| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஹாலித்³தி³கானிஸுத்தவண்ணனா
3. Hāliddikānisuttavaṇṇanā
3. ததியே அவந்தீஸூதி அவந்தித³க்கி²ணாபத²ஸங்கா²தே அவந்திரட்டே². குரரக⁴ரேதி ஏவங்னாமகே நக³ரே. பபாதேதி ஏகதோ பபாதே. தஸ்ஸ கிர பப்³ப³தஸ்ஸ ஏகங் பஸ்ஸங் சி²ந்தி³த்வா பாதிதங் விய அஹோஸி. ‘‘பவத்தே’’திபி பாடோ², நானாதித்தி²யானங் லத்³தி⁴பவத்தட்டா²னேதி அத்தோ². இதி தே²ரோ தஸ்மிங் ரட்டே² தங் நக³ரங் நிஸ்ஸாய தஸ்மிங் பப்³ப³தே விஹரதி. ஹாலித்³தி³கானீதி ஏவங்னாமகோ. அட்ட²கவக்³கி³யே மாக³ண்டி³யபஞ்ஹேதி அட்ட²கவக்³கி³கம்ஹி மாக³ண்டி³யபஞ்ஹோ நாம அத்தி², தஸ்மிங் பஞ்ஹே. ரூபதா⁴தூதி ரூபக்க²ந்தோ⁴ அதி⁴ப்பேதோ. ரூபதா⁴துராக³வினிப³த்³த⁴ந்தி ரூபதா⁴தும்ஹி ராகே³ன வினிப³த்³த⁴ங் . விஞ்ஞாணந்தி கம்மவிஞ்ஞாணங். ஓகஸாரீதி கே³ஹஸாரீ ஆலயஸாரீ.
3. Tatiye avantīsūti avantidakkhiṇāpathasaṅkhāte avantiraṭṭhe. Kuraraghareti evaṃnāmake nagare. Papāteti ekato papāte. Tassa kira pabbatassa ekaṃ passaṃ chinditvā pātitaṃ viya ahosi. ‘‘Pavatte’’tipi pāṭho, nānātitthiyānaṃ laddhipavattaṭṭhāneti attho. Iti thero tasmiṃ raṭṭhe taṃ nagaraṃ nissāya tasmiṃ pabbate viharati. Hāliddikānīti evaṃnāmako. Aṭṭhakavaggiye māgaṇḍiyapañheti aṭṭhakavaggikamhi māgaṇḍiyapañho nāma atthi, tasmiṃ pañhe. Rūpadhātūti rūpakkhandho adhippeto. Rūpadhāturāgavinibaddhanti rūpadhātumhi rāgena vinibaddhaṃ . Viññāṇanti kammaviññāṇaṃ. Okasārīti gehasārī ālayasārī.
கஸ்மா பனெத்த² ‘‘விஞ்ஞாணதா⁴து கோ², க³ஹபதீ’’தி ந வுத்தந்தி? ஸம்மோஹவிகா⁴தத்த²ங். ‘‘ஓகோ’’தி ஹி அத்த²தோ பச்சயோ வுச்சதி, புரேஜாதஞ்ச கம்மவிஞ்ஞாணங் பச்சா²ஜாதஸ்ஸ கம்மவிஞ்ஞாணஸ்ஸபி விபாகவிஞ்ஞாணஸ்ஸபி விபாகவிஞ்ஞாணஞ்ச விபாகவிஞ்ஞாணஸ்ஸபி கம்மவிஞ்ஞாணஸ்ஸபி பச்சயோ ஹோதி, தஸ்மா ‘‘கதரங் நு கோ² இத⁴ விஞ்ஞாண’’ந்தி? ஸம்மோஹோ ப⁴வெய்ய, தஸ்ஸ விகா⁴தத்த²ங் தங் அக³ஹெத்வா அஸம்பி⁴ன்னாவ தே³ஸனா கதா. அபிச ஆரம்மணவஸேன சதஸ்ஸோ அபி⁴ஸங்கா²ரவிஞ்ஞாணட்டி²தியோ வுத்தாதி தா த³ஸ்ஸேதும்பி இத⁴ விஞ்ஞாணங் ந க³ஹிதங்.
Kasmā panettha ‘‘viññāṇadhātu kho, gahapatī’’ti na vuttanti? Sammohavighātatthaṃ. ‘‘Oko’’ti hi atthato paccayo vuccati, purejātañca kammaviññāṇaṃ pacchājātassa kammaviññāṇassapi vipākaviññāṇassapi vipākaviññāṇañca vipākaviññāṇassapi kammaviññāṇassapi paccayo hoti, tasmā ‘‘kataraṃ nu kho idha viññāṇa’’nti? Sammoho bhaveyya, tassa vighātatthaṃ taṃ agahetvā asambhinnāva desanā katā. Apica ārammaṇavasena catasso abhisaṅkhāraviññāṇaṭṭhitiyo vuttāti tā dassetumpi idha viññāṇaṃ na gahitaṃ.
