| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
3. හසධම්‌මසික්‌ඛාපදවණ්‌ණනා
3. Hasadhammasikkhāpadavaṇṇanā
335. තතියෙ – අප්‌පකතඤ්‌ඤුනොති යං භගවතා පකතං පඤ්‌ඤත්‌තං, තං න ජානන්‌තීති අත්‌ථො.
335. Tatiye – appakataññunoti yaṃ bhagavatā pakataṃ paññattaṃ, taṃ na jānantīti attho.
336. උදකෙ හසධම්‌මෙති උදකකීළිකා වුච්‌චති. උපරිගොප්‌ඵකෙති ගොප්‌ඵකානං උපරිභාගප්‌පමාණෙ. හසාධිප්‌පායොති කීළාධිප්‌පායො. නිමුජ්‌ජති වාතිආදීසු නිමුජ්‌ජනත්‌ථාය ඔරොහන්‌තස්‌ස පදවාරෙ පදවාරෙ දුක්‌කටං. නිමුජ්‌ජනුම්‌මුජ්‌ජනෙසු පයොගෙ පයොගෙ පාචිත්‌තියං. නිමුජ්‌ජිත්‌වා අන්‌තොඋදකෙයෙව ගච්‌ඡන්‌තස්‌ස හත්‌ථවාරපදවාරෙසු සබ්‌බත්‌ථ පාචිත්‌තියං. පලවතීති තරති. හත්‌ථෙහි තරන්‌තස්‌ස හත්‌ථවාරෙ හත්‌ථවාරෙ පාචිත්‌තියං. පාදෙසුපි එසෙව නයො. යෙන යෙන අඞ්‌ගෙන තරති, තස්‌ස තස්‌ස පයොගෙ පයොගෙ පාචිත්‌තියං. තීරතො වා රුක්‌ඛතො වා උදකෙ පතති, පාචිත්‌තියමෙව. නාවාය කීළතීති ඵියාරිත්‌තාදීහි නාවං පාජෙන්‌තො වා තීරෙ උස්‌සාරෙන්‌තො වා නාවාය කීළති, දුක්‌කටං.
336.Udake hasadhammeti udakakīḷikā vuccati. Uparigopphaketi gopphakānaṃ uparibhāgappamāṇe. Hasādhippāyoti kīḷādhippāyo. Nimujjati vātiādīsu nimujjanatthāya orohantassa padavāre padavāre dukkaṭaṃ. Nimujjanummujjanesu payoge payoge pācittiyaṃ. Nimujjitvā antoudakeyeva gacchantassa hatthavārapadavāresu sabbattha pācittiyaṃ. Palavatīti tarati. Hatthehi tarantassa hatthavāre hatthavāre pācittiyaṃ. Pādesupi eseva nayo. Yena yena aṅgena tarati, tassa tassa payoge payoge pācittiyaṃ. Tīrato vā rukkhato vā udake patati, pācittiyameva. Nāvāya kīḷatīti phiyārittādīhi nāvaṃ pājento vā tīre ussārento vā nāvāya kīḷati, dukkaṭaṃ.
හත්‌ථෙන වාතිආදීසුපි පයොගෙ පයොගෙ දුක්‌කටං. කෙචි හත්‌ථෙන උදකෙ ඛිත්‌තාය කථලාය පතනුප්‌පතනවාරෙසු දුක්‌කටං වදන්‌ති, තං න ගහෙතබ්‌බං. තත්‌ථ හි එකපයොගත්‌තා එකමෙව දුක්‌කටං, අපිච උපරිගොප්‌ඵකෙ වුත්‌තානි උම්‌මුජ්‌ජනාදීනි ඨපෙත්‌වා අඤ්‌ඤෙන යෙන කෙනචි ආකාරෙන උදකං ඔතරිත්‌වා වා අනොතරිත්‌වා වා යත්‌ථ කත්‌ථචි ඨිතං උදකං අන්‌තමසො බින්‌දුං ගහෙත්‌වා ඛිපනකීළායපි කීළන්‌තස්‌ස දුක්‌කටමෙව, අත්‌ථජොතකං පන අක්‌ඛරං ලිඛිතුං වට්‌ටති, අයමෙත්‌ථ විනිච්‌ඡයො. සෙසමෙත්‌ථ උත්‌තානමෙව.
Hatthena vātiādīsupi payoge payoge dukkaṭaṃ. Keci hatthena udake khittāya kathalāya patanuppatanavāresu dukkaṭaṃ vadanti, taṃ na gahetabbaṃ. Tattha hi ekapayogattā ekameva dukkaṭaṃ, apica uparigopphake vuttāni ummujjanādīni ṭhapetvā aññena yena kenaci ākārena udakaṃ otaritvā vā anotaritvā vā yattha katthaci ṭhitaṃ udakaṃ antamaso binduṃ gahetvā khipanakīḷāyapi kīḷantassa dukkaṭameva, atthajotakaṃ pana akkharaṃ likhituṃ vaṭṭati, ayamettha vinicchayo. Sesamettha uttānameva.
පඨමපාරාජිකසමුට්‌ඨානං – කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, අකුසලචිත්‌තං, තිවෙදනන්‌ති.
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, tivedananti.
හසධම්‌මසික්‌ඛාපදං තතියං.
Hasadhammasikkhāpadaṃ tatiyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. හසධම්‌මසික්‌ඛාපදවණ්‌ණනා • 3. Hasadhammasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. හසධම්‌මසික්‌ඛාපදං • 3. Hasadhammasikkhāpadaṃ
