཡེན བྷགཝཱ ཏེནུཔསངྐམཱིཏི བྷགཝཱ ཀཔིལཔུརཾ གནྟྭཱ པཋམམེཝ ནནྡཾ པབྦཱཛེསི, སཏྟམེ དིཝསེ རཱཧུལཀུམཱརཾ། ཙུམྦཊཀཀལཧེ (དཱི॰ ནི॰ ཨཊྛ॰ ༢.༣༣༡; སཾ॰ ནི॰ ཨཊྛ॰ ༡.༡.༣༧) པན ཨུབྷཡནགརཝཱསིཀེསུ ཡུདྡྷཏྠཱཡ ནིཀྑནྟེསུ སཏྠཱ གནྟྭཱ ཏེ རཱཛཱནོ སཉྙཱཔེཏྭཱ ཨཏྟདཎྜསུཏྟཾ (སུ॰ ནི॰ ༩༤༡ ཨཱདཡོ; མཧཱནི॰ ༡༧༠ ཨཱདཡོ) ཀཐེསི། རཱཛཱནོ པསཱིདིཏྭཱ ཨཌྜྷཏིཡསཏེ ཨཌྜྷཏིཡསཏེ ཀུམཱརེ ཨདཾསུ, ཏཱནི པཉྩ ཀུམཱརསཏཱནི སཏྠུ སནྟིཀེ པབྦཛིཾསུ, ཨཐ ནེསཾ པཛཱཔཏིཡོ སཱསནཾ པེསེཏྭཱ ཨནབྷིརཏིཾ ཨུཔྤཱདཡིཾསུ། སཏྠཱ ཏེསཾ ཨནབྷིརཏིཡཱ ཨུཔྤནྣབྷཱཝཾ ཉཏྭཱ ཏེ པཉྩསཏེ དཧརབྷིཀྑཱུ ཀུཎཱལདཧཾ ནེཏྭཱ ཨཏྟནོ ཀུཎཱལཀཱལེ ནིསིནྣཔུབྦེ པཱསཱཎཏལེ ནིསཱིདིཏྭཱ ཀུཎཱལཛཱཏཀཀཐཱཡ (ཛཱ॰ ༢.༢༡.ཀུཎཱལཛཱཏཀ) ཏེསཾ ཨནབྷིརཏིཾ ཝིནོདེཏྭཱ སབྦེཔི ཏེ སོཏཱཔཏྟིཕལེ པཏིཊྛཱཔེསི, པུན མཧཱཝནཾ ཨཱནེཏྭཱ ཨརཧཏྟཕལེཏི། ཏེསཾ ཙིཏྟཛཱནནཏྠཾ པུནཔི པཛཱཔཏིཡོ སཱསནཾ པཧིཎིཾསུ། ཏེ ‘‘ཨབྷབྦཱ མཡཾ གྷརཱཝཱསསྶཱ’’ཏི པཊིསཱསནཾ པཧིཎིཾསུ། ཏཱ ‘‘ན དཱནི ཨམྷཱཀཾ གྷརཾ གནྟུཾ ཡུཏྟཾ, མཧཱཔཛཱཔཏིཡཱ སནྟིཀཾ གནྟྭཱ པབྦཛྫཾ ཨནུཛཱནཱཔེཏྭཱ པབྦཛིསྶཱམཱ’’ཏི པཉྩསཏཱཔི མཧཱཔཛཱཔཏིཾ ཨུཔསངྐམིཏྭཱ ‘‘ཨཡྻེ, ཨམྷཱཀཾ པབྦཛྫཾ ཨནུཛཱནཱཔེཐཱ’’ཏི ཨཱཧཾསུ། མཧཱཔཛཱཔཏཱི ཏཱ ཨིཏྠིཡོ གཧེཏྭཱ ཡེན བྷགཝཱ ཏེནུཔསངྐམི། སེཏཙྪཏྟསྶ ཧེཊྛཱ རཉྙོ པརིནིབྦུཏཀཱལེ ཨུཔསངྐམཱིཏིཔི ཝདནྟིཡེཝ།
51. Chaṭṭhassa paṭhame sakkesu viharatīti paṭhamagamanena gantvā viharati. Mahāpajāpatīti puttapajāya ceva dhītupajāya ca mahantattā evaṃladdhanāmā. Yena bhagavā tenupasaṅkamīti bhagavā kapilapuraṃ gantvā paṭhamameva nandaṃ pabbājesi, sattame divase rāhulakumāraṃ. Cumbaṭakakalahe (dī. ni. aṭṭha. 2.331; saṃ. ni. aṭṭha. 1.1.37) pana ubhayanagaravāsikesu yuddhatthāya nikkhantesu satthā gantvā te rājāno saññāpetvā attadaṇḍasuttaṃ (su. ni. 941 ādayo; mahāni. 170 ādayo) kathesi. Rājāno pasīditvā aḍḍhatiyasate aḍḍhatiyasate kumāre adaṃsu, tāni pañca kumārasatāni satthu santike pabbajiṃsu, atha nesaṃ pajāpatiyo sāsanaṃ pesetvā anabhiratiṃ uppādayiṃsu. Satthā tesaṃ anabhiratiyā uppannabhāvaṃ ñatvā te pañcasate daharabhikkhū kuṇāladahaṃ netvā attano kuṇālakāle nisinnapubbe pāsāṇatale nisīditvā kuṇālajātakakathāya (jā. 2.21.kuṇālajātaka) tesaṃ anabhiratiṃ vinodetvā sabbepi te sotāpattiphale patiṭṭhāpesi, puna mahāvanaṃ ānetvā arahattaphaleti. Tesaṃ cittajānanatthaṃ punapi pajāpatiyo sāsanaṃ pahiṇiṃsu. Te ‘‘abhabbā mayaṃ gharāvāsassā’’ti paṭisāsanaṃ pahiṇiṃsu. Tā ‘‘na dāni amhākaṃ gharaṃ gantuṃ yuttaṃ, mahāpajāpatiyā santikaṃ gantvā pabbajjaṃ anujānāpetvā pabbajissāmā’’ti pañcasatāpi mahāpajāpatiṃ upasaṅkamitvā ‘‘ayye, amhākaṃ pabbajjaṃ anujānāpethā’’ti āhaṃsu. Mahāpajāpatī tā itthiyo gahetvā yena bhagavā tenupasaṅkami. Setacchattassa heṭṭhā rañño parinibbutakāle upasaṅkamītipi vadantiyeva.
ཨལཾ གོཏམི, མཱ ཏེ རུཙྩཱིཏི ཀསྨཱ པཊིཀྑིཔི, ནནུ སབྦེསམྤི བུདྡྷཱནཾ ཙཏསྶོ པརིསཱ ཧོནྟཱིཏི? ཀཱམཾ ཧོནྟི, ཀིལམེཏྭཱ པན ཨནེཀཝཱརཾ ཡཱཙིཏེ ཨནུཉྙཱཏཾ པབྦཛྫཾ ‘‘དུཀྑེན ལདྡྷཱ’’ཏི སམྨཱ པརིཔཱལེསྶནྟཱིཏི གརུཾ ཀཏྭཱ ཨནུཉྙཱཏུཀཱམོ པཊིཀྑིཔི། པཀྐཱམཱིཏི པུན ཀཔིལཔུརམེཝ པཱཝིསི། ཡཐཱབྷིརནྟཾ ཝིཧརིཏྭཱཏི བོདྷནེཡྻསཏྟཱནཾ ཨུཔནིསྶཡཾ ཨོལོཀེནྟོ ཡཐཱཛ྄ཛྷཱསཡནེ ཝིཧརིཏྭཱ། ཙཱརིཀཾ པཀྐཱམཱིཏི མཧཱཛནསངྒཧཾ ཀརོནྟོ ཨུཏྟམཱཡ བུདྡྷསིརིཡཱ ཨནོཔམེན བུདྡྷཝིལཱསེན ཨཏུརིཏཙཱརིཀཾ པཀྐཱམི།
Alaṃ gotami, mā te ruccīti kasmā paṭikkhipi, nanu sabbesampi buddhānaṃ catasso parisā hontīti? Kāmaṃ honti, kilametvā pana anekavāraṃ yācite anuññātaṃ pabbajjaṃ ‘‘dukkhena laddhā’’ti sammā paripālessantīti garuṃ katvā anuññātukāmo paṭikkhipi. Pakkāmīti puna kapilapurameva pāvisi. Yathābhirantaṃviharitvāti bodhaneyyasattānaṃ upanissayaṃ olokento yathājjhāsayane viharitvā. Cārikaṃ pakkāmīti mahājanasaṅgahaṃ karonto uttamāya buddhasiriyā anopamena buddhavilāsena aturitacārikaṃ pakkāmi.
