| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
கு³ளாதி³அனுஜானநகதா²
Guḷādianujānanakathā
272. ஸசே பி⁴க்க²வே பக்காபி முக்³கா³ ஜாயந்தீதி பக்கா முக்³கா³ ஸசேபி ஜாயந்தி, யதா²ஸுக²ங் பரிபு⁴ஞ்ஜிதப்³பா³. பக்கத்தா ஹி தே கப்பியா ஏவ.
272.Sace bhikkhave pakkāpi muggā jāyantīti pakkā muggā sacepi jāyanti, yathāsukhaṃ paribhuñjitabbā. Pakkattā hi te kappiyā eva.
274. அந்தோவுத்த²ந்தி அகப்பியகுடியங் வுத்த²ங். ஸாமங் பக்கந்தி எத்த² யங்கிஞ்சி ஆமிஸங் பி⁴க்கு²னோ பசிதுங் ந வட்டதி. ஸசேபிஸ்ஸ உண்ஹயாகு³யா ஸுலஸிபண்ணானி வா ஸிங்கி³வேரங் வா லோணங் வா பக்கி²பந்தி, தம்பி சாலேதுங் ந வட்டதி, ‘‘யாகு³ங் நிப்³பா³பேமீ’’தி பன சாலேதுங் வட்டதி. உத்தண்டு³லப⁴த்தங் லபி⁴த்வாபி பித³ஹிதுங் ந வட்டதி. ஸசே பன மனுஸ்ஸா பித³ஹித்வாவ தெ³ந்தி, வட்டதி; ‘‘ப⁴த்தங் வா மா நிப்³பா³யதூ’’தி பித³ஹிதுங் வட்டதி. கீ²ரதக்காதீ³ஸு பன ஸகிங் குதி²தேஸு அக்³கி³ங் தா³துங் வட்டதி, புனபாகஸ்ஸ அனுஞ்ஞாதத்தா. உக்கபிண்ட³காபி கா²த³ந்தீதி பி³ளாமூஸிககோ³தா⁴மங்கு³ஸா கா²த³ந்தி. த³மகாதி விகா⁴ஸாதா³.
274.Antovutthanti akappiyakuṭiyaṃ vutthaṃ. Sāmaṃ pakkanti ettha yaṃkiñci āmisaṃ bhikkhuno pacituṃ na vaṭṭati. Sacepissa uṇhayāguyā sulasipaṇṇāni vā siṅgiveraṃ vā loṇaṃ vā pakkhipanti, tampi cāletuṃ na vaṭṭati, ‘‘yāguṃ nibbāpemī’’ti pana cāletuṃ vaṭṭati. Uttaṇḍulabhattaṃ labhitvāpi pidahituṃ na vaṭṭati. Sace pana manussā pidahitvāva denti, vaṭṭati; ‘‘bhattaṃ vā mā nibbāyatū’’ti pidahituṃ vaṭṭati. Khīratakkādīsu pana sakiṃ kuthitesu aggiṃ dātuṃ vaṭṭati, punapākassa anuññātattā. Ukkapiṇḍakāpi khādantīti biḷāmūsikagodhāmaṅgusā khādanti. Damakāti vighāsādā.
276. ததோ நீஹடந்தி யத்த² நிமந்திதா பு⁴ஞ்ஜந்தி, ததோ நீஹடங்.
276.Tato nīhaṭanti yattha nimantitā bhuñjanti, tato nīhaṭaṃ.
278. வனட்ட²ங் பொக்க²ரட்ட²ந்தி வனே சேவ பது³மினிக³ச்சே² ச ஜாதங். அபீ³ஜந்தி தருணப²லங், யஸ்ஸ பீ³ஜங் ந அங்குரங் ஜனேதி. நிப்³ப³ட்டபீ³ஜந்தி பீ³ஜங் நிப்³ப³ட்டெத்வா அபனெத்வா பரிபு⁴ஞ்ஜிதப்³ப³கங் அம்ப³பனஸாதி³.
