| Library / Tipiṭaka / तिपिटक • Tipiṭaka / महावग्गपाळि • Mahāvaggapāḷi |
१६३. गुळादिअनुजानना
163. Guḷādianujānanā
२७२. अथ खो भगवा सावत्थियं यथाभिरन्तं विहरित्वा येन राजगहं तेन चारिकं पक्कामि। अद्दसा खो आयस्मा कङ्खारेवतो अन्तरामग्गे गुळकरणं, ओक्कमित्वा गुळे पिट्ठम्पि छारिकम्पि पक्खिपन्ते, दिस्वान ‘‘अकप्पियो गुळो सामिसो, न कप्पति गुळो विकाले परिभुञ्जितु’’न्ति कुक्कुच्चायन्तो सपरिसो गुळं न परिभुञ्जति। येपिस्स सोतब्बं मञ्ञन्ति, तेपि गुळं न परिभुञ्जन्ति। भगवतो एतमत्थं आरोचेसुं। किमत्थाय 1, भिक्खवे, गुळे पिट्ठम्पि छारिकम्पि पक्खिपन्तीति? थद्धत्थाय 2 भगवाति। सचे, भिक्खवे, थद्धत्थाय गुळे पिट्ठम्पि छारिकम्पि पक्खिपन्ति, सो च गुळोत्वेव सङ्खं गच्छति। अनुजानामि, भिक्खवे, यथासुखं गुळं परिभुञ्जितुन्ति।
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
अद्दसा खो आयस्मा कङ्खारेवतो अन्तरामग्गे वच्चे मुग्गं जातं, पस्सित्वा ‘‘अकप्पिया मुग्गा; पक्कापि मुग्गा जायन्तीति’’ कुक्कुच्चायन्तो सपरिसो मुग्गं न परिभुञ्जति। येपिस्स सोतब्बं मञ्ञन्ति, तेपि मुग्गं न परिभुञ्जन्ति। भगवतो एतमत्थं आरोचेसुं। सचे 5, भिक्खवे, पक्कापि मुग्गा जायन्ति , अनुजानामि, भिक्खवे, यथासुखं मुग्गं परिभुञ्जितुन्ति।
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
२७३. तेन खो पन समयेन अञ्ञतरस्स भिक्खुनो उदरवाताबाधो होति। सो लोणसोवीरकं अपायि। तस्स सो उदरवाताबाधो पटिप्पस्सम्भि। भगवतो एतमत्थं आरोचेसुं । अनुजानामि, भिक्खवे, गिलानस्स लोणसोवीरकं; अगिलानस्स उदकसम्भिन्नं पानपरिभोगेन परिभुञ्जितुन्ति।
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
गुळादिअनुजानना निट्ठिता।
Guḷādianujānanā niṭṭhitā.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / गुळादिअनुजाननकथा • Guḷādianujānanakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / गुळादिअनुजाननकथावण्णना • Guḷādianujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / गुळादिअनुजाननकथावण्णना • Guḷādianujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १६३. गुळादिअनुजाननकथा • 163. Guḷādianujānanakathā
