| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৫৭. হত্থচ্ছিন্নাদিৰত্থুকথা
57. Hatthacchinnādivatthukathā
১১৯. হত্থচ্ছিন্নাদিৰত্থূসু হত্থা ছিন্না যস্সাতি হত্থচ্ছিন্নোতিআদিৰচনত্থং দস্সেন্তো আহ ‘‘যস্সা’’তিআদি। মণিবন্ধেতি পকোট্ঠন্তে। সো হি যস্মা এত্থ মণিসঙ্খাতং অলঙ্কারৰিকতিং বন্ধতি, তস্মা মণিবন্ধোতি ৰুচ্চতি। কপ্পরেতি কপোণিযং। সা হি পরেসং পিট্ঠীসু কপতি হিংসতি অনেনাতি ‘‘কপ্পরো’’তি ৰুচ্চতি। যস্স হত্থা ছিন্না হোন্তি, অযং হত্থচ্ছিন্নো নামাতি যোজনা। এসেৰ নযো সেসেসুপি। একো ৰা পাদোতি যোজনা। হেট্ঠা ‘‘একো ৰা দ্ৰে ৰা হত্থা’’তি এত্থাপি এসেৰ নযো। চতূসু হত্থপাদেসু দ্ৰে ৰাতি একো হত্থো, একো পাদোতি দ্ৰে ৰা। কণ্ণাতি সদ্দগ্গহা। তে হি কণ্ণতি সৰতি এতেহীতি কণ্ণাতি ৰুচ্চন্তি। কণ্ণাবদ্ধেতি কণ্ণচ্ছিদ্দস্স আবদ্ধে। সঙ্ঘাটেতুন্তি সঙ্ঘটনং কাতুং, আবন্ধনং কাতুন্তি অত্থো। অজপদকেতি অজপদসণ্ঠানে ঠানে। নাসাতি ঘানানি। তানি হি নাসতি অব্যত্তসদ্দং করোতি এতাহীতি নাসাতি ৰুচ্চন্তি। নাসিকাতি নাসাযেৰ। সণ্ঠাপেতুন্তি সুট্ঠু ঠপেতুং, পকতিযা ঠপেতুন্তি অত্থো। নখসেসন্তি নখোযেৰ সেসো ছিন্নঙ্গুলিতোতি নখসেসো, তং। অগ্গে পুরে উট্ঠহতীতি অঙ্গুট্ঠো। ‘‘ৰুত্তনযেনেৰা’’তি ইমিনা ‘‘নখসেসং অদস্সেত্ৰা’’তি ৰচনং অতিদিসতি। কণ্ডরনামকাতি মহাসিরনামকা। তে হি কং সরীরং ধারেন্তীতি কণ্ডরাতি ৰুচ্চন্তি ধকারস্স ডকারং কত্ৰা। যেসূতি কণ্ডরেসু, নিদ্ধারণে ভুম্মং।
119. Hatthacchinnādivatthūsu hatthā chinnā yassāti hatthacchinnotiādivacanatthaṃ dassento āha ‘‘yassā’’tiādi. Maṇibandheti pakoṭṭhante. So hi yasmā ettha maṇisaṅkhātaṃ alaṅkāravikatiṃ bandhati, tasmā maṇibandhoti vuccati. Kappareti kapoṇiyaṃ. Sā hi paresaṃ piṭṭhīsu kapati hiṃsati anenāti ‘‘kapparo’’ti vuccati. Yassa hatthā chinnā honti, ayaṃ hatthacchinno nāmāti yojanā. Eseva nayo sesesupi. Eko vā pādoti yojanā. Heṭṭhā ‘‘eko vā dve vā hatthā’’ti etthāpi eseva nayo. Catūsu hatthapādesu dve vāti eko hattho, eko pādoti dve vā. Kaṇṇāti saddaggahā. Te hi kaṇṇati savati etehīti kaṇṇāti vuccanti. Kaṇṇābaddheti kaṇṇacchiddassa ābaddhe. Saṅghāṭetunti saṅghaṭanaṃ kātuṃ, ābandhanaṃ kātunti attho. Ajapadaketi ajapadasaṇṭhāne ṭhāne. Nāsāti ghānāni. Tāni hi nāsati abyattasaddaṃ karoti etāhīti nāsāti vuccanti. Nāsikāti nāsāyeva. Saṇṭhāpetunti suṭṭhu ṭhapetuṃ, pakatiyā ṭhapetunti attho. Nakhasesanti nakhoyeva seso chinnaṅgulitoti nakhaseso, taṃ. Agge pure uṭṭhahatīti aṅguṭṭho. ‘‘Vuttanayenevā’’ti iminā ‘‘nakhasesaṃ adassetvā’’ti vacanaṃ atidisati. Kaṇḍaranāmakāti mahāsiranāmakā. Te hi kaṃ sarīraṃ dhārentīti kaṇḍarāti vuccanti dhakārassa ḍakāraṃ katvā. Yesūti kaṇḍaresu, niddhāraṇe bhummaṃ.
যস্স ৰগ্গুলিপক্খকা ৰিয অঙ্গুলিযো সম্বন্ধো হোন্তি, অযং ফণহত্থকো নামাতি যোজনা। এতন্তি ফণহত্থকং। ছল়ঙ্গুলাদযোপি ফণহত্থকেযেৰ সঙ্গহেতব্বাতি আহ ‘‘যস্সপি ছ অঙ্গুলিযো’’তিআদি। যস্সপি ছ অঙ্গুলিযো হোন্তি, অযম্পি ফণহত্থকো নাম উপচারেন।
Yassa vaggulipakkhakā viya aṅguliyo sambandho honti, ayaṃ phaṇahatthako nāmāti yojanā. Etanti phaṇahatthakaṃ. Chaḷaṅgulādayopi phaṇahatthakeyeva saṅgahetabbāti āha ‘‘yassapi cha aṅguliyo’’tiādi. Yassapi cha aṅguliyo honti, ayampi phaṇahatthako nāma upacārena.
খুজ্জোতি এত্থ খুজ্জো সরীরো যস্সত্থীতি খুজ্জোতি ৰচনত্থং দস্সেন্তো আহ ‘‘খুজ্জসরীরো’’তি। কস্মা খুজ্জোতি আহ ‘‘উরস্স ৰা’’তিআদি। যস্স পন ৰঙ্কং, অযম্পি খুজ্জো নামাতি যোজনা। ৰঙ্কন্তি চ কুটিলং। হীতি সচ্চং, যস্মা ৰা। ব্রহ্মুজুগত্তোতি উজুং গত্তং উজুগত্তং, ব্রহ্মুনো উজুগত্তং ৰিয উজুগত্তং ইমস্স মহাপুরিসস্সাতি ব্রহ্মুজুগত্তো, মহাপুরিসো।
Khujjoti ettha khujjo sarīro yassatthīti khujjoti vacanatthaṃ dassento āha ‘‘khujjasarīro’’ti. Kasmā khujjoti āha ‘‘urassa vā’’tiādi. Yassa pana vaṅkaṃ, ayampi khujjo nāmāti yojanā. Vaṅkanti ca kuṭilaṃ. Hīti saccaṃ, yasmā vā. Brahmujugattoti ujuṃ gattaṃ ujugattaṃ, brahmuno ujugattaṃ viya ujugattaṃ imassa mahāpurisassāti brahmujugatto, mahāpuriso.
সংখেপেন ৰুত্তমত্থং ৰিত্থারেন দস্সেন্তো আহ ‘‘জঙ্ঘৰামনস্স হী’’তিআদি। যেসন্তি উভিন্নং কাযানং। ভূতানন্তি অমনুস্সানং পিসাচকপেতানং। অত্তভাৰো হোতি ৰিযাতি যোজনা। পরিৰটুমোতি পরিসমন্ততো ৰট্টুলসরীরো।
Saṃkhepena vuttamatthaṃ vitthārena dassento āha ‘‘jaṅghavāmanassa hī’’tiādi. Yesanti ubhinnaṃ kāyānaṃ. Bhūtānanti amanussānaṃ pisācakapetānaṃ. Attabhāvo hoti viyāti yojanā. Parivaṭumoti parisamantato vaṭṭulasarīro.
