| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၀. ဂောတ္ရဘုဉာဏနိဒ္ဒေသော
10. Gotrabhuñāṇaniddeso
၅၉. ကထံ ဗဟိဒ္ဓာ ဝုဋ္ဌာနဝိဝဋ္ဋနေ ပညာ ဂောတ္ရဘုဉာဏံ? ဥပ္ပာဒံ အဘိဘုယ္ယတီတိ – ဂောတ္ရဘု။ ပဝတ္တံ အဘိဘုယ္ယတီတိ – ဂောတ္ရဘု။ နိမိတ္တံ အဘိဘုယ္ယတီတိ – ဂောတ္ရဘု။ အာယူဟနံ အဘိဘုယ္ယတီတိ – ဂောတ္ရဘု။ ပဋိသန္ဓိံ အဘိဘုယ္ယတီတိ – ဂောတ္ရဘု။ ဂတိံ အဘိဘုယ္ယတီတိ – ဂောတ္ရဘု။ နိဗ္ဗတ္တိံ အဘိဘုယ္ယတီတိ – ဂောတ္ရဘု။ ဥပပတ္တိံ အဘိဘုယ္ယတီတိ – ဂောတ္ရဘု။ ဇာတိံ အဘိဘုယ္ယတီတိ – ဂောတ္ရဘု။ ဇရံ အဘိဘုယ္ယတီတိ – ဂောတ္ရဘု။ ဗ္ယာဓိံ အဘိဘုယ္ယတီတိ – ဂောတ္ရဘု။ မရဏံ အဘိဘုယ္ယတီတိ – ဂောတ္ရဘု။ သောကံ အဘိဘုယ္ယတီတိ – ဂောတ္ရဘု။ ပရိဒေဝံ အဘိဘုယ္ယတီတိ – ဂောတ္ရဘု။ ဥပာယာသံ အဘိဘုယ္ယတီတိ – ဂောတ္ရဘု။ ဗဟိဒ္ဓာ သင္ခာရနိမိတ္တံ အဘိဘုယ္ယတီတိ – ဂောတ္ရဘု။ အနုပ္ပာဒံ ပက္ခန္ဒတီတိ – ဂောတ္ရဘု။ အပ္ပဝတ္တံ ပက္ခန္ဒတီတိ – ဂောတ္ရဘု။ပေ.။ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
59. Kathaṃ bahiddhā vuṭṭhānavivaṭṭane paññā gotrabhuñāṇaṃ? Uppādaṃ abhibhuyyatīti – gotrabhu. Pavattaṃ abhibhuyyatīti – gotrabhu. Nimittaṃ abhibhuyyatīti – gotrabhu. Āyūhanaṃ abhibhuyyatīti – gotrabhu. Paṭisandhiṃ abhibhuyyatīti – gotrabhu. Gatiṃ abhibhuyyatīti – gotrabhu. Nibbattiṃ abhibhuyyatīti – gotrabhu. Upapattiṃ abhibhuyyatīti – gotrabhu. Jātiṃ abhibhuyyatīti – gotrabhu. Jaraṃ abhibhuyyatīti – gotrabhu. Byādhiṃ abhibhuyyatīti – gotrabhu. Maraṇaṃ abhibhuyyatīti – gotrabhu. Sokaṃ abhibhuyyatīti – gotrabhu. Paridevaṃ abhibhuyyatīti – gotrabhu. Upāyāsaṃ abhibhuyyatīti – gotrabhu. Bahiddhā saṅkhāranimittaṃ abhibhuyyatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ဥပ္ပာဒံ အဘိဘုယ္ယိတ္ဝာ အနုပ္ပာဒံ ပက္ခန္ဒတီတိ – ဂောတ္ရဘု။ ပဝတ္တံ အဘိဘုယ္ယိတ္ဝာ အပ္ပဝတ္တံ ပက္ခန္ဒတီတိ – ဂောတ္ရဘု။ နိမိတ္တံ အဘိဘုယ္ယိတ္ဝာ အနိမိတ္တံ ပက္ခန္ဒတီတိ – ဂောတ္ရဘု ။ပေ.။ ဗဟိဒ္ဓာ သင္ခာရနိမိတ္တံ အဘိဘုယ္ယိတ္ဝာ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
Uppādaṃ abhibhuyyitvā anuppādaṃ pakkhandatīti – gotrabhu. Pavattaṃ abhibhuyyitvā appavattaṃ pakkhandatīti – gotrabhu. Nimittaṃ abhibhuyyitvā animittaṃ pakkhandatīti – gotrabhu …pe… bahiddhā saṅkhāranimittaṃ abhibhuyyitvā nirodhaṃ nibbānaṃ pakkhandatīti – gotrabhu.
