| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১০. গোত্রভুঞাণনিদ্দেসো
10. Gotrabhuñāṇaniddeso
৫৯. কথং বহিদ্ধা ৰুট্ঠানৰিৰট্টনে পঞ্ঞা গোত্রভুঞাণং? উপ্পাদং অভিভুয্যতীতি – গোত্রভু। পৰত্তং অভিভুয্যতীতি – গোত্রভু। নিমিত্তং অভিভুয্যতীতি – গোত্রভু। আযূহনং অভিভুয্যতীতি – গোত্রভু। পটিসন্ধিং অভিভুয্যতীতি – গোত্রভু। গতিং অভিভুয্যতীতি – গোত্রভু। নিব্বত্তিং অভিভুয্যতীতি – গোত্রভু। উপপত্তিং অভিভুয্যতীতি – গোত্রভু। জাতিং অভিভুয্যতীতি – গোত্রভু। জরং অভিভুয্যতীতি – গোত্রভু। ব্যাধিং অভিভুয্যতীতি – গোত্রভু। মরণং অভিভুয্যতীতি – গোত্রভু। সোকং অভিভুয্যতীতি – গোত্রভু। পরিদেৰং অভিভুয্যতীতি – গোত্রভু। উপাযাসং অভিভুয্যতীতি – গোত্রভু। বহিদ্ধা সঙ্খারনিমিত্তং অভিভুয্যতীতি – গোত্রভু। অনুপ্পাদং পক্খন্দতীতি – গোত্রভু। অপ্পৰত্তং পক্খন্দতীতি – গোত্রভু…পে॰… নিরোধং নিব্বানং পক্খন্দতীতি – গোত্রভু।
59. Kathaṃ bahiddhā vuṭṭhānavivaṭṭane paññā gotrabhuñāṇaṃ? Uppādaṃ abhibhuyyatīti – gotrabhu. Pavattaṃ abhibhuyyatīti – gotrabhu. Nimittaṃ abhibhuyyatīti – gotrabhu. Āyūhanaṃ abhibhuyyatīti – gotrabhu. Paṭisandhiṃ abhibhuyyatīti – gotrabhu. Gatiṃ abhibhuyyatīti – gotrabhu. Nibbattiṃ abhibhuyyatīti – gotrabhu. Upapattiṃ abhibhuyyatīti – gotrabhu. Jātiṃ abhibhuyyatīti – gotrabhu. Jaraṃ abhibhuyyatīti – gotrabhu. Byādhiṃ abhibhuyyatīti – gotrabhu. Maraṇaṃ abhibhuyyatīti – gotrabhu. Sokaṃ abhibhuyyatīti – gotrabhu. Paridevaṃ abhibhuyyatīti – gotrabhu. Upāyāsaṃ abhibhuyyatīti – gotrabhu. Bahiddhā saṅkhāranimittaṃ abhibhuyyatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
উপ্পাদং অভিভুয্যিত্ৰা অনুপ্পাদং পক্খন্দতীতি – গোত্রভু। পৰত্তং অভিভুয্যিত্ৰা অপ্পৰত্তং পক্খন্দতীতি – গোত্রভু। নিমিত্তং অভিভুয্যিত্ৰা অনিমিত্তং পক্খন্দতীতি – গোত্রভু …পে॰… বহিদ্ধা সঙ্খারনিমিত্তং অভিভুয্যিত্ৰা নিরোধং নিব্বানং পক্খন্দতীতি – গোত্রভু।
Uppādaṃ abhibhuyyitvā anuppādaṃ pakkhandatīti – gotrabhu. Pavattaṃ abhibhuyyitvā appavattaṃ pakkhandatīti – gotrabhu. Nimittaṃ abhibhuyyitvā animittaṃ pakkhandatīti – gotrabhu …pe… bahiddhā saṅkhāranimittaṃ abhibhuyyitvā nirodhaṃ nibbānaṃ pakkhandatīti – gotrabhu.