গলগণ্ডীতি এত্থ গলে গণ্ডো যস্সত্থীতি গলগণ্ডীতি ৰচনত্থং দস্সেন্তো আহ ‘‘যস্সা’’তিআদি। এতন্তি ‘‘গলগণ্ডী’’তি এতং ৰচনং। তত্থাতি গলগণ্ডিপব্বাজনে। যন্তি ৰচনং।
Galagaṇḍīti ettha gale gaṇḍo yassatthīti galagaṇḍīti vacanatthaṃ dassento āha ‘‘yassā’’tiādi. Etanti ‘‘galagaṇḍī’’ti etaṃ vacanaṃ. Tatthāti galagaṇḍipabbājane. Yanti vacanaṃ.
সিপদীতি এত্থ সিথিলং পদং ইমস্সাতি সিপদীতি ৰুত্তে ভারপাদোযেৰ গহেতব্বোতি আহ ‘‘ভারপাদো ৰুচ্চতী’’তি। ভারং পাদং যস্সাতি ভারপাদো। এতে দ্ৰে থূলপাদরোগীসু ৰত্তন্তীতি দট্ঠব্বং। সঞ্জাতপিল়কোতি সঞ্জাতফোটো। উপনাহন্তি ভুসং বন্ধনং। উদকআৰাটেতি উদকেন পুণ্ণাযং কাসুযং। উদকৰালিকাযাতি উদকতিন্তেন মরুনা। যথা সিরা পঞ্ঞাযন্তি, এৰং মিলাপেতুন্তি যোজনা। ঈদিসন্তি সিরাপঞ্ঞাযনজঙ্ঘতেলনাল়িকসভাৰং। তথাতি যথা পব্বজ্জাকালে করোতি, তথা কত্ৰাতি অত্থো।
Sipadīti ettha sithilaṃ padaṃ imassāti sipadīti vutte bhārapādoyeva gahetabboti āha ‘‘bhārapādo vuccatī’’ti. Bhāraṃ pādaṃ yassāti bhārapādo. Ete dve thūlapādarogīsu vattantīti daṭṭhabbaṃ. Sañjātapiḷakoti sañjātaphoṭo. Upanāhanti bhusaṃ bandhanaṃ. Udakaāvāṭeti udakena puṇṇāyaṃ kāsuyaṃ. Udakavālikāyāti udakatintena marunā. Yathā sirā paññāyanti, evaṃ milāpetunti yojanā. Īdisanti sirāpaññāyanajaṅghatelanāḷikasabhāvaṃ. Tathāti yathā pabbajjākāle karoti, tathā katvāti attho.
পাপরোগীতি এত্থ পাপরোগস্স সরূপং দস্সেন্তো আহ ‘‘অরিস’’ইতিআদি। তত্থ অরিসো চ ভগন্দরো চ পিত্তঞ্চ সেম্হো চ কাসো চ সোসো চাতি দ্ৰন্দো, তে আদযো যেসং তেতি অরিস…পে॰… সোসাদযো। আদিসদ্দেন হেট্ঠা ৰুত্তে আবাধে সঙ্গণ্হাতি। তত্থ পিত্তসেম্হসদ্দেহি তংসমুট্ঠানো রোগো গহেতব্বো। ‘‘নিচ্চাতুরো’’তি ইমিনা পাপরোগীতি এত্থ মন্তুত্থে পৰত্তস্স ঈপচ্চযস্স নিচ্চযোগত্থং দস্সেতি।
Pāparogīti ettha pāparogassa sarūpaṃ dassento āha ‘‘arisa’’itiādi. Tattha ariso ca bhagandaro ca pittañca semho ca kāso ca soso cāti dvando, te ādayo yesaṃ teti arisa…pe… sosādayo. Ādisaddena heṭṭhā vutte ābādhe saṅgaṇhāti. Tattha pittasemhasaddehi taṃsamuṭṭhāno rogo gahetabbo. ‘‘Niccāturo’’ti iminā pāparogīti ettha mantutthe pavattassa īpaccayassa niccayogatthaṃ dasseti.
