| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
2. கு³ஹட்ட²கஸுத்தவண்ணனா
2. Guhaṭṭhakasuttavaṇṇanā
779. ஸத்தோ கு³ஹாயந்தி கு³ஹட்ட²கஸுத்தங். கா உப்பத்தி? ப⁴க³வதி கிர ஸாவத்தி²யங் விஹரந்தே ஆயஸ்மா பிண்டோ³லபா⁴ரத்³வாஜோ கோஸம்பி³யங் க³ங்ங்கா³தீரே ஆவட்டகங் நாம உதேனஸ்ஸ உய்யானங், தத்த² அக³மாஸி ஸீதலே பதே³ஸே தி³வாவிஹாரங் நிஸீதி³துகாமோ. அஞ்ஞதா³பி சாயங் க³ச்ச²தேவ தத்த² புப்³பா³ஸேவனேன யதா² க³வம்பதித்தே²ரோ தாவதிங்ஸப⁴வனந்தி வுத்தனயமேதங் வங்கீ³ஸஸுத்தவண்ணனாயங். ஸோ தத்த² க³ங்கா³தீரே ஸீதலே ருக்க²மூலே ஸமாபத்திங் அப்பெத்வா தி³வாவிஹாரங் நிஸீதி³. ராஜாபி கோ² உதேனோ தங் தி³வஸங்யேவ உய்யானகீளிகங் க³ந்த்வா ப³ஹுதே³வ தி³வஸபா⁴க³ங் நச்சகீ³தாதீ³ஹி உய்யானே கீளித்வா பானமத³மத்தோ ஏகிஸ்ஸா இத்தி²யா அங்கே ஸீஸங் கத்வா ஸயி. ஸேஸித்தி²யோ ‘‘ஸுத்தோ ராஜா’’தி உட்ட²ஹித்வா உய்யானே புப்ப²ப²லாதீ³னி க³ண்ஹந்தியோ தே²ரங் தி³ஸ்வா ஹிரொத்தப்பங் உபட்டா²பெத்வா ‘‘மா ஸத்³த³ங் அகத்தா²’’தி அஞ்ஞமஞ்ஞங் நிவாரெத்வா அப்பஸத்³தா³ உபஸங்கமித்வா வந்தி³த்வா தே²ரங் ஸம்பரிவாரெத்வா நிஸீதி³ங்ஸு. தே²ரோ ஸமாபத்திதோ வுட்டா²ய தாஸங் த⁴ம்மங் தே³ஸேஸி, தா துட்டா² ‘‘ஸாது⁴ ஸாதூ⁴’’தி வத்வா ஸுணந்தி.
779.Sattoguhāyanti guhaṭṭhakasuttaṃ. Kā uppatti? Bhagavati kira sāvatthiyaṃ viharante āyasmā piṇḍolabhāradvājo kosambiyaṃ gaṃṅgātīre āvaṭṭakaṃ nāma utenassa uyyānaṃ, tattha agamāsi sītale padese divāvihāraṃ nisīditukāmo. Aññadāpi cāyaṃ gacchateva tattha pubbāsevanena yathā gavampatitthero tāvatiṃsabhavananti vuttanayametaṃ vaṅgīsasuttavaṇṇanāyaṃ. So tattha gaṅgātīre sītale rukkhamūle samāpattiṃ appetvā divāvihāraṃ nisīdi. Rājāpi kho uteno taṃ divasaṃyeva uyyānakīḷikaṃ gantvā bahudeva divasabhāgaṃ naccagītādīhi uyyāne kīḷitvā pānamadamatto ekissā itthiyā aṅke sīsaṃ katvā sayi. Sesitthiyo ‘‘sutto rājā’’ti uṭṭhahitvā uyyāne pupphaphalādīni gaṇhantiyo theraṃ disvā hirottappaṃ upaṭṭhāpetvā ‘‘mā saddaṃ akatthā’’ti aññamaññaṃ nivāretvā appasaddā upasaṅkamitvā vanditvā theraṃ samparivāretvā nisīdiṃsu. Thero samāpattito vuṭṭhāya tāsaṃ dhammaṃ desesi, tā tuṭṭhā ‘‘sādhu sādhū’’ti vatvā suṇanti.
