| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡༠. གོཏྲབྷུཉཱཎནིདྡེསོ
10. Gotrabhuñāṇaniddeso
༥༩. ཀཐཾ བཧིདྡྷཱ ཝུཊྛཱནཝིཝཊྚནེ པཉྙཱ གོཏྲབྷུཉཱཎཾ? ཨུཔྤཱདཾ ཨབྷིབྷུཡྻཏཱིཏི – གོཏྲབྷུ། པཝཏྟཾ ཨབྷིབྷུཡྻཏཱིཏི – གོཏྲབྷུ། ནིམིཏྟཾ ཨབྷིབྷུཡྻཏཱིཏི – གོཏྲབྷུ། ཨཱཡཱུཧནཾ ཨབྷིབྷུཡྻཏཱིཏི – གོཏྲབྷུ། པཊིསནྡྷིཾ ཨབྷིབྷུཡྻཏཱིཏི – གོཏྲབྷུ། གཏིཾ ཨབྷིབྷུཡྻཏཱིཏི – གོཏྲབྷུ། ནིབྦཏྟིཾ ཨབྷིབྷུཡྻཏཱིཏི – གོཏྲབྷུ། ཨུཔཔཏྟིཾ ཨབྷིབྷུཡྻཏཱིཏི – གོཏྲབྷུ། ཛཱཏིཾ ཨབྷིབྷུཡྻཏཱིཏི – གོཏྲབྷུ། ཛརཾ ཨབྷིབྷུཡྻཏཱིཏི – གོཏྲབྷུ། བྱཱདྷིཾ ཨབྷིབྷུཡྻཏཱིཏི – གོཏྲབྷུ། མརཎཾ ཨབྷིབྷུཡྻཏཱིཏི – གོཏྲབྷུ། སོཀཾ ཨབྷིབྷུཡྻཏཱིཏི – གོཏྲབྷུ། པརིདེཝཾ ཨབྷིབྷུཡྻཏཱིཏི – གོཏྲབྷུ། ཨུཔཱཡཱསཾ ཨབྷིབྷུཡྻཏཱིཏི – གོཏྲབྷུ། བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི – གོཏྲབྷུ། ཨནུཔྤཱདཾ པཀྑནྡཏཱིཏི – གོཏྲབྷུ། ཨཔྤཝཏྟཾ པཀྑནྡཏཱིཏི – གོཏྲབྷུ…པེ॰… ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
59. Kathaṃ bahiddhā vuṭṭhānavivaṭṭane paññā gotrabhuñāṇaṃ? Uppādaṃ abhibhuyyatīti – gotrabhu. Pavattaṃ abhibhuyyatīti – gotrabhu. Nimittaṃ abhibhuyyatīti – gotrabhu. Āyūhanaṃ abhibhuyyatīti – gotrabhu. Paṭisandhiṃ abhibhuyyatīti – gotrabhu. Gatiṃ abhibhuyyatīti – gotrabhu. Nibbattiṃ abhibhuyyatīti – gotrabhu. Upapattiṃ abhibhuyyatīti – gotrabhu. Jātiṃ abhibhuyyatīti – gotrabhu. Jaraṃ abhibhuyyatīti – gotrabhu. Byādhiṃ abhibhuyyatīti – gotrabhu. Maraṇaṃ abhibhuyyatīti – gotrabhu. Sokaṃ abhibhuyyatīti – gotrabhu. Paridevaṃ abhibhuyyatīti – gotrabhu. Upāyāsaṃ abhibhuyyatīti – gotrabhu. Bahiddhā saṅkhāranimittaṃ abhibhuyyatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ཨུཔྤཱདཾ ཨབྷིབྷུཡྻིཏྭཱ ཨནུཔྤཱདཾ པཀྑནྡཏཱིཏི – གོཏྲབྷུ། པཝཏྟཾ ཨབྷིབྷུཡྻིཏྭཱ ཨཔྤཝཏྟཾ པཀྑནྡཏཱིཏི – གོཏྲབྷུ། ནིམིཏྟཾ ཨབྷིབྷུཡྻིཏྭཱ ཨནིམིཏྟཾ པཀྑནྡཏཱིཏི – གོཏྲབྷུ …པེ॰… བཧིདྡྷཱ སངྑཱརནིམིཏྟཾ ཨབྷིབྷུཡྻིཏྭཱ ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
Uppādaṃ abhibhuyyitvā anuppādaṃ pakkhandatīti – gotrabhu. Pavattaṃ abhibhuyyitvā appavattaṃ pakkhandatīti – gotrabhu. Nimittaṃ abhibhuyyitvā animittaṃ pakkhandatīti – gotrabhu …pe… bahiddhā saṅkhāranimittaṃ abhibhuyyitvā nirodhaṃ nibbānaṃ pakkhandatīti – gotrabhu.
