| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৮. গূথভাণীসুত্তৰণ্ণনা
8. Gūthabhāṇīsuttavaṇṇanā
২৮. অট্ঠমে গূথভাণীতি যো গূথং ৰিয দুগ্গন্ধকথং কথেতি। পুপ্ফভাণীতি যো পুপ্ফানি ৰিয সুগন্ধকথং কথেতি। মধুভাণীতি যো মধু ৰিয মধুরকথং কথেতি। সভগ্গতোতি সভায ঠিতো। পরিসগ্গতোতি গামপরিসায ঠিতো। ঞাতিমজ্ঝগতোতি ঞাতীনং মজ্ঝে ঠিতো। পূগমজ্ঝগতোতি সেণীনং মজ্ঝে ঠিতো। রাজকুলমজ্ঝগতোতি রাজকুলস্স মজ্ঝে মহাৰিনিচ্ছযে ঠিতো। অভিনীতোতি পুচ্ছনত্থাযানীতো। সক্খিপুট্ঠোতি সক্খিং কত্ৰা পুচ্ছিতো। এহম্ভো পুরিসাতি আলপনমেতং। অত্তহেতু ৰা পরহেতু ৰাতি অত্তনো ৰা পরস্স ৰা হত্থপাদাদিহেতু ৰা ধনহেতু ৰা। আমিসকিঞ্চিক্খহেতু ৰাতি এত্থ আমিসন্তি লঞ্জো অধিপ্পেতো। কিঞ্চিক্খন্তি যং ৰা তং ৰা অপ্পমত্তকং অন্তমসো তিত্তিরিযৰট্টকসপ্পিপিণ্ডনৰনীতপিণ্ডাদিমত্তকস্স লঞ্জস্স হেতূতি অত্থো। সম্পজানমুসা ভাসিতা হোতীতি জানন্তোযেৰ মুসাৰাদং কত্তা হোতি।
28. Aṭṭhame gūthabhāṇīti yo gūthaṃ viya duggandhakathaṃ katheti. Pupphabhāṇīti yo pupphāni viya sugandhakathaṃ katheti. Madhubhāṇīti yo madhu viya madhurakathaṃ katheti. Sabhaggatoti sabhāya ṭhito. Parisaggatoti gāmaparisāya ṭhito. Ñātimajjhagatoti ñātīnaṃ majjhe ṭhito. Pūgamajjhagatoti seṇīnaṃ majjhe ṭhito. Rājakulamajjhagatoti rājakulassa majjhe mahāvinicchaye ṭhito. Abhinītoti pucchanatthāyānīto. Sakkhipuṭṭhoti sakkhiṃ katvā pucchito. Ehambho purisāti ālapanametaṃ. Attahetu vā parahetu vāti attano vā parassa vā hatthapādādihetu vā dhanahetu vā. Āmisakiñcikkhahetu vāti ettha āmisanti lañjo adhippeto. Kiñcikkhanti yaṃ vā taṃ vā appamattakaṃ antamaso tittiriyavaṭṭakasappipiṇḍanavanītapiṇḍādimattakassa lañjassa hetūti attho. Sampajānamusā bhāsitā hotīti jānantoyeva musāvādaṃ kattā hoti.
নেলাতি এলং ৰুচ্চতি দোসো, নাস্স এলন্তি নেলা, নিদ্দোসাতি অত্থো। ‘‘নেলঙ্গো সেতপচ্ছাদো’’তি (উদা॰ ৬৫) এত্থ ৰুত্তসীলং ৰিয। কণ্ণসুখাতি ব্যঞ্জনমধুরতায কণ্ণানং সুখা, সূচিৰিজ্ঝনং ৰিয কণ্ণসূলং ন জনেতি। অত্থমধুরতায সকলসরীরে কোপং অজনেত্ৰা পেমং জনেতীতি পেমনীযা। হদযং গচ্ছতি অপ্পটিহঞ্ঞমানা সুখেন চিত্তং পৰিসতীতি হদযঙ্গমা। গুণপরিপুণ্ণতায পুরে ভৰাতি পোরী। পুরে সংৰড্ঢনারী ৰিয সুকুমারাতিপি পোরী। পুরস্স এসাতিপি পোরী। পুরস্স এসাতি নগরৰাসীনং কথাতি অত্থো। নগরৰাসিনো হি যুত্তকথা হোন্তি , পিতিমত্তং পিতাতি, মাতিমত্তং মাতাতি, ভাতিমত্তং ভাতাতি ৰদন্তি। এৰরূপী কথা বহুনো জনস্স কন্তা হোতীতি বহুজনকন্তা। কন্তভাৰেনেৰ বহুনো জনস্স মনাপা চিত্তৰুদ্ধিকরাতি বহুজনমনাপা।
Nelāti elaṃ vuccati doso, nāssa elanti nelā, niddosāti attho. ‘‘Nelaṅgo setapacchādo’’ti (udā. 65) ettha vuttasīlaṃ viya. Kaṇṇasukhāti byañjanamadhuratāya kaṇṇānaṃ sukhā, sūcivijjhanaṃ viya kaṇṇasūlaṃ na janeti. Atthamadhuratāya sakalasarīre kopaṃ ajanetvā pemaṃ janetīti pemanīyā. Hadayaṃ gacchati appaṭihaññamānā sukhena cittaṃ pavisatīti hadayaṅgamā. Guṇaparipuṇṇatāya pure bhavāti porī. Pure saṃvaḍḍhanārī viya sukumārātipi porī. Purassa esātipi porī. Purassa esāti nagaravāsīnaṃ kathāti attho. Nagaravāsino hi yuttakathā honti , pitimattaṃ pitāti, mātimattaṃ mātāti, bhātimattaṃ bhātāti vadanti. Evarūpī kathā bahuno janassa kantā hotīti bahujanakantā. Kantabhāveneva bahuno janassa manāpā cittavuddhikarāti bahujanamanāpā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৮. গূথভাণীসুত্তং • 8. Gūthabhāṇīsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. গূথভাণীসুত্তৰণ্ণনা • 8. Gūthabhāṇīsuttavaṇṇanā