உபயுபாதா³னாதி தண்ஹூபயதி³ட்டூ²பயவஸேன த்³வே உபயா, காமுபாதா³னாதீ³னி சத்தாரி உபாதா³னானி ச. சேதஸோ அதி⁴ட்டா²னாபி⁴னிவேஸானுஸயாதி அகுஸலசித்தஸ்ஸ அதி⁴ட்டா²னபூ⁴தா சேவ அபி⁴னிவேஸபூ⁴தா ச அனுஸயபூ⁴தா ச. ததா²க³தஸ்ஸாதி ஸம்மாஸம்பு³த்³த⁴ஸ்ஸ. ஸப்³பே³ஸம்பி ஹி கீ²ணாஸவானங் ஏதே பஹீனாவ, ஸத்து² பன கீ²ணாஸவபா⁴வோ லோகே அதிபாகடோதி உபரிமகோடியா ஏவங் வுத்தங். விஞ்ஞாணதா⁴துயாதி இத⁴ விஞ்ஞாணங் கஸ்மா க³ஹிதங்? கிலேஸப்பஹானத³ஸ்ஸனத்த²ங். கிலேஸா ஹி ந கேவலங் சதூஸுயேவ க²ந்தே⁴ஸு பஹீனா பஹீயந்தி, பஞ்சஸுபி பஹீயந்தியேவாதி கிலேஸப்பஹானத³ஸ்ஸனத்த²ங் க³ஹிதங். ஏவங் கோ², க³ஹபதி, அனோகஸாரீ ஹோதீதி ஏவங் கம்மவிஞ்ஞாணேன ஓகங் அஸரந்தேன அனோகஸாரீ நாம ஹோதி.
Upayupādānāti taṇhūpayadiṭṭhūpayavasena dve upayā, kāmupādānādīni cattāri upādānāni ca. Cetaso adhiṭṭhānābhinivesānusayāti akusalacittassa adhiṭṭhānabhūtā ceva abhinivesabhūtā ca anusayabhūtā ca. Tathāgatassāti sammāsambuddhassa. Sabbesampi hi khīṇāsavānaṃ ete pahīnāva, satthu pana khīṇāsavabhāvo loke atipākaṭoti uparimakoṭiyā evaṃ vuttaṃ. Viññāṇadhātuyāti idha viññāṇaṃ kasmā gahitaṃ? Kilesappahānadassanatthaṃ. Kilesā hi na kevalaṃ catūsuyeva khandhesu pahīnā pahīyanti, pañcasupi pahīyantiyevāti kilesappahānadassanatthaṃ gahitaṃ. Evaṃ kho, gahapati, anokasārī hotīti evaṃ kammaviññāṇena okaṃ asarantena anokasārī nāma hoti.
ரூபனிமித்தனிகேதவிஸாரவினிப³ந்தா⁴தி ரூபமேவ கிலேஸானங் பச்சயட்டே²ன நிமித்தங், ஆரம்மணகிரியஸங்கா²தனிவாஸனட்டா²னட்டே²ன நிகேதந்தி ரூபனிமித்தனிகேதங். விஸாரோ ச வினிப³ந்தோ⁴ ச விஸாரவினிப³ந்தா⁴. உப⁴யேனபி ஹி கிலேஸானங் பத்த²டபா⁴வோ ச வினிப³ந்த⁴னபா⁴வோ ச வுத்தோ, ரூபனிமித்தனிகேதே விஸாரவினிப³ந்தா⁴தி ரூபனிமித்தனிகேதவிஸாரவினிப³ந்தா⁴, தஸ்மா ரூபனிமித்தனிகேதம்ஹி உப்பன்னேன கிலேஸவிஸாரேன சேவ கிலேஸப³ந்த⁴னேன சாதி அத்தோ². நிகேதஸாரீதி வுச்சதீதி ஆரம்மணகரணவஸேன நிவாஸனட்டா²னங் ஸாரீதி வுச்சதி. பஹீனாதி தே ரூபனிமித்தனிகேதகிலேஸவிஸாரவினிப³ந்தா⁴ பஹீனா.
Rūpanimittaniketavisāravinibandhāti rūpameva kilesānaṃ paccayaṭṭhena nimittaṃ, ārammaṇakiriyasaṅkhātanivāsanaṭṭhānaṭṭhena niketanti rūpanimittaniketaṃ. Visāro ca vinibandho ca visāravinibandhā. Ubhayenapi hi kilesānaṃ patthaṭabhāvo ca vinibandhanabhāvo ca vutto, rūpanimittanikete visāravinibandhāti rūpanimittaniketavisāravinibandhā, tasmā rūpanimittaniketamhi uppannena kilesavisārena ceva kilesabandhanena cāti attho. Niketasārīti vuccatīti ārammaṇakaraṇavasena nivāsanaṭṭhānaṃ sārīti vuccati. Pahīnāti te rūpanimittaniketakilesavisāravinibandhā pahīnā.
கஸ்மா பனெத்த² பஞ்சக்க²ந்தா⁴ ‘‘ஓகா’’தி வுத்தா, ச² ஆரம்மணானி ‘‘நிகேத’’ந்தி? ச²ந்த³ராக³ஸ்ஸ ப³லவது³ப்³ப³லதாய. ஸமானேபி ஹி ஏதேஸங் ஆலயட்டே²ன விஸயபா⁴வே ஓகோதி நிச்சனிவாஸனட்டா²னகே³ஹமேவ வுச்சதி, நிகேதந்தி ‘‘அஜ்ஜ அஸுகட்டா²னே கீளிஸ்ஸாமா’’தி கதஸங்கேதட்டா²னங் நிவாஸட்டா²னங் உய்யானாதி³. தத்த² யதா² புத்ததா³ரத⁴னத⁴ஞ்ஞபுண்ணகே³ஹே ச²ந்த³ராகோ³ ப³லவா ஹோதி, ஏவங் அஜ்ஜ²த்திகேஸு க²ந்தே⁴ஸு. யதா² பன உய்யானட்டா²னாதீ³ஸு ததோ து³ப்³ப³லதரோ ஹோதி, ஏவங் பா³ஹிரேஸு ச²ஸு ஆரம்மணேஸூதி ச²ந்த³ராக³ஸ்ஸ ப³லவது³ப்³ப³லதாய ஏவங் தே³ஸனா கதாதி வேதி³தப்³போ³.
Kasmā panettha pañcakkhandhā ‘‘okā’’ti vuttā, cha ārammaṇāni ‘‘niketa’’nti? Chandarāgassa balavadubbalatāya. Samānepi hi etesaṃ ālayaṭṭhena visayabhāve okoti niccanivāsanaṭṭhānagehameva vuccati, niketanti ‘‘ajja asukaṭṭhāne kīḷissāmā’’ti katasaṅketaṭṭhānaṃ nivāsaṭṭhānaṃ uyyānādi. Tattha yathā puttadāradhanadhaññapuṇṇagehe chandarāgo balavā hoti, evaṃ ajjhattikesu khandhesu. Yathā pana uyyānaṭṭhānādīsu tato dubbalataro hoti, evaṃ bāhiresu chasu ārammaṇesūti chandarāgassa balavadubbalatāya evaṃ desanā katāti veditabbo.
ஸுகி²தேஸு ஸுகி²தோதி உபட்டா²கேஸு த⁴னத⁴ஞ்ஞலாபா⁴தி³வஸேன ஸுகி²தேஸு ‘‘இதா³னாஹங் மனாபங் போ⁴ஜனங் லபி⁴ஸ்ஸாமீ’’தி கே³ஹஸிதஸுகே²ன ஸுகி²தோ ஹோதி, தேஹி பத்தஸம்பத்திங் அனுப⁴வமானோ விய சரதி. து³க்கி²தேஸு து³க்கி²தோதி தேஸங் கேனசிதே³வ காரணேன து³க்கே² உப்பன்னே ஸயங் த்³விகு³ணேன து³க்கே²ன து³க்கி²தோ ஹோதி. கிச்சகரணீயேஸூதி கிச்சஸங்கா²தேஸு கரணீயேஸு. தேஸு யோக³ங் ஆபஜ்ஜதீதி உபயோக³ங் ஸயங் தேஸங் கிச்சானங் கத்தப்³ப³தங் ஆபஜ்ஜதி. காமேஸூதி வத்து²காமேஸு. ஏவங் கோ², க³ஹபதி, காமேஹி அரித்தோ ஹோதீதி ஏவங் கிலேஸகாமேஹி அரித்தோ ஹோதி அந்தோ காமானங் பா⁴வேன அதுச்சோ². ஸுக்கபக்கோ² தேஸங் அபா⁴வேன ரித்தோ துச்சோ²தி வேதி³தப்³போ³.
Sukhitesu sukhitoti upaṭṭhākesu dhanadhaññalābhādivasena sukhitesu ‘‘idānāhaṃ manāpaṃ bhojanaṃ labhissāmī’’ti gehasitasukhena sukhito hoti, tehi pattasampattiṃ anubhavamāno viya carati. Dukkhitesu dukkhitoti tesaṃ kenacideva kāraṇena dukkhe uppanne sayaṃ dviguṇena dukkhena dukkhito hoti. Kiccakaraṇīyesūti kiccasaṅkhātesu karaṇīyesu. Tesu yogaṃ āpajjatīti upayogaṃ sayaṃ tesaṃ kiccānaṃ kattabbataṃ āpajjati. Kāmesūti vatthukāmesu. Evaṃ kho, gahapati, kāmehi aritto hotīti evaṃ kilesakāmehi aritto hoti anto kāmānaṃ bhāvena atuccho. Sukkapakkho tesaṃ abhāvena ritto tucchoti veditabbo.
புரக்க²ரானோதி வட்டங் புரதோ குருமானோ. ஏவங்ரூபோ ஸியந்திஆதீ³ஸு தீ³க⁴ரஸ்ஸகாளோதா³தாதீ³ஸு ரூபேஸு ‘‘ஏவங்ரூபோ நாம ப⁴வெய்ய’’ந்தி பத்தே²தி. ஸுகா²தீ³ஸு வேத³னாஸு ஏவங்வேத³னோ நாம; நீலஸஞ்ஞாதீ³ஸு ஸஞ்ஞாஸு ஏவங் ஸஞ்ஞோ நாம; புஞ்ஞாபி⁴ஸங்கா²ராதீ³ஸு ஸங்கா²ரேஸு ஏவங்ஸங்கா²ரோ நாம; சக்கு²விஞ்ஞாணாதீ³ஸு விஞ்ஞாணேஸு ‘‘ஏவங் விஞ்ஞாணோ நாம ப⁴வெய்ய’’ந்தி பத்தே²தி.
Purakkharānoti vaṭṭaṃ purato kurumāno. Evaṃrūpo siyantiādīsu dīgharassakāḷodātādīsu rūpesu ‘‘evaṃrūpo nāma bhaveyya’’nti pattheti. Sukhādīsu vedanāsu evaṃvedano nāma; nīlasaññādīsu saññāsu evaṃ sañño nāma; puññābhisaṅkhārādīsu saṅkhāresu evaṃsaṅkhāro nāma; cakkhuviññāṇādīsu viññāṇesu ‘‘evaṃ viññāṇo nāma bhaveyya’’nti pattheti.
அபுரக்க²ரானோதி வட்டங் புரதோ அகுருமானோ. ஸஹிதங் மே, அஸஹிதங் தேதி துய்ஹங் வசனங் அஸஹிதங் அஸிலிட்ட²ங், மய்ஹங் ஸஹிதங் ஸிலிட்ட²ங் மது⁴ரபானஸதி³ஸங். அதி⁴சிண்ணங் தே விபராவத்தந்தி யங் துய்ஹங் தீ³கே⁴ன காலேன பரிசிதங் ஸுப்பகு³ணங், தங் மம வாத³ங் ஆக³ம்ம ஸப்³ப³ங் க²ணேன விபராவத்தங் நிவத்தங். ஆரோபிதோ தே வாதோ³தி துய்ஹங் தோ³ஸோ மயா ஆரோபிதோ. சர வாத³ப்பமொக்கா²யாதி தங் தங் ஆசரியங் உபஸங்கமித்வா உத்தரி பரியேஸந்தோ இமஸ்ஸ வாத³ஸ்ஸ மொக்கா²ய சர ஆஹிண்டா³ஹி. நிப்³பே³டே²ஹி வா ஸசே பஹோஸீதி அத² ஸயமேவ பஹோஸி, இதே⁴வ நிப்³பே³டே²ஹீதி. ததியங்.
Apurakkharānoti vaṭṭaṃ purato akurumāno. Sahitaṃ me, asahitaṃ teti tuyhaṃ vacanaṃ asahitaṃ asiliṭṭhaṃ, mayhaṃ sahitaṃ siliṭṭhaṃ madhurapānasadisaṃ. Adhiciṇṇaṃ te viparāvattanti yaṃ tuyhaṃ dīghena kālena paricitaṃ suppaguṇaṃ, taṃ mama vādaṃ āgamma sabbaṃ khaṇena viparāvattaṃ nivattaṃ. Āropito te vādoti tuyhaṃ doso mayā āropito. Cara vādappamokkhāyāti taṃ taṃ ācariyaṃ upasaṅkamitvā uttari pariyesanto imassa vādassa mokkhāya cara āhiṇḍāhi. Nibbeṭhehi vā sace pahosīti atha sayameva pahosi, idheva nibbeṭhehīti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஹாலித்³தி³கானிஸுத்தங் • 3. Hāliddikānisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஹாலித்³தி³கானிஸுத்தவண்ணனா • 3. Hāliddikānisuttavaṇṇanā