ཨུཔྤཱདཱ ཝུཊྛཱཏཱིཏི – གོཏྲབྷུ། པཝཏྟཱ ཝུཊྛཱཏཱིཏི – གོཏྲབྷུ། ནིམིཏྟཱ ཝུཊྛཱཏཱིཏི – གོཏྲབྷུ། ཨཱཡཱུཧནཱ ཝུཊྛཱཏཱིཏི – གོཏྲབྷུ། པཊིསནྡྷིཡཱ ཝུཊྛཱཏཱིཏི – གོཏྲབྷུ། གཏིཡཱ ཝུཊྛཱཏཱིཏི – གོཏྲབྷུ། ནིབྦཏྟིཡཱ ཝུཊྛཱཏཱིཏི – གོཏྲབྷུ། ཨུཔཔཏྟིཡཱ ཝུཊྛཱཏཱིཏི – གོཏྲབྷུ། ཛཱཏིཡཱ ཝུཊྛཱཏཱིཏི – གོཏྲབྷུ། ཛརཱཡ ཝུཊྛཱཏཱིཏི – གོཏྲབྷུ། བྱཱདྷིམྷཱ ཝུཊྛཱཏཱིཏི – གོཏྲབྷུ། མརཎཱ ཝུཊྛཱཏཱིཏི – གོཏྲབྷུ། སོཀཱ ཝུཊྛཱཏཱིཏི – གོཏྲབྷུ། པརིདེཝཱ ཝུཊྛཱཏཱིཏི – གོཏྲབྷུ། ཨུཔཱཡཱསཱ ཝུཊྛཱཏཱིཏི – གོཏྲབྷུ། བཧིདྡྷཱ སངྑཱརནིམིཏྟཱ ཝུཊྛཱཏཱིཏི – གོཏྲབྷུ། ཨནུཔྤཱདཾ པཀྑནྡཏཱིཏི – གོཏྲབྷུ། ཨཔྤཝཏྟཾ པཀྑནྡཏཱིཏི – གོཏྲབྷུ…པེ॰… ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
Uppādā vuṭṭhātīti – gotrabhu. Pavattā vuṭṭhātīti – gotrabhu. Nimittā vuṭṭhātīti – gotrabhu. Āyūhanā vuṭṭhātīti – gotrabhu. Paṭisandhiyā vuṭṭhātīti – gotrabhu. Gatiyā vuṭṭhātīti – gotrabhu. Nibbattiyā vuṭṭhātīti – gotrabhu. Upapattiyā vuṭṭhātīti – gotrabhu. Jātiyā vuṭṭhātīti – gotrabhu. Jarāya vuṭṭhātīti – gotrabhu. Byādhimhā vuṭṭhātīti – gotrabhu. Maraṇā vuṭṭhātīti – gotrabhu. Sokā vuṭṭhātīti – gotrabhu. Paridevā vuṭṭhātīti – gotrabhu. Upāyāsā vuṭṭhātīti – gotrabhu. Bahiddhā saṅkhāranimittā vuṭṭhātīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ཨུཔྤཱདཱ ཝུཊྛཧིཏྭཱ 1 ཨནུཔྤཱདཾ པཀྑནྡཏཱིཏི – གོཏྲབྷུ། པཝཏྟཱ ཝུཊྛཧིཏྭཱ ཨཔྤཝཏྟཾ པཀྑནྡཏཱིཏི – གོཏྲབྷུ། ནིམིཏྟཱ ཝུཊྛཧིཏྭཱ ཨནིམིཏྟཾ པཀྑནྡཏཱིཏི – གོཏྲབྷུ། ཨཱཡཱུཧནཱ ཝུཊྛཧིཏྭཱ ཨནཱཡཱུཧནཾ པཀྑནྡཏཱིཏི – གོཏྲབྷུ། པཊིསནྡྷིཡཱ ཝུཊྛཧིཏྭཱ ཨཔྤཊིསནྡྷིཾ པཀྑནྡཏཱིཏི – གོཏྲབྷུ། གཏིཡཱ ཝུཊྛཧིཏྭཱ ཨགཏིཾ པཀྑནྡཏཱིཏི – གོཏྲབྷུ། ནིབྦཏྟིཡཱ ཝུཊྛཧིཏྭཱ ཨནིབྦཏྟིཾ པཀྑནྡཏཱིཏི – གོཏྲབྷུ། ཨུཔཔཏྟིཡཱ ཝུཊྛཧིཏྭཱ ཨནུཔཔཏྟིཾ པཀྑནྡཏཱིཏི – གོཏྲབྷུ། ཛཱཏིཡཱ ཝུཊྛཧིཏྭཱ ཨཛཱཏིཾ པཀྑནྡཏཱིཏི – གོཏྲབྷུ། ཛརཱཡ ཝུཊྛཧིཏྭཱ ཨཛརཾ པཀྑནྡཏཱིཏི – གོཏྲབྷུ། བྱཱདྷིམྷཱ ཝུཊྛཧིཏྭཱ ཨབྱཱདྷིཾ པཀྑནྡཏཱིཏི – གོཏྲབྷུ། མརཎཱ ཝུཊྛཧིཏྭཱ ཨམཏཾ པཀྑནྡཏཱིཏི – གོཏྲབྷུ། སོཀཱ ཝུཊྛཧིཏྭཱ ཨསོཀཾ པཀྑནྡཏཱིཏི – གོཏྲབྷུ། པརིདེཝཱ ཝུཊྛཧིཏྭཱ ཨཔརིདེཝཾ པཀྑནྡཏཱིཏི – གོཏྲབྷུ། ཨུཔཱཡཱསཱ ཝུཊྛཧིཏྭཱ ཨནུཔཱཡཱསཾ པཀྑནྡཏཱིཏི – གོཏྲབྷུ། བཧིདྡྷཱ སངྑཱརནིམིཏྟཱ ཝུཊྛཧིཏྭཱ ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
Uppādā vuṭṭhahitvā 2 anuppādaṃ pakkhandatīti – gotrabhu. Pavattā vuṭṭhahitvā appavattaṃ pakkhandatīti – gotrabhu. Nimittā vuṭṭhahitvā animittaṃ pakkhandatīti – gotrabhu. Āyūhanā vuṭṭhahitvā anāyūhanaṃ pakkhandatīti – gotrabhu. Paṭisandhiyā vuṭṭhahitvā appaṭisandhiṃ pakkhandatīti – gotrabhu. Gatiyā vuṭṭhahitvā agatiṃ pakkhandatīti – gotrabhu. Nibbattiyā vuṭṭhahitvā anibbattiṃ pakkhandatīti – gotrabhu. Upapattiyā vuṭṭhahitvā anupapattiṃ pakkhandatīti – gotrabhu. Jātiyā vuṭṭhahitvā ajātiṃ pakkhandatīti – gotrabhu. Jarāya vuṭṭhahitvā ajaraṃ pakkhandatīti – gotrabhu. Byādhimhā vuṭṭhahitvā abyādhiṃ pakkhandatīti – gotrabhu. Maraṇā vuṭṭhahitvā amataṃ pakkhandatīti – gotrabhu. Sokā vuṭṭhahitvā asokaṃ pakkhandatīti – gotrabhu. Paridevā vuṭṭhahitvā aparidevaṃ pakkhandatīti – gotrabhu. Upāyāsā vuṭṭhahitvā anupāyāsaṃ pakkhandatīti – gotrabhu. Bahiddhā saṅkhāranimittā vuṭṭhahitvā nirodhaṃ nibbānaṃ pakkhandatīti – gotrabhu.
