| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਹਾਲਿਦ੍ਦਿਕਾਨਿਸੁਤ੍ਤવਣ੍ਣਨਾ
3. Hāliddikānisuttavaṇṇanā
੩. ਤਤਿਯੇ ਅવਨ੍ਤੀਸੂਤਿ ਅવਨ੍ਤਿਦਕ੍ਖਿਣਾਪਥਸਙ੍ਖਾਤੇ ਅવਨ੍ਤਿਰਟ੍ਠੇ। ਕੁਰਰਘਰੇਤਿ ਏવਂਨਾਮਕੇ ਨਗਰੇ। ਪਪਾਤੇਤਿ ਏਕਤੋ ਪਪਾਤੇ। ਤਸ੍ਸ ਕਿਰ ਪਬ੍ਬਤਸ੍ਸ ਏਕਂ ਪਸ੍ਸਂ ਛਿਨ੍ਦਿਤ੍વਾ ਪਾਤਿਤਂ વਿਯ ਅਹੋਸਿ। ‘‘ਪવਤ੍ਤੇ’’ਤਿਪਿ ਪਾਠੋ, ਨਾਨਾਤਿਤ੍ਥਿਯਾਨਂ ਲਦ੍ਧਿਪવਤ੍ਤਟ੍ਠਾਨੇਤਿ ਅਤ੍ਥੋ। ਇਤਿ ਥੇਰੋ ਤਸ੍ਮਿਂ ਰਟ੍ਠੇ ਤਂ ਨਗਰਂ ਨਿਸ੍ਸਾਯ ਤਸ੍ਮਿਂ ਪਬ੍ਬਤੇ વਿਹਰਤਿ। ਹਾਲਿਦ੍ਦਿਕਾਨੀਤਿ ਏવਂਨਾਮਕੋ। ਅਟ੍ਠਕવਗ੍ਗਿਯੇ ਮਾਗਣ੍ਡਿਯਪਞ੍ਹੇਤਿ ਅਟ੍ਠਕવਗ੍ਗਿਕਮ੍ਹਿ ਮਾਗਣ੍ਡਿਯਪਞ੍ਹੋ ਨਾਮ ਅਤ੍ਥਿ, ਤਸ੍ਮਿਂ ਪਞ੍ਹੇ। ਰੂਪਧਾਤੂਤਿ ਰੂਪਕ੍ਖਨ੍ਧੋ ਅਧਿਪ੍ਪੇਤੋ। ਰੂਪਧਾਤੁਰਾਗવਿਨਿਬਦ੍ਧਨ੍ਤਿ ਰੂਪਧਾਤੁਮ੍ਹਿ ਰਾਗੇਨ વਿਨਿਬਦ੍ਧਂ । વਿਞ੍ਞਾਣਨ੍ਤਿ ਕਮ੍ਮવਿਞ੍ਞਾਣਂ। ਓਕਸਾਰੀਤਿ ਗੇਹਸਾਰੀ ਆਲਯਸਾਰੀ।
3. Tatiye avantīsūti avantidakkhiṇāpathasaṅkhāte avantiraṭṭhe. Kuraraghareti evaṃnāmake nagare. Papāteti ekato papāte. Tassa kira pabbatassa ekaṃ passaṃ chinditvā pātitaṃ viya ahosi. ‘‘Pavatte’’tipi pāṭho, nānātitthiyānaṃ laddhipavattaṭṭhāneti attho. Iti thero tasmiṃ raṭṭhe taṃ nagaraṃ nissāya tasmiṃ pabbate viharati. Hāliddikānīti evaṃnāmako. Aṭṭhakavaggiye māgaṇḍiyapañheti aṭṭhakavaggikamhi māgaṇḍiyapañho nāma atthi, tasmiṃ pañhe. Rūpadhātūti rūpakkhandho adhippeto. Rūpadhāturāgavinibaddhanti rūpadhātumhi rāgena vinibaddhaṃ . Viññāṇanti kammaviññāṇaṃ. Okasārīti gehasārī ālayasārī.