278.Vanaṭṭhaṃ pokkharaṭṭhanti vane ceva paduminigacche ca jātaṃ. Abījanti taruṇaphalaṃ, yassa bījaṃ na aṅkuraṃ janeti. Nibbaṭṭabījanti bījaṃ nibbaṭṭetvā apanetvā paribhuñjitabbakaṃ ambapanasādi.
279. து³ரோபயோ வணோதி து³க்கே²ன ருஹதி, து³க்கே²ன பாகதிகோ ஹோதீதி அத்தோ². து³ப்பரிஹாரங் ஸத்த²ந்தி ஸம்பா³தே⁴ து³க்கே²ன ஸத்த²ங் பரிஹரெய்யங். ஸத்த²கம்மங் வா வத்தி²கம்மங் வாதி யதா²பரிச்சி²ன்னே ஓகாஸே யேன கேனசி ஸத்தே²ன வா ஸூசியா வா கண்டகேன வா ஸத்திகாய வா பாஸாணஸக்க²லிகாய வா நகே²ன வா சி²ந்த³னங் வா பா²லனங் வா விஜ்ஜ²னங் வா லேக²னங் வா ந காதப்³ப³ங்; ஸப்³ப³ஞ்ஹேதங் ஸத்த²கம்மமேவ ஹோதி. யேன கேனசி பன சம்மேன வா வத்தே²ன வா வத்தி²பீளனம்பி ந காதப்³ப³ங்; ஸப்³ப³ஞ்ஹேதங் வத்தி²கம்மமேவ ஹோதி. எத்த² ச ஸம்பா³த⁴ஸ்ஸ ஸாமந்தா த்³வங்கு³லாதி இத³ங் ஸத்த²கம்மங்யேவ ஸந்தா⁴ய வுத்தங். வத்தி²கம்மங் பன ஸம்பா³தே⁴யேவ படிக்கி²த்தங். தத்த² பன கா²ரங் ஆதா³துங் யேன கேனசி ரஜ்ஜுகேன வா ப³ந்தி⁴துங் வட்டதி. யதி³ தேன சி²ஜ்ஜதி, ஸுச்சி²ன்னங். அண்ட³வுட்³டி⁴ரோகே³பி ஸத்த²கம்மங் ந வட்டதி, தஸ்மா அண்ட³ங் பா²லெத்வா பீ³ஜானி உத்³த⁴ரித்வா ‘‘அரோக³ங் கரிஸ்ஸாமீ’’தி ந கத்தப்³ப³ங். அக்³கி³தாபனபே⁴ஸஜ்ஜாலிம்பனேஸு பன படிக்கே²போ நத்தி². வச்சமக்³கே³ பே⁴ஸஜ்ஜமக்கி²தா ஆதா³னவட்டி வா வேளுனாளிகா வா வட்டதி, யாய கா²ரகம்மங் வா கரொந்தி, தேலங் வா பவேஸெந்தி.
279.Duropayo vaṇoti dukkhena ruhati, dukkhena pākatiko hotīti attho. Dupparihāraṃ satthanti sambādhe dukkhena satthaṃ parihareyyaṃ. Satthakammaṃ vā vatthikammaṃ vāti yathāparicchinne okāse yena kenaci satthena vā sūciyā vā kaṇṭakena vā sattikāya vā pāsāṇasakkhalikāya vā nakhena vā chindanaṃ vā phālanaṃ vā vijjhanaṃ vā lekhanaṃ vā na kātabbaṃ; sabbañhetaṃ satthakammameva hoti. Yena kenaci pana cammena vā vatthena vā vatthipīḷanampi na kātabbaṃ; sabbañhetaṃ vatthikammameva hoti. Ettha ca sambādhassa sāmantā dvaṅgulāti idaṃ satthakammaṃyeva sandhāya vuttaṃ. Vatthikammaṃ pana sambādheyeva paṭikkhittaṃ. Tattha pana khāraṃ ādātuṃ yena kenaci rajjukena vā bandhituṃ vaṭṭati. Yadi tena chijjati, succhinnaṃ. Aṇḍavuḍḍhirogepi satthakammaṃ na vaṭṭati, tasmā aṇḍaṃ phāletvā bījāni uddharitvā ‘‘arogaṃ karissāmī’’ti na kattabbaṃ. Aggitāpanabhesajjālimpanesu pana paṭikkhepo natthi. Vaccamagge bhesajjamakkhitā ādānavaṭṭi vā veḷunāḷikā vā vaṭṭati, yāya khārakammaṃ vā karonti, telaṃ vā pavesenti.