পরিসদূসনোতি এত্থ ইতিসদ্দো নামপরিযাযো, পরিসদূসনো নামাতি হি অত্থো। যো অত্তনো ৰিরূপতায পরিসং দূসেতি, অযং পরিসদূসনো নামাতি যোজনা। ছসরীরদোসং আদিং কত্ৰা পরিসদূসনভাৰং ৰিত্থারেন্তো আহ ‘‘অতিদীঘো ৰা’’তিআদি। অতিদীঘো ৰাতি এত্থ ন কেৰলং পরেসং দ্ৰঙ্গুলাদিমত্তদীঘো, অথ খো দিগুণাদিদীঘোৰাধিপ্পেতোতি আহ ‘‘অঞ্ঞেস’’ন্তিআদি। নাভিপদেসোতি অত্তনো নাভিপদেসো। যথা হি অতিদীঘে পরৰচনেন অতিদীঘস্স সরূপং ৰেদিতব্বং, তথা অতিরস্সাদীসুপি অতিরস্সসরূপন্তি দট্ঠব্বং। মহোদরোতি মহাউদরো। কপ্পসীসো ৰাতি হত্থিসীসো ৰিয যুগসীসো ৰা। কপ্পসদ্দো হেত্থ যুগত্থৰাচকো। কণ্ণিককেসো ৰাতি কণ্ণিকসদিসেহি কেসেহি সমন্নাগতো। ‘‘জাতিপলিতেহী’’তি ইমিনা জরাৰাতেন পহতং পলিতং নিৰত্তেতি। পকতিতম্বকেসোতি এত্থ পকতিসদ্দেন কেনচি পযোগেন তম্বকেসং নিৰত্তেতি। আৰট্টসীসোতি পুনপ্পুনং ৰট্টতীতি আৰট্টো, কেসাৰট্টো, সো এতস্স সীসে অত্থীতি আৰট্টসীসো। উদ্ধগ্গেহীতি উদ্ধং কোটীহি। জালবদ্ধেন ৰিযাতি জালেন বদ্ধেন ইৰ।
Parisadūsanoti ettha itisaddo nāmapariyāyo, parisadūsano nāmāti hi attho. Yo attano virūpatāya parisaṃ dūseti, ayaṃ parisadūsano nāmāti yojanā. Chasarīradosaṃ ādiṃ katvā parisadūsanabhāvaṃ vitthārento āha ‘‘atidīgho vā’’tiādi. Atidīgho vāti ettha na kevalaṃ paresaṃ dvaṅgulādimattadīgho, atha kho diguṇādidīghovādhippetoti āha ‘‘aññesa’’ntiādi. Nābhipadesoti attano nābhipadeso. Yathā hi atidīghe paravacanena atidīghassa sarūpaṃ veditabbaṃ, tathā atirassādīsupi atirassasarūpanti daṭṭhabbaṃ. Mahodaroti mahāudaro. Kappasīso vāti hatthisīso viya yugasīso vā. Kappasaddo hettha yugatthavācako. Kaṇṇikakeso vāti kaṇṇikasadisehi kesehi samannāgato. ‘‘Jātipalitehī’’ti iminā jarāvātena pahataṃ palitaṃ nivatteti. Pakatitambakesoti ettha pakatisaddena kenaci payogena tambakesaṃ nivatteti. Āvaṭṭasīsoti punappunaṃ vaṭṭatīti āvaṭṭo, kesāvaṭṭo, so etassa sīse atthīti āvaṭṭasīso. Uddhaggehīti uddhaṃ koṭīhi. Jālabaddhena viyāti jālena baddhena iva.
সম্বদ্ধভমুকো ৰাতি অঞ্ঞমঞ্ঞসম্বদ্ধভমুকো ৰা। মক্কটভমুকোতি মক্কটস্স ভমু ৰিয ভমু এতস্সাতি মক্কটভমুকো। ৰাসিকোণেনাতি তচ্ছনীকোটিযা। ৰিসমচক্কলোতি এত্থ চক্কাকারেন লাতি পৰত্ততি, চক্কাকারং ৰা লাতি গণ্হাতীতি চক্কলো। কেকরোতি ৰলিরো। সো হি কুচ্ছিতং করোতীতি কেকরোতি ৰুচ্চতি। কক্কটস্সেৰাতি কক্কটস্স ইৰ। মূসিককণ্ণোতি আখুকণ্ণো। জটুককণ্ণোতি ৰগ্গুলিকণ্ণো। অৰিদ্ধকণ্ণোতি অচ্ছিদ্দকণ্ণো। হীতি সচ্চং, যস্মা ৰা। সোতি অৰিদ্ধকণ্ণো। কণ্ণে ভগন্দরো এতস্সাতি কণ্ণভগন্দরো, সোযেৰ কণ্ণভগন্দরিকো। গণ্ডো কণ্ণে এতস্সাতি গণ্ডকণ্ণো। পগ্ঘরিতপুব্বেনাতি পগ্ঘরিতপূযেন। টঙ্কিতো কণ্ণো যস্সাতি টঙ্কিতকণ্ণো। গোভত্তনাল়িকাযাতি গুন্নং ভত্তপানত্থং কতায নাল়িকায। বিল়ারক্খি ৰিয অতিপিঙ্গলং অক্খি এতস্সাতি অতিপিঙ্গলক্খি। মধুৰণ্ণো ৰিয পিঙ্গলং অক্খি এতস্সাতি মধুপিঙ্গলক্খি। নিপ্পখুমক্খীতি এত্থ পখুমং ৰুচ্চতি অক্খম্হি জাতং লোমং। তঞ্হি অক্খিনো পক্খদ্ৰযে জাতত্তা পখুমন্তি ৰুচ্চতি। নত্থি পখুমং অক্খিম্হি এতস্সাতি নিপ্পখুমক্খি। অস্সুপগ্ঘরণং অক্খিম্হা এতস্সাতি অস্সুপগ্ঘরণক্খি। পুপ্ফং সঞ্জাতং যস্স অক্খিনোতি পুপ্ফিতং। পুপ্ফিতং অক্খি যস্সাতি পুপ্ফিতক্খি। অক্খিপাকেনাতি অক্খিনো দলপরিযন্তেসু পচ্চনকেন রোগেন।
Sambaddhabhamuko vāti aññamaññasambaddhabhamuko vā. Makkaṭabhamukoti makkaṭassa bhamu viya bhamu etassāti makkaṭabhamuko. Vāsikoṇenāti tacchanīkoṭiyā. Visamacakkaloti ettha cakkākārena lāti pavattati, cakkākāraṃ vā lāti gaṇhātīti cakkalo. Kekaroti valiro. So hi kucchitaṃ karotīti kekaroti vuccati. Kakkaṭassevāti kakkaṭassa iva. Mūsikakaṇṇoti ākhukaṇṇo. Jaṭukakaṇṇoti vaggulikaṇṇo. Aviddhakaṇṇoti acchiddakaṇṇo. Hīti saccaṃ, yasmā vā. Soti aviddhakaṇṇo. Kaṇṇe bhagandaro etassāti kaṇṇabhagandaro, soyeva kaṇṇabhagandariko. Gaṇḍo kaṇṇe etassāti gaṇḍakaṇṇo. Paggharitapubbenāti paggharitapūyena. Ṭaṅkito kaṇṇo yassāti ṭaṅkitakaṇṇo. Gobhattanāḷikāyāti gunnaṃ bhattapānatthaṃ katāya nāḷikāya. Biḷārakkhi viya atipiṅgalaṃ akkhi etassāti atipiṅgalakkhi. Madhuvaṇṇo viya piṅgalaṃ akkhi etassāti madhupiṅgalakkhi. Nippakhumakkhīti ettha pakhumaṃ vuccati akkhamhi jātaṃ lomaṃ. Tañhi akkhino pakkhadvaye jātattā pakhumanti vuccati. Natthi pakhumaṃ akkhimhi etassāti nippakhumakkhi. Assupaggharaṇaṃ akkhimhā etassāti assupaggharaṇakkhi. Pupphaṃ sañjātaṃ yassa akkhinoti pupphitaṃ. Pupphitaṃ akkhi yassāti pupphitakkhi. Akkhipākenāti akkhino dalapariyantesu paccanakena rogena.
চিপিটনাসিকোতি অনুন্নতনাসিকো। সুকতুণ্ডসদিসাযাতি সুৰানং মুখেন সদিসায।
Cipiṭanāsikoti anunnatanāsiko. Sukatuṇḍasadisāyāti suvānaṃ mukhena sadisāya.
পটঙ্গমণ্ডূকস্সেৰাতি পটঙ্গনামকস্স মণ্ডূকস্স মুখনিমিত্তং ইৰ মুখনিমিত্তংযেৰাতি যোজনা। উক্খলিমুখৰট্টিসদিসেহীতি উক্খলিযা মুখৰট্টিনা সদিসেহি। ভেরিচম্মসদিসেহীতি ভেরিযা মুখে নহিতচম্মেন সদিসেহি। এল়মুখোতি এল়ায নিচ্চপগ্ঘরিতং মুখমেতস্সেতি এল়মুখো। উপ্পক্কমুখোতি উপ্পক্কং কুথিকং মুখমেতস্সাতি উপ্পক্কমুখো। সঙ্খতুণ্ডকোতি সঙ্খস্স তুণ্ডেন সদিসো ওট্ঠো এতস্সাতি সঙ্খতুণ্ডকো।
Paṭaṅgamaṇḍūkassevāti paṭaṅganāmakassa maṇḍūkassa mukhanimittaṃ iva mukhanimittaṃyevāti yojanā. Ukkhalimukhavaṭṭisadisehīti ukkhaliyā mukhavaṭṭinā sadisehi. Bhericammasadisehīti bheriyā mukhe nahitacammena sadisehi. Eḷamukhoti eḷāya niccapaggharitaṃ mukhametasseti eḷamukho. Uppakkamukhoti uppakkaṃ kuthikaṃ mukhametassāti uppakkamukho. Saṅkhatuṇḍakoti saṅkhassa tuṇḍena sadiso oṭṭho etassāti saṅkhatuṇḍako.
অট্ঠকদন্তসদিসেহীতি অট্ঠকনামকস্স নঙ্গলস্স দন্তেহি সদিসেহি। দন্তে পিদহিতুন্তি সম্বন্ধো। দন্তন্তরেতি দন্তৰিৰরে, দন্তমজ্ঝে ৰা। কলন্দকদন্তো ৰিযাতি কাল়কানং দন্তো ৰিয।
Aṭṭhakadantasadisehīti aṭṭhakanāmakassa naṅgalassa dantehi sadisehi. Dante pidahitunti sambandho. Dantantareti dantavivare, dantamajjhe vā. Kalandakadanto viyāti kāḷakānaṃ danto viya.
মহাহনুকোতি মহন্তো হনু এতস্সাতি মহাহনুকো। চিপিটহনুকোতি অনুন্নতহনুকো। নিম্মস্সুদাঠিকোতি নত্থি মস্সু চ দাঠি চ এতস্সাতি নিম্মস্সুদাঠিকো। ভট্ঠঅংসকূটোতি ভট্ঠো পতিতো অংসকূটো ইমস্সাতি ভট্ঠঅংসকূটো। গোধাগত্তোতি গোধায গত্তং ৰিয গত্তং ইমস্সাতি গোধাগত্তো । সব্বংপেতন্তি সব্বম্পি এতং ‘‘কচ্ছুগত্তো’’তিআদিৰচনং। এত্থাতি ‘‘কচ্ছুগত্তো’’তিআদিৰচনে। ৰিনিচ্ছযো ৰেদিতব্বোতি যোজনা।
Mahāhanukoti mahanto hanu etassāti mahāhanuko. Cipiṭahanukoti anunnatahanuko. Nimmassudāṭhikoti natthi massu ca dāṭhi ca etassāti nimmassudāṭhiko. Bhaṭṭhaaṃsakūṭoti bhaṭṭho patito aṃsakūṭo imassāti bhaṭṭhaaṃsakūṭo. Godhāgattoti godhāya gattaṃ viya gattaṃ imassāti godhāgatto . Sabbaṃpetanti sabbampi etaṃ ‘‘kacchugatto’’tiādivacanaṃ. Etthāti ‘‘kacchugatto’’tiādivacane. Vinicchayo veditabboti yojanā.
ভট্ঠকটিকোতি ভট্ঠা পন্না কটি এতস্সাতি ভট্ঠকটিকো। অচ্চুগ্গতেহি আনিসদমংসেহীতি সম্বন্ধো। ৰাতণ্ডিকোতি ৰাতেন পূরিতো অণ্ডকোসো এতস্সাতি ৰাতণ্ডিকো। সঙ্ঘট্টনজাণুকোতি অন্তো নতত্তা অঞ্ঞমঞ্ঞং সঙ্ঘট্টনং জাণু এতস্সাতি সঙ্ঘট্টনজাণুকো। ৰিকটোতি তিরিযগমনপাদো। উপড্ঢপিণ্ডিকস্স অত্থং সহ ভেদেন দস্সেন্তো আহ ‘‘সো দুৰিধো’’তিআদি। তত্থ দুৰিধো সো উপড্ঢপিণ্ডিকো সমন্নাগতোতি যোজনা। অথ ৰা সো উপড্ঢপিণ্ডিকো হেট্ঠা ওরূল়্হাহি মহন্তীহি জঙ্ঘপিণ্ডিকাহি সমন্নাগতো ৰা উপরি আরূল়্হাহি মহন্তীহি জঙ্ঘপিণ্ডিকাহি সমন্নাগতো ৰাতি দুৰিধোতি যোজনা। পিট্ঠিকপাদোতি পিট্ঠিযং উট্ঠিতো পাদো এতস্সাতি পিট্ঠিকপাদো। গণ্ডিকঙ্গুলি ৰাতি গণ্ডেন উট্ঠিতো অঙ্গুলি এতস্সাতি গণ্ডিকঙ্গুলি। সব্বোপেসাতি এস সব্বোপি জনো। পরিসং দূসেতীতি পরিসদূসনো।
Bhaṭṭhakaṭikoti bhaṭṭhā pannā kaṭi etassāti bhaṭṭhakaṭiko. Accuggatehi ānisadamaṃsehīti sambandho. Vātaṇḍikoti vātena pūrito aṇḍakoso etassāti vātaṇḍiko. Saṅghaṭṭanajāṇukoti anto natattā aññamaññaṃ saṅghaṭṭanaṃ jāṇu etassāti saṅghaṭṭanajāṇuko. Vikaṭoti tiriyagamanapādo. Upaḍḍhapiṇḍikassa atthaṃ saha bhedena dassento āha ‘‘so duvidho’’tiādi. Tattha duvidho so upaḍḍhapiṇḍiko samannāgatoti yojanā. Atha vā so upaḍḍhapiṇḍiko heṭṭhā orūḷhāhi mahantīhi jaṅghapiṇḍikāhi samannāgato vā upari ārūḷhāhi mahantīhi jaṅghapiṇḍikāhi samannāgato vāti duvidhoti yojanā. Piṭṭhikapādoti piṭṭhiyaṃ uṭṭhito pādo etassāti piṭṭhikapādo. Gaṇḍikaṅguli vāti gaṇḍena uṭṭhito aṅguli etassāti gaṇḍikaṅguli. Sabbopesāti esa sabbopi jano. Parisaṃ dūsetīti parisadūsano.
পুব্বাদীহীতিআদিসদ্দেন চক্খুপসাদস্স অন্তরাযকরানি অঞ্ঞানিপি ৰত্থূনি গহেতব্বানি। দ্ৰীহি ৰা অক্খীহি, একেন ৰা অক্খিনাতি যোজনা। উভযম্পীতি দ্ৰিন্নং অট্ঠকথাচরিযানং উভযম্পি ৰচনং। পাল়িযং ‘‘অন্ধং পব্বাজেন্তী’’তি অৰত্ৰা ‘‘কাণং পব্বাজেন্তী’’তি ৰুত্তত্তা ‘‘পরিযাযেনা’’তি ৰুত্তং। মহাঅট্ঠকথাযঞ্হি ‘‘জচ্চন্ধো’’তি ইমিনা দ্ৰেঅক্খিকাণং সন্ধায ৰুত্তং। কুণীতি কুণনং সংকোচনং কুণং, তমেতস্সত্থীতি কুণী। খঞ্জোতি খঞ্জতি গতিৰেকল্লভাৰেন পৰত্ততীতি খঞ্জো। কুণ্ডপাদকোতি এত্থ কুণ্ডোতি খঞ্জস্সেৰ নামং। খঞ্জো হি কুডতি গমনং পটিহনতীতি কুণ্ডোতি ৰুচ্চতি। কস্মা কুণ্ডপাদকো? কস্মা পিট্ঠিপাদমজ্ঝেন চঙ্কমন্তোতি আহ ‘‘মজ্ঝে সংকুটিতপাদত্তা’’তি। ইমিনা হি কুণ্ডপাদস্স চ পিট্ঠিপাদমজ্ঝেন চঙ্কমনস্স চ হেতুং দস্সেতি। এসেৰ নযো অনন্তরৰাক্যেপি। সব্বোপেসাতি এস সব্বোপি জনো।
