| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
хаанабхааг̇ияажад̇угганид̣̇д̣̇зсаван̣н̣анаа
Hānabhāgiyacatukkaniddesavaṇṇanā
30. ид̣̇аани яасмаа хаанабхааг̇ияаад̣̇ид̇аа згзгассзва самаад̇хисса авад̇т̇аабхзд̣̇зна ход̇и, д̇асмаа хаанабхааг̇ияажад̇уггам̣ згад̇оязва нид̣̇д̣̇идтам̣. д̇ад̇т̇а батамасса жхаанасса лаабхинд̇и батамасса жхаанасса лаабхино . саамиад̇т̇з убаяог̇аважанам̣. лаабхо сажчигирияаа асса ад̇т̇ийд̇и лаабхийд̇и вужжад̇и. гаамасахаг̇ад̇аад̇и зд̇т̇а сахаг̇ад̇асад̣̇д̣̇асса аарамман̣ад̇т̇о ад̇хиббзд̇о, вад̇т̇угаамагилзсагаамаарамман̣аад̇и ад̇т̇о. сан̃н̃ааманасигаараад̇и ж̇аванасан̃н̃аа жа д̇ад̣̇ааваж̇ж̇анаманасигааро жа, сан̃н̃аасамбаяуд̇д̇аманасигаароби ваддад̇и. самуд̣̇аажаранд̇ийд̇и бавад̇д̇анд̇и. д̇хаммод̇и батамаж̇жхаанад̇хаммо. жхаанаа барихааяанд̇о д̇ийхи гааран̣зхи барихааяад̇и гилзсасамуд̣̇аажаарзна ваа асаббааяагирияааяа ваа анануяог̇зна ваа. гилзсасамуд̣̇аажаарзна барихааяанд̇о сийгхам̣ барихааяад̇и, гаммаараамад̇аабхассаараамад̇аанид̣̇д̣̇аараамад̇аасан̇г̇ан̣игаараамад̇аануяог̇авасзна асаббааяагирияааяа барихааяанд̇о д̣̇анд̇хам̣ барихааяад̇и, г̇злан̃н̃абажжаяавзгаллаад̣̇инаа балиб̣од̇хзна абхигкан̣ам̣ асамаабаж̇ж̇анд̇о анануяог̇зна барихааяанд̇оби д̣̇анд̇хам̣ барихааяад̇и. ид̇ха бана б̣алавагааран̣амзва д̣̇ассзнд̇о гилзсасамуд̣̇аажаарамзвааха. д̣̇уд̇ияаж̇жхаанаад̣̇ийхи бана барихааяанд̇о хздтимахздтимаж̇жхаананиганд̇исамуд̣̇аажаарзнаби барихааяад̇и. гид̇д̇аавад̇аа барихийно ход̇ийд̇и? яад̣̇аа на саггод̇и самаабаж̇ж̇ид̇ум̣, зд̇д̇аавад̇аа барихийно ход̇ийд̇и. д̇ад̣̇ануд̇хаммад̇аад̇и анубавад̇д̇о д̇хаммо ануд̇хаммо, жхаанам̣ ад̇хигам̣ гад̇ваа бавад̇д̇асса ниганд̇ид̇хаммассзд̇ам̣ ад̇хиважанам̣. ануд̇хаммо зва ануд̇хаммад̇аа, д̇асса жхаанасса ануд̇хаммад̇аа д̇ад̣̇ануд̇хаммад̇аа. сад̇ийд̇и ниганд̇и. санд̇идтад̇ийд̇и бад̇идтаад̇и . д̇ам̣ батамаж̇жхаанам̣ анувад̇д̇амаанаа ниганд̇и бавад̇д̇ад̇ийд̇и вуд̇д̇ам̣ ход̇и. авид̇аггасахаг̇ад̇аад̇и д̣̇уд̇ияаж̇жхаанаарамман̣аа. д̇ан̃хи над̇т̇зд̇т̇а вид̇аггод̇и авид̇агганд̇и вужжад̇и. ниб̣б̣ид̣̇аасахаг̇ад̇аад̇и вибассанаарамман̣аа. саа хи сан̇каарзсу ниб̣б̣инд̣̇анад̇о ниб̣б̣ид̣̇аад̇и вужжад̇и. ‘‘ниб̣б̣инд̣̇ам̣ вираж̇ж̇ад̇ий’’д̇и (махаава. 23; сам̣. ни. 3.61) хи вуд̇д̇ам̣. вирааг̇уубасам̣хид̇аад̇и арияамаг̇г̇абадисан̃н̃уд̇д̇аа вибассанаа. вибассанаа хи сикааббад̇д̇аа маг̇г̇авудтаанам̣ баабзд̇и. д̇асмаа вибассанаарамман̣аа сан̃н̃ааманасигаараа ‘‘вирааг̇уубасам̣хид̇аа’’д̇и вужжанд̇и, ‘‘вирааг̇аа вимужжад̇ий’’д̇и хи вуд̇д̇ам̣.