སམྦཧུལཱཧི སཱཀིཡཱནཱིཧི སདྡྷིནྟི ཨནྟོནིཝེསནམྷིཡེཝ དསབལཾ ཨུདྡིསྶ པབྦཛྫཱཝེསཾ གཧེཏྭཱ པཉྩསཏཱ སཱཀིཡཱནིཡོ པབྦཛྫཱཝེསཾཡེཝ གཱཧཱཔེཏྭཱ སབྦཱཧིཔི ཏཱཧི སམྦཧུལཱཧི སཱཀིཡཱནཱིཧི སདྡྷིཾ། ཙཱརིཀཾ པཀྐཱམཱིཏི གམནཾ ཨབྷིནཱིཧརི། གམནཱབྷིནཱིཧརཎཀཱལེ པན ཏཱ སུཁུམཱལཱ རཱཛིཏྠིཡོ པདསཱ གནྟུཾ ན སཀྑིསྶནྟཱིཏི སཱཀིཡཀོལིཡརཱཛཱནོ སོཝཎྞསིཝིཀཱཡོ ཨུཔཊྛཱཔཡིཾསུ། ཏཱ པན ‘‘ཡཱནེ ཨཱརུཡ྄ཧ གཙྪནྟཱིཏི སཏྠརི ཨགཱརཝོ ཀཏོ ཧོཏཱི’’ཏི ཨེཀཔཎྞཱསཡོཛནིཀཾ པདསཱཝ པཊིཔཛྫིཾསུ། རཱཛཱནོཔི པུརཏོ ཙ པཙྪཏོ ཙ ཨཱརཀྑཾ སཾཝིདཧཱཔེཏྭཱ ཏཎྜུལསཔྤིཏེལཱདཱིནཾ སཀཊཱནི པཱུརཱཔེཏྭཱ ‘‘གཏཊྛཱནེ གཏཊྛཱནེ ཨཱཧཱརཾ པཊིཡཱདེཐཱ’’ཏི པུརིསེ པེསཡིཾསུ། སཱུནེཧི པཱདེཧཱིཏི ཏཱསཉྷི སུཁུམཱལཏྟཱ པཱདེསུ ཨེཀོ ཕོཊོ ཨུཊྛེཏི, ཨེཀོ བྷིཛྫཏི། ཨུབྷོ པཱདཱ ཀཏཀཊྛིསམྤརིཀིཎྞཱ ཝིཡ ཧུཏྭཱ ཨུདྡྷུམཱཏཱ ཛཱཏཱ། ཏེན ཝུཏྟཾ – ‘‘སཱུནེཧི པཱདེཧཱི’’ཏི། བཧིདྭཱརཀོཊྛཀེཏི དྭཱརཀོཊྛཀཏོ བཧི། ཀསྨཱ པནེཝཾ ཋིཏཱཏི? ཨེཝཾ ཀིརསྶཱ ཨཧོསི – ‘‘ཨཧཾ ཏཐཱགཏེན ཨནནུཉྙཱཏཱ སཡམེཝ པབྦཛྫཱཝེསཾ ཨགྒཧེསིཾ, ཨེཝཾ གཧིཏབྷཱཝོ ཙ པན མེ སཀལཛམྦུདཱིཔེ པཱཀཊོ ཛཱཏོ། སཙེ སཏྠཱ པབྦཛྫཾ ཨནུཛཱནཱཏི, ཨིཙྩེཏཾ ཀུསལཾ། སཙེ པན ནཱནུཛཱནིསྶཏི, མཧཏཱི གརཧཱ བྷཝིསྶཏཱི’’ཏི ཝིཧཱརཾ པཝིསིཏུཾ ཨསཀྐོནྟཱི རོདམཱནཱཝ ཨཊྛཱསི།
Sambahulāhi sākiyānīhi saddhinti antonivesanamhiyeva dasabalaṃ uddissa pabbajjāvesaṃ gahetvā pañcasatā sākiyāniyo pabbajjāvesaṃyeva gāhāpetvā sabbāhipi tāhi sambahulāhi sākiyānīhi saddhiṃ. Cārikaṃ pakkāmīti gamanaṃ abhinīhari. Gamanābhinīharaṇakāle pana tā sukhumālā rājitthiyo padasā gantuṃ na sakkhissantīti sākiyakoliyarājāno sovaṇṇasivikāyo upaṭṭhāpayiṃsu. Tā pana ‘‘yāne āruyha gacchantīti satthari agāravo kato hotī’’ti ekapaṇṇāsayojanikaṃ padasāva paṭipajjiṃsu. Rājānopi purato ca pacchato ca ārakkhaṃ saṃvidahāpetvā taṇḍulasappitelādīnaṃ sakaṭāni pūrāpetvā ‘‘gataṭṭhāne gataṭṭhāne āhāraṃ paṭiyādethā’’ti purise