| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৬৩. গুল়াদিঅনুজাননা
163. Guḷādianujānanā
২৭২. অথ খো ভগৰা সাৰত্থিযং যথাভিরন্তং ৰিহরিত্ৰা যেন রাজগহং তেন চারিকং পক্কামি। অদ্দসা খো আযস্মা কঙ্খারেৰতো অন্তরামগ্গে গুল়করণং, ওক্কমিত্ৰা গুল়ে পিট্ঠম্পি ছারিকম্পি পক্খিপন্তে, দিস্ৰান ‘‘অকপ্পিযো গুল়ো সামিসো, ন কপ্পতি গুল়ো ৰিকালে পরিভুঞ্জিতু’’ন্তি কুক্কুচ্চাযন্তো সপরিসো গুল়ং ন পরিভুঞ্জতি। যেপিস্স সোতব্বং মঞ্ঞন্তি, তেপি গুল়ং ন পরিভুঞ্জন্তি। ভগৰতো এতমত্থং আরোচেসুং। কিমত্থায 1, ভিক্খৰে, গুল়ে পিট্ঠম্পি ছারিকম্পি পক্খিপন্তীতি? থদ্ধত্থায 2 ভগৰাতি। সচে, ভিক্খৰে, থদ্ধত্থায গুল়ে পিট্ঠম্পি ছারিকম্পি পক্খিপন্তি, সো চ গুল়োত্ৰেৰ সঙ্খং গচ্ছতি। অনুজানামি, ভিক্খৰে, যথাসুখং গুল়ং পরিভুঞ্জিতুন্তি।
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
অদ্দসা খো আযস্মা কঙ্খারেৰতো অন্তরামগ্গে ৰচ্চে মুগ্গং জাতং, পস্সিত্ৰা ‘‘অকপ্পিযা মুগ্গা; পক্কাপি মুগ্গা জাযন্তীতি’’ কুক্কুচ্চাযন্তো সপরিসো মুগ্গং ন পরিভুঞ্জতি। যেপিস্স সোতব্বং মঞ্ঞন্তি, তেপি মুগ্গং ন পরিভুঞ্জন্তি। ভগৰতো এতমত্থং আরোচেসুং। সচে 5, ভিক্খৰে, পক্কাপি মুগ্গা জাযন্তি , অনুজানামি, ভিক্খৰে, যথাসুখং মুগ্গং পরিভুঞ্জিতুন্তি।
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
২৭৩. তেন খো পন সমযেন অঞ্ঞতরস্স ভিক্খুনো উদরৰাতাবাধো হোতি। সো লোণসোৰীরকং অপাযি। তস্স সো উদরৰাতাবাধো পটিপ্পস্সম্ভি। ভগৰতো এতমত্থং আরোচেসুং । অনুজানামি, ভিক্খৰে, গিলানস্স লোণসোৰীরকং; অগিলানস্স উদকসম্ভিন্নং পানপরিভোগেন পরিভুঞ্জিতুন্তি।
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
গুল়াদিঅনুজাননা নিট্ঠিতা।
Guḷādianujānanā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / গুল়াদিঅনুজাননকথা • Guḷādianujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / গুল়াদিঅনুজাননকথাৰণ্ণনা • Guḷādianujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / গুল়াদিঅনুজাননকথাৰণ্ণনা • Guḷādianujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৬৩. গুল়াদিঅনুজাননকথা • 163. Guḷādianujānanakathā