280. பவத்தமங்ஸந்தி மதஸ்ஸ மங்ஸங். மாகா⁴தோதி தங் தி³வஸங் ந லப்³பா⁴ கேனசி கிஞ்சி ஜீவிதா வோரோபேதுங். பொத்த²னிகந்தி மங்ஸச்சே²த³னஸத்த²கங் வுச்சதி. கிம்பிமாயாதி கிம்பி இமாய. ந ப⁴க³வா உஸ்ஸஹதீதி ந ப⁴க³வா ஸக்கோதி. யத்ர ஹி நாமாதி யஸ்மா நாம. படிவெக்கீ²தி வீமங்ஸி; படிபுச்சீ²தி வுத்தங் ஹோதி. அப்படிவெக்கி²த்வாதி அப்படிபுச்சி²த்வா. ஸசே பன அஸுகமங்ஸந்தி ஜானாதி, படிபுச்ச²னகிச்சங் நத்தி², அஜானந்தேன பன புச்சி²த்வாவ கா²தி³தப்³ப³ங்.
280.Pavattamaṃsanti matassa maṃsaṃ. Māghātoti taṃ divasaṃ na labbhā kenaci kiñci jīvitā voropetuṃ. Potthanikanti maṃsacchedanasatthakaṃ vuccati. Kimpimāyāti kimpi imāya. Na bhagavā ussahatīti na bhagavā sakkoti. Yatra hi nāmāti yasmā nāma. Paṭivekkhīti vīmaṃsi; paṭipucchīti vuttaṃ hoti. Appaṭivekkhitvāti appaṭipucchitvā. Sace pana asukamaṃsanti jānāti, paṭipucchanakiccaṃ natthi, ajānantena pana pucchitvāva khāditabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
163. கு³ளாதி³அனுஜானநா • 163. Guḷādianujānanā
164. அந்தோவுட்டா²தி³படிக்கே²பகதா² • 164. Antovuṭṭhādipaṭikkhepakathā
165. உக்³க³ஹிதபடிக்³க³ஹணா • 165. Uggahitapaṭiggahaṇā
166. படிக்³க³ஹிதாதி³அனுஜானநா • 166. Paṭiggahitādianujānanā
167. ஸத்த²கம்மபடிக்கே²பகதா² • 167. Satthakammapaṭikkhepakathā
168. மனுஸ்ஸமங்ஸபடிக்கே²பகதா² • 168. Manussamaṃsapaṭikkhepakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கு³ளாதி³அனுஜானநகதா²வண்ணனா • Guḷādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
கு³ளாதி³அனுஜானநகதா²வண்ணனா • Guḷādianujānanakathāvaṇṇanā
மனுஸ்ஸமங்ஸபடிக்கே²பகதா²வண்ணனா • Manussamaṃsapaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கு³ளாதி³அனுஜானநகதா²வண்ணனா • Guḷādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
163. கு³ளாதி³அனுஜானநகதா² • 163. Guḷādianujānanakathā
167. ஸத்த²கம்மபடிக்கே²பகதா² • 167. Satthakammapaṭikkhepakathā