ဥပ္ပာဒာ ဝုဋ္ဌာတီတိ – ဂောတ္ရဘု။ ပဝတ္တာ ဝုဋ္ဌာတီတိ – ဂောတ္ရဘု။ နိမိတ္တာ ဝုဋ္ဌာတီတိ – ဂောတ္ရဘု။ အာယူဟနာ ဝုဋ္ဌာတီတိ – ဂောတ္ရဘု။ ပဋိသန္ဓိယာ ဝုဋ္ဌာတီတိ – ဂောတ္ရဘု။ ဂတိယာ ဝုဋ္ဌာတီတိ – ဂောတ္ရဘု။ နိဗ္ဗတ္တိယာ ဝုဋ္ဌာတီတိ – ဂောတ္ရဘု။ ဥပပတ္တိယာ ဝုဋ္ဌာတီတိ – ဂောတ္ရဘု။ ဇာတိယာ ဝုဋ္ဌာတီတိ – ဂောတ္ရဘု။ ဇရာယ ဝုဋ္ဌာတီတိ – ဂောတ္ရဘု။ ဗ္ယာဓိမ္ဟာ ဝုဋ္ဌာတီတိ – ဂောတ္ရဘု။ မရဏာ ဝုဋ္ဌာတီတိ – ဂောတ္ရဘု။ သောကာ ဝုဋ္ဌာတီတိ – ဂောတ္ရဘု။ ပရိဒေဝာ ဝုဋ္ဌာတီတိ – ဂောတ္ရဘု။ ဥပာယာသာ ဝုဋ္ဌာတီတိ – ဂောတ္ရဘု။ ဗဟိဒ္ဓာ သင္ခာရနိမိတ္တာ ဝုဋ္ဌာတီတိ – ဂောတ္ရဘု။ အနုပ္ပာဒံ ပက္ခန္ဒတီတိ – ဂောတ္ရဘု။ အပ္ပဝတ္တံ ပက္ခန္ဒတီတိ – ဂောတ္ရဘု။ပေ.။ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
Uppādā vuṭṭhātīti – gotrabhu. Pavattā vuṭṭhātīti – gotrabhu. Nimittā vuṭṭhātīti – gotrabhu. Āyūhanā vuṭṭhātīti – gotrabhu. Paṭisandhiyā vuṭṭhātīti – gotrabhu. Gatiyā vuṭṭhātīti – gotrabhu. Nibbattiyā vuṭṭhātīti – gotrabhu. Upapattiyā vuṭṭhātīti – gotrabhu. Jātiyā vuṭṭhātīti – gotrabhu. Jarāya vuṭṭhātīti – gotrabhu. Byādhimhā vuṭṭhātīti – gotrabhu. Maraṇā vuṭṭhātīti – gotrabhu. Sokā vuṭṭhātīti – gotrabhu. Paridevā vuṭṭhātīti – gotrabhu. Upāyāsā vuṭṭhātīti – gotrabhu. Bahiddhā saṅkhāranimittā vuṭṭhātīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ဥပ္ပာဒာ ဝုဋ္ဌဟိတ္ဝာ 1 အနုပ္ပာဒံ ပက္ခန္ဒတီတိ – ဂောတ္ရဘု။ ပဝတ္တာ ဝုဋ္ဌဟိတ္ဝာ အပ္ပဝတ္တံ ပက္ခန္ဒတီတိ – ဂောတ္ရဘု။ နိမိတ္တာ ဝုဋ္ဌဟိတ္ဝာ အနိမိတ္တံ ပက္ခန္ဒတီတိ – ဂောတ္ရဘု။ အာယူဟနာ ဝုဋ္ဌဟိတ္ဝာ အနာယူဟနံ ပက္ခန္ဒတီတိ – ဂောတ္ရဘု။ ပဋိသန္ဓိယာ ဝုဋ္ဌဟိတ္ဝာ အပ္ပဋိသန္ဓိံ ပက္ခန္ဒတီတိ – ဂောတ္ရဘု။ ဂတိယာ ဝုဋ္ဌဟိတ္ဝာ အဂတိံ ပက္ခန္ဒတီတိ – ဂောတ္ရဘု။ နိဗ္ဗတ္တိယာ ဝုဋ္ဌဟိတ္ဝာ အနိဗ္ဗတ္တိံ ပက္ခန္ဒတီတိ – ဂောတ္ရဘု။ ဥပပတ္တိယာ ဝုဋ္ဌဟိတ္ဝာ အနုပပတ္တိံ ပက္ခန္ဒတီတိ – ဂောတ္ရဘု။ ဇာတိယာ ဝုဋ္ဌဟိတ္ဝာ အဇာတိံ ပက္ခန္ဒတီတိ – ဂောတ္ရဘု။ ဇရာယ ဝုဋ္ဌဟိတ္ဝာ အဇရံ ပက္ခန္ဒတီတိ – ဂောတ္ရဘု။ ဗ္ယာဓိမ္ဟာ ဝုဋ္ဌဟိတ္ဝာ အဗ္ယာဓိံ ပက္ခန္ဒတီတိ – ဂောတ္ရဘု။ မရဏာ ဝုဋ္ဌဟိတ္ဝာ အမတံ ပက္ခန္ဒတီတိ – ဂောတ္ရဘု။ သောကာ ဝုဋ္ဌဟိတ္ဝာ အသောကံ ပက္ခန္ဒတီတိ – ဂောတ္ရဘု။ ပရိဒေဝာ ဝုဋ္ဌဟိတ္ဝာ အပရိဒေဝံ ပက္ခန္ဒတီတိ – ဂောတ္ရဘု။ ဥပာယာသာ ဝုဋ္ဌဟိတ္ဝာ အနုပာယာသံ ပက္ခန္ဒတီတိ – ဂောတ္ရဘု။ ဗဟိဒ္ဓာ သင္ခာရနိမိတ္တာ ဝုဋ္ဌဟိတ္ဝာ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
Uppādā vuṭṭhahitvā 2 anuppādaṃ pakkhandatīti – gotrabhu. Pavattā vuṭṭhahitvā appavattaṃ pakkhandatīti – gotrabhu. Nimittā vuṭṭhahitvā animittaṃ pakkhandatīti – gotrabhu. Āyūhanā vuṭṭhahitvā anāyūhanaṃ pakkhandatīti – gotrabhu. Paṭisandhiyā vuṭṭhahitvā appaṭisandhiṃ pakkhandatīti – gotrabhu. Gatiyā vuṭṭhahitvā agatiṃ pakkhandatīti – gotrabhu. Nibbattiyā vuṭṭhahitvā anibbattiṃ pakkhandatīti – gotrabhu. Upapattiyā vuṭṭhahitvā anupapattiṃ pakkhandatīti – gotrabhu. Jātiyā vuṭṭhahitvā ajātiṃ pakkhandatīti – gotrabhu. Jarāya vuṭṭhahitvā ajaraṃ pakkhandatīti – gotrabhu. Byādhimhā vuṭṭhahitvā abyādhiṃ pakkhandatīti – gotrabhu. Maraṇā vuṭṭhahitvā amataṃ pakkhandatīti – gotrabhu. Sokā vuṭṭhahitvā asokaṃ pakkhandatīti – gotrabhu. Paridevā vuṭṭhahitvā aparidevaṃ pakkhandatīti – gotrabhu. Upāyāsā vuṭṭhahitvā anupāyāsaṃ pakkhandatīti – gotrabhu. Bahiddhā saṅkhāranimittā vuṭṭhahitvā nirodhaṃ nibbānaṃ pakkhandatīti – gotrabhu.