pesayiṃsu. Sūnehi pādehīti tāsañhi sukhumālattā pādesu eko phoṭo uṭṭheti, eko bhijjati. Ubho pādā katakaṭṭhisamparikiṇṇā viya hutvā uddhumātā jātā. Tena vuttaṃ – ‘‘sūnehi pādehī’’ti. Bahidvārakoṭṭhaketi dvārakoṭṭhakato bahi. Kasmā panevaṃ ṭhitāti? Evaṃ kirassā ahosi – ‘‘ahaṃ tathāgatena ananuññātā sayameva pabbajjāvesaṃ aggahesiṃ, evaṃ gahitabhāvo ca pana me sakalajambudīpe pākaṭo jāto. Sace satthā pabbajjaṃ anujānāti, iccetaṃ kusalaṃ. Sace pana nānujānissati, mahatī garahā bhavissatī’’ti vihāraṃ pavisituṃ asakkontī rodamānāva aṭṭhāsi.
ཀིཾ ནུ ཏྭཾ གོཏམཱིཏི ཀིཾ ནུ རཱཛཀུལཱནཾ ཝིཔཏྟི ཨུཔྤནྣཱ, ཀེན ཏྭཾ ཀཱརཎེན ཨེཝཾ ཝིཝཎྞབྷཱཝཾ པཏྟཱ, སཱུནེཧི པཱདེཧི…པེ॰… ཋིཏཱཏི། ཨཉྙེནཔི པརིཡཱཡེནཱཏི ཨཉྙེནཔི ཀཱརཎེན། བཧུཀཱརཱ, བྷནྟེཏིཨཱདིནཱ ཏསྶཱ གུཎཾ ཀཐེཏྭཱ པུན པབྦཛྫཾ ཡཱཙནྟོ ཨེཝམཱཧ། སཏྠཱཔི ‘‘ཨིཏྠིཡོ ནཱམ པརིཏྟཔཉྙཱ, ཨེཀཡཱཙིཏམཏྟེན པབྦཛྫཱཡ ཨནུཉྙཱཏཱཡ ན མམ སཱསནཾ གརུཾ ཀཏྭཱ གཎྷིསྶནྟཱི’’ཏི ཏིཀྑཏྟུཾ པཊིཀྑིཔིཏྭཱ ཨིདཱནི གརུཾ ཀཏྭཱ གཱཧཱཔེཏུཀཱམཏཱཡ སཙེ, ཨཱནནྡ, མཧཱཔཛཱཔཏཱི གོཏམཱི ཨཊྛ གརུདྷམྨེ པཊིགྒཎྷཱཏི, སཱཝ’སྶཱ ཧོཏུ ཨུཔསམྤདཱཏིཨཱདིམཱཧ། ཏཏྠ སཱཝསྶཱཏི སཱ ཨེཝ ཨསྶཱ པབྦཛྫཱཔི ཨུཔསམྤདཱཔི ཧོཏུ།
Kiṃ nu tvaṃ gotamīti kiṃ nu rājakulānaṃ vipatti uppannā, kena tvaṃ kāraṇena evaṃ vivaṇṇabhāvaṃ pattā, sūnehi pādehi…pe… ṭhitāti. Aññenapi pariyāyenāti aññenapi kāraṇena. Bahukārā, bhantetiādinā tassā guṇaṃ kathetvā puna pabbajjaṃ yācanto evamāha. Satthāpi ‘‘itthiyo nāma parittapaññā, ekayācitamattena pabbajjāya anuññātāya na mama sāsanaṃ garuṃ katvā gaṇhissantī’’ti tikkhattuṃ paṭikkhipitvā idāni garuṃ katvā gāhāpetukāmatāya sace, ānanda, mahāpajāpatī gotamīaṭṭha garudhamme paṭiggaṇhāti, sāva’ssā hotuupasampadātiādimāha. Tattha sāvassāti sā eva assā pabbajjāpi upasampadāpi hotu.