ਕਸ੍ਮਾ ਪਨੇਤ੍ਥ ‘‘વਿਞ੍ਞਾਣਧਾਤੁ ਖੋ, ਗਹਪਤੀ’’ਤਿ ਨ વੁਤ੍ਤਨ੍ਤਿ? ਸਮ੍ਮੋਹવਿਘਾਤਤ੍ਥਂ। ‘‘ਓਕੋ’’ਤਿ ਹਿ ਅਤ੍ਥਤੋ ਪਚ੍ਚਯੋ વੁਚ੍ਚਤਿ, ਪੁਰੇਜਾਤਞ੍ਚ ਕਮ੍ਮવਿਞ੍ਞਾਣਂ ਪਚ੍ਛਾਜਾਤਸ੍ਸ ਕਮ੍ਮવਿਞ੍ਞਾਣਸ੍ਸਪਿ વਿਪਾਕવਿਞ੍ਞਾਣਸ੍ਸਪਿ વਿਪਾਕવਿਞ੍ਞਾਣਞ੍ਚ વਿਪਾਕવਿਞ੍ਞਾਣਸ੍ਸਪਿ ਕਮ੍ਮવਿਞ੍ਞਾਣਸ੍ਸਪਿ ਪਚ੍ਚਯੋ ਹੋਤਿ, ਤਸ੍ਮਾ ‘‘ਕਤਰਂ ਨੁ ਖੋ ਇਧ વਿਞ੍ਞਾਣ’’ਨ੍ਤਿ? ਸਮ੍ਮੋਹੋ ਭવੇਯ੍ਯ, ਤਸ੍ਸ વਿਘਾਤਤ੍ਥਂ ਤਂ ਅਗਹੇਤ੍વਾ ਅਸਮ੍ਭਿਨ੍ਨਾવ ਦੇਸਨਾ ਕਤਾ। ਅਪਿਚ ਆਰਮ੍ਮਣવਸੇਨ ਚਤਸ੍ਸੋ ਅਭਿਸਙ੍ਖਾਰવਿਞ੍ਞਾਣਟ੍ਠਿਤਿਯੋ વੁਤ੍ਤਾਤਿ ਤਾ ਦਸ੍ਸੇਤੁਮ੍ਪਿ ਇਧ વਿਞ੍ਞਾਣਂ ਨ ਗਹਿਤਂ।
Kasmā panettha ‘‘viññāṇadhātu kho, gahapatī’’ti na vuttanti? Sammohavighātatthaṃ. ‘‘Oko’’ti hi atthato paccayo vuccati, purejātañca kammaviññāṇaṃ pacchājātassa kammaviññāṇassapi vipākaviññāṇassapi vipākaviññāṇañca vipākaviññāṇassapi kammaviññāṇassapi paccayo hoti, tasmā ‘‘kataraṃ nu kho idha viññāṇa’’nti? Sammoho bhaveyya, tassa vighātatthaṃ taṃ agahetvā asambhinnāva desanā katā. Apica ārammaṇavasena catasso abhisaṅkhāraviññāṇaṭṭhitiyo vuttāti tā dassetumpi idha viññāṇaṃ na gahitaṃ.