ဥပ္ပာဒာ ဝိဝဋ္ဋတီတိ – ဂောတ္ရဘု။ ပဝတ္တာ ဝိဝဋ္ဋတီတိ – ဂောတ္ရဘု။ပေ.။ ဗဟိဒ္ဓာ သင္ခာရနိမိတ္တာ ဝိဝဋ္ဋတီတိ – ဂောတ္ရဘု။ အနုပ္ပာဒံ ပက္ခန္ဒတီတိ – ဂောတ္ရဘု။ အပ္ပဝတ္တံ ပက္ခန္ဒတီတိ – ဂောတ္ရဘု။ပေ.။ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
Uppādā vivaṭṭatīti – gotrabhu. Pavattā vivaṭṭatīti – gotrabhu…pe… bahiddhā saṅkhāranimittā vivaṭṭatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ဥပ္ပာဒာ ဝိဝဋ္ဋိတ္ဝာ အနုပ္ပာဒံ ပက္ခန္ဒတီတိ – ဂောတ္ရဘု။ ပဝတ္တာ ဝိဝဋ္ဋိတ္ဝာ အပ္ပဝတ္တံ ပက္ခန္ဒတီတိ – ဂောတ္ရဘု။ပေ.။ ဗဟိဒ္ဓာ သင္ခာရနိမိတ္တာ ဝိဝဋ္ဋိတ္ဝာ နိရောဓံ နိဗ္ဗာနံ ပက္ခန္ဒတီတိ – ဂောတ္ရဘု။
Uppādā vivaṭṭitvā anuppādaṃ pakkhandatīti – gotrabhu. Pavattā vivaṭṭitvā appavattaṃ pakkhandatīti – gotrabhu…pe… bahiddhā saṅkhāranimittā vivaṭṭitvā nirodhaṃ nibbānaṃ pakkhandatīti – gotrabhu.
၆၀. ကတိ ဂောတ္ရဘူ ဓမ္မာ သမထဝသေန ဥပ္ပဇ္ဇန္တိ? ကတိ ဂောတ္ရဘူ ဓမ္မာ ဝိပသ္သနာဝသေန ဥပ္ပဇ္ဇန္တိ? အဋ္ဌ ဂောတ္ရဘူ ဓမ္မာ သမထဝသေန ဥပ္ပဇ္ဇန္တိ။ ဒသ ဂောတ္ရဘူ ဓမ္မာ ဝိပသ္သနာဝသေန ဥပ္ပဇ္ဇန္တိ။
60. Kati gotrabhū dhammā samathavasena uppajjanti? Kati gotrabhū dhammā vipassanāvasena uppajjanti? Aṭṭha gotrabhū dhammā samathavasena uppajjanti. Dasa gotrabhū dhammā vipassanāvasena uppajjanti.