উপ্পাদা ৰুট্ঠাতীতি – গোত্রভু। পৰত্তা ৰুট্ঠাতীতি – গোত্রভু। নিমিত্তা ৰুট্ঠাতীতি – গোত্রভু। আযূহনা ৰুট্ঠাতীতি – গোত্রভু। পটিসন্ধিযা ৰুট্ঠাতীতি – গোত্রভু। গতিযা ৰুট্ঠাতীতি – গোত্রভু। নিব্বত্তিযা ৰুট্ঠাতীতি – গোত্রভু। উপপত্তিযা ৰুট্ঠাতীতি – গোত্রভু। জাতিযা ৰুট্ঠাতীতি – গোত্রভু। জরায ৰুট্ঠাতীতি – গোত্রভু। ব্যাধিম্হা ৰুট্ঠাতীতি – গোত্রভু। মরণা ৰুট্ঠাতীতি – গোত্রভু। সোকা ৰুট্ঠাতীতি – গোত্রভু। পরিদেৰা ৰুট্ঠাতীতি – গোত্রভু। উপাযাসা ৰুট্ঠাতীতি – গোত্রভু। বহিদ্ধা সঙ্খারনিমিত্তা ৰুট্ঠাতীতি – গোত্রভু। অনুপ্পাদং পক্খন্দতীতি – গোত্রভু। অপ্পৰত্তং পক্খন্দতীতি – গোত্রভু…পে॰… নিরোধং নিব্বানং পক্খন্দতীতি – গোত্রভু।
Uppādā vuṭṭhātīti – gotrabhu. Pavattā vuṭṭhātīti – gotrabhu. Nimittā vuṭṭhātīti – gotrabhu. Āyūhanā vuṭṭhātīti – gotrabhu. Paṭisandhiyā vuṭṭhātīti – gotrabhu. Gatiyā vuṭṭhātīti – gotrabhu. Nibbattiyā vuṭṭhātīti – gotrabhu. Upapattiyā vuṭṭhātīti – gotrabhu. Jātiyā vuṭṭhātīti – gotrabhu. Jarāya vuṭṭhātīti – gotrabhu. Byādhimhā vuṭṭhātīti – gotrabhu. Maraṇā vuṭṭhātīti – gotrabhu. Sokā vuṭṭhātīti – gotrabhu. Paridevā vuṭṭhātīti – gotrabhu. Upāyāsā vuṭṭhātīti – gotrabhu. Bahiddhā saṅkhāranimittā vuṭṭhātīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
উপ্পাদা ৰুট্ঠহিত্ৰা 1 অনুপ্পাদং পক্খন্দতীতি – গোত্রভু। পৰত্তা ৰুট্ঠহিত্ৰা অপ্পৰত্তং পক্খন্দতীতি – গোত্রভু। নিমিত্তা ৰুট্ঠহিত্ৰা অনিমিত্তং পক্খন্দতীতি – গোত্রভু। আযূহনা ৰুট্ঠহিত্ৰা অনাযূহনং পক্খন্দতীতি – গোত্রভু। পটিসন্ধিযা ৰুট্ঠহিত্ৰা অপ্পটিসন্ধিং পক্খন্দতীতি – গোত্রভু। গতিযা ৰুট্ঠহিত্ৰা অগতিং পক্খন্দতীতি – গোত্রভু। নিব্বত্তিযা ৰুট্ঠহিত্ৰা অনিব্বত্তিং পক্খন্দতীতি – গোত্রভু। উপপত্তিযা ৰুট্ঠহিত্ৰা অনুপপত্তিং পক্খন্দতীতি – গোত্রভু। জাতিযা ৰুট্ঠহিত্ৰা অজাতিং পক্খন্দতীতি – গোত্রভু। জরায ৰুট্ঠহিত্ৰা অজরং পক্খন্দতীতি – গোত্রভু। ব্যাধিম্হা ৰুট্ঠহিত্ৰা অব্যাধিং পক্খন্দতীতি – গোত্রভু। মরণা ৰুট্ঠহিত্ৰা অমতং পক্খন্দতীতি – গোত্রভু। সোকা ৰুট্ঠহিত্ৰা অসোকং পক্খন্দতীতি – গোত্রভু। পরিদেৰা ৰুট্ঠহিত্ৰা অপরিদেৰং পক্খন্দতীতি – গোত্রভু। উপাযাসা ৰুট্ঠহিত্ৰা অনুপাযাসং পক্খন্দতীতি – গোত্রভু। বহিদ্ধা সঙ্খারনিমিত্তা ৰুট্ঠহিত্ৰা নিরোধং নিব্বানং পক্খন্দতীতি – গোত্রভু।
Uppādā vuṭṭhahitvā 2 anuppādaṃ pakkhandatīti – gotrabhu. Pavattā vuṭṭhahitvā appavattaṃ pakkhandatīti – gotrabhu. Nimittā vuṭṭhahitvā animittaṃ pakkhandatīti – gotrabhu. Āyūhanā vuṭṭhahitvā anāyūhanaṃ pakkhandatīti – gotrabhu. Paṭisandhiyā vuṭṭhahitvā appaṭisandhiṃ pakkhandatīti – gotrabhu. Gatiyā vuṭṭhahitvā agatiṃ pakkhandatīti – gotrabhu. Nibbattiyā vuṭṭhahitvā anibbattiṃ pakkhandatīti – gotrabhu. Upapattiyā vuṭṭhahitvā anupapattiṃ pakkhandatīti – gotrabhu. Jātiyā vuṭṭhahitvā ajātiṃ pakkhandatīti – gotrabhu. Jarāya vuṭṭhahitvā ajaraṃ pakkhandatīti – gotrabhu. Byādhimhā vuṭṭhahitvā abyādhiṃ pakkhandatīti – gotrabhu. Maraṇā vuṭṭhahitvā amataṃ pakkhandatīti – gotrabhu. Sokā vuṭṭhahitvā asokaṃ pakkhandatīti – gotrabhu. Paridevā vuṭṭhahitvā aparidevaṃ pakkhandatīti – gotrabhu. Upāyāsā vuṭṭhahitvā anupāyāsaṃ pakkhandatīti – gotrabhu. Bahiddhā saṅkhāranimittā vuṭṭhahitvā nirodhaṃ nibbānaṃ pakkhandatīti – gotrabhu.