ਉਪਯੁਪਾਦਾਨਾਤਿ ਤਣ੍ਹੂਪਯਦਿਟ੍ਠੂਪਯવਸੇਨ ਦ੍વੇ ਉਪਯਾ, ਕਾਮੁਪਾਦਾਨਾਦੀਨਿ ਚਤ੍ਤਾਰਿ ਉਪਾਦਾਨਾਨਿ ਚ। ਚੇਤਸੋ ਅਧਿਟ੍ਠਾਨਾਭਿਨਿવੇਸਾਨੁਸਯਾਤਿ ਅਕੁਸਲਚਿਤ੍ਤਸ੍ਸ ਅਧਿਟ੍ਠਾਨਭੂਤਾ ਚੇવ ਅਭਿਨਿવੇਸਭੂਤਾ ਚ ਅਨੁਸਯਭੂਤਾ ਚ। ਤਥਾਗਤਸ੍ਸਾਤਿ ਸਮ੍ਮਾਸਮ੍ਬੁਦ੍ਧਸ੍ਸ। ਸਬ੍ਬੇਸਮ੍ਪਿ ਹਿ ਖੀਣਾਸવਾਨਂ ਏਤੇ ਪਹੀਨਾવ, ਸਤ੍ਥੁ ਪਨ ਖੀਣਾਸવਭਾવੋ ਲੋਕੇ ਅਤਿਪਾਕਟੋਤਿ ਉਪਰਿਮਕੋਟਿਯਾ ਏવਂ વੁਤ੍ਤਂ। વਿਞ੍ਞਾਣਧਾਤੁਯਾਤਿ ਇਧ વਿਞ੍ਞਾਣਂ ਕਸ੍ਮਾ ਗਹਿਤਂ? ਕਿਲੇਸਪ੍ਪਹਾਨਦਸ੍ਸਨਤ੍ਥਂ। ਕਿਲੇਸਾ ਹਿ ਨ ਕੇવਲਂ ਚਤੂਸੁਯੇવ ਖਨ੍ਧੇਸੁ ਪਹੀਨਾ ਪਹੀਯਨ੍ਤਿ, ਪਞ੍ਚਸੁਪਿ ਪਹੀਯਨ੍ਤਿਯੇવਾਤਿ ਕਿਲੇਸਪ੍ਪਹਾਨਦਸ੍ਸਨਤ੍ਥਂ ਗਹਿਤਂ। ਏવਂ ਖੋ, ਗਹਪਤਿ, ਅਨੋਕਸਾਰੀ ਹੋਤੀਤਿ ਏવਂ ਕਮ੍ਮવਿਞ੍ਞਾਣੇਨ ਓਕਂ ਅਸਰਨ੍ਤੇਨ ਅਨੋਕਸਾਰੀ ਨਾਮ ਹੋਤਿ।
Upayupādānāti taṇhūpayadiṭṭhūpayavasena dve upayā, kāmupādānādīni cattāri upādānāni ca. Cetaso adhiṭṭhānābhinivesānusayāti akusalacittassa adhiṭṭhānabhūtā ceva abhinivesabhūtā ca anusayabhūtā ca. Tathāgatassāti sammāsambuddhassa. Sabbesampi hi khīṇāsavānaṃ ete pahīnāva, satthu pana khīṇāsavabhāvo loke atipākaṭoti uparimakoṭiyā evaṃ vuttaṃ. Viññāṇadhātuyāti idha viññāṇaṃ kasmā gahitaṃ? Kilesappahānadassanatthaṃ. Kilesā hi na kevalaṃ catūsuyeva khandhesu pahīnā pahīyanti, pañcasupi pahīyantiyevāti kilesappahānadassanatthaṃ gahitaṃ. Evaṃ kho, gahapati, anokasārī hotīti evaṃ kammaviññāṇena okaṃ asarantena anokasārī nāma hoti.