ཏདཧཱུཔསམྤནྣསྶཱཏི ཏཾདིཝསཾ ཨུཔསམྤནྣསྶ། ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀཏྟབྦནྟི ཨོམཱནཱཏིམཱནེ ཨཀཏྭཱ པཉྩཔཏིཊྛིཏེན ཨབྷིཝཱདནཾ, ཨཱསནཱ པཙྩུཊྛཱཡ པཙྩུགྒམནཝསེན པཙྩུཊྛཱནཾ, དསནཁེ སམོདྷཱནེཏྭཱ ཨཉྫལིཀམྨཾ, ཨཱསནཔཉྙཱཔནབཱིཛནཱདིཀཾ ཨནུཙྪཝིཀཀམྨསངྑཱཏཾ སཱམཱིཙིཀམྨཉྩ ཀཏབྦཾ། ཨབྷིཀྑུཀེ ཨཱཝཱསེཏི ཡཏྠ ཝསནྟིཡཱ ཨནནྟརཱཡེན ཨོཝཱདཏྠཱཡ ཨུཔསངྐམནཊྛཱནེ ཨོཝཱདདཱཡཀོ ཨཱཙརིཡོ ནཏྠི, ཨཡཾ ཨབྷིཀྑུཀོ ཨཱཝཱསོ ནཱམ། ཨེཝརཱུཔེ ཨཱཝཱསེ ཝསྶཾ ན ཨུཔགནྟབྦཾ། ཨནྭཌྜྷམཱསནྟི ཨནུཔོསཐིཀཾ། ཨོཝཱདཱུཔསངྐམནནྟི ཨོཝཱདཏྠཱཡ ཨུཔསངྐམནཾ། དིཊྛེནཱཏི ཙཀྑུནཱ དིཊྛེན། སུཏེནཱཏི སོཏེན སུཏེན། པརིསངྐཱཡཱཏི དིཊྛསུཏཝསེན པརིསངྐིཏེན། གརུདྷམྨནྟི གརུཀཾ སངྒྷཱདིསེསཱཔཏྟིཾ། པཀྑམཱནཏྟནྟི ཨནཱུནཱནི པནྣརས དིཝསཱནི མཱནཏྟཾ། ཚསུ དྷམྨེསཱུཏི ཝིཀཱལབྷོཛནཙྪཊྛེསུ སིཀྑཱཔདེསུ། སིཀྑིཏསིཀྑཱཡཱཏི ཨེཀསིཀྑམྤི ཨཁཎྜཾ ཀཏྭཱ པཱུརིཏསིཀྑཱཡ། ཨཀྐོསིཏབྦོ པརིབྷཱསིཏབྦོཏི དསནྣཾ ཨཀྐོསཝཏྠཱུནཾ ཨཉྙཏརེན ཨཀྐོསཝཏྠུནཱ ན ཨཀྐོསིཏབྦོ, བྷཡཱུཔདཾསནཱཡ ཡཱཡ ཀཱཡཙི པརིབྷཱསཱཡ ན པརིབྷཱསིཏབྦོ།
Tadahūpasampannassāti taṃdivasaṃ upasampannassa. Abhivādanaṃ paccuṭṭhānaṃ añjalikammaṃ sāmīcikammaṃ kattabbanti omānātimāne akatvā pañcapatiṭṭhitena abhivādanaṃ, āsanā paccuṭṭhāya paccuggamanavasena paccuṭṭhānaṃ, dasanakhe samodhānetvā añjalikammaṃ, āsanapaññāpanabījanādikaṃ anucchavikakammasaṅkhātaṃ sāmīcikammañca katabbaṃ. Abhikkhuke āvāseti yattha vasantiyā anantarāyena ovādatthāya upasaṅkamanaṭṭhāne ovādadāyako ācariyo natthi, ayaṃ abhikkhuko āvāso nāma. Evarūpe āvāse vassaṃ na upagantabbaṃ. Anvaḍḍhamāsanti anuposathikaṃ. Ovādūpasaṅkamananti ovādatthāya upasaṅkamanaṃ. Diṭṭhenāti cakkhunā diṭṭhena. Sutenāti