| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā |
೩. ಹಸಧಮ್ಮಸಿಕ್ಖಾಪದವಣ್ಣನಾ
3. Hasadhammasikkhāpadavaṇṇanā
೩೩೫. ತತಿಯೇ – ಅಪ್ಪಕತಞ್ಞುನೋತಿ ಯಂ ಭಗವತಾ ಪಕತಂ ಪಞ್ಞತ್ತಂ, ತಂ ನ ಜಾನನ್ತೀತಿ ಅತ್ಥೋ।
335. Tatiye – appakataññunoti yaṃ bhagavatā pakataṃ paññattaṃ, taṃ na jānantīti attho.
೩೩೬. ಉದಕೇ ಹಸಧಮ್ಮೇತಿ ಉದಕಕೀಳಿಕಾ ವುಚ್ಚತಿ। ಉಪರಿಗೋಪ್ಫಕೇತಿ ಗೋಪ್ಫಕಾನಂ ಉಪರಿಭಾಗಪ್ಪಮಾಣೇ। ಹಸಾಧಿಪ್ಪಾಯೋತಿ ಕೀಳಾಧಿಪ್ಪಾಯೋ। ನಿಮುಜ್ಜತಿ ವಾತಿಆದೀಸು ನಿಮುಜ್ಜನತ್ಥಾಯ ಓರೋಹನ್ತಸ್ಸ ಪದವಾರೇ ಪದವಾರೇ ದುಕ್ಕಟಂ। ನಿಮುಜ್ಜನುಮ್ಮುಜ್ಜನೇಸು ಪಯೋಗೇ ಪಯೋಗೇ ಪಾಚಿತ್ತಿಯಂ। ನಿಮುಜ್ಜಿತ್ವಾ ಅನ್ತೋಉದಕೇಯೇವ ಗಚ್ಛನ್ತಸ್ಸ ಹತ್ಥವಾರಪದವಾರೇಸು ಸಬ್ಬತ್ಥ ಪಾಚಿತ್ತಿಯಂ। ಪಲವತೀತಿ ತರತಿ। ಹತ್ಥೇಹಿ ತರನ್ತಸ್ಸ ಹತ್ಥವಾರೇ ಹತ್ಥವಾರೇ ಪಾಚಿತ್ತಿಯಂ। ಪಾದೇಸುಪಿ ಏಸೇವ ನಯೋ। ಯೇನ ಯೇನ ಅಙ್ಗೇನ ತರತಿ, ತಸ್ಸ ತಸ್ಸ ಪಯೋಗೇ ಪಯೋಗೇ ಪಾಚಿತ್ತಿಯಂ। ತೀರತೋ ವಾ ರುಕ್ಖತೋ ವಾ ಉದಕೇ ಪತತಿ, ಪಾಚಿತ್ತಿಯಮೇವ। ನಾವಾಯ ಕೀಳತೀತಿ ಫಿಯಾರಿತ್ತಾದೀಹಿ ನಾವಂ ಪಾಜೇನ್ತೋ ವಾ ತೀರೇ ಉಸ್ಸಾರೇನ್ತೋ ವಾ ನಾವಾಯ ಕೀಳತಿ, ದುಕ್ಕಟಂ।
336.Udake hasadhammeti udakakīḷikā vuccati. Uparigopphaketi gopphakānaṃ uparibhāgappamāṇe. Hasādhippāyoti kīḷādhippāyo. Nimujjati vātiādīsu nimujjanatthāya orohantassa padavāre padavāre dukkaṭaṃ. Nimujjanummujjanesu payoge payoge pācittiyaṃ. Nimujjitvā antoudakeyeva gacchantassa hatthavārapadavāresu sabbattha pācittiyaṃ. Palavatīti tarati. Hatthehi tarantassa hatthavāre hatthavāre pācittiyaṃ. Pādesupi eseva nayo. Yena yena aṅgena tarati, tassa tassa payoge payoge pācittiyaṃ. Tīrato vā rukkhato vā udake patati, pācittiyameva. Nāvāya kīḷatīti phiyārittādīhi nāvaṃ pājento vā tīre ussārento vā nāvāya kīḷati, dukkaṭaṃ.
ಹತ್ಥೇನ ವಾತಿಆದೀಸುಪಿ ಪಯೋಗೇ ಪಯೋಗೇ ದುಕ್ಕಟಂ। ಕೇಚಿ ಹತ್ಥೇನ ಉದಕೇ ಖಿತ್ತಾಯ ಕಥಲಾಯ ಪತನುಪ್ಪತನವಾರೇಸು ದುಕ್ಕಟಂ ವದನ್ತಿ, ತಂ ನ ಗಹೇತಬ್ಬಂ। ತತ್ಥ ಹಿ ಏಕಪಯೋಗತ್ತಾ ಏಕಮೇವ ದುಕ್ಕಟಂ, ಅಪಿಚ ಉಪರಿಗೋಪ್ಫಕೇ ವುತ್ತಾನಿ ಉಮ್ಮುಜ್ಜನಾದೀನಿ ಠಪೇತ್ವಾ ಅಞ್ಞೇನ ಯೇನ ಕೇನಚಿ ಆಕಾರೇನ ಉದಕಂ ಓತರಿತ್ವಾ ವಾ ಅನೋತರಿತ್ವಾ ವಾ ಯತ್ಥ ಕತ್ಥಚಿ ಠಿತಂ ಉದಕಂ ಅನ್ತಮಸೋ ಬಿನ್ದುಂ ಗಹೇತ್ವಾ ಖಿಪನಕೀಳಾಯಪಿ ಕೀಳನ್ತಸ್ಸ ದುಕ್ಕಟಮೇವ, ಅತ್ಥಜೋತಕಂ ಪನ ಅಕ್ಖರಂ ಲಿಖಿತುಂ ವಟ್ಟತಿ, ಅಯಮೇತ್ಥ ವಿನಿಚ್ಛಯೋ। ಸೇಸಮೇತ್ಥ ಉತ್ತಾನಮೇವ।
Hatthena vātiādīsupi payoge payoge dukkaṭaṃ. Keci hatthena udake khittāya kathalāya patanuppatanavāresu dukkaṭaṃ vadanti, taṃ na gahetabbaṃ. Tattha hi ekapayogattā ekameva dukkaṭaṃ, apica uparigopphake vuttāni ummujjanādīni ṭhapetvā aññena yena kenaci ākārena udakaṃ otaritvā vā anotaritvā vā yattha katthaci ṭhitaṃ udakaṃ antamaso binduṃ gahetvā khipanakīḷāyapi kīḷantassa dukkaṭameva, atthajotakaṃ pana akkharaṃ likhituṃ vaṭṭati, ayamettha vinicchayo. Sesamettha uttānameva.
ಪಠಮಪಾರಾಜಿಕಸಮುಟ್ಠಾನಂ – ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ಅಕುಸಲಚಿತ್ತಂ, ತಿವೇದನನ್ತಿ।
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, tivedananti.
ಹಸಧಮ್ಮಸಿಕ್ಖಾಪದಂ ತತಿಯಂ।
Hasadhammasikkhāpadaṃ tatiyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೬. ಸುರಾಪಾನವಗ್ಗೋ • 6. Surāpānavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೩. ಹಸಧಮ್ಮಸಿಕ್ಖಾಪದವಣ್ಣನಾ • 3. Hasadhammasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೩. ಹಸಧಮ್ಮಸಿಕ್ಖಾಪದವಣ್ಣನಾ • 3. Hasadhammasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೩. ಹಸಧಮ್ಮಸಿಕ್ಖಾಪದಂ • 3. Hasadhammasikkhāpadaṃ