ਰੂਪਨਿਮਿਤ੍ਤਨਿਕੇਤવਿਸਾਰવਿਨਿਬਨ੍ਧਾਤਿ ਰੂਪਮੇવ ਕਿਲੇਸਾਨਂ ਪਚ੍ਚਯਟ੍ਠੇਨ ਨਿਮਿਤ੍ਤਂ, ਆਰਮ੍ਮਣਕਿਰਿਯਸਙ੍ਖਾਤਨਿવਾਸਨਟ੍ਠਾਨਟ੍ਠੇਨ ਨਿਕੇਤਨ੍ਤਿ ਰੂਪਨਿਮਿਤ੍ਤਨਿਕੇਤਂ। વਿਸਾਰੋ ਚ વਿਨਿਬਨ੍ਧੋ ਚ વਿਸਾਰવਿਨਿਬਨ੍ਧਾ। ਉਭਯੇਨਪਿ ਹਿ ਕਿਲੇਸਾਨਂ ਪਤ੍ਥਟਭਾવੋ ਚ વਿਨਿਬਨ੍ਧਨਭਾવੋ ਚ વੁਤ੍ਤੋ, ਰੂਪਨਿਮਿਤ੍ਤਨਿਕੇਤੇ વਿਸਾਰવਿਨਿਬਨ੍ਧਾਤਿ ਰੂਪਨਿਮਿਤ੍ਤਨਿਕੇਤવਿਸਾਰવਿਨਿਬਨ੍ਧਾ, ਤਸ੍ਮਾ ਰੂਪਨਿਮਿਤ੍ਤਨਿਕੇਤਮ੍ਹਿ ਉਪ੍ਪਨ੍ਨੇਨ ਕਿਲੇਸવਿਸਾਰੇਨ ਚੇવ ਕਿਲੇਸਬਨ੍ਧਨੇਨ ਚਾਤਿ ਅਤ੍ਥੋ। ਨਿਕੇਤਸਾਰੀਤਿ વੁਚ੍ਚਤੀਤਿ ਆਰਮ੍ਮਣਕਰਣવਸੇਨ ਨਿવਾਸਨਟ੍ਠਾਨਂ ਸਾਰੀਤਿ વੁਚ੍ਚਤਿ। ਪਹੀਨਾਤਿ ਤੇ ਰੂਪਨਿਮਿਤ੍ਤਨਿਕੇਤਕਿਲੇਸવਿਸਾਰવਿਨਿਬਨ੍ਧਾ ਪਹੀਨਾ।
Rūpanimittaniketavisāravinibandhāti rūpameva kilesānaṃ paccayaṭṭhena nimittaṃ, ārammaṇakiriyasaṅkhātanivāsanaṭṭhānaṭṭhena niketanti rūpanimittaniketaṃ. Visāro ca vinibandho ca visāravinibandhā. Ubhayenapi hi kilesānaṃ patthaṭabhāvo ca vinibandhanabhāvo ca vutto, rūpanimittanikete visāravinibandhāti rūpanimittaniketavisāravinibandhā, tasmā rūpanimittaniketamhi uppannena kilesavisārena ceva kilesabandhanena cāti attho. Niketasārīti vuccatīti ārammaṇakaraṇavasena nivāsanaṭṭhānaṃ sārīti vuccati. Pahīnāti te rūpanimittaniketakilesavisāravinibandhā pahīnā.