30. Idāni yasmā hānabhāgiyāditā ekekasseva samādhissa avatthābhedena hoti, tasmā hānabhāgiyacatukkaṃ ekatoyeva niddiṭṭhaṃ. Tattha paṭhamassa jhānassa lābhinti paṭhamassa jhānassa lābhino . Sāmiatthe upayogavacanaṃ. Lābho sacchikiriyā assa atthīti lābhīti vuccati. Kāmasahagatāti ettha sahagatasaddassa ārammaṇattho adhippeto, vatthukāmakilesakāmārammaṇāti attho. Saññāmanasikārāti javanasaññā ca tadāvajjanamanasikāro ca, saññāsampayuttamanasikāropi vaṭṭati. Samudācarantīti pavattanti. Dhammoti paṭhamajjhānadhammo. Jhānā parihāyanto tīhi kāraṇehi parihāyati kilesasamudācārena vā asappāyakiriyāya vā ananuyogena vā. Kilesasamudācārena parihāyanto sīghaṃ parihāyati, kammārāmatābhassārāmatāniddārāmatāsaṅgaṇikārāmatānuyogavasena asappāyakiriyāya parihāyanto dandhaṃ parihāyati, gelaññapaccayavekallādinā palibodhena abhikkhaṇaṃ asamāpajjanto ananuyogena parihāyantopi dandhaṃ parihāyati. Idha pana balavakāraṇameva dassento kilesasamudācāramevāha. Dutiyajjhānādīhi pana parihāyanto heṭṭhimaheṭṭhimajjhānanikantisamudācārenapi parihāyati. Kittāvatā parihīno hotīti? Yadā na sakkoti samāpajjituṃ, ettāvatā parihīno hotīti. Tadanudhammatāti anupavatto dhammo anudhammo, jhānaṃ adhikaṃ katvā pavattassa nikantidhammassetaṃ adhivacanaṃ. Anudhammo eva anudhammatā, tassa jhānassa anudhammatā tadanudhammatā. Satīti nikanti. Santiṭṭhatīti patiṭṭhāti . Taṃ paṭhamajjhānaṃ anuvattamānā nikanti pavattatīti vuttaṃ hoti. Avitakkasahagatāti dutiyajjhānārammaṇā. Tañhi natthettha vitakkoti avitakkanti vuccati. Nibbidāsahagatāti vipassanārammaṇā. Sā hi saṅkhāresu nibbindanato nibbidāti vuccati. ‘‘Nibbindaṃ virajjatī’’ti (mahāva. 23; saṃ. ni. 3.61) hi vuttaṃ. Virāgūpasaṃhitāti ariyamaggapaṭisaññuttā vipassanā. Vipassanā hi sikhāppattā maggavuṭṭhānaṃ pāpeti. Tasmā vipassanārammaṇā saññāmanasikārā ‘‘virāgūpasaṃhitā’’ti vuccanti, ‘‘virāgā vimuccatī’’ti hi vuttaṃ.
