| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
435. හලිද්‌දිරාගජාතකං (9)
435. Haliddirāgajātakaṃ (9)
78.
78.
සුතිතික්‌ඛං අරඤ්‌ඤම්‌හි, පන්‌තම්‌හි සයනාසනෙ;
Sutitikkhaṃ araññamhi, pantamhi sayanāsane;
යෙ ච ගාමෙ තිතික්‌ඛන්‌ති, තෙ උළාරතරා තයා.
Ye ca gāme titikkhanti, te uḷāratarā tayā.
79.
79.
අරඤ්‌ඤා ගාමමාගම්‌ම, කිංසීලං කිංවතං අහං;
Araññā gāmamāgamma, kiṃsīlaṃ kiṃvataṃ ahaṃ;
පුරිසං තාත සෙවෙය්‍යං, තං මෙ අක්‌ඛාහි පුච්‌ඡිතො.
Purisaṃ tāta seveyyaṃ, taṃ me akkhāhi pucchito.
80.
80.
සුස්‌සූසී ච තිතික්‌ඛී ච, තං භජෙහි ඉතො ගතො.
Sussūsī ca titikkhī ca, taṃ bhajehi ito gato.
81.
81.
යස්‌ස කායෙන වාචාය, මනසා නත්‌ථි දුක්‌කටං;
Yassa kāyena vācāya, manasā natthi dukkaṭaṃ;
උරසීව පතිට්‌ඨාය, තං භජෙහි ඉතො ගතො.
Urasīva patiṭṭhāya, taṃ bhajehi ito gato.
82.
82.
යො ච ධම්‌මෙන චරති, චරන්‌තොපි න මඤ්‌ඤති;
Yo ca dhammena carati, carantopi na maññati;
විසුද්‌ධකාරිං සප්‌පඤ්‌ඤං, තං භජෙහි ඉතො ගතො.
Visuddhakāriṃ sappaññaṃ, taṃ bhajehi ito gato.
83.
83.
හලිද්‌දිරාගං කපිචිත්‌තං, පුරිසං රාගවිරාගිනං;
Haliddirāgaṃ kapicittaṃ, purisaṃ rāgavirāginaṃ;
තාදිසං තාත මා සෙවි, නිම්‌මනුස්‌සම්‌පි චෙ සියා.
Tādisaṃ tāta mā sevi, nimmanussampi ce siyā.
84.
84.
ආසීවිසංව කුපිතං, මීළ්‌හලිත්‌තං මහාපථං;
Āsīvisaṃva kupitaṃ, mīḷhalittaṃ mahāpathaṃ;
ආරකා පරිවජ්‌ජෙහි, යානීව විසමං පථං.
Ārakā parivajjehi, yānīva visamaṃ pathaṃ.
85.
85.
අනත්‌ථා තාත වඩ්‌ඪන්‌ති, බාලං අච්‌චුපසෙවතො;
Anatthā tāta vaḍḍhanti, bālaṃ accupasevato;
මාස්‌සු බාලෙන සංගච්‌ඡි, අමිත්‌තෙනෙව සබ්‌බදා.
Māssu bālena saṃgacchi, amitteneva sabbadā.
86.
86.
තං තාහං තාත යාචාමි, කරස්‌සු වචනං මම;
Taṃ tāhaṃ tāta yācāmi, karassu vacanaṃ mama;
මාස්‌සු බාලෙන සංගච්‌ඡි 3, දුක්‌ඛො බාලෙහි සඞ්‌ගමොති.
Māssu bālena saṃgacchi 4, dukkho bālehi saṅgamoti.
හලිද්‌දිරාගජාතකං නවමං.
Haliddirāgajātakaṃ navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [435] 9. හලිද්‌දිරාගජාතකවණ්‌ණනා • [435] 9. Haliddirāgajātakavaṇṇanā