Pubbādīhītiādisaddena cakkhupasādassa antarāyakarāni aññānipi vatthūni gahetabbāni. Dvīhi vā akkhīhi, ekena vā akkhināti yojanā. Ubhayampīti dvinnaṃ aṭṭhakathācariyānaṃ ubhayampi vacanaṃ. Pāḷiyaṃ ‘‘andhaṃ pabbājentī’’ti avatvā ‘‘kāṇaṃ pabbājentī’’ti vuttattā ‘‘pariyāyenā’’ti vuttaṃ. Mahāaṭṭhakathāyañhi ‘‘jaccandho’’ti iminā dveakkhikāṇaṃ sandhāya vuttaṃ. Kuṇīti kuṇanaṃ saṃkocanaṃ kuṇaṃ, tametassatthīti kuṇī. Khañjoti khañjati gativekallabhāvena pavattatīti khañjo. Kuṇḍapādakoti ettha kuṇḍoti khañjasseva nāmaṃ. Khañjo hi kuḍati gamanaṃ paṭihanatīti kuṇḍoti vuccati. Kasmā kuṇḍapādako? Kasmā piṭṭhipādamajjhena caṅkamantoti āha ‘‘majjhe saṃkuṭitapādattā’’ti. Iminā hi kuṇḍapādassa ca piṭṭhipādamajjhena caṅkamanassa ca hetuṃ dasseti. Eseva nayo anantaravākyepi. Sabbopesāti esa sabbopi jano.
পক্খহতোতি এত্থ একো পক্খো হতো ৰিনাসো এতস্সাতি পক্খহতোতি অত্থং দস্সেন্তো আহ ‘‘একো হত্থো ৰা’’তিআদি। ‘‘পক্খপাতো’’তিপি পাঠো, সো অপাঠোযেৰ। পক্খসদ্দো হি কোট্ঠাসৰাচকো, ন পঙ্গুলপরিযাযো, পীঠসব্বী ৰুচ্চতীতি পীঠেন সব্বতি গচ্ছতি সীলেনাতি পীঠসব্বী ৰুচ্চতি। ‘‘জিণ্ণভাৰেন দুব্বলো’’তি ইমিনা জীরণং জরা, তায দুব্বলো জরাদুব্বলোতি ৰচনত্থং দস্সেতি। বলৰা হোতীতি আগন্তুকরোগানমভাৰেন বলৰা হোতি, ‘‘ৰচীভেদো নপ্পৰত্ততী’’তি ইমিনা মুখমত্তমেৰ গচ্ছতি পৰত্ততি, ন ৰচীভেদো এত্থ জনেতি মূগোতি দস্সেতি। যস্স ৰচীভেদো ন পৰত্ততি, অযং মূগো নামাতি যোজনা। মম্মনন্তি খলিতৰচনং। যো একমেৰ অক্খরং চতুপঞ্চক্খত্তুং ৰদতি, তস্সেতমধিৰচনং।
Pakkhahatoti ettha eko pakkho hato vināso etassāti pakkhahatoti atthaṃ dassento āha ‘‘eko hattho vā’’tiādi. ‘‘Pakkhapāto’’tipi pāṭho, so apāṭhoyeva. Pakkhasaddo hi koṭṭhāsavācako, na paṅgulapariyāyo, pīṭhasabbī vuccatīti pīṭhena sabbati gacchati sīlenāti pīṭhasabbī vuccati. ‘‘Jiṇṇabhāvena dubbalo’’ti iminā jīraṇaṃ jarā, tāya dubbalo jarādubbaloti vacanatthaṃ dasseti. Balavā hotīti āgantukarogānamabhāvena