вид̇аггасахаг̇ад̇аад̇и вид̇аггавасзна батамаж̇жхаанаарамман̣аа. убзгкаасукасахаг̇ад̇аад̇и д̇ад̇рамаж̇жхад̇д̇убзгкааяа жа сукавзд̣̇анааяа жа васзна д̇ад̇ияаж̇жхаанаарамман̣аа. бийд̇исукасахаг̇ад̇аад̇и бийд̇ияаа жа сукавзд̣̇анааяа жа васзна д̣̇уд̇ияаж̇жхаанаарамман̣аа. ад̣̇угкамасукасахаг̇ад̇аад̇и убзгкаавзд̣̇анаавасзна жад̇уд̇т̇аж̇жхаанаарамман̣аа. саа хи взд̣̇анаа на д̣̇угкаа на сукаад̇и ад̣̇угкамасукаад̇и вужжад̇и , ма-гааро банзд̇т̇а бад̣̇асанд̇хивасзна вуд̇д̇о. руубасахаг̇ад̇аад̇и руубаж̇жхаанаарамман̣аа. нзвасан̃н̃аанаасан̃н̃ааяад̇анз тид̇асса хаанабхааг̇ияатид̇ибхааг̇ияаниб̣б̣зд̇хабхааг̇ияад̇д̇зсу виж̇ж̇амаанзсуби висзсабхааг̇ияад̇д̇аабхааваа нзвасан̃н̃аанаасан̃н̃ааяад̇анам̣ на нид̣̇д̣̇идтам̣. саб̣б̣оби жзса логияо самаад̇хи бамаад̣̇авихаарисса муд̣̇инд̣̇рияасса хаанабхааг̇ияо ход̇и, аббамаад̣̇авихаарисса муд̣̇инд̣̇рияасса тид̇ибхааг̇ияо ход̇и, д̇ан̣хаажарид̇асса д̇игкинд̣̇рияасса висзсабхааг̇ияо ход̇и, д̣̇идтижарид̇асса д̇игкинд̣̇рияасса ниб̣б̣зд̇хабхааг̇ияо ход̇ийд̇и вужжад̇и.
Vitakkasahagatāti vitakkavasena paṭhamajjhānārammaṇā. Upekkhāsukhasahagatāti tatramajjhattupekkhāya ca sukhavedanāya ca vasena tatiyajjhānārammaṇā. Pītisukhasahagatāti pītiyā ca sukhavedanāya ca vasena dutiyajjhānārammaṇā. Adukkhamasukhasahagatāti upekkhāvedanāvasena catutthajjhānārammaṇā. Sā hi vedanā na dukkhā na sukhāti adukkhamasukhāti vuccati , ma-kāro panettha padasandhivasena vutto. Rūpasahagatāti rūpajjhānārammaṇā. Nevasaññānāsaññāyatane ṭhitassa hānabhāgiyaṭhitibhāgiyanibbedhabhāgiyattesu vijjamānesupi visesabhāgiyattābhāvā nevasaññānāsaññāyatanaṃ na niddiṭṭhaṃ. Sabbopi cesa lokiyo samādhi pamādavihārissa mudindriyassa hānabhāgiyo hoti, appamādavihārissa mudindriyassa ṭhitibhāgiyo hoti, taṇhācaritassa tikkhindriyassa visesabhāgiyo hoti, diṭṭhicaritassa tikkhindriyassa nibbedhabhāgiyo hotīti vuccati.
хаанабхааг̇ияажад̇угганид̣̇д̣̇зсаван̣н̣анаа нидтид̇аа.
Hānabhāgiyacatukkaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 1. суд̇амаяан̃аан̣анид̣̇д̣̇зсо • 1. Sutamayañāṇaniddeso
