| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
10. கொ³த்ரபு⁴ஞாணனித்³தே³ஸோ
10. Gotrabhuñāṇaniddeso
59. கத²ங் ப³ஹித்³தா⁴ வுட்டா²னவிவட்டனே பஞ்ஞா கொ³த்ரபு⁴ஞாணங்? உப்பாத³ங் அபி⁴பு⁴ய்யதீதி – கொ³த்ரபு⁴. பவத்தங் அபி⁴பு⁴ய்யதீதி – கொ³த்ரபு⁴. நிமித்தங் அபி⁴பு⁴ய்யதீதி – கொ³த்ரபு⁴. ஆயூஹனங் அபி⁴பு⁴ய்யதீதி – கொ³த்ரபு⁴. படிஸந்தி⁴ங் அபி⁴பு⁴ய்யதீதி – கொ³த்ரபு⁴. க³திங் அபி⁴பு⁴ய்யதீதி – கொ³த்ரபு⁴. நிப்³ப³த்திங் அபி⁴பு⁴ய்யதீதி – கொ³த்ரபு⁴. உபபத்திங் அபி⁴பு⁴ய்யதீதி – கொ³த்ரபு⁴. ஜாதிங் அபி⁴பு⁴ய்யதீதி – கொ³த்ரபு⁴. ஜரங் அபி⁴பு⁴ய்யதீதி – கொ³த்ரபு⁴. ப்³யாதி⁴ங் அபி⁴பு⁴ய்யதீதி – கொ³த்ரபு⁴. மரணங் அபி⁴பு⁴ய்யதீதி – கொ³த்ரபு⁴. ஸோகங் அபி⁴பு⁴ய்யதீதி – கொ³த்ரபு⁴. பரிதே³வங் அபி⁴பு⁴ய்யதீதி – கொ³த்ரபு⁴. உபாயாஸங் அபி⁴பு⁴ய்யதீதி – கொ³த்ரபு⁴. ப³ஹித்³தா⁴ ஸங்கா²ரனிமித்தங் அபி⁴பு⁴ய்யதீதி – கொ³த்ரபு⁴. அனுப்பாத³ங் பக்க²ந்த³தீதி – கொ³த்ரபு⁴. அப்பவத்தங் பக்க²ந்த³தீதி – கொ³த்ரபு⁴…பே॰… நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
59. Kathaṃ bahiddhā vuṭṭhānavivaṭṭane paññā gotrabhuñāṇaṃ? Uppādaṃ abhibhuyyatīti – gotrabhu. Pavattaṃ abhibhuyyatīti – gotrabhu. Nimittaṃ abhibhuyyatīti – gotrabhu. Āyūhanaṃ abhibhuyyatīti – gotrabhu. Paṭisandhiṃ abhibhuyyatīti – gotrabhu. Gatiṃ abhibhuyyatīti – gotrabhu. Nibbattiṃ abhibhuyyatīti – gotrabhu. Upapattiṃ abhibhuyyatīti – gotrabhu. Jātiṃ abhibhuyyatīti – gotrabhu. Jaraṃ abhibhuyyatīti – gotrabhu. Byādhiṃ abhibhuyyatīti – gotrabhu. Maraṇaṃ abhibhuyyatīti – gotrabhu. Sokaṃ abhibhuyyatīti – gotrabhu. Paridevaṃ abhibhuyyatīti – gotrabhu. Upāyāsaṃ abhibhuyyatīti – gotrabhu. Bahiddhā saṅkhāranimittaṃ abhibhuyyatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
உப்பாத³ங் அபி⁴பு⁴ய்யித்வா அனுப்பாத³ங் பக்க²ந்த³தீதி – கொ³த்ரபு⁴. பவத்தங் அபி⁴பு⁴ய்யித்வா அப்பவத்தங் பக்க²ந்த³தீதி – கொ³த்ரபு⁴. நிமித்தங் அபி⁴பு⁴ய்யித்வா அனிமித்தங் பக்க²ந்த³தீதி – கொ³த்ரபு⁴ …பே॰… ப³ஹித்³தா⁴ ஸங்கா²ரனிமித்தங் அபி⁴பு⁴ய்யித்வா நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
Uppādaṃ abhibhuyyitvā anuppādaṃ pakkhandatīti – gotrabhu. Pavattaṃ abhibhuyyitvā appavattaṃ pakkhandatīti – gotrabhu. Nimittaṃ abhibhuyyitvā animittaṃ pakkhandatīti – gotrabhu …pe… bahiddhā saṅkhāranimittaṃ abhibhuyyitvā nirodhaṃ nibbānaṃ pakkhandatīti – gotrabhu.
உப்பாதா³ வுட்டா²தீதி – கொ³த்ரபு⁴. பவத்தா வுட்டா²தீதி – கொ³த்ரபு⁴. நிமித்தா வுட்டா²தீதி – கொ³த்ரபு⁴. ஆயூஹனா வுட்டா²தீதி – கொ³த்ரபு⁴. படிஸந்தி⁴யா வுட்டா²தீதி – கொ³த்ரபு⁴. க³தியா வுட்டா²தீதி – கொ³த்ரபு⁴. நிப்³ப³த்தியா வுட்டா²தீதி – கொ³த்ரபு⁴. உபபத்தியா வுட்டா²தீதி – கொ³த்ரபு⁴. ஜாதியா வுட்டா²தீதி – கொ³த்ரபு⁴. ஜராய வுட்டா²தீதி – கொ³த்ரபு⁴. ப்³யாதி⁴ம்ஹா வுட்டா²தீதி – கொ³த்ரபு⁴. மரணா வுட்டா²தீதி – கொ³த்ரபு⁴. ஸோகா வுட்டா²தீதி – கொ³த்ரபு⁴. பரிதே³வா வுட்டா²தீதி – கொ³த்ரபு⁴. உபாயாஸா வுட்டா²தீதி – கொ³த்ரபு⁴. ப³ஹித்³தா⁴ ஸங்கா²ரனிமித்தா வுட்டா²தீதி – கொ³த்ரபு⁴. அனுப்பாத³ங் பக்க²ந்த³தீதி – கொ³த்ரபு⁴. அப்பவத்தங் பக்க²ந்த³தீதி – கொ³த்ரபு⁴…பே॰… நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
Uppādā vuṭṭhātīti – gotrabhu. Pavattā vuṭṭhātīti – gotrabhu. Nimittā vuṭṭhātīti – gotrabhu. Āyūhanā vuṭṭhātīti – gotrabhu. Paṭisandhiyā vuṭṭhātīti – gotrabhu. Gatiyā vuṭṭhātīti – gotrabhu. Nibbattiyā vuṭṭhātīti – gotrabhu. Upapattiyā vuṭṭhātīti – gotrabhu. Jātiyā vuṭṭhātīti – gotrabhu. Jarāya vuṭṭhātīti – gotrabhu. Byādhimhā vuṭṭhātīti – gotrabhu. Maraṇā vuṭṭhātīti – gotrabhu. Sokā vuṭṭhātīti – gotrabhu. Paridevā vuṭṭhātīti – gotrabhu. Upāyāsā vuṭṭhātīti – gotrabhu. Bahiddhā saṅkhāranimittā vuṭṭhātīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
உப்பாதா³ வுட்ட²ஹித்வா 1 அனுப்பாத³ங் பக்க²ந்த³தீதி – கொ³த்ரபு⁴. பவத்தா வுட்ட²ஹித்வா அப்பவத்தங் பக்க²ந்த³தீதி – கொ³த்ரபு⁴. நிமித்தா வுட்ட²ஹித்வா அனிமித்தங் பக்க²ந்த³தீதி – கொ³த்ரபு⁴. ஆயூஹனா வுட்ட²ஹித்வா அனாயூஹனங் பக்க²ந்த³தீதி – கொ³த்ரபு⁴. படிஸந்தி⁴யா வுட்ட²ஹித்வா அப்படிஸந்தி⁴ங் பக்க²ந்த³தீதி – கொ³த்ரபு⁴. க³தியா வுட்ட²ஹித்வா அக³திங் பக்க²ந்த³தீதி – கொ³த்ரபு⁴. நிப்³ப³த்தியா வுட்ட²ஹித்வா அனிப்³ப³த்திங் பக்க²ந்த³தீதி – கொ³த்ரபு⁴. உபபத்தியா வுட்ட²ஹித்வா அனுபபத்திங் பக்க²ந்த³தீதி – கொ³த்ரபு⁴. ஜாதியா வுட்ட²ஹித்வா அஜாதிங் பக்க²ந்த³தீதி – கொ³த்ரபு⁴. ஜராய வுட்ட²ஹித்வா அஜரங் பக்க²ந்த³தீதி – கொ³த்ரபு⁴. ப்³யாதி⁴ம்ஹா வுட்ட²ஹித்வா அப்³யாதி⁴ங் பக்க²ந்த³தீதி – கொ³த்ரபு⁴. மரணா வுட்ட²ஹித்வா அமதங் பக்க²ந்த³தீதி – கொ³த்ரபு⁴. ஸோகா வுட்ட²ஹித்வா அஸோகங் பக்க²ந்த³தீதி – கொ³த்ரபு⁴. பரிதே³வா வுட்ட²ஹித்வா அபரிதே³வங் பக்க²ந்த³தீதி – கொ³த்ரபு⁴. உபாயாஸா வுட்ட²ஹித்வா அனுபாயாஸங் பக்க²ந்த³தீதி – கொ³த்ரபு⁴. ப³ஹித்³தா⁴ ஸங்கா²ரனிமித்தா வுட்ட²ஹித்வா நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
