| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
२. गुहट्ठकसुत्तं
2. Guhaṭṭhakasuttaṃ
७७८.
778.
सत्तो गुहायं बहुनाभिछन्नो, तिट्ठं नरो मोहनस्मिं पगाळ्हो।
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
दूरे विवेका हि तथाविधो सो, कामा हि लोके न हि सुप्पहाया॥
Dūre vivekā hi tathāvidho so, kāmā hi loke na hi suppahāyā.
७७९.
779.
इच्छानिदाना भवसातबद्धा, ते दुप्पमुञ्चा न हि अञ्ञमोक्खा।
Icchānidānā bhavasātabaddhā, te duppamuñcā na hi aññamokkhā;
पच्छा पुरे वापि अपेक्खमाना, इमेव कामे पुरिमेव जप्पं॥
Pacchā pure vāpi apekkhamānā, imeva kāme purimeva jappaṃ.
७८०.
780.
कामेसु गिद्धा पसुता पमूळ्हा, अवदानिया ते विसमे निविट्ठा।
Kāmesu giddhā pasutā pamūḷhā, avadāniyā te visame niviṭṭhā;
दुक्खूपनीता परिदेवयन्ति, किंसू भविस्साम इतो चुतासे॥
Dukkhūpanītā paridevayanti, kiṃsū bhavissāma ito cutāse.
७८१.
781.
तस्मा हि सिक्खेथ इधेव जन्तु, यं किञ्चि जञ्ञा विसमन्ति लोके।
Tasmā hi sikkhetha idheva jantu, yaṃ kiñci jaññā visamanti loke;
न तस्स हेतू विसमं चरेय्य, अप्पञ्हिदं जीवितमाहु धीरा॥
Na tassa hetū visamaṃ careyya, appañhidaṃ jīvitamāhu dhīrā.
७८२.
782.
पस्सामि लोके परिफन्दमानं, पजं इमं तण्हगतं भवेसु।
Passāmi loke pariphandamānaṃ, pajaṃ imaṃ taṇhagataṃ bhavesu;
हीना नरा मच्चुमुखे लपन्ति, अवीततण्हासे भवाभवेसु॥
Hīnā narā maccumukhe lapanti, avītataṇhāse bhavābhavesu.
७८३.
783.
ममायिते पस्सथ फन्दमाने, मच्छेव अप्पोदके खीणसोते।
Mamāyite passatha phandamāne, maccheva appodake khīṇasote;
एतम्पि दिस्वा अममो चरेय्य, भवेसु आसत्तिमकुब्बमानो॥
Etampi disvā amamo careyya, bhavesu āsattimakubbamāno.
७८४.
784.
उभोसु अन्तेसु विनेय्य छन्दं, फस्सं परिञ्ञाय अनानुगिद्धो।
Ubhosu antesu vineyya chandaṃ, phassaṃ pariññāya anānugiddho;
यदत्तगरही तदकुब्बमानो, न लिप्पती 1 दिट्ठसुतेसु धीरो॥
Yadattagarahī tadakubbamāno, na lippatī 2 diṭṭhasutesu dhīro.
७८५.
785.
सञ्ञं परिञ्ञा वितरेय्य ओघं, परिग्गहेसु मुनि नोपलित्तो।
Saññaṃ pariññā vitareyya oghaṃ, pariggahesu muni nopalitto;
अब्बूळ्हसल्लो चरमप्पमत्तो, नासीसती 3 लोकमिमं परञ्चाति॥
Abbūḷhasallo caramappamatto, nāsīsatī 4 lokamimaṃ parañcāti.
गुहट्ठकसुत्तं दुतियं निट्ठितं।
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / २. गुहट्ठकसुत्तवण्णना • 2. Guhaṭṭhakasuttavaṇṇanā
