கு³ளாதி³அனுஜானநகதா²வண்ணனா

274. ஸாமங் பக்கங் ஸமபக்கந்தி து³வித⁴ங் விய தீ³பேதி, தஸ்மா கீ²ராதீ³ஸு உண்ஹமத்தமேவ பாகோ. தேன உத்தண்டு³லாதி³ஸமானா ஹொந்தி.

276-8. ‘‘பு³த்³த⁴ப்பமுக²’ந்தி ஆக³தட்டா²னே ‘பி⁴க்கு²ஸங்கோ⁴’தி அவத்வா ‘ஸங்கோ⁴’தி வுச்சதி ப⁴க³வந்தம்பி ஸங்க³ஹேது’’ந்தி வத³ந்தி. நாகோ³தி ஹத்தீ².

279. ஸம்பா³தே⁴தி வச்சமக்³கே³ பி⁴க்கு²ஸ்ஸ பி⁴க்கு²னியா ச பஸ்ஸாவமக்³கே³பி அனுலோமதோ. த³ஹனங் படிக்கே²பாபா⁴வா வட்டதி. ஸத்த²வத்திகம்மானுலோமதோ ந வட்டதீதி சே? ந, படிக்கி²த்தபடிக்கே²பா, படிக்கி²பிதப்³ப³ஸ்ஸ தப்பரமதாதீ³பனதோ, கிங் வுத்தங் ஹோதி? புப்³பே³ படிக்கி²த்தம்பி ஸத்த²கம்மங் ஸம்பிண்டெ³த்வா பச்சா² ‘‘ந, பி⁴க்க²வே…பே॰… து²ல்லச்சயஸ்ஸா’’தி த்³விக்க²த்துங் ஸத்த²கம்மஸ்ஸ படிக்கே²போ கதோ. தேன ஸம்பா³த⁴ஸ்ஸ ஸாமந்தா த்³வங்கு³லங் படிக்கி²பிதப்³ப³ங் நாம. ஸத்த²வத்திகம்மதோ உத்³த⁴ங் நத்தீ²தி தீ³பேதி. கிஞ்ச பி⁴ய்யோ புப்³பே³ ஸம்பா³தே⁴யேவ ஸத்த²கம்மங் படிக்கி²த்தங், பச்சா² ஸம்பா³த⁴ஸ்ஸ ஸாமந்தா த்³வங்கு³லம்பி படிக்கி²த்தங், தஸ்மா தஸ்ஸேவ படிக்கே²போ, நேதரஸ்ஸாதி ஸித்³த⁴ங். எத்த² ‘‘ஸத்த²ங் நாம ஸத்த²ஹாரகங் வாஸ்ஸ பரியேஸெய்யா’’திஆதீ³ஸு விய யேன சி²ந்த³தி, தங் ஸப்³ப³ங். தேன வுத்தங் ‘‘கண்டகேன வா’’திஆதி³. கா²ரதா³னங் பனெத்த² பி⁴க்கு²னிவிப⁴ங்கே³ பஸாகே² லேபமுகே²ன அனுஞ்ஞாதந்தி வேதி³தப்³ப³ங். ஏகே பன ‘‘ஸத்த²கம்மங் வா’’தி பாட²ங் விகப்பெத்வா வத்தி²கம்மங் கரொந்தி. ‘‘வத்தீ²’’தி கிர அக்³கி⁴கா வுச்சதி. தாய சி²ந்த³னங் வத்தி²கம்மங் நாமாதி ச அத்த²ங் வண்ணயந்தி, தே ‘‘ஸத்த²ஹாரகங் வாஸ்ஸ பரியேஸெய்யா’’தி இமஸ்ஸ பத³பா⁴ஜனீயங் த³ஸ்ஸெத்வா படிக்கி²பிதப்³பா³. அண்ட³வுட்³டீ⁴தி வாதண்ட³கோ. ஆதா³னவத்தீதி ஆனஹவத்தி.