| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༣. ཧཱལིདྡིཀཱནིསུཏྟཝཎྞནཱ
3. Hāliddikānisuttavaṇṇanā
༣. ‘‘ཨཝནྟིདཀྑིཎཱཔཐེ’’ཏི ཨཉྙེསུ སུཏྟཔདེསུ ཨཱགཏཏྟཱ ཨཱཧ ‘‘ཨཝནྟིདཀྑིཎཱཔཐསངྑཱཏེ’’ཏི། མཛ྄ཛྷིམདེསཏོ ཧི དཀྑིཎདིསཱཡ ཨཝནྟིརཊྛཾ། པཝཏྟཡིཏྠ ཨེཏྠ ལདྡྷཱིཏི པཝཏྟཾ, པཝཏྟིཏབྦཊྛཱནནྟི ཨཱཧ ‘‘ལདྡྷིཔཝཏྟཊྛཱནེ’’ཏི། རུཔྤནསབྷཱཝོ དྷམྨོཏི ཀཏྭཱ རཱུཔདྷཱཏཱུཏི རཱུཔཀྑནྡྷོ ཝུཏྟོ། རཱུཔདྷཱཏུམྷི ཨཱརམྨཎཔཙྩཡབྷཱུཏེན རཱགེན སཧཛཱཏེནཔི ཨསཧཛཱཏེནཔི ཨུཔནིསྶཡབྷཱུཏེན ཨཔྤཧཱིནབྷཱཝེནེཝ ཝིནིབདྡྷཾ པཊིབདྡྷཾ ཀམྨཝིཉྙཱཎཾ། ཨོཀསཱརཱིཏི ཝུཙྩཏི – ‘‘ཏསྨིཾ རཱུཔདྷཱཏུསཉྙིཏེ ཨོཀེ སརཏི པཝཏྟཏཱི’’ཏི ཀཏྭཱ། ཨཝཏི ཨེཏྠ གཙྪཏི པཝཏྟཏཱིཏི ཨོཀཾ, པཝཏྟིཊྛཱནཾ། ཏེནཱཧ – ‘‘གེཧསཱརཱི ཨཱལཡསཱརཱི’’ཏི།
3. ‘‘Avantidakkhiṇāpathe’’ti aññesu suttapadesu āgatattā āha ‘‘avantidakkhiṇāpathasaṅkhāte’’ti. Majjhimadesato hi dakkhiṇadisāya avantiraṭṭhaṃ. Pavattayittha ettha laddhīti pavattaṃ, pavattitabbaṭṭhānanti āha ‘‘laddhipavattaṭṭhāne’’ti. Ruppanasabhāvo dhammoti katvā rūpadhātūti rūpakkhandho vutto. Rūpadhātumhi ārammaṇapaccayabhūtena rāgena sahajātenapi asahajātenapi upanissayabhūtena appahīnabhāveneva vinibaddhaṃ paṭibaddhaṃ kammaviññāṇaṃ. Okasārīti vuccati – ‘‘tasmiṃ rūpadhātusaññite oke sarati pavattatī’’ti katvā. Avati ettha gacchati pavattatīti okaṃ, pavattiṭṭhānaṃ. Tenāha – ‘‘gehasārī ālayasārī’’ti.