ཨུཔྤཱདཱ ཝིཝཊྚཏཱིཏི – གོཏྲབྷུ། པཝཏྟཱ ཝིཝཊྚཏཱིཏི – གོཏྲབྷུ…པེ॰… བཧིདྡྷཱ སངྑཱརནིམིཏྟཱ ཝིཝཊྚཏཱིཏི – གོཏྲབྷུ། ཨནུཔྤཱདཾ པཀྑནྡཏཱིཏི – གོཏྲབྷུ། ཨཔྤཝཏྟཾ པཀྑནྡཏཱིཏི – གོཏྲབྷུ…པེ॰… ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
Uppādā vivaṭṭatīti – gotrabhu. Pavattā vivaṭṭatīti – gotrabhu…pe… bahiddhā saṅkhāranimittā vivaṭṭatīti – gotrabhu. Anuppādaṃ pakkhandatīti – gotrabhu. Appavattaṃ pakkhandatīti – gotrabhu…pe… nirodhaṃ nibbānaṃ pakkhandatīti – gotrabhu.
ཨུཔྤཱདཱ ཝིཝཊྚིཏྭཱ ཨནུཔྤཱདཾ པཀྑནྡཏཱིཏི – གོཏྲབྷུ། པཝཏྟཱ ཝིཝཊྚིཏྭཱ ཨཔྤཝཏྟཾ པཀྑནྡཏཱིཏི – གོཏྲབྷུ…པེ॰… བཧིདྡྷཱ སངྑཱརནིམིཏྟཱ ཝིཝཊྚིཏྭཱ ནིརོདྷཾ ནིབྦཱནཾ པཀྑནྡཏཱིཏི – གོཏྲབྷུ།
Uppādā vivaṭṭitvā anuppādaṃ pakkhandatīti – gotrabhu. Pavattā vivaṭṭitvā appavattaṃ pakkhandatīti – gotrabhu…pe… bahiddhā saṅkhāranimittā vivaṭṭitvā nirodhaṃ nibbānaṃ pakkhandatīti – gotrabhu.
༦༠. ཀཏི གོཏྲབྷཱུ དྷམྨཱ སམཐཝསེན ཨུཔྤཛྫནྟི? ཀཏི གོཏྲབྷཱུ དྷམྨཱ ཝིཔསྶནཱཝསེན ཨུཔྤཛྫནྟི? ཨཊྛ གོཏྲབྷཱུ དྷམྨཱ སམཐཝསེན ཨུཔྤཛྫནྟི། དས གོཏྲབྷཱུ དྷམྨཱ ཝིཔསྶནཱཝསེན ཨུཔྤཛྫནྟི།
60. Kati gotrabhū dhammā samathavasena uppajjanti? Kati gotrabhū dhammā vipassanāvasena uppajjanti? Aṭṭha gotrabhū dhammā samathavasena uppajjanti. Dasa gotrabhū dhammā vipassanāvasena uppajjanti.