sotena sutena. Parisaṅkāyāti diṭṭhasutavasena parisaṅkitena. Garudhammanti garukaṃ saṅghādisesāpattiṃ. Pakkhamānattanti anūnāni pannarasa divasāni mānattaṃ. Chasu dhammesūti vikālabhojanacchaṭṭhesu sikkhāpadesu. Sikkhitasikkhāyāti ekasikkhampi akhaṇḍaṃ katvā pūritasikkhāya. Akkositabbo paribhāsitabboti dasannaṃ akkosavatthūnaṃ aññatarena akkosavatthunā na akkositabbo, bhayūpadaṃsanāya yāya kāyaci paribhāsāya na paribhāsitabbo.
ཨོཝཊོ བྷིཀྑུནཱིནཾ བྷིཀྑཱུསུ ཝཙནཔཐོཏི ཨོཝཱདཱནུསཱསནདྷམྨཀཐཱསངྑཱཏོ ཝཙནཔཐོ བྷིཀྑུནཱིནཾ བྷིཀྑཱུསུ ཨོཝརིཏོ པིཧིཏོ, ན བྷིཀྑུནིཡཱ ཀོཙི བྷིཀྑུ ཨོཝདིཏབྦོ ཨནུསཱསིཏབྦོ ཝཱ ‘‘བྷནྟེ, པོརཱཎཀཏྠེརཱ ཨིདཾ ཙཱིཝརཝཏྟཾ པཱུརཡིཾསཱུ’’ཏི ཨེཝཾ པན པཝེཎིཝསེན ཀཐེཏུཾ ཝཊྚཏི། ཨནོཝཊོ བྷིཀྑཱུནཾ བྷིཀྑུནཱིསུ ཝཙནཔཐོཏི བྷིཀྑཱུནཾ པན བྷིཀྑུནཱིསུ ཝཙནཔཐོ ཨནིཝཱརིཏོ, ཡཐཱརུཙི ཨོཝདིཏུཾ ཨནུསཱསིཏུཾ དྷམྨཀཐཾ ཀཐེཏུནྟི ཨཡམེཏྠ སངྑེཔོ, ཝིཏྠཱརཏོ པནེསཱ གརུདྷམྨཀཐཱ སམནྟཔཱསཱདིཀཱཡ ཝིནཡསཾཝཎྞནཱཡ (པཱཙི॰ ཨཊྛ॰ ༡༤༨) ཝུཏྟནཡེནེཝ ཝེདིཏབྦཱ།
Ovaṭo bhikkhunīnaṃ bhikkhūsu vacanapathoti ovādānusāsanadhammakathāsaṅkhāto vacanapatho bhikkhunīnaṃ bhikkhūsu ovarito pihito, na bhikkhuniyā koci bhikkhu ovaditabbo anusāsitabbo vā ‘‘bhante, porāṇakattherā idaṃ cīvaravattaṃ pūrayiṃsū’’ti evaṃ pana paveṇivasena kathetuṃ vaṭṭati. Anovaṭobhikkhūnaṃ bhikkhunīsu vacanapathoti bhikkhūnaṃ pana bhikkhunīsu vacanapatho anivārito, yathāruci ovadituṃ anusāsituṃ dhammakathaṃ kathetunti ayamettha saṅkhepo, vitthārato panesā garudhammakathā samantapāsādikāya vinayasaṃvaṇṇanāya (pāci. aṭṭha. 148) vuttanayeneva veditabbā.
ཨིམེ པན ཨཊྛ གརུདྷམྨེ སཏྠུ སནྟིཀེ ཨུགྒཧེཏྭཱ ཐེརེན ཨཏྟནོ ཨཱརོཙིཡམཱནེ སུཏྭཱཝ མཧཱཔཛཱཔཏིཡཱ ཏཱཝ མཧནྟཾ དོམནསྶཾ ཁཎེན པཊིཔྤསྶམྦྷི, ཨནོཏཏྟདཧཏོ ཨཱབྷཏེན སཱིཏུདཀསྶ གྷཊསཏེན མཏྠཀེ པརིསིཏྟཱ ཝིཡ ཝིགཏཔརིལཱ༹ཧཱ ཨཏྟམནཱ ཧུཏྭཱ གརུདྷམྨཔཊིགྒཧཎེན ཨུཔྤནྣཔཱིཏིཔཱམོཛྫཾ ཨཱཝིཀརོནྟཱི སེཡྻཐཱཔི, བྷནྟེཏིཨཱདིཀཾ ཨུདཱནཾ ཨུདཱནེསི།
Ime pana aṭṭha garudhamme satthu santike uggahetvā therena attano ārociyamāne sutvāva mahāpajāpatiyā tāva mahantaṃ domanassaṃ khaṇena paṭippassambhi, anotattadahato ābhatena sītudakassa ghaṭasatena matthake parisittā viya vigatapariḷāhā attamanā hutvā garudhammapaṭiggahaṇena uppannapītipāmojjaṃ āvikarontī seyyathāpi, bhantetiādikaṃ udānaṃ udānesi.
ཀུམྦྷཏྠེནཀེཧཱིཏི ཀུམྦྷེ དཱིཔཾ ཛཱལེཏྭཱ ཏེན ཨཱལོཀེན པརགྷརེ བྷཎྜཾ ཝིཙིནིཏྭཱ ཐེནཀཙོརེཧི། སེཏཊྛིཀཱ ནཱམ རོགཛཱཏཱིཏི ཨེཀོ པཱཎཀོ ནཱལ༹མཛ྄ཛྷགཏཾ ཀཎྜཾ ཝིཛ྄ཛྷཏི, ཡེན ཝིདྡྷཱ ཀཎྜཱ ནིཀྑནྟམྤི སཱལིསཱིསཾ ཁཱིརཾ གཧེཏུཾ ན སཀྐོཏི། མཉྫིཊྛིཀཱ ནཱམ རོགཛཱཏཱིཏི ཨུཙྪཱུནཾ ཨནྟོརཏྟབྷཱཝོ།
Kumbhatthenakehīti kumbhe dīpaṃ jāletvā tena ālokena paraghare bhaṇḍaṃ vicinitvā thenakacorehi. Setaṭṭhikā nāma rogajātīti eko pāṇako nāḷamajjhagataṃ kaṇḍaṃ vijjhati, yena viddhā kaṇḍā nikkhantampi sālisīsaṃ khīraṃ gahetuṃ na sakkoti. Mañjiṭṭhikā nāma rogajātīti ucchūnaṃ antorattabhāvo.
མཧཏོ ཏལཱ༹ཀསྶ པཊིཀཙྩེཝ ཨཱལི༹ནྟི ཨིམིནཱ པན ཨེཏམཏྠཾ དསྶེཏི – ཡཐཱ མཧཏོ ཏལཱ༹ཀསྶ པཱལི༹ཡཱ ཨབདྡྷཱཡཔི ཀིཉྩི ཨུདཀཾ ཏིཊྛཏེཝ, པཋམམེཝ བདྡྷཱཡ པན ཡཾ ཨབདྡྷཔཙྩཡཱ ན ཏིཊྛེཡྻ, ཏམྤི ཏིཊྛེཡྻ, ཨེཝམེཝ ཡེ ཨིམེ ཨནུཔྤནྣེ ཝཏྠུསྨིཾ པཊིཀཙྩེཝ ཨནཏིཀྐམནཏྠཱཡ གརུདྷམྨཱ པཉྙཏྟཱ, ཏེསུ ཨཔཉྙཏྟེསུ མཱཏུགཱམསྶ པབྦཛིཏཏྟཱ པཉྩ ཝསྶསཏཱནི སདྡྷམྨོ ཏིཊྛེཡྻ། པཊིཀཙྩེཝ པཉྙཏྟཏྟཱ པན ཨཔརཱནིཔི པཉྩ ཝསྶསཏཱནི ཋསྶཏཱིཏི ཨེཝཾ པཋམཾ ཝུཏྟཝསྶསཧསྶམེཝ ཋསྶཏི། ཝསྶསཧསྶནྟི ཙེཏཾ པཊིསམྦྷིདཱཔབྷེདཔྤཏྟཁཱིཎཱསཝཱནཾ ཝསེནེཝ ཝུཏྟཾ, ཏཏོ པན ཨུཏྟརིཔི སུཀྑཝིཔསྶཀཁཱིཎཱསཝཝསེན ཝསྶསཧསྶཾ, ཨནཱགཱམིཝསེན ཝསྶསཧསྶཾ, སཀདཱགཱམིཝསེན ཝསྶསཧསྶཾ, སོཏཱཔནྣཝསེན ཝསྶསཧསྶནྟི ཨེཝཾ པཉྩཝསྶསཧསྶཱནི པཊིཝེདྷསདྡྷམྨོ ཋསྶཏི། པརིཡཏྟིདྷམྨོཔི ཏཱནིཡེཝ། ན ཧི པརིཡཏྟིཡཱ ཨསཏི པཊིཝེདྷོ ཨཏྠི, ནཱཔི པརིཡཏྟིཡཱ སཏི པཊིཝེདྷོ ན ཧོཏི། ལིངྒཾ པན པརིཡཏྟིཡཱ ཨནྟརཧིཏཱཡཔི ཙིརཾ པཝཏྟིསྶཏཱིཏི།
Mahato taḷākassa paṭikacceva āḷinti iminā pana etamatthaṃ dasseti – yathā mahato taḷākassa pāḷiyā abaddhāyapi kiñci udakaṃ tiṭṭhateva, paṭhamameva baddhāya pana yaṃ abaddhapaccayā na tiṭṭheyya, tampi tiṭṭheyya, evameva ye ime anuppanne vatthusmiṃ paṭikacceva anatikkamanatthāya garudhammā paññattā, tesu apaññattesu mātugāmassa pabbajitattā pañca vassasatāni saddhammo tiṭṭheyya. Paṭikacceva paññattattā pana aparānipi pañca vassasatāni ṭhassatīti evaṃ paṭhamaṃ vuttavassasahassameva ṭhassati. Vassasahassanti cetaṃ paṭisambhidāpabhedappattakhīṇāsavānaṃ vaseneva vuttaṃ, tato pana uttaripi sukkhavipassakakhīṇāsavavasena vassasahassaṃ, anāgāmivasena vassasahassaṃ, sakadāgāmivasena vassasahassaṃ, sotāpannavasena vassasahassanti evaṃ pañcavassasahassāni paṭivedhasaddhammo ṭhassati. Pariyattidhammopi tāniyeva. Na hi pariyattiyā asati paṭivedho atthi, nāpi pariyattiyā sati paṭivedho na hoti. Liṅgaṃ pana pariyattiyā antarahitāyapi ciraṃ pavattissatīti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. གོཏམཱིསུཏྟཾ • 1. Gotamīsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༣. གོཏམཱིསུཏྟཱདིཝཎྞནཱ • 1-3. Gotamīsuttādivaṇṇanā