ਕਸ੍ਮਾ ਪਨੇਤ੍ਥ ਪਞ੍ਚਕ੍ਖਨ੍ਧਾ ‘‘ਓਕਾ’’ਤਿ વੁਤ੍ਤਾ, ਛ ਆਰਮ੍ਮਣਾਨਿ ‘‘ਨਿਕੇਤ’’ਨ੍ਤਿ? ਛਨ੍ਦਰਾਗਸ੍ਸ ਬਲવਦੁਬ੍ਬਲਤਾਯ। ਸਮਾਨੇਪਿ ਹਿ ਏਤੇਸਂ ਆਲਯਟ੍ਠੇਨ વਿਸਯਭਾવੇ ਓਕੋਤਿ ਨਿਚ੍ਚਨਿવਾਸਨਟ੍ਠਾਨਗੇਹਮੇવ વੁਚ੍ਚਤਿ, ਨਿਕੇਤਨ੍ਤਿ ‘‘ਅਜ੍ਜ ਅਸੁਕਟ੍ਠਾਨੇ ਕੀਲ਼ਿਸ੍ਸਾਮਾ’’ਤਿ ਕਤਸਙ੍ਕੇਤਟ੍ਠਾਨਂ ਨਿવਾਸਟ੍ਠਾਨਂ ਉਯ੍ਯਾਨਾਦਿ। ਤਤ੍ਥ ਯਥਾ ਪੁਤ੍ਤਦਾਰਧਨਧਞ੍ਞਪੁਣ੍ਣਗੇਹੇ ਛਨ੍ਦਰਾਗੋ ਬਲવਾ ਹੋਤਿ, ਏવਂ ਅਜ੍ਝਤ੍ਤਿਕੇਸੁ ਖਨ੍ਧੇਸੁ। ਯਥਾ ਪਨ ਉਯ੍ਯਾਨਟ੍ਠਾਨਾਦੀਸੁ ਤਤੋ ਦੁਬ੍ਬਲਤਰੋ ਹੋਤਿ, ਏવਂ ਬਾਹਿਰੇਸੁ ਛਸੁ ਆਰਮ੍ਮਣੇਸੂਤਿ ਛਨ੍ਦਰਾਗਸ੍ਸ ਬਲવਦੁਬ੍ਬਲਤਾਯ ਏવਂ ਦੇਸਨਾ ਕਤਾਤਿ વੇਦਿਤਬ੍ਬੋ।
Kasmā panettha pañcakkhandhā ‘‘okā’’ti vuttā, cha ārammaṇāni ‘‘niketa’’nti? Chandarāgassa balavadubbalatāya. Samānepi hi etesaṃ ālayaṭṭhena visayabhāve okoti niccanivāsanaṭṭhānagehameva vuccati, niketanti ‘‘ajja asukaṭṭhāne kīḷissāmā’’ti katasaṅketaṭṭhānaṃ nivāsaṭṭhānaṃ uyyānādi. Tattha yathā puttadāradhanadhaññapuṇṇagehe chandarāgo balavā hoti, evaṃ ajjhattikesu khandhesu. Yathā pana uyyānaṭṭhānādīsu tato dubbalataro hoti, evaṃ bāhiresu chasu ārammaṇesūti chandarāgassa balavadubbalatāya evaṃ desanā katāti veditabbo.
ਸੁਖਿਤੇਸੁ ਸੁਖਿਤੋਤਿ ਉਪਟ੍ਠਾਕੇਸੁ ਧਨਧਞ੍ਞਲਾਭਾਦਿવਸੇਨ ਸੁਖਿਤੇਸੁ ‘‘ਇਦਾਨਾਹਂ ਮਨਾਪਂ ਭੋਜਨਂ ਲਭਿਸ੍ਸਾਮੀ’’ਤਿ ਗੇਹਸਿਤਸੁਖੇਨ ਸੁਖਿਤੋ ਹੋਤਿ, ਤੇਹਿ ਪਤ੍ਤਸਮ੍ਪਤ੍ਤਿਂ ਅਨੁਭવਮਾਨੋ વਿਯ ਚਰਤਿ। ਦੁਕ੍ਖਿਤੇਸੁ ਦੁਕ੍ਖਿਤੋਤਿ ਤੇਸਂ ਕੇਨਚਿਦੇવ ਕਾਰਣੇਨ ਦੁਕ੍ਖੇ ਉਪ੍ਪਨ੍ਨੇ ਸਯਂ ਦ੍વਿਗੁਣੇਨ ਦੁਕ੍ਖੇਨ ਦੁਕ੍ਖਿਤੋ ਹੋਤਿ। ਕਿਚ੍ਚਕਰਣੀਯੇਸੂਤਿ ਕਿਚ੍ਚਸਙ੍ਖਾਤੇਸੁ ਕਰਣੀਯੇਸੁ। ਤੇਸੁ ਯੋਗਂ ਆਪਜ੍ਜਤੀਤਿ ਉਪਯੋਗਂ ਸਯਂ ਤੇਸਂ ਕਿਚ੍ਚਾਨਂ ਕਤ੍ਤਬ੍ਬਤਂ ਆਪਜ੍ਜਤਿ। ਕਾਮੇਸੂਤਿ વਤ੍ਥੁਕਾਮੇਸੁ। ਏવਂ ਖੋ, ਗਹਪਤਿ, ਕਾਮੇਹਿ ਅਰਿਤ੍ਤੋ ਹੋਤੀਤਿ ਏવਂ ਕਿਲੇਸਕਾਮੇਹਿ ਅਰਿਤ੍ਤੋ ਹੋਤਿ ਅਨ੍ਤੋ ਕਾਮਾਨਂ ਭਾવੇਨ ਅਤੁਚ੍ਛੋ। ਸੁਕ੍ਕਪਕ੍ਖੋ ਤੇਸਂ ਅਭਾવੇਨ ਰਿਤ੍ਤੋ ਤੁਚ੍ਛੋਤਿ વੇਦਿਤਬ੍ਬੋ।