Uppādā vuṭṭhahitvā 2 anuppādaṃ pakkhandatīti – gotrabhu. Pavattā vuṭṭhahitvā appavattaṃ pakkhandatīti – gotrabhu. Nimittā vuṭṭhahitvā animittaṃ pakkhandatīti – gotrabhu. Āyūhanā vuṭṭhahitvā anāyūhanaṃ pakkhandatīti – gotrabhu. Paṭisandhiyā vuṭṭhahitvā appaṭisandhiṃ pakkhandatīti – gotrabhu. Gatiyā vuṭṭhahitvā agatiṃ pakkhandatīti – gotrabhu. Nibbattiyā vuṭṭhahitvā anibbattiṃ pakkhandatīti – gotrabhu. Upapattiyā vuṭṭhahitvā anupapattiṃ pakkhandatīti – gotrabhu. Jātiyā vuṭṭhahitvā ajātiṃ pakkhandatīti – gotrabhu. Jarāya vuṭṭhahitvā ajaraṃ pakkhandatīti – gotrabhu. Byādhimhā vuṭṭhahitvā abyādhiṃ pakkhandatīti – gotrabhu. Maraṇā vuṭṭhahitvā amataṃ pakkhandatīti – gotrabhu. Sokā vuṭṭhahitvā asokaṃ pakkhandatīti – gotrabhu. Paridevā vuṭṭhahitvā aparidevaṃ pakkhandatīti – gotrabhu. Upāyāsā vuṭṭhahitvā anupāyāsaṃ pakkhandatīti – gotrabhu. Bahiddhā saṅkhāranimittā vuṭṭhahitvā nirodhaṃ nibbānaṃ pakkhandatīti – gotrabhu.
உப்பாதா³ விவட்டதீதி – கொ³த்ரபு⁴. பவத்தா விவட்டதீதி – கொ³த்ரபு⁴…பே॰… ப³ஹித்³தா⁴ ஸங்கா²ரனிமித்தா விவட்டதீதி – கொ³த்ரபு⁴. அனுப்பாத³ங் பக்க²ந்த³தீதி – கொ³த்ரபு⁴. அப்பவத்தங் பக்க²ந்த³தீதி – கொ³த்ரபு⁴…பே॰… நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
Uppādā vivaṭṭatīti – gotrabhu. Pavattā vivaṭṭatīti – gotrabhu…pe… bahiddhā saṅkhāranimittā vivaṭṭatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
உப்பாதா³ விவட்டித்வா அனுப்பாத³ங் பக்க²ந்த³தீதி – கொ³த்ரபு⁴. பவத்தா விவட்டித்வா அப்பவத்தங் பக்க²ந்த³தீதி – கொ³த்ரபு⁴…பே॰… ப³ஹித்³தா⁴ ஸங்கா²ரனிமித்தா விவட்டித்வா நிரோத⁴ங் நிப்³பா³னங் பக்க²ந்த³தீதி – கொ³த்ரபு⁴.
Uppādā vivaṭṭitvā anuppādaṃ pakkhandatīti – gotrabhu. Pavattā vivaṭṭitvā appavattaṃ pakkhandatīti – gotrabhu…pe… bahiddhā saṅkhāranimittā vivaṭṭitvā nirodhaṃ nibbānaṃ pakkhandatīti – gotrabhu.
60. கதி கொ³த்ரபூ⁴ த⁴ம்மா ஸமத²வஸேன உப்பஜ்ஜந்தி? கதி கொ³த்ரபூ⁴ த⁴ம்மா விபஸ்ஸனாவஸேன உப்பஜ்ஜந்தி? அட்ட² கொ³த்ரபூ⁴ த⁴ம்மா ஸமத²வஸேன உப்பஜ்ஜந்தி. த³ஸ கொ³த்ரபூ⁴ த⁴ம்மா விபஸ்ஸனாவஸேன உப்பஜ்ஜந்தி.
60. Kati gotrabhū dhammā samathavasena uppajjanti? Kati gotrabhū dhammā vipassanāvasena uppajjanti? Aṭṭha gotrabhū dhammā samathavasena uppajjanti. Dasa gotrabhū dhammā vipassanāvasena uppajjanti.
கதமே அட்ட² கொ³த்ரபூ⁴ த⁴ம்மா ஸமத²வஸேன உப்பஜ்ஜந்தி? பட²மங் ஜா²னங் படிலாப⁴த்தா²ய நீவரணே அபி⁴பு⁴ய்யதீதி – கொ³த்ரபு⁴. து³தியங் ஜா²னங் படிலாப⁴த்தா²ய விதக்கவிசாரே அபி⁴பு⁴ய்யதீதி – கொ³த்ரபு⁴. ததியங் ஜா²னங் படிலாப⁴த்தா²ய பீதிங் அபி⁴பு⁴ய்யதீதி – கொ³த்ரபு⁴. சதுத்த²ங் ஜா²னங் படிலாப⁴த்தா²ய ஸுக²து³க்கே² அபி⁴பு⁴ய்யதீதி – கொ³த்ரபு⁴. ஆகாஸானஞ்சாயதனஸமாபத்திங் படிலாப⁴த்தா²ய ரூபஸஞ்ஞங் படிக⁴ஸஞ்ஞங் நானத்தஸஞ்ஞங் அபி⁴பு⁴ய்யதீதி – கொ³த்ரபு⁴. விஞ்ஞாணஞ்சாயதனஸமாபத்திங் படிலாப⁴த்தா²ய ஆகாஸானஞ்சாயதனஸஞ்ஞங் அபி⁴பு⁴ய்யதீதி – கொ³த்ரபு⁴. ஆகிஞ்சஞ்ஞாயதனஸமாபத்திங் படிலாப⁴த்தா²ய விஞ்ஞாணஞ்சாயதனஸஞ்ஞங் அபி⁴பு⁴ய்யதீதி – கொ³த்ரபு⁴ . நேவஸஞ்ஞானாஸஞ்ஞாயதனஸமாபத்திங் படிலாப⁴த்தா²ய ஆகிஞ்சஞ்ஞாயதனஸஞ்ஞங் அபி⁴பு⁴ய்யதீதி – கொ³த்ரபு⁴. இமே அட்ட² கொ³த்ரபூ⁴ த⁴ம்மா ஸமத²வஸேன உப்பஜ்ஜந்தி.
Katame aṭṭha gotrabhū dhammā samathavasena uppajjanti? Paṭhamaṃ jhānaṃ paṭilābhatthāya nīvaraṇe abhibhuyyatīti – gotrabhu. Dutiyaṃ jhānaṃ paṭilābhatthāya vitakkavicāre abhibhuyyatīti – gotrabhu. Tatiyaṃ jhānaṃ paṭilābhatthāya pītiṃ abhibhuyyatīti – gotrabhu. Catutthaṃ jhānaṃ paṭilābhatthāya sukhadukkhe abhibhuyyatīti – gotrabhu. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ abhibhuyyatīti – gotrabhu. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ abhibhuyyatīti – gotrabhu. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ abhibhuyyatīti – gotrabhu . Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ abhibhuyyatīti – gotrabhu. Ime aṭṭha gotrabhū dhammā samathavasena uppajjanti.