ကတမေ အဋ္ဌ ဂောတ္ရဘူ ဓမ္မာ သမထဝသေန ဥပ္ပဇ္ဇန္တိ? ပဌမံ ဈာနံ ပဋိလာဘတ္ထာယ နီဝရဏေ အဘိဘုယ္ယတီတိ – ဂောတ္ရဘု။ ဒုတိယံ ဈာနံ ပဋိလာဘတ္ထာယ ဝိတက္ကဝိစာရေ အဘိဘုယ္ယတီတိ – ဂောတ္ရဘု။ တတိယံ ဈာနံ ပဋိလာဘတ္ထာယ ပီတိံ အဘိဘုယ္ယတီတိ – ဂောတ္ရဘု။ စတုတ္ထံ ဈာနံ ပဋိလာဘတ္ထာယ သုခဒုက္ခေ အဘိဘုယ္ယတီတိ – ဂောတ္ရဘု။ အာကာသာနဉ္စာယတနသမာပတ္တိံ ပဋိလာဘတ္ထာယ ရူပသညံ ပဋိဃသညံ နာနတ္တသညံ အဘိဘုယ္ယတီတိ – ဂောတ္ရဘု။ ဝိညာဏဉ္စာယတနသမာပတ္တိံ ပဋိလာဘတ္ထာယ အာကာသာနဉ္စာယတနသညံ အဘိဘုယ္ယတီတိ – ဂောတ္ရဘု။ အာကိဉ္စညာယတနသမာပတ္တိံ ပဋိလာဘတ္ထာယ ဝိညာဏဉ္စာယတနသညံ အဘိဘုယ္ယတီတိ – ဂောတ္ရဘု ။ နေဝသညာနာသညာယတနသမာပတ္တိံ ပဋိလာဘတ္ထာယ အာကိဉ္စညာယတနသညံ အဘိဘုယ္ယတီတိ – ဂောတ္ရဘု။ ဣမေ အဋ္ဌ ဂောတ္ရဘူ ဓမ္မာ သမထဝသေန ဥပ္ပဇ္ဇန္တိ။
Katame aṭṭha gotrabhū dhammā samathavasena uppajjanti? Paṭhamaṃ jhānaṃ paṭilābhatthāya nīvaraṇe abhibhuyyatīti – gotrabhu. Dutiyaṃ jhānaṃ paṭilābhatthāya vitakkavicāre abhibhuyyatīti – gotrabhu. Tatiyaṃ jhānaṃ paṭilābhatthāya pītiṃ abhibhuyyatīti – gotrabhu. Catutthaṃ jhānaṃ paṭilābhatthāya sukhadukkhe abhibhuyyatīti – gotrabhu. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ abhibhuyyatīti – gotrabhu. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ abhibhuyyatīti – gotrabhu. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ abhibhuyyatīti – gotrabhu . Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ abhibhuyyatīti – gotrabhu. Ime aṭṭha gotrabhū dhammā samathavasena uppajjanti.
ကတမေ ဒသ ဂောတ္ရဘူ ဓမ္မာ ဝိပသ္သနာဝသေန ဥပ္ပဇ္ဇန္တိ? သောတာပတ္တိမဂ္ဂံ ပဋိလာဘတ္ထာယ ဥပ္ပာဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗ္ယာဓိံ မရဏံ သောကံ ပရိဒေဝံ ဥပာယာသံ ဗဟိဒ္ဓာ သင္ခာရနိမိတ္တံ အဘိဘုယ္ယတီတိ – ဂောတ္ရဘု။ သောတာပတ္တိဖလသမာပတ္တတ္ထာယ ဥပ္ပာဒံ ပဝတ္တံ နိမိတ္တံ အာယူဟနံ ပဋိသန္ဓိံ။ပေ.။ အဘိဘုယ္ယတီတိ – ဂောတ္ရဘု။ သကဒာဂာမိမဂ္ဂံ ပဋိလာဘတ္ထာယ။ပေ.။ သကဒာဂာမိဖလသမာပတ္တတ္ထာယ။ အနာဂာမိမဂ္ဂံ ပဋိလာဘတ္ထာယ။ အနာဂာမိဖလသမာပတ္တတ္ထာယ။ အရဟတ္တမဂ္ဂံ ပဋိလာဘတ္ထာယ ဥပ္ပာဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗ္ယာဓိံ မရဏံ သောကံ ပရိဒေဝံ ဥပာယာသံ ဗဟိဒ္ဓာ သင္ခာရနိမိတ္တံ အဘိဘုယ္ယတီတိ – ဂောတ္ရဘု။ အရဟတ္တဖလသမာပတ္တတ္ထာယ။ သုညတဝိဟာရသမာပတ္တတ္ထာယ။ အနိမိတ္တဝိဟာရသမာပတ္တတ္ထာယ ဥပ္ပာဒံ ပဝတ္တံ နိမိတ္တံ အာယူဟနံ ပဋိသန္ဓိံ။ပေ.။ အဘိဘုယ္ယတီတိ – ဂောတ္ရဘု။ ဣမေ ဒသ ဂောတ္ရဘူ ဓမ္မာ ဝိပသ္သနာဝသေန ဥပ္ပဇ္ဇန္တိ။
Katame dasa gotrabhū dhammā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Sakadāgāmimaggaṃ paṭilābhatthāya…pe… sakadāgāmiphalasamāpattatthāya… anāgāmimaggaṃ paṭilābhatthāya… anāgāmiphalasamāpattatthāya… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Arahattaphalasamāpattatthāya… suññatavihārasamāpattatthāya… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Ime dasa gotrabhū dhammā vipassanāvasena uppajjanti.