ཨུགཙྪཏི ཝཱ ཨེཏྠ ཝེདནཱདཱིཧི སདྡྷིཾ སམཝེཏཱིཏི ཨོཀོ, ཙཀྑུརཱུཔཱདི། པཙྩཡོཏི ཨཱརམྨཎཱདིཝསེན པཙྩཡོ། པཙྩཡོ ཧོཏཱིཏི ཨནནྟརསམནནྟརཱདིནཱ ཙེཝ ཀམྨཱུཔནིསྶཡཨཱརམྨཎཱདིནཱ ཙ། ‘‘ཝིཉྙཱཎདྷཱཏུ ཁོ, གཧཔཏཱི’’ཏི ཨེཝཾ ཝུཏྟེ ‘‘ཀམྨཝིཉྙཱཎཝིཔཱཀཝིཉྙཱཎེསུ ཀཏརཾ ནུ ཁོ’’ཏི སམྨོཧོ བྷཝེཡྻ། ཏསྶ སམྨོཧསྶ ཝིགྷཱཏཏྠཾ ཨཔགམནཏྠཾ། ཨསམྦྷིནྣཱཝཱཏི ཨསཾཀིཎྞཱཝ དེསནཱ ཀཏཱ། ཨཱརམྨཎཝསེན ཙཏསྶོ ཨབྷིསངྑཱརཝིཉྙཱཎཊྛིཏིཡོ ཝུཏྟཱ – ‘‘རཱུཔུཔཡཾ ཝཱ, བྷིཀྑཝེ, ཝིཉྙཱཎཾ ཏིཊྛམཱནཾ ཏིཊྛེཡྻ, རཱུཔཱརམྨཎ’’ནྟིཨཱདིནཱ (སཾ॰ ནི॰ ༣.༥༣)། ཏཱ ཝིཉྙཱཎཊྛིཏིཡོ དསྶེཏུམྤི།
Ugacchati vā ettha vedanādīhi saddhiṃ samavetīti oko, cakkhurūpādi. Paccayoti ārammaṇādivasena paccayo. Paccayo hotīti anantarasamanantarādinā ceva kammūpanissayaārammaṇādinā ca. ‘‘Viññāṇadhātu kho, gahapatī’’ti evaṃ vutte ‘‘kammaviññāṇavipākaviññāṇesu kataraṃ nu kho’’ti sammoho bhaveyya. Tassa sammohassa vighātatthaṃ apagamanatthaṃ. Asambhinnāvāti asaṃkiṇṇāva desanā katā. Ārammaṇavasena catasso abhisaṅkhāraviññāṇaṭṭhitiyo vuttā – ‘‘rūpupayaṃ vā, bhikkhave, viññāṇaṃ tiṭṭhamānaṃ tiṭṭheyya, rūpārammaṇa’’ntiādinā (saṃ. ni. 3.53). Tā viññāṇaṭṭhitiyo dassetumpi.
དལ༹ྷཾ ཨབྷིནིཝེསཝསེན ཨཱརམྨཎཾ ཨུཔེནྟཱིཏི ཨུཔཡཱ, ཏཎྷཱདིཊྛིཡོ། ཨདྷིཊྛཱནབྷཱུཏཱཏི པཏིཊྛཱནབྷཱུཏཱ། ཨབྷིནིཝེསབྷཱུཏཱཏི ཏཾ ཏཾ ཨཱརམྨཎཾ ཨབྷིནིཝིསྶ ཨཛ྄ཛྷོསཱཡ པཝཏྟིཡཱ ཀཱརཎབྷཱུཏཱ། ཨནུསཡབྷཱུཏཱཏི རཱགཱནུསཡདིཊྛཱནུསཡབྷཱུཏཱ། ཨུཔརིམཀོཊིཡཱཏི པཧཱནསྶ ཨུཔརིམཀོཊིཡཱ ། བུདྡྷཱནཉྙེཝ ཧི ཏེ སཝཱསནཱ པཧཱིནཱ། པུབྦེ ཨགྒཧིཏཾ ཝིཉྙཱཎཾ ཨགྒཧིཏམེཝཱཏི ཀཏྭཱ ཀསྨཱ ཨིདྷ དེསནཱ ཀཏཱཏི ཙོདེཏི – ‘‘ཨིདྷ ཝིཉྙཱཎཾ ཀསྨཱ གཧིཏ’’ནྟི། པུབྦེ ‘‘ཝིཉྙཱཎདྷཱཏུརཱགཝིནིབནྡྷཉྩ ཝིཉྙཱཎ’’ནྟི ཝུཙྩམཱནེ ཡཐཱ ཡཐཱ སམྨོཧོ སིཡཱ པཙྩཡཔཙྩཡུཔྤནྣཝིབྷཱགསྶ དུཀྐརཏྟཱ, ཨིདྷ པན སམྨོཧསྶ ཨོཀཱསོཝ ནཏྠི ཨཝིསེསེན པཉྩསུ ཁནྡྷེསུ ཀིལེསཔྤཧཱནཝསེནཱཏི། ཏེནཱཧ ‘‘ཀིལེསཔྤཧཱནདསྶནཏྠ’’ནྟིཨཱདི། ཀམྨཝིཉྙཱཎེན ཨོཀཾ ཨསརནྟེནཱ’’ཏི ཨིཏྠམྦྷཱུཏལཀྑཎེ ཀརཎཝཙནཾ། ཨསརནྟེནཱཏི ཨནུཔགཙྪནྟེན།