ཀཏམེ ཨཊྛ གོཏྲབྷཱུ དྷམྨཱ སམཐཝསེན ཨུཔྤཛྫནྟི? པཋམཾ ཛྷཱནཾ པཊིལཱབྷཏྠཱཡ ནཱིཝརཎེ ཨབྷིབྷུཡྻཏཱིཏི – གོཏྲབྷུ། དུཏིཡཾ ཛྷཱནཾ པཊིལཱབྷཏྠཱཡ ཝིཏཀྐཝིཙཱརེ ཨབྷིབྷུཡྻཏཱིཏི – གོཏྲབྷུ། ཏཏིཡཾ ཛྷཱནཾ པཊིལཱབྷཏྠཱཡ པཱིཏིཾ ཨབྷིབྷུཡྻཏཱིཏི – གོཏྲབྷུ། ཙཏུཏྠཾ ཛྷཱནཾ པཊིལཱབྷཏྠཱཡ སུཁདུཀྑེ ཨབྷིབྷུཡྻཏཱིཏི – གོཏྲབྷུ། ཨཱཀཱསཱནཉྩཱཡཏནསམཱཔཏྟིཾ པཊིལཱབྷཏྠཱཡ རཱུཔསཉྙཾ པཊིགྷསཉྙཾ ནཱནཏྟསཉྙཾ ཨབྷིབྷུཡྻཏཱིཏི – གོཏྲབྷུ། ཝིཉྙཱཎཉྩཱཡཏནསམཱཔཏྟིཾ པཊིལཱབྷཏྠཱཡ ཨཱཀཱསཱནཉྩཱཡཏནསཉྙཾ ཨབྷིབྷུཡྻཏཱིཏི – གོཏྲབྷུ། ཨཱཀིཉྩཉྙཱཡཏནསམཱཔཏྟིཾ པཊིལཱབྷཏྠཱཡ ཝིཉྙཱཎཉྩཱཡཏནསཉྙཾ ཨབྷིབྷུཡྻཏཱིཏི – གོཏྲབྷུ ། ནེཝསཉྙཱནཱསཉྙཱཡཏནསམཱཔཏྟིཾ པཊིལཱབྷཏྠཱཡ ཨཱཀིཉྩཉྙཱཡཏནསཉྙཾ ཨབྷིབྷུཡྻཏཱིཏི – གོཏྲབྷུ། ཨིམེ ཨཊྛ གོཏྲབྷཱུ དྷམྨཱ སམཐཝསེན ཨུཔྤཛྫནྟི།
Katame aṭṭha gotrabhū dhammā samathavasena uppajjanti? Paṭhamaṃ jhānaṃ paṭilābhatthāya nīvaraṇe abhibhuyyatīti – gotrabhu. Dutiyaṃ jhānaṃ paṭilābhatthāya vitakkavicāre abhibhuyyatīti – gotrabhu. Tatiyaṃ jhānaṃ paṭilābhatthāya pītiṃ abhibhuyyatīti – gotrabhu. Catutthaṃ jhānaṃ paṭilābhatthāya sukhadukkhe abhibhuyyatīti – gotrabhu. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ abhibhuyyatīti – gotrabhu. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ abhibhuyyatīti – gotrabhu. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ abhibhuyyatīti – gotrabhu . Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ abhibhuyyatīti – gotrabhu. Ime aṭṭha gotrabhū dhammā samathavasena uppajjanti.