Sukhitesu sukhitoti upaṭṭhākesu dhanadhaññalābhādivasena sukhitesu ‘‘idānāhaṃ manāpaṃ bhojanaṃ labhissāmī’’ti gehasitasukhena sukhito hoti, tehi pattasampattiṃ anubhavamāno viya carati. Dukkhitesu dukkhitoti tesaṃ kenacideva kāraṇena dukkhe uppanne sayaṃ dviguṇena dukkhena dukkhito hoti. Kiccakaraṇīyesūti kiccasaṅkhātesu karaṇīyesu. Tesu yogaṃ āpajjatīti upayogaṃ sayaṃ tesaṃ kiccānaṃ kattabbataṃ āpajjati. Kāmesūti vatthukāmesu. Evaṃ kho, gahapati, kāmehi aritto hotīti evaṃ kilesakāmehi aritto hoti anto kāmānaṃ bhāvena atuccho. Sukkapakkho tesaṃ abhāvena ritto tucchoti veditabbo.
ਪੁਰਕ੍ਖਰਾਨੋਤਿ વਟ੍ਟਂ ਪੁਰਤੋ ਕੁਰੁਮਾਨੋ। ਏવਂਰੂਪੋ ਸਿਯਨ੍ਤਿਆਦੀਸੁ ਦੀਘਰਸ੍ਸਕਾਲ਼ੋਦਾਤਾਦੀਸੁ ਰੂਪੇਸੁ ‘‘ਏવਂਰੂਪੋ ਨਾਮ ਭવੇਯ੍ਯ’’ਨ੍ਤਿ ਪਤ੍ਥੇਤਿ। ਸੁਖਾਦੀਸੁ વੇਦਨਾਸੁ ਏવਂવੇਦਨੋ ਨਾਮ; ਨੀਲਸਞ੍ਞਾਦੀਸੁ ਸਞ੍ਞਾਸੁ ਏવਂ ਸਞ੍ਞੋ ਨਾਮ; ਪੁਞ੍ਞਾਭਿਸਙ੍ਖਾਰਾਦੀਸੁ ਸਙ੍ਖਾਰੇਸੁ ਏવਂਸਙ੍ਖਾਰੋ ਨਾਮ; ਚਕ੍ਖੁવਿਞ੍ਞਾਣਾਦੀਸੁ વਿਞ੍ਞਾਣੇਸੁ ‘‘ਏવਂ વਿਞ੍ਞਾਣੋ ਨਾਮ ਭવੇਯ੍ਯ’’ਨ੍ਤਿ ਪਤ੍ਥੇਤਿ।
Purakkharānoti vaṭṭaṃ purato kurumāno. Evaṃrūpo siyantiādīsu dīgharassakāḷodātādīsu rūpesu ‘‘evaṃrūpo nāma bhaveyya’’nti pattheti. Sukhādīsu vedanāsu evaṃvedano nāma; nīlasaññādīsu saññāsu evaṃ sañño nāma; puññābhisaṅkhārādīsu saṅkhāresu evaṃsaṅkhāro nāma; cakkhuviññāṇādīsu viññāṇesu ‘‘evaṃ viññāṇo nāma bhaveyya’’nti pattheti.
