| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๘. หรีตกทายกเตฺถรอปทานํ
8. Harītakadāyakattheraapadānaṃ
๖๐.
60.
‘‘หรีตกํ อามลกํ, อมฺพชมฺพุวิภีตกํ;
‘‘Harītakaṃ āmalakaṃ, ambajambuvibhītakaṃ;
โกลํ ภลฺลาตกํ พิลฺลํ, สยเมว หรามหํฯ
Kolaṃ bhallātakaṃ billaṃ, sayameva harāmahaṃ.
๖๑.
61.
‘‘ทิสฺวาน ปพฺภารคตํ, ฌายิํ ฌานรตํ มุนิํ;
‘‘Disvāna pabbhāragataṃ, jhāyiṃ jhānarataṃ muniṃ;
อาพาเธน อาปีเฬนฺตํ, อทุตียํ มหามุนิํฯ
Ābādhena āpīḷentaṃ, adutīyaṃ mahāmuniṃ.
๖๒.
62.
‘‘หรีตกํ คเหตฺวาน, สยมฺภุสฺส อทาสหํ;
‘‘Harītakaṃ gahetvāna, sayambhussa adāsahaṃ;
๖๓.
63.
‘‘ปหีนทรโถ พุโทฺธ, อนุโมทมกาสิ เม;
‘‘Pahīnadaratho buddho, anumodamakāsi me;
‘เภสชฺชทาเนนิมินา, พฺยาธิวูปสเมน จฯ
‘Bhesajjadāneniminā, byādhivūpasamena ca.
๖๔.
64.
‘‘‘เทวภูโต มนุโสฺส วา, ชาโต วา อญฺญชาติยา;
‘‘‘Devabhūto manusso vā, jāto vā aññajātiyā;
สพฺพตฺถ สุขิโต โหตุ, มา จ เต พฺยาธิมาคมา’ฯ
Sabbattha sukhito hotu, mā ca te byādhimāgamā’.
๖๕.
65.
‘‘อิทํ วตฺวาน สมฺพุโทฺธ, สยมฺภู อปราชิโต;
‘‘Idaṃ vatvāna sambuddho, sayambhū aparājito;
นภํ อพฺภุคฺคมี ธีโร, หํสราชาว อมฺพเรฯ
Nabhaṃ abbhuggamī dhīro, haṃsarājāva ambare.
๖๖.
66.
‘‘ยโต หรีตกํ ทินฺนํ, สยมฺภุสฺส มเหสิโน;
‘‘Yato harītakaṃ dinnaṃ, sayambhussa mahesino;
อิมํ ชาติํ อุปาทาย, พฺยาธิ เม นุปปชฺชถฯ
Imaṃ jātiṃ upādāya, byādhi me nupapajjatha.
๖๗.
67.
‘‘อยํ ปจฺฉิมโก มยฺหํ, จริโม วตฺตเต ภโว;
‘‘Ayaṃ pacchimako mayhaṃ, carimo vattate bhavo;
ติโสฺส วิชฺชา สจฺฉิกตา, กตํ พุทฺธสฺส สาสนํฯ
Tisso vijjā sacchikatā, kataṃ buddhassa sāsanaṃ.
๖๘.
68.
‘‘จตุนฺนวุติโต กเปฺป, เภสชฺชมททิํ ตทา;
‘‘Catunnavutito kappe, bhesajjamadadiṃ tadā;
ทุคฺคติํ นาภิชานามิ, เภสชฺชสฺส อิทํ ผลํฯ
Duggatiṃ nābhijānāmi, bhesajjassa idaṃ phalaṃ.
๖๙.
69.
‘‘กิเลสา ฌาปิตา มยฺหํ…เป.… วิหรามิ อนาสโวฯ
‘‘Kilesā jhāpitā mayhaṃ…pe… viharāmi anāsavo.
๗๐.
70.
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
‘‘Svāgataṃ vata me āsi…pe… kataṃ buddhassa sāsanaṃ.
๗๑.
71.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา หรีตกทายโก เถโร อิมา คาถาโย
Itthaṃ sudaṃ āyasmā harītakadāyako thero imā gāthāyo
อภาสิตฺถาติฯ
Abhāsitthāti.
หรีตกทายกเตฺถรสฺสาปทานํ อฎฺฐมํฯ
Harītakadāyakattherassāpadānaṃ aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā
