| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
3. හසධම්‌මසික්‌ඛාපදං
3. Hasadhammasikkhāpadaṃ
335. තතියෙ පකාරෙන කරීයති ඨපීයතීති පකතං පඤ්‌ඤත්‌තන්‌ති දස්‌සෙන්‌තො ආහ ‘‘යං භගවතා’’තිආදි. යන්‌ති සික්‌ඛාපදං.
335. Tatiye pakārena karīyati ṭhapīyatīti pakataṃ paññattanti dassento āha ‘‘yaṃ bhagavatā’’tiādi. Yanti sikkhāpadaṃ.
336. හසසඞ්‌ඛාතො ධම්‌මො සභාවො හසධම්‌මොති වුත්‌තෙ අත්‌ථතො කීළිකායෙවාති ආහ ‘‘කීළිකා වුච්‌චතී’’ති.
336. Hasasaṅkhāto dhammo sabhāvo hasadhammoti vutte atthato kīḷikāyevāti āha ‘‘kīḷikā vuccatī’’ti.
337. ගොප්‌ඵකානන්‌ති චරණගණ්‌ඨිකානං. තෙ හි පාදෙ පාදං ඨපනකාලෙ අඤ්‌ඤමඤ්‌ඤූපරි ඨපනතො ගොපීයන්‌තීති ගොප්‌ඵා, තෙ එව ගොප්‌ඵකාති වුච්‌චන්‌ති. පාදස්‌ස හි උපරි පාදං ඨපනකාලෙ එකස්‌ස උපරි එකො න ඨපෙතබ්‌බො. තෙනාහ භගවා ‘‘පාදෙ පාදං අච්‌චාධායා’’ති (දී. නි. 2.196; ම. නි. 1.423; අ. නි. 3.16). ඔට්‌ඨජො දුතියො. ඔරොහන්‌තස්‌ස භික්‌ඛුනොති සම්‌බන්‌ධො.
337.Gopphakānanti caraṇagaṇṭhikānaṃ. Te hi pāde pādaṃ ṭhapanakāle aññamaññūpari ṭhapanato gopīyantīti gopphā, te eva gopphakāti vuccanti. Pādassa hi upari pādaṃ ṭhapanakāle ekassa upari eko na ṭhapetabbo. Tenāha bhagavā ‘‘pāde pādaṃ accādhāyā’’ti (dī. ni. 2.196; ma. ni. 1.423; a. ni. 3.16). Oṭṭhajo dutiyo. Orohantassa bhikkhunoti sambandho.
338. ඵියාරිත්‌තාදීහීති ආදිසද්‌දෙන ලඞ්‌කාරාදයො සඞ්‌ගණ්‌හාති. කෙචි වදන්‌තීති සම්‌බන්‌ධො. පතනුප්‌පතනවාරෙසූති පතනවාර උප්‌පතනවාරෙසු. තත්‌ථාති තස්‌සං ඛිත්‌තකථලායං. හීති සච්‌චං , යස්‌මා වා. ඨපෙත්‌වා කීළන්‌තස්‌සාති සම්‌බන්‌ධො. ලිඛිතුං වට්‌ටති කීළාධිප්‌පායස්‌ස විරහිතත්‌තාති අධිප්‌පායො. කීළාධිප්‌පායෙන අත්‌ථජොතකං අක්‌ඛරං ලිඛන්‌තස්‌සාපි ආපත්‌තියෙවාති වදන්‌ති. එත්‌ථාති ඉමස්‌මිං සික්‌ඛාපදෙති. තතියං.
338.Phiyārittādīhīti ādisaddena laṅkārādayo saṅgaṇhāti. Keci vadantīti sambandho. Patanuppatanavāresūti patanavāra uppatanavāresu. Tatthāti tassaṃ khittakathalāyaṃ. Hīti saccaṃ , yasmā vā. Ṭhapetvā kīḷantassāti sambandho. Likhituṃ vaṭṭati kīḷādhippāyassa virahitattāti adhippāyo. Kīḷādhippāyena atthajotakaṃ akkharaṃ likhantassāpi āpattiyevāti vadanti. Etthāti imasmiṃ sikkhāpadeti. Tatiyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