ரஞ்ஞோ ஸீஸங் அங்கேனாதா³ய நிஸின்னித்தீ² ‘‘இமா மங் ஓஹாய கீளந்தீ’’தி தாஸு இஸ்ஸாபகதா ஊருங் சாலெத்வா ராஜானங் பபோ³தே⁴ஸி. ராஜா படிபு³ஜ்ஜி²த்வா இத்தா²கா³ரங் அபஸ்ஸந்தோ ‘‘குஹிங் இமா வஸலியோ’’தி ஆஹ. ஸா ஆஹ – ‘‘தும்ஹேஸு அப³ஹுகதா ‘ஸமணங் ரமயிஸ்ஸாமா’தி க³தா’’தி. ஸோ குத்³தோ⁴ தே²ராபி⁴முகோ² அக³மாஸி. தா இத்தி²யோ ராஜானங் தி³ஸ்வா ஏகச்சா உட்ட²ஹிங்ஸு, ஏகச்சா ‘‘மஹாராஜ, பப்³ப³ஜிதஸ்ஸ ஸந்திகே த⁴ம்மங் ஸுணாமா’’தி ந உட்ட²ஹிங்ஸு. ஸோ தேன பி⁴ய்யோஸோமத்தாய குத்³தோ⁴ தே²ரங் அவந்தி³த்வாவ ‘‘கிமத்த²ங் ஆக³தோஸீ’’தி ஆஹ. ‘‘விவேகத்த²ங் மஹாராஜா’’தி. ஸோ ‘‘விவேகத்தா²ய ஆக³தா ஏவங் இத்தா²கா³ரபரிவுதா நிஸீத³ந்தீ’’தி வத்வா ‘‘தவ விவேகங் கதே²ஹீ’’தி ஆஹ. தே²ரோ விஸாரதோ³பி விவேககதா²ய ‘‘நாயங் அஞ்ஞாதுகாமோ புச்ச²தீ’’தி துண்ஹீ அஹோஸி. ராஜா ‘‘ஸசே ந கதே²ஸி, தம்ப³கிபில்லிகேஹி தங் கா²தா³பெஸ்ஸாமீ’’தி அஞ்ஞதரஸ்மிங் அஸோகருக்கே² தம்ப³கிபில்லிகபுடங் க³ண்ஹந்தோ அத்தனோவ உபரி விகிரி. ஸோ ஸரீரங் புஞ்சி²த்வா அஞ்ஞங் புடங் க³ஹெத்வா தே²ராபி⁴முகோ² அக³மாஸி. தே²ரோ ‘‘ஸசாயங் ராஜா மயி அபரஜ்ஜெ²ய்ய , அபாயாபி⁴முகோ² ப⁴வெய்யா’’தி தங் அனுகம்பமானோ இத்³தி⁴யா ஆகாஸங் அப்³பு⁴க்³க³ந்த்வா க³தோ.
Rañño sīsaṃ aṅkenādāya nisinnitthī ‘‘imā maṃ ohāya kīḷantī’’ti tāsu issāpakatā ūruṃ cāletvā rājānaṃ pabodhesi. Rājā paṭibujjhitvā itthāgāraṃ apassanto ‘‘kuhiṃ imā vasaliyo’’ti āha. Sā āha – ‘‘tumhesu abahukatā ‘samaṇaṃ ramayissāmā’ti gatā’’ti. So kuddho therābhimukho agamāsi. Tā itthiyo rājānaṃ disvā ekaccā uṭṭhahiṃsu, ekaccā ‘‘mahārāja, pabbajitassa santike dhammaṃ suṇāmā’’ti na uṭṭhahiṃsu. So tena bhiyyosomattāya kuddho theraṃ avanditvāva ‘‘kimatthaṃ āgatosī’’ti āha. ‘‘Vivekatthaṃ mahārājā’’ti. So ‘‘vivekatthāya āgatā evaṃ itthāgāraparivutā nisīdantī’’ti vatvā ‘‘tava vivekaṃ kathehī’’ti āha. Thero visāradopi vivekakathāya ‘‘nāyaṃ aññātukāmo pucchatī’’ti tuṇhī ahosi. Rājā ‘‘sace na kathesi, tambakipillikehi taṃ khādāpessāmī’’ti aññatarasmiṃ asokarukkhe tambakipillikapuṭaṃ gaṇhanto attanova upari vikiri. So sarīraṃ puñchitvā aññaṃ puṭaṃ gahetvā therābhimukho agamāsi. Thero ‘‘sacāyaṃ rājā mayi aparajjheyya , apāyābhimukho bhaveyyā’’ti taṃ anukampamāno iddhiyā ākāsaṃ abbhuggantvā gato.
ததோ இத்தி²யோ ஆஹங்ஸு – ‘‘மஹாராஜ, அஞ்ஞே ராஜானோ ஈதி³ஸங் பப்³ப³ஜிதங் தி³ஸ்வா புப்ப²க³ந்தா⁴தீ³ஹி பூஜெந்தி, த்வங் தம்ப³கிபில்லிகபுடேன ஆஸாதே³துங் ஆரத்³தோ⁴ அஹோஸி, குலவங்ஸங் நாஸேதுங் உட்டி²தோ’’தி. ஸோ அத்தனோ தோ³ஸங் ஞத்வா துண்ஹீ ஹுத்வா உய்யானபாலங் புச்சி² – ‘‘அஞ்ஞம்பி தி³வஸங் தே²ரோ இதா⁴க³ச்ச²தீ’’தி? ‘‘ஆம, மஹாராஜா’’தி. தேன ஹி யதா³ ஆக³ச்ச²தி, ததா³ மே ஆரோசெய்யாஸீதி. ஸோ ஏகதி³வஸங் தே²ரே ஆக³தே ஆரோசேஸி. ராஜாபி தே²ரங் உபஸங்கமித்வா பஞ்ஹங் புச்சி²த்வா பாணேஹி ஸரணங் க³தோ அஹோஸி. தம்ப³கிபில்லிகபுடேன ஆஸாதி³ததி³வஸே பன தே²ரோ ஆகாஸேனாக³ந்த்வா புன பத²வியங் நிமுஜ்ஜித்வா ப⁴க³வதோ க³ந்த⁴குடியங் உம்முஜ்ஜி. ப⁴க³வாபி கோ² த³க்கி²ணேன பஸ்ஸேன ஸதோ ஸம்பஜானோ ஸீஹஸெய்யங் கப்பயமானோ தே²ரங் தி³ஸ்வா ‘‘கிங், பா⁴ரத்³வாஜ, அகாலே ஆக³தோஸீ’’தி ஆஹ. தே²ரோ ‘‘ஆம ப⁴க³வா’’தி வத்வா ஸப்³ப³ங் தங் பவத்திங் ஆரோசேஸி. தங் ஸுத்வா ப⁴க³வா ‘‘கிங் கரிஸ்ஸதி தஸ்ஸ விவேககதா² காமகு³ணகி³த்³த⁴ஸ்ஸா’’தி வத்வா த³க்கி²ணேன பஸ்ஸேன நிபன்னோ ஏவ தே²ரஸ்ஸ த⁴ம்மதே³ஸனத்த²ங் இமங் ஸுத்தமபா⁴ஸி.
Tato itthiyo āhaṃsu – ‘‘mahārāja, aññe rājāno īdisaṃ pabbajitaṃ disvā pupphagandhādīhi pūjenti, tvaṃ tambakipillikapuṭena āsādetuṃ āraddho ahosi, kulavaṃsaṃ nāsetuṃ uṭṭhito’’ti. So attano dosaṃ ñatvā tuṇhī hutvā uyyānapālaṃ pucchi – ‘‘aññampi divasaṃ thero idhāgacchatī’’ti? ‘‘Āma, mahārājā’’ti. Tena hi yadā āgacchati, tadā me āroceyyāsīti. So ekadivasaṃ there āgate ārocesi. Rājāpi theraṃ upasaṅkamitvā pañhaṃ pucchitvā pāṇehi saraṇaṃ gato ahosi. Tambakipillikapuṭena āsāditadivase pana thero ākāsenāgantvā puna pathaviyaṃ nimujjitvā bhagavato gandhakuṭiyaṃ ummujji. Bhagavāpi kho dakkhiṇena passena sato sampajāno sīhaseyyaṃ kappayamāno theraṃ disvā ‘‘kiṃ, bhāradvāja, akāle āgatosī’’ti āha. Thero ‘‘āma bhagavā’’ti vatvā sabbaṃ taṃ pavattiṃ ārocesi. Taṃ sutvā bhagavā ‘‘kiṃ karissati tassa vivekakathā kāmaguṇagiddhassā’’ti vatvā dakkhiṇena passena nipanno eva therassa dhammadesanatthaṃ imaṃ suttamabhāsi.
தத்த² ஸத்தோதி லக்³கோ³. கு³ஹாயந்தி காயே. காயோ ஹி ராகா³தீ³னங் வாளானங் வஸனோகாஸதோ ‘‘கு³ஹா’’தி வுச்சதி. ப³ஹுனாபி⁴ச²ன்னோதி ப³ஹுனா ராகா³தி³கிலேஸஜாலேன அபி⁴ச்ச²ன்னோ. ஏதேன அஜ்ஜ²த்தப³ந்த⁴னங் வுத்தங். திட்ட²ந்தி ராகா³தி³வஸேன திட்ட²ந்தோ. நரோதி ஸத்தோ. மோஹனஸ்மிங் பகா³ள்ஹோதி மோஹனங் வுச்சதி காமகு³ணா. எத்த² ஹி தே³வமனுஸ்ஸா முய்ஹந்தி, தேஸு அஜ்ஜோ²கா³ள்ஹோ ஹுத்வா . ஏதேன ப³ஹித்³தா⁴ப³ந்த⁴னங் வுத்தங். தூ³ரே விவேகா ஹி ததா²விதோ⁴ ஸோதி ஸோ ததா²ரூபோ நரோ திவிதா⁴பி காயவிவேகாதி³கா விவேகா தூ³ரே அனாஸன்னே. கிங்காரணா? காமா ஹி லோகே ந ஹி ஸுப்பஹாயா, யஸ்மா லோகே காமா ஸுப்பஹாயா ந ஹொந்தீதி வுத்தங் ஹோதி.
Tattha sattoti laggo. Guhāyanti kāye. Kāyo hi rāgādīnaṃ vāḷānaṃ vasanokāsato ‘‘guhā’’ti vuccati. Bahunābhichannoti bahunā rāgādikilesajālena abhicchanno. Etena ajjhattabandhanaṃ vuttaṃ. Tiṭṭhanti rāgādivasena tiṭṭhanto. Naroti satto. Mohanasmiṃ pagāḷhoti mohanaṃ vuccati kāmaguṇā. Ettha hi devamanussā muyhanti, tesu ajjhogāḷho hutvā . Etena bahiddhābandhanaṃ vuttaṃ. Dūre vivekā hi tathāvidho soti so tathārūpo naro tividhāpi kāyavivekādikā vivekā dūre anāsanne. Kiṃkāraṇā? Kāmā hi loke na hi suppahāyā, yasmā loke kāmā suppahāyā na hontīti vuttaṃ hoti.
780. ஏவங் பட²மகா³தா²ய ‘‘தூ³ரே விவேகா ததா²விதோ⁴’’தி ஸாதெ⁴த்வா புன ததா²விதா⁴னங் ஸத்தானங் த⁴ம்மதங் ஆவிகரொந்தோ ‘‘இச்சா²னிதா³னா’’தி கா³த²மாஹ. தத்த² இச்சா²னிதா³னாதி தண்ஹாஹேதுகா. ப⁴வஸாதப³த்³தா⁴தி ஸுக²வேத³னாதி³ம்ஹி ப⁴வஸாதே ப³த்³தா⁴. தே து³ப்பமுஞ்சாதி தே ப⁴வஸாதவத்து²பூ⁴தா த⁴ம்மா, தே வா தத்த² ப³த்³தா⁴ இச்சா²னிதா³னா ஸத்தா து³ப்பமோசயா. ந ஹி அஞ்ஞமொக்கா²தி அஞ்ஞேன ச மோசேதுங் ந ஸக்கொந்தி. காரணவசனங் வா ஏதங், தே ஸத்தா து³ப்பமுஞ்சா. கஸ்மா? யஸ்மா அஞ்ஞேன மோசேதப்³பா³ ந ஹொந்தி. யதி³ பன முஞ்செய்யுங், ஸகேன தா²மேன முஞ்செய்யுந்தி அயமஸ்ஸ அத்தோ². பச்சா² புரே வாபி அபெக்க²மானாதி அனாக³தே அதீதே வா காமே அபெக்க²மானா. இமேவ காமே புரிமேவ ஜப்பந்தி இமே வா பச்சுப்பன்னே காமே புரிமே வா து³விதே⁴பி அதீதானாக³தே ப³லவதண்ஹாய பத்த²யமானா. இமேஸஞ்ச த்³வின்னங் பதா³னங் ‘‘தே து³ப்பமுஞ்சா ந ஹி அஞ்ஞமொக்கா²’’தி இமினா ஸஹ ஸம்ப³ந்தோ⁴ வேதி³தப்³போ³, இதரதா² ‘‘அபெக்க²மானா ஜப்பங் கிங் கரொந்தி கிங் வா கதா’’தி ந பஞ்ஞாயெய்யுங்.
780. Evaṃ paṭhamagāthāya ‘‘dūre vivekā tathāvidho’’ti sādhetvā puna tathāvidhānaṃ sattānaṃ dhammataṃ āvikaronto ‘‘icchānidānā’’ti gāthamāha. Tattha icchānidānāti taṇhāhetukā. Bhavasātabaddhāti sukhavedanādimhi bhavasāte baddhā. Te duppamuñcāti te bhavasātavatthubhūtā dhammā, te vā tattha baddhā icchānidānā sattā duppamocayā. Na hi aññamokkhāti aññena ca mocetuṃ na sakkonti. Kāraṇavacanaṃ vā etaṃ, te sattā duppamuñcā. Kasmā? Yasmā aññena mocetabbā na honti. Yadi pana muñceyyuṃ, sakena thāmena muñceyyunti ayamassa attho. Pacchā pure vāpi apekkhamānāti anāgate atīte vā kāme apekkhamānā. Imeva kāme purimeva jappanti ime vā paccuppanne kāme purime vā duvidhepi atītānāgate balavataṇhāya patthayamānā. Imesañca dvinnaṃ padānaṃ ‘‘te duppamuñcā na hi aññamokkhā’’ti iminā saha sambandho veditabbo, itarathā ‘‘apekkhamānā jappaṃ kiṃ karonti kiṃ vā katā’’ti na paññāyeyyuṃ.
781-2. ஏவங் பட²மகா³தா²ய ‘‘தூ³ரே விவேகா ததா²விதோ⁴’’தி ஸாதெ⁴த்வா து³தியகா³தா²ய ச ததா²விதா⁴னங் ஸத்தானங் த⁴ம்மதங் ஆவிகத்வா இதா³னி நேஸங் பாபகம்மகரணங் ஆவிகரொந்தோ ‘‘காமேஸு கி³த்³தா⁴’’தி கா³த²மாஹ. தஸ்ஸத்தோ² – தே ஸத்தா காமேஸு பரிபோ⁴க³தண்ஹாய கி³த்³தா⁴ பரியேஸனாதி³மனுயுத்தத்தா பஸுதா ஸம்மோஹமாபன்னத்தா பமூள்ஹா அவக³மனதாய மச்ச²ரிதாய பு³த்³தா⁴தீ³னங் வசனங் அனாதி³யனதாய ச அவதா³னியா. காயவிஸமாதி³ம்ஹி விஸமே நிவிட்டா² அந்தகாலே மரணது³க்கூ²பனீதா ‘‘கிங்ஸூ ப⁴விஸ்ஸாம இதோ சுதாஸே’’தி பரிதே³வயந்தீதி. யஸ்மா ஏததே³வ, தஸ்மா ஹி ஸிக்கே²த²…பே॰… மாஹு தீ⁴ராதி. தத்த² ஸிக்கே²தா²தி திஸ்ஸோ ஸிக்கா² ஆபஜ்ஜெய்ய. இதே⁴வாதி இமஸ்மிங்யேவ ஸாஸனே. ஸேஸமுத்தானமேவ.
781-2. Evaṃ paṭhamagāthāya ‘‘dūre vivekā tathāvidho’’ti sādhetvā dutiyagāthāya ca tathāvidhānaṃ sattānaṃ dhammataṃ āvikatvā idāni nesaṃ pāpakammakaraṇaṃ āvikaronto ‘‘kāmesu giddhā’’ti gāthamāha. Tassattho – te sattā kāmesu paribhogataṇhāya giddhā pariyesanādimanuyuttattā pasutā sammohamāpannattā pamūḷhā avagamanatāya maccharitāya buddhādīnaṃ vacanaṃ anādiyanatāya ca avadāniyā. Kāyavisamādimhi visame niviṭṭhā antakāle maraṇadukkhūpanītā ‘‘kiṃsū bhavissāma ito cutāse’’ti paridevayantīti. Yasmā etadeva, tasmā hi sikkhetha…pe… māhu dhīrāti. Tattha sikkhethāti tisso sikkhā āpajjeyya. Idhevāti imasmiṃyeva sāsane. Sesamuttānameva.
783. இதா³னி யே ததா² ந கரொந்தி, தேஸங் ப்³யஸனப்பத்திங் த³ஸ்ஸெந்தோ ‘‘பஸ்ஸாமீ’’தி கா³த²மாஹ. தத்த² பஸ்ஸாமீதி மங்ஸசக்கு²ஆதீ³ஹி பெக்கா²மி. லோகேதி அபாயாதி³ம்ஹி. பரிப²ந்த³மானந்தி இதோ சிதோ ச ப²ந்த³மானங். பஜங் இமந்தி இமங் ஸத்தகாயங். தண்ஹக³தந்தி தண்ஹாய க³தங் அபி⁴பூ⁴தங், நிபாதிதந்தி அதி⁴ப்பாயோ. ப⁴வேஸூதி காமப⁴வாதீ³ஸு. ஹீனா நராதி ஹீனகம்மந்தா நரா. மச்சுமுகே² லபந்தீதி அந்தகாலே ஸம்பத்தே மரணமுகே² பரிதே³வந்தி. அவீததண்ஹாஸேதி அவிக³ததண்ஹா. ப⁴வாப⁴வேஸூதி காமப⁴வாதீ³ஸு. அத² வா ப⁴வாப⁴வேஸூதி ப⁴வப⁴வேஸு, புனப்புனப⁴வேஸூதி வுத்தங் ஹோதி.
783. Idāni ye tathā na karonti, tesaṃ byasanappattiṃ dassento ‘‘passāmī’’ti gāthamāha. Tattha passāmīti maṃsacakkhuādīhi pekkhāmi. Loketi apāyādimhi. Pariphandamānanti ito cito ca phandamānaṃ. Pajaṃ imanti imaṃ sattakāyaṃ. Taṇhagatanti taṇhāya gataṃ abhibhūtaṃ, nipātitanti adhippāyo. Bhavesūti kāmabhavādīsu. Hīnā narāti hīnakammantā narā. Maccumukhe lapantīti antakāle sampatte maraṇamukhe paridevanti. Avītataṇhāseti avigatataṇhā. Bhavābhavesūti kāmabhavādīsu. Atha vā bhavābhavesūti bhavabhavesu, punappunabhavesūti vuttaṃ hoti.
784. இதா³னி யஸ்மா அவீததண்ஹா ஏவங் ப²ந்த³ந்தி ச லபந்தி ச, தஸ்மா தண்ஹாவினயே ஸமாத³பெந்தோ ‘‘மமாயிதே’’தி கா³த²மாஹ. தத்த² மமாயிதேதி தண்ஹாதி³ட்டி²மமத்தேஹி ‘‘மம’’ந்தி பரிக்³க³ஹிதே வத்து²ஸ்மிங். பஸ்ஸதா²தி ஸோதாரே ஆலபந்தோ ஆஹ. ஏதம்பீதி ஏதம்பி ஆதீ³னவங். ஸேஸங் பாகடமேவ.
784. Idāni yasmā avītataṇhā evaṃ phandanti ca lapanti ca, tasmā taṇhāvinaye samādapento ‘‘mamāyite’’ti gāthamāha. Tattha mamāyiteti taṇhādiṭṭhimamattehi ‘‘mama’’nti pariggahite vatthusmiṃ. Passathāti sotāre ālapanto āha. Etampīti etampi ādīnavaṃ. Sesaṃ pākaṭameva.
785. ஏவமெத்த² பட²மகா³தா²ய அஸ்ஸாத³ங், ததோ பராஹி சதூஹி ஆதீ³னவஞ்ச த³ஸ்ஸெத்வா இதா³னி ஸஉபாயங் நிஸ்ஸரணங் நிஸ்ஸரணானிஸங்ஸஞ்ச த³ஸ்ஸேதுங் ஸப்³பா³ஹி வா ஏதாஹி காமானங் ஆதீ³னவங் ஓகாரங் ஸங்கிலேஸஞ்ச த³ஸ்ஸெத்வா இதா³னி நெக்க²ம்மே ஆனிஸங்ஸங் த³ஸ்ஸேதுங் ‘‘உபோ⁴ஸு அந்தேஸூ’’தி கா³தா²த்³வயமாஹ. தத்த² உபோ⁴ஸு அந்தேஸூதி ப²ஸ்ஸப²ஸ்ஸஸமுத³யாதீ³ஸு த்³வீஸு பரிச்சே²தே³ஸு. வினெய்ய ச²ந்த³ந்தி ச²ந்த³ராக³ங் வினெத்வா. ப²ஸ்ஸங் பரிஞ்ஞாயாதி சக்கு²ஸம்ப²ஸ்ஸாதி³ப²ஸ்ஸங், ப²ஸ்ஸானுஸாரேன வா தங்ஸம்பயுத்தே ஸப்³பே³பி அரூபத⁴ம்மே, தேஸங் வத்து²த்³வாராரம்மணவஸேன ரூபத⁴ம்மே சாதி ஸகலம்பி நாமரூபங் தீஹி பரிஞ்ஞாஹி பரிஜானித்வா. அனானுகி³த்³தோ⁴தி ரூபாதீ³ஸு ஸப்³ப³த⁴ம்மேஸு அகி³த்³தோ⁴. யத³த்தக³ரஹீ தத³குப்³ப³மானோதி யங் அத்தனா க³ரஹதி, தங் அகுருமானோ. நலிப்பதீ தி³ட்ட²ஸுதேஸு தீ⁴ரோதி ஸோ ஏவரூபோ தி⁴திஸம்பன்னோ தீ⁴ரோ தி³ட்டே²ஸு ச ஸுதேஸு ச த⁴ம்மேஸு த்³வின்னங் லேபானங் ஏகேனபி லேபேன ந லிப்பதி. ஆகாஸமிவ நிருபலித்தோ அச்சந்தவோதா³னப்பத்தோ ஹோதி.
785. Evamettha paṭhamagāthāya assādaṃ, tato parāhi catūhi ādīnavañca dassetvā idāni saupāyaṃ nissaraṇaṃ nissaraṇānisaṃsañca dassetuṃ sabbāhi vā etāhi kāmānaṃ ādīnavaṃ okāraṃ saṃkilesañca dassetvā idāni nekkhamme ānisaṃsaṃ dassetuṃ ‘‘ubhosu antesū’’ti gāthādvayamāha. Tattha ubhosu antesūti phassaphassasamudayādīsu dvīsu paricchedesu. Vineyya chandanti chandarāgaṃ vinetvā. Phassaṃ pariññāyāti cakkhusamphassādiphassaṃ, phassānusārena vā taṃsampayutte sabbepi arūpadhamme, tesaṃ vatthudvārārammaṇavasena rūpadhamme cāti sakalampi nāmarūpaṃ tīhi pariññāhi parijānitvā. Anānugiddhoti rūpādīsu sabbadhammesu agiddho. Yadattagarahī tadakubbamānoti yaṃ attanā garahati, taṃ akurumāno. Nalippatī diṭṭhasutesu dhīroti so evarūpo dhitisampanno dhīro diṭṭhesu ca sutesu ca dhammesu dvinnaṃ lepānaṃ ekenapi lepena na lippati. Ākāsamiva nirupalitto accantavodānappatto hoti.
786. ஸஞ்ஞங் பரிஞ்ஞாதி கா³தா²ய பன அயங் ஸங்கே²பத்தோ² – ந கேவலஞ்ச ப²ஸ்ஸமேவ, அபிச கோ² பன காமஸஞ்ஞாதி³பே⁴த³ங் ஸஞ்ஞம்பி, ஸஞ்ஞானுஸாரேன வா புப்³பே³ வுத்தனயேனேவ நாமரூபங் தீஹி பரிஞ்ஞாஹி பரிஜானித்வா இமாய படிபதா³ய சதுப்³பி³த⁴ம்பி விதரெய்ய ஓக⁴ங், ததோ ஸோ திண்ணோகோ⁴ தண்ஹாதி³ட்டி²பரிக்³க³ஹேஸு தண்ஹாதி³ட்டி²லேபப்பஹானேன நோபலித்தோ கீ²ணாஸவமுனி ராகா³தி³ஸல்லானங் அப்³பூ³ள்ஹத்தா அப்³பூ³ள்ஹஸல்லோ ஸதிவேபுல்லப்பத்தியா அப்பமத்தோ சரங், புப்³ப³பா⁴கே³ வா அப்பமத்தோ சரங் தேன அப்பமாத³சாரேன அப்³பூ³ள்ஹஸல்லோ ஹுத்வா ஸகபரத்தபா⁴வாதி³பே⁴த³ங் நாஸீஸதீ லோகமிமங் பரஞ்ச, அஞ்ஞத³த்து² சரிமசித்தனிரோதா⁴ நிருபாதா³னோ ஜாதவேதோ³வ பரினிப்³பா³தீதி அரஹத்தனிகூடேன தே³ஸனங் நிட்டா²பேஸி த⁴ம்மனெத்திட்ட²பனமேவ கரொந்தோ, ந உத்தரிங் இமாய தே³ஸனாய மக்³க³ங் வா ப²லங் வா உப்பாதே³ஸி கீ²ணாஸவஸ்ஸ தே³ஸிதத்தாதி.
786.Saññaṃ pariññāti gāthāya pana ayaṃ saṅkhepattho – na kevalañca phassameva, apica kho pana kāmasaññādibhedaṃ saññampi, saññānusārena vā pubbe vuttanayeneva nāmarūpaṃ tīhi pariññāhi parijānitvā imāya paṭipadāya catubbidhampi vitareyya oghaṃ, tato so tiṇṇogho taṇhādiṭṭhipariggahesu taṇhādiṭṭhilepappahānena nopalitto khīṇāsavamuni rāgādisallānaṃ abbūḷhattā abbūḷhasallo sativepullappattiyā appamatto caraṃ, pubbabhāge vā appamatto caraṃ tena appamādacārena abbūḷhasallo hutvā sakaparattabhāvādibhedaṃ nāsīsatī lokamimaṃ parañca, aññadatthu carimacittanirodhā nirupādāno jātavedova parinibbātīti arahattanikūṭena desanaṃ niṭṭhāpesi dhammanettiṭṭhapanameva karonto, na uttariṃ imāya desanāya maggaṃ vā phalaṃ vā uppādesi khīṇāsavassa desitattāti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய கு³ஹட்ட²கஸுத்தவண்ணனா நிட்டி²தா.
Suttanipāta-aṭṭhakathāya guhaṭṭhakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 2. கு³ஹட்ட²கஸுத்தங் • 2. Guhaṭṭhakasuttaṃ