கதமே த³ஸ கொ³த்ரபூ⁴ த⁴ம்மா விபஸ்ஸனாவஸேன உப்பஜ்ஜந்தி? ஸோதாபத்திமக்³க³ங் படிலாப⁴த்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங் ப³ஹித்³தா⁴ ஸங்கா²ரனிமித்தங் அபி⁴பு⁴ய்யதீதி – கொ³த்ரபு⁴. ஸோதாபத்திப²லஸமாபத்தத்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங்…பே॰… அபி⁴பு⁴ய்யதீதி – கொ³த்ரபு⁴. ஸகதா³கா³மிமக்³க³ங் படிலாப⁴த்தா²ய…பே॰… ஸகதா³கா³மிப²லஸமாபத்தத்தா²ய… அனாகா³மிமக்³க³ங் படிலாப⁴த்தா²ய… அனாகா³மிப²லஸமாபத்தத்தா²ய… அரஹத்தமக்³க³ங் படிலாப⁴த்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங் ப³ஹித்³தா⁴ ஸங்கா²ரனிமித்தங் அபி⁴பு⁴ய்யதீதி – கொ³த்ரபு⁴. அரஹத்தப²லஸமாபத்தத்தா²ய… ஸுஞ்ஞதவிஹாரஸமாபத்தத்தா²ய… அனிமித்தவிஹாரஸமாபத்தத்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங்…பே॰… அபி⁴பு⁴ய்யதீதி – கொ³த்ரபு⁴. இமே த³ஸ கொ³த்ரபூ⁴ த⁴ம்மா விபஸ்ஸனாவஸேன உப்பஜ்ஜந்தி.
Katame dasa gotrabhū dhammā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Sakadāgāmimaggaṃ paṭilābhatthāya…pe… sakadāgāmiphalasamāpattatthāya… anāgāmimaggaṃ paṭilābhatthāya… anāgāmiphalasamāpattatthāya… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Arahattaphalasamāpattatthāya… suññatavihārasamāpattatthāya… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Ime dasa gotrabhū dhammā vipassanāvasena uppajjanti.
கதி கொ³த்ரபூ⁴ த⁴ம்மா குஸலா, கதி அகுஸலா, கதி அப்³யாகதா? பன்னரஸ கொ³த்ரபூ⁴ த⁴ம்மா குஸலா, தயோ கொ³த்ரபூ⁴ த⁴ம்மா அப்³யாகதா. நத்தி² கொ³த்ரபூ⁴ த⁴ம்மா அகுஸலாதி.
Kati gotrabhū dhammā kusalā, kati akusalā, kati abyākatā? Pannarasa gotrabhū dhammā kusalā, tayo gotrabhū dhammā abyākatā. Natthi gotrabhū dhammā akusalāti.
ஸாமிஸஞ்ச நிராமிஸங், பணிஹிதஞ்ச அப்பணிஹிதங்;
Sāmisañca nirāmisaṃ, paṇihitañca appaṇihitaṃ;
ஸஞ்ஞுத்தஞ்ச விஸஞ்ஞுத்தங், வுட்டி²தஞ்ச அவுட்டி²தங்.
Saññuttañca visaññuttaṃ, vuṭṭhitañca avuṭṭhitaṃ.
அட்ட² ஸமாதி⁴ஸ்ஸ பச்சயா, த³ஸ ஞாணஸ்ஸ கோ³சரா;
Aṭṭha samādhissa paccayā, dasa ñāṇassa gocarā;
அட்டா²ரஸ கொ³த்ரபூ⁴ த⁴ம்மா, திண்ணங் விமொக்கா²ன பச்சயா.
Aṭṭhārasa gotrabhū dhammā, tiṇṇaṃ vimokkhāna paccayā.
இமே அட்டா²ரஸாகாரா, பஞ்ஞா யஸ்ஸ பரிச்சிதா;
Ime aṭṭhārasākārā, paññā yassa pariccitā;
குஸலோ விவட்டே வுட்டா²னே, நானாதி³ட்டீ²ஸு ந கம்பதீதி.
Kusalo vivaṭṭe vuṭṭhāne, nānādiṭṭhīsu na kampatīti.
தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘ப³ஹித்³தா⁴ வுட்டா²னவிவட்டனே பஞ்ஞா கொ³த்ரபு⁴ஞாணங்’’.
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vuṭṭhānavivaṭṭane paññā gotrabhuñāṇaṃ’’.
கொ³த்ரபு⁴ஞாணனித்³தே³ஸோ த³ஸமோ.
Gotrabhuñāṇaniddeso dasamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 10. கொ³த்ரபு⁴ஞாணனித்³தே³ஸவண்ணனா • 10. Gotrabhuñāṇaniddesavaṇṇanā