ਅਪੁਰਕ੍ਖਰਾਨੋਤਿ વਟ੍ਟਂ ਪੁਰਤੋ ਅਕੁਰੁਮਾਨੋ। ਸਹਿਤਂ ਮੇ, ਅਸਹਿਤਂ ਤੇਤਿ ਤੁਯ੍ਹਂ વਚਨਂ ਅਸਹਿਤਂ ਅਸਿਲਿਟ੍ਠਂ, ਮਯ੍ਹਂ ਸਹਿਤਂ ਸਿਲਿਟ੍ਠਂ ਮਧੁਰਪਾਨਸਦਿਸਂ। ਅਧਿਚਿਣ੍ਣਂ ਤੇ વਿਪਰਾવਤ੍ਤਨ੍ਤਿ ਯਂ ਤੁਯ੍ਹਂ ਦੀਘੇਨ ਕਾਲੇਨ ਪਰਿਚਿਤਂ ਸੁਪ੍ਪਗੁਣਂ, ਤਂ ਮਮ વਾਦਂ ਆਗਮ੍ਮ ਸਬ੍ਬਂ ਖਣੇਨ વਿਪਰਾવਤ੍ਤਂ ਨਿવਤ੍ਤਂ। ਆਰੋਪਿਤੋ ਤੇ વਾਦੋਤਿ ਤੁਯ੍ਹਂ ਦੋਸੋ ਮਯਾ ਆਰੋਪਿਤੋ। ਚਰ વਾਦਪ੍ਪਮੋਕ੍ਖਾਯਾਤਿ ਤਂ ਤਂ ਆਚਰਿਯਂ ਉਪਸਙ੍ਕਮਿਤ੍વਾ ਉਤ੍ਤਰਿ ਪਰਿਯੇਸਨ੍ਤੋ ਇਮਸ੍ਸ વਾਦਸ੍ਸ ਮੋਕ੍ਖਾਯ ਚਰ ਆਹਿਣ੍ਡਾਹਿ। ਨਿਬ੍ਬੇਠੇਹਿ વਾ ਸਚੇ ਪਹੋਸੀਤਿ ਅਥ ਸਯਮੇવ ਪਹੋਸਿ, ਇਧੇવ ਨਿਬ੍ਬੇਠੇਹੀਤਿ। ਤਤਿਯਂ।
Apurakkharānoti vaṭṭaṃ purato akurumāno. Sahitaṃ me, asahitaṃ teti tuyhaṃ vacanaṃ asahitaṃ asiliṭṭhaṃ, mayhaṃ sahitaṃ siliṭṭhaṃ madhurapānasadisaṃ. Adhiciṇṇaṃ te viparāvattanti yaṃ tuyhaṃ dīghena kālena paricitaṃ suppaguṇaṃ, taṃ mama vādaṃ āgamma sabbaṃ khaṇena viparāvattaṃ nivattaṃ. Āropito te vādoti tuyhaṃ doso mayā āropito. Cara vādappamokkhāyāti taṃ taṃ ācariyaṃ upasaṅkamitvā uttari pariyesanto imassa vādassa mokkhāya cara āhiṇḍāhi. Nibbeṭhehi vā sace pahosīti atha sayameva pahosi, idheva nibbeṭhehīti. Tatiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਹਾਲਿਦ੍ਦਿਕਾਨਿਸੁਤ੍ਤਂ • 3. Hāliddikānisuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਹਾਲਿਦ੍ਦਿਕਾਨਿਸੁਤ੍ਤવਣ੍ਣਨਾ • 3. Hāliddikānisuttavaṇṇanā
