| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༦༣. གུལཱ༹དིཨནུཛཱནནཱ
163. Guḷādianujānanā
༢༧༢. ཨཐ ཁོ བྷགཝཱ སཱཝཏྠིཡཾ ཡཐཱབྷིརནྟཾ ཝིཧརིཏྭཱ ཡེན རཱཛགཧཾ ཏེན ཙཱརིཀཾ པཀྐཱམི། ཨདྡསཱ ཁོ ཨཱཡསྨཱ ཀངྑཱརེཝཏོ ཨནྟརཱམགྒེ གུལ༹ཀརཎཾ, ཨོཀྐམིཏྭཱ གུལེ༹ པིཊྛམྤི ཚཱརིཀམྤི པཀྑིཔནྟེ, དིསྭཱན ‘‘ཨཀཔྤིཡོ གུལོ༹ སཱམིསོ, ན ཀཔྤཏི གུལོ༹ ཝིཀཱལེ པརིབྷུཉྫིཏུ’’ནྟི ཀུཀྐུཙྩཱཡནྟོ སཔརིསོ གུལ༹ཾ ན པརིབྷུཉྫཏི། ཡེཔིསྶ སོཏབྦཾ མཉྙནྟི, ཏེཔི གུལ༹ཾ ན པརིབྷུཉྫནྟི། བྷགཝཏོ ཨེཏམཏྠཾ ཨཱརོཙེསུཾ། ཀིམཏྠཱཡ 1, བྷིཀྑཝེ, གུལེ༹ པིཊྛམྤི ཚཱརིཀམྤི པཀྑིཔནྟཱིཏི? ཐདྡྷཏྠཱཡ 2 བྷགཝཱཏི། སཙེ, བྷིཀྑཝེ, ཐདྡྷཏྠཱཡ གུལེ༹ པིཊྛམྤི ཚཱརིཀམྤི པཀྑིཔནྟི, སོ ཙ གུལོ༹ཏྭེཝ སངྑཾ གཙྪཏི། ཨནུཛཱནཱམི, བྷིཀྑཝེ, ཡཐཱསུཁཾ གུལ༹ཾ པརིབྷུཉྫིཏུནྟི།
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
ཨདྡསཱ ཁོ ཨཱཡསྨཱ ཀངྑཱརེཝཏོ ཨནྟརཱམགྒེ ཝཙྩེ མུགྒཾ ཛཱཏཾ, པསྶིཏྭཱ ‘‘ཨཀཔྤིཡཱ མུགྒཱ; པཀྐཱཔི མུགྒཱ ཛཱཡནྟཱིཏི’’ ཀུཀྐུཙྩཱཡནྟོ སཔརིསོ མུགྒཾ ན པརིབྷུཉྫཏི། ཡེཔིསྶ སོཏབྦཾ མཉྙནྟི, ཏེཔི མུགྒཾ ན པརིབྷུཉྫནྟི། བྷགཝཏོ ཨེཏམཏྠཾ ཨཱརོཙེསུཾ། སཙེ 5, བྷིཀྑཝེ, པཀྐཱཔི མུགྒཱ ཛཱཡནྟི , ཨནུཛཱནཱམི, བྷིཀྑཝེ, ཡཐཱསུཁཾ མུགྒཾ པརིབྷུཉྫིཏུནྟི།
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
༢༧༣. ཏེན ཁོ པན སམཡེན ཨཉྙཏརསྶ བྷིཀྑུནོ ཨུདརཝཱཏཱབཱདྷོ ཧོཏི། སོ ལོཎསོཝཱིརཀཾ ཨཔཱཡི། ཏསྶ སོ ཨུདརཝཱཏཱབཱདྷོ པཊིཔྤསྶམྦྷི། བྷགཝཏོ ཨེཏམཏྠཾ ཨཱརོཙེསུཾ ། ཨནུཛཱནཱམི, བྷིཀྑཝེ, གིལཱནསྶ ལོཎསོཝཱིརཀཾ; ཨགིལཱནསྶ ཨུདཀསམྦྷིནྣཾ པཱནཔརིབྷོགེན པརིབྷུཉྫིཏུནྟི།
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
གུལཱ༹དིཨནུཛཱནནཱ ནིཊྛིཏཱ།
Guḷādianujānanā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / གུལཱ༹དིཨནུཛཱནནཀཐཱ • Guḷādianujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / གུལཱ༹དིཨནུཛཱནནཀཐཱཝཎྞནཱ • Guḷādianujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / གུལཱ༹དིཨནུཛཱནནཀཐཱཝཎྞནཱ • Guḷādianujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༦༣. གུལཱ༹དིཨནུཛཱནནཀཐཱ • 163. Guḷādianujānanakathā
