| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
163. ගුළාදිඅනුජානනකථා
163. Guḷādianujānanakathā
272. හීති සච්‌චං. පක්‌කත්‌තාති මුග්‌ගානං පක්‌කභාවතො. තෙති මුග්‌ගා.
272.Hīti saccaṃ. Pakkattāti muggānaṃ pakkabhāvato. Teti muggā.
274. අකප්‌පියකුටියන්‌ති අකප්‌පියකුටියා අන්‌තො. අස්‌සාති භික්‌ඛුනො න වට්‌ටතීති සම්‌බන්‌ධො. තම්‌පීති උණ්‌හයාගුම්‌පි. පිසද්‌දෙන පගෙව ආමිසං පචිතුන්‌ති දස්‌සෙති. උත්‌තණ්‌ඩුලභත්‌තන්‌ති පක්‌කතණ්‌ඩුලතො වියොගොති උත්‌තණ්‌ඩුලො, උකාරො හි වියොගත්‌ථවාචකො, අපක්‌කතණ්‌ඩුලොති අත්‌ථො. උත්‌තණ්‌ඩුලමයං භත්‌තන්‌ති උත්‌තණ්‌ඩුලභත්‌තං. සකිං කුථිතෙසු ඛීරතක්‌කාදීසු අග්‌ගිං දාතුං වට්‌ටතීති යොජනා. බිළාලාදීනං සත්‌තානං සමූහො රූළ්‌හීවසෙන උක්‌කපිණ්‌ඩකොති වුච්‌චතීති ආහ ‘‘බිළාලමූසිකගොධාමඞ්‌ගුසා’’ති. විඝාසාදභාවෙන නිහතමානත්‌තා කායවාචං දමෙතීති දමකො විඝාසාදොති ආහ ‘‘විඝාසාදා’’ති.
274.Akappiyakuṭiyanti akappiyakuṭiyā anto. Assāti bhikkhuno na vaṭṭatīti sambandho. Tampīti uṇhayāgumpi. Pisaddena pageva āmisaṃ pacitunti dasseti. Uttaṇḍulabhattanti pakkataṇḍulato viyogoti uttaṇḍulo, ukāro hi viyogatthavācako, apakkataṇḍuloti attho. Uttaṇḍulamayaṃ bhattanti uttaṇḍulabhattaṃ. Sakiṃ kuthitesu khīratakkādīsu aggiṃ dātuṃ vaṭṭatīti yojanā. Biḷālādīnaṃ sattānaṃ samūho rūḷhīvasena ukkapiṇḍakoti vuccatīti āha ‘‘biḷālamūsikagodhāmaṅgusā’’ti. Vighāsādabhāvena nihatamānattā kāyavācaṃ dametīti damako vighāsādoti āha ‘‘vighāsādā’’ti.
276. තතො නීහටන්‌ති එත්‌ථ තසද්‌දස්‌ස විසයං දස්‌සෙන්‌තො ආහ ‘‘යත්‌ථා’’තිආදි. යත්‌ථාති යස්‌මිං ඨානෙ. නීහටන්‌ති නීහරිත්‌වා හරිතං.
276.Tato nīhaṭanti ettha tasaddassa visayaṃ dassento āha ‘‘yatthā’’tiādi. Yatthāti yasmiṃ ṭhāne. Nīhaṭanti nīharitvā haritaṃ.
278. වනට්‌ඨං පොක්‌ඛරට්‌ඨන්‌ති එත්‌ථ වනෙ තිට්‌ඨතීති වනට්‌ඨො, පොක්‌ඛරෙ තිට්‌ඨතීති පොක්‌ඛරට්‌ඨොති වචනත්‌ථං දස්‌සෙන්‌තො ආහ ‘‘වනෙ චෙවා’’තිආදි. ‘‘පදුමිනිගච්‌ඡෙ’’ති ඉමිනා පොක්‌ඛරසද්‌දො පදුමවාචකොති දස්‌සෙති. යස්‌ස බීජං අඞ්‌කුරං න ජනෙති, තං ඵලං අබීජං නාමාති යොජනා.
278.Vanaṭṭhaṃ pokkharaṭṭhanti ettha vane tiṭṭhatīti vanaṭṭho, pokkhare tiṭṭhatīti pokkharaṭṭhoti vacanatthaṃ dassento āha ‘‘vane cevā’’tiādi. ‘‘Paduminigacche’’ti iminā pokkharasaddo padumavācakoti dasseti. Yassa bījaṃ aṅkuraṃ na janeti, taṃ phalaṃ abījaṃ nāmāti yojanā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
163. ගුළාදිඅනුජානනා • 163. Guḷādianujānanā
164. අන්‌තොවුට්‌ඨාදිපටික්‌ඛෙපකථා • 164. Antovuṭṭhādipaṭikkhepakathā
165. උග්‌ගහිතපටිග්‌ගහණා • 165. Uggahitapaṭiggahaṇā
166. පටිග්‌ගහිතාදිඅනුජානනා • 166. Paṭiggahitādianujānanā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ගුළාදිඅනුජානනකථා • Guḷādianujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ගුළාදිඅනුජානනකථාවණ්‌ණනා • Guḷādianujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ගුළාදිඅනුජානනකථාවණ්‌ණනා • Guḷādianujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ගුළාදිඅනුජානනකථාවණ්‌ණනා • Guḷādianujānanakathāvaṇṇanā