ཀཏམེ དས གོཏྲབྷཱུ དྷམྨཱ ཝིཔསྶནཱཝསེན ཨུཔྤཛྫནྟི? སོཏཱཔཏྟིམགྒཾ པཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི – གོཏྲབྷུ། སོཏཱཔཏྟིཕལསམཱཔཏྟཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ…པེ॰… ཨབྷིབྷུཡྻཏཱིཏི – གོཏྲབྷུ། སཀདཱགཱམིམགྒཾ པཊིལཱབྷཏྠཱཡ…པེ॰… སཀདཱགཱམིཕལསམཱཔཏྟཏྠཱཡ… ཨནཱགཱམིམགྒཾ པཊིལཱབྷཏྠཱཡ… ཨནཱགཱམིཕལསམཱཔཏྟཏྠཱཡ… ཨརཧཏྟམགྒཾ པཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི – གོཏྲབྷུ། ཨརཧཏྟཕལསམཱཔཏྟཏྠཱཡ… སུཉྙཏཝིཧཱརསམཱཔཏྟཏྠཱཡ… ཨནིམིཏྟཝིཧཱརསམཱཔཏྟཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ…པེ॰… ཨབྷིབྷུཡྻཏཱིཏི – གོཏྲབྷུ། ཨིམེ དས གོཏྲབྷཱུ དྷམྨཱ ཝིཔསྶནཱཝསེན ཨུཔྤཛྫནྟི།
Katame dasa gotrabhū dhammā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Sakadāgāmimaggaṃ paṭilābhatthāya…pe… sakadāgāmiphalasamāpattatthāya… anāgāmimaggaṃ paṭilābhatthāya… anāgāmiphalasamāpattatthāya… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ bahiddhā saṅkhāranimittaṃ abhibhuyyatīti – gotrabhu. Arahattaphalasamāpattatthāya… suññatavihārasamāpattatthāya… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… abhibhuyyatīti – gotrabhu. Ime dasa gotrabhū dhammā vipassanāvasena uppajjanti.
ཀཏི གོཏྲབྷཱུ དྷམྨཱ ཀུསལཱ, ཀཏི ཨཀུསལཱ, ཀཏི ཨབྱཱཀཏཱ? པནྣརས གོཏྲབྷཱུ དྷམྨཱ ཀུསལཱ, ཏཡོ གོཏྲབྷཱུ དྷམྨཱ ཨབྱཱཀཏཱ། ནཏྠི གོཏྲབྷཱུ དྷམྨཱ ཨཀུསལཱཏི།
Kati gotrabhū dhammā kusalā, kati akusalā, kati abyākatā? Pannarasa gotrabhū dhammā kusalā, tayo gotrabhū dhammā abyākatā. Natthi gotrabhū dhammā akusalāti.
སཱམིསཉྩ ནིརཱམིསཾ, པཎིཧིཏཉྩ ཨཔྤཎིཧིཏཾ།
Sāmisañca nirāmisaṃ, paṇihitañca appaṇihitaṃ;
སཉྙུཏྟཉྩ ཝིསཉྙུཏྟཾ, ཝུཊྛིཏཉྩ ཨཝུཊྛིཏཾ༎
Saññuttañca visaññuttaṃ, vuṭṭhitañca avuṭṭhitaṃ.
ཨཊྛ སམཱདྷིསྶ པཙྩཡཱ, དས ཉཱཎསྶ གོཙརཱ།
Aṭṭha samādhissa paccayā, dasa ñāṇassa gocarā;
ཨཊྛཱརས གོཏྲབྷཱུ དྷམྨཱ, ཏིཎྞཾ ཝིམོཀྑཱན པཙྩཡཱ༎
Aṭṭhārasa gotrabhū dhammā, tiṇṇaṃ vimokkhāna paccayā.
ཨིམེ ཨཊྛཱརསཱཀཱརཱ, པཉྙཱ ཡསྶ པརིཙྩིཏཱ།
Ime aṭṭhārasākārā, paññā yassa pariccitā;
ཀུསལོ ཝིཝཊྚེ ཝུཊྛཱནེ, ནཱནཱདིཊྛཱིསུ ན ཀམྤཏཱིཏི༎
Kusalo vivaṭṭe vuṭṭhāne, nānādiṭṭhīsu na kampatīti.
ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘བཧིདྡྷཱ ཝུཊྛཱནཝིཝཊྚནེ པཉྙཱ གོཏྲབྷུཉཱཎཾ’’།
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vuṭṭhānavivaṭṭane paññā gotrabhuñāṇaṃ’’.
གོཏྲབྷུཉཱཎནིདྡེསོ དསམོ།
Gotrabhuñāṇaniddeso dasamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡༠. གོཏྲབྷུཉཱཎནིདྡེསཝཎྞནཱ • 10. Gotrabhuñāṇaniddesavaṇṇanā