উপ্পাদা ৰিৰট্টতীতি – গোত্রভু। পৰত্তা ৰিৰট্টতীতি – গোত্রভু…পে॰… বহিদ্ধা সঙ্খারনিমিত্তা ৰিৰট্টতীতি – গোত্রভু। অনুপ্পাদং পক্খন্দতীতি – গোত্রভু। অপ্পৰত্তং পক্খন্দতীতি – গোত্রভু…পে॰… নিরোধং নিব্বানং পক্খন্দতীতি – গোত্রভু।
Uppādā vivaṭṭatīti – gotrabhu. Pavattā vivaṭṭatīti – gotrabhu…pe… bahiddhā saṅkhāranimittā vivaṭṭatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
উপ্পাদা ৰিৰট্টিত্ৰা অনুপ্পাদং পক্খন্দতীতি – গোত্রভু। পৰত্তা ৰিৰট্টিত্ৰা অপ্পৰত্তং পক্খন্দতীতি – গোত্রভু…পে॰… বহিদ্ধা সঙ্খারনিমিত্তা ৰিৰট্টিত্ৰা নিরোধং নিব্বানং পক্খন্দতীতি – গোত্রভু।
Uppādā vivaṭṭitvā anuppādaṃ pakkhandatīti – gotrabhu. Pavattā vivaṭṭitvā appavattaṃ pakkhandatīti – gotrabhu…pe… bahiddhā saṅkhāranimittā vivaṭṭitvā nirodhaṃ nibbānaṃ pakkhandatīti – gotrabhu.
৬০. কতি গোত্রভূ ধম্মা সমথৰসেন উপ্পজ্জন্তি? কতি গোত্রভূ ধম্মা ৰিপস্সনাৰসেন উপ্পজ্জন্তি? অট্ঠ গোত্রভূ ধম্মা সমথৰসেন উপ্পজ্জন্তি। দস গোত্রভূ ধম্মা ৰিপস্সনাৰসেন উপ্পজ্জন্তি।
60. Kati gotrabhū dhammā samathavasena uppajjanti? Kati gotrabhū dhammā vipassanāvasena uppajjanti? Aṭṭha gotrabhū dhammā samathavasena uppajjanti. Dasa gotrabhū dhammā vipassanāvasena uppajjanti.
কতমে অট্ঠ গোত্রভূ ধম্মা সমথৰসেন উপ্পজ্জন্তি? পঠমং ঝানং পটিলাভত্থায নীৰরণে অভিভুয্যতীতি – গোত্রভু। দুতিযং ঝানং পটিলাভত্থায ৰিতক্কৰিচারে অভিভুয্যতীতি – গোত্রভু। ততিযং ঝানং পটিলাভত্থায পীতিং অভিভুয্যতীতি – গোত্রভু। চতুত্থং ঝানং পটিলাভত্থায সুখদুক্খে অভিভুয্যতীতি – গোত্রভু। আকাসানঞ্চাযতনসমাপত্তিং পটিলাভত্থায রূপসঞ্ঞং পটিঘসঞ্ঞং নানত্তসঞ্ঞং অভিভুয্যতীতি – গোত্রভু। ৰিঞ্ঞাণঞ্চাযতনসমাপত্তিং পটিলাভত্থায আকাসানঞ্চাযতনসঞ্ঞং অভিভুয্যতীতি – গোত্রভু। আকিঞ্চঞ্ঞাযতনসমাপত্তিং পটিলাভত্থায ৰিঞ্ঞাণঞ্চাযতনসঞ্ঞং অভিভুয্যতীতি – গোত্রভু । নেৰসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং অভিভুয্যতীতি – গোত্রভু। ইমে অট্ঠ গোত্রভূ ধম্মা সমথৰসেন উপ্পজ্জন্তি।
Katame aṭṭha gotrabhū dhammā samathavasena uppajjanti? Paṭhamaṃ jhānaṃ paṭilābhatthāya nīvaraṇe abhibhuyyatīti – gotrabhu. Dutiyaṃ jhānaṃ paṭilābhatthāya vitakkavicāre abhibhuyyatīti – gotrabhu. Tatiyaṃ jhānaṃ paṭilābhatthāya pītiṃ abhibhuyyatīti – gotrabhu. Catutthaṃ jhānaṃ paṭilābhatthāya sukhadukkhe abhibhuyyatīti – gotrabhu. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ abhibhuyyatīti – gotrabhu. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ abhibhuyyatīti – gotrabhu. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ abhibhuyyatīti – gotrabhu . Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ abhibhuyyatīti – gotrabhu. Ime aṭṭha gotrabhū dhammā samathavasena uppajjanti.
কতমে দস গোত্রভূ ধম্মা ৰিপস্সনাৰসেন উপ্পজ্জন্তি? সোতাপত্তিমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং বহিদ্ধা সঙ্খারনিমিত্তং অভিভুয্যতীতি – গোত্রভু। সোতাপত্তিফলসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে॰… অভিভুয্যতীতি – গোত্রভু। সকদাগামিমগ্গং পটিলাভত্থায…পে॰… সকদাগামিফলসমাপত্তত্থায… অনাগামিমগ্গং পটিলাভত্থায… অনাগামিফলসমাপত্তত্থায… অরহত্তমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং বহিদ্ধা সঙ্খারনিমিত্তং অভিভুয্যতীতি – গোত্রভু। অরহত্তফলসমাপত্তত্থায… সুঞ্ঞতৰিহারসমাপত্তত্থায… অনিমিত্তৰিহারসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং…পে॰… অভিভুয্যতীতি – গোত্রভু। ইমে দস গোত্রভূ ধম্মা ৰিপস্সনাৰসেন উপ্পজ্জন্তি।
Katame dasa gotrabhū dhammā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Sakadāgāmimaggaṃ paṭilābhatthāya…pe… sakadāgāmiphalasamāpattatthāya… anāgāmimaggaṃ paṭilābhatthāya… anāgāmiphalasamāpattatthāya… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Arahattaphalasamāpattatthāya… suññatavihārasamāpattatthāya… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Ime dasa gotrabhū dhammā vipassanāvasena uppajjanti.
কতি গোত্রভূ ধম্মা কুসলা, কতি অকুসলা, কতি অব্যাকতা? পন্নরস গোত্রভূ ধম্মা কুসলা, তযো গোত্রভূ ধম্মা অব্যাকতা। নত্থি গোত্রভূ ধম্মা অকুসলাতি।
Kati gotrabhū dhammā kusalā, kati akusalā, kati abyākatā? Pannarasa gotrabhū dhammā kusalā, tayo gotrabhū dhammā abyākatā. Natthi gotrabhū dhammā akusalāti.
সামিসঞ্চ নিরামিসং, পণিহিতঞ্চ অপ্পণিহিতং।
Sāmisañca nirāmisaṃ, paṇihitañca appaṇihitaṃ;
সঞ্ঞুত্তঞ্চ ৰিসঞ্ঞুত্তং, ৰুট্ঠিতঞ্চ অৰুট্ঠিতং॥
Saññuttañca visaññuttaṃ, vuṭṭhitañca avuṭṭhitaṃ.
অট্ঠ সমাধিস্স পচ্চযা, দস ঞাণস্স গোচরা।
Aṭṭha samādhissa paccayā, dasa ñāṇassa gocarā;
অট্ঠারস গোত্রভূ ধম্মা, তিণ্ণং ৰিমোক্খান পচ্চযা॥
Aṭṭhārasa gotrabhū dhammā, tiṇṇaṃ vimokkhāna paccayā.
ইমে অট্ঠারসাকারা, পঞ্ঞা যস্স পরিচ্চিতা।
Ime aṭṭhārasākārā, paññā yassa pariccitā;
কুসলো ৰিৰট্টে ৰুট্ঠানে, নানাদিট্ঠীসু ন কম্পতীতি॥
Kusalo vivaṭṭe vuṭṭhāne, nānādiṭṭhīsu na kampatīti.
তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘বহিদ্ধা ৰুট্ঠানৰিৰট্টনে পঞ্ঞা গোত্রভুঞাণং’’।
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vuṭṭhānavivaṭṭane paññā gotrabhuñāṇaṃ’’.
গোত্রভুঞাণনিদ্দেসো দসমো।
Gotrabhuñāṇaniddeso dasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১০. গোত্রভুঞাণনিদ্দেসৰণ্ণনা • 10. Gotrabhuñāṇaniddesavaṇṇanā