ကတိ ဂောတ္ရဘူ ဓမ္မာ ကုသလာ, ကတိ အကုသလာ, ကတိ အဗ္ယာကတာ? ပန္နရသ ဂောတ္ရဘူ ဓမ္မာ ကုသလာ, တယော ဂောတ္ရဘူ ဓမ္မာ အဗ္ယာကတာ။ နတ္ထိ ဂောတ္ရဘူ ဓမ္မာ အကုသလာတိ။
Kati gotrabhū dhammā kusalā, kati akusalā, kati abyākatā? Pannarasa gotrabhū dhammā kusalā, tayo gotrabhū dhammā abyākatā. Natthi gotrabhū dhammā akusalāti.
သာမိသဉ္စ နိရာမိသံ၊ ပဏိဟိတဉ္စ အပ္ပဏိဟိတံ။
Sāmisañca nirāmisaṃ, paṇihitañca appaṇihitaṃ;
သညုတ္တဉ္စ ဝိသညုတ္တံ၊ ဝုဋ္ဌိတဉ္စ အဝုဋ္ဌိတံ။
Saññuttañca visaññuttaṃ, vuṭṭhitañca avuṭṭhitaṃ.
အဋ္ဌ သမာဓိသ္သ ပစ္စယာ၊ ဒသ ဉာဏသ္သ ဂောစရာ။
Aṭṭha samādhissa paccayā, dasa ñāṇassa gocarā;
အဋ္ဌာရသ ဂောတ္ရဘူ ဓမ္မာ၊ တိဏ္ဏံ ဝိမောက္ခာန ပစ္စယာ။
Aṭṭhārasa gotrabhū dhammā, tiṇṇaṃ vimokkhāna paccayā.
ဣမေ အဋ္ဌာရသာကာရာ၊ ပညာ ယသ္သ ပရိစ္စိတာ။
Ime aṭṭhārasākārā, paññā yassa pariccitā;
ကုသလော ဝိဝဋ္ဋေ ဝုဋ္ဌာနေ၊ နာနာဒိဋ္ဌီသု န ကမ္ပတီတိ။
Kusalo vivaṭṭe vuṭṭhāne, nānādiṭṭhīsu na kampatīti.
တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဗဟိဒ္ဓာ ဝုဋ္ဌာနဝိဝဋ္ဋနေ ပညာ ဂောတ္ရဘုဉာဏံ’’။
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vuṭṭhānavivaṭṭane paññā gotrabhuñāṇaṃ’’.
ဂောတ္ရဘုဉာဏနိဒ္ဒေသော ဒသမော။
Gotrabhuñāṇaniddeso dasamo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၀. ဂောတ္ရဘုဉာဏနိဒ္ဒေသဝဏ္ဏနာ • 10. Gotrabhuñāṇaniddesavaṇṇanā