Daḷhaṃ abhinivesavasena ārammaṇaṃ upentīti upayā, taṇhādiṭṭhiyo. Adhiṭṭhānabhūtāti patiṭṭhānabhūtā. Abhinivesabhūtāti taṃ taṃ ārammaṇaṃ abhinivissa ajjhosāya pavattiyā kāraṇabhūtā. Anusayabhūtāti rāgānusayadiṭṭhānusayabhūtā. Uparimakoṭiyāti pahānassa uparimakoṭiyā . Buddhānaññeva hi te savāsanā pahīnā. Pubbe aggahitaṃ viññāṇaṃ aggahitamevāti katvā kasmā idha desanā katāti codeti – ‘‘idhaviññāṇaṃ kasmā gahita’’nti. Pubbe ‘‘viññāṇadhāturāgavinibandhañca viññāṇa’’nti vuccamāne yathā yathā sammoho siyā paccayapaccayuppannavibhāgassa dukkarattā, idha pana sammohassa okāsova natthi avisesena pañcasu khandhesu kilesappahānavasenāti. Tenāha ‘‘kilesappahānadassanattha’’ntiādi. Kammaviññāṇena okaṃ asarantenā’’ti itthambhūtalakkhaṇe karaṇavacanaṃ. Asarantenāti anupagacchantena.
པཙྩཡཊྛེནཱཏི ཨཱརམྨཎཱདིཔཙྩཡབྷཱཝེན། ནིམིཏྟཾ ཨུཔྤཏྟིཀཾ། ཨཱརམྨཎ…པེ॰… ནིཀེཏནྟི ཨཱརམྨཎཀརཎསངྑཱཏེན ནིཝཱསཊྛཱནབྷཱུཏེན རཱུཔམེཝ ནིཀེཏནྟི རཱུཔནིམིཏྟནིཀེཏཾ།
Paccayaṭṭhenāti ārammaṇādipaccayabhāvena. Nimittaṃ uppattikaṃ. Ārammaṇa…pe… niketanti ārammaṇakaraṇasaṅkhātena nivāsaṭṭhānabhūtena rūpameva niketanti rūpanimittaniketaṃ.
ཚནྡརཱགསྶ བལཝདུབྦལཏཱཡཱཏི ཨཛ྄ཛྷཏྟཁནྡྷཔཉྩཀེ ཚནྡརཱགསྶ བལཝབྷཱཝེན ཏཾ ‘‘ཨོཀོ’’ཏི, བཧིདྡྷཱ ཚསུ ཨཱརམྨཎེསུ ཏསྶ དུབྦལཏཱཡ ཏཱནི ‘‘ནིཀེཏ’’ནྟི ཝུཏྟཱནི། ཨིདཱནི ཡཐཱཝུཏྟམཏྠཾ པཱཀཊཾ ཀཏྭཱ དསྶེཏུཾ ‘‘སམཱནེཔི ཧཱི’’ཏིཨཱདི ཝུཏྟཾ། ཨོཀོཏི ཝུཙྩཏི གེཧམེཝ རཏྟིཊྛཱནབྷཱཝཏོ། ནིཀེཏནྟི ཝུཙྩཏི ཨུཡྻཱནཱདི དིཝཱཊྛཱནབྷཱཝཏོ། ཏཏོ དུབྦལཏརོ ཧོཏི ཚནྡརཱགོ།
Chandarāgassa balavadubbalatāyāti ajjhattakhandhapañcake chandarāgassa balavabhāvena taṃ ‘‘oko’’ti, bahiddhā chasu ārammaṇesu tassa dubbalatāya tāni ‘‘niketa’’nti vuttāni. Idāni yathāvuttamatthaṃ pākaṭaṃ katvā dassetuṃ ‘‘samānepi hī’’tiādi vuttaṃ. Okoti vuccati gehameva rattiṭṭhānabhāvato. Niketanti vuccati uyyānādi divāṭṭhānabhāvato. Tato dubbalataro hoti chandarāgo.
གེཧསྶིཏསུཁེནཱཏི གེཧནིསྶིཏེན ཙིཏྟསྶ སུཁེན སུཁིཏོ སུཁཔྤཏྟོ ཧོཏི། ཀིཙྩཀརཎཱིཡེསཱུཏི ཁུདྡཀེསུ ཙེཝ མཧནྟེསུ ཙ ཀཏྟབྦཏྠེསུ། སཡནྟི ཨཏྟནཱ། ཨནྟོཏི ཙིཏྟཛ྄ཛྷཱསཡེ།
Gehassitasukhenāti gehanissitena cittassa sukhena sukhito sukhappatto hoti. Kiccakaraṇīyesūti khuddakesu ceva mahantesu ca kattabbatthesu. Sayanti attanā. Antoti cittajjhāsaye.
ཨེཝཾརཱུཔོཏི ཨཱིདིསརཱུཔོ། ཝཎྞསདྡོ ཝིཡ རཱུཔསདྡོ རཱུཔཱཡཏནསྶ ཝིཡ སཎྛཱནསྶཔི ཝཱཙཀོཏི ཨདྷིཔྤཱཡེན ‘‘དཱིགྷརསྶ ཀཱལོ༹དཱཏཱདཱིསུ རཱུཔེསཱུ’’ཏི ཝུཏྟཾ། སུཁཱདཱིསཱུཏི སོམནསྶཱདཱིསུ། ཏཏྠ ཧི ‘‘ཨབྷིཎྷཾ སོམནསྶིཏོ བྷཝེཡྻ’’ནྟི པཏྠནཱ སིཡཱ། ཨེཝཾསཉྙོ ནཱམཱཏི ཝིསཡཝསེན སཉྙཱཝིསེསཔཏྠནམཱཧ། ཨེཝཾཝིཉྙཱཎོཏི པན ཨིདྷ ཝིསཡམུཁེན ཝིཉྙཱཎཝིསེསཔཏྠནཾ ཝདཏི – ‘‘ཨེཝཾནིཔུཎརཱུཔདསྶནསམཏྠཾ, ཨེཝཾཔཉྩཔསཱདཔཊིམཎྜིཏནིསྶཡཉྩ མེ ཝིཉྙཱཎཾ བྷཝེཡྻཱ’’ཏི།
Evaṃrūpoti īdisarūpo. Vaṇṇasaddo viya rūpasaddo rūpāyatanassa viya saṇṭhānassapi vācakoti adhippāyena ‘‘dīgharassa kāḷodātādīsu rūpesū’’ti vuttaṃ. Sukhādīsūti somanassādīsu. Tattha hi ‘‘abhiṇhaṃ somanassito bhaveyya’’nti patthanā siyā. Evaṃsañño nāmāti visayavasena saññāvisesapatthanamāha. Evaṃviññāṇoti pana idha visayamukhena viññāṇavisesapatthanaṃ vadati – ‘‘evaṃnipuṇarūpadassanasamatthaṃ, evaṃpañcapasādapaṭimaṇḍitanissayañca me viññāṇaṃ bhaveyyā’’ti.
ཝཊྚཾ པུརཏོ ཨཀུརཱུམཱནོཏི ལོཀེ ཙིཏྟཾ ཨཔཏྠེནྟོ། ཨསིལིཊྛཾ པུབྦེནཱཔརཾ ཨསམྦདྡྷཾ། ཝདནྟི ཨེཏེནཱཏི ཝཱདོ, དོསོཏི ཨཱཧ – ‘‘ཏུཡ྄ཧཾ དོསོ’’ཏིཨཱདི། ཨིདྷེཝ ཨིམསྨིཾཡེཝ སམཱགམེ། ནིབྦེཋེཧི དོསཏོ ཨཏྟཱནཾ མོཙེཧི།
Vaṭṭaṃ purato akurūmānoti loke cittaṃ apatthento. Asiliṭṭhaṃ pubbenāparaṃ asambaddhaṃ. Vadanti etenāti vādo, dosoti āha – ‘‘tuyhaṃ doso’’tiādi. Idheva imasmiṃyeva samāgame. Nibbeṭhehi dosato attānaṃ mocehi.
ཧཱལིདྡིཀཱནིསུཏྟཝཎྞནཱ ནིཊྛིཏཱ།
Hāliddikānisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. ཧཱལིདྡིཀཱནིསུཏྟཾ • 3. Hāliddikānisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. ཧཱལིདྡིཀཱནིསུཏྟཝཎྞནཱ • 3. Hāliddikānisuttavaṇṇanā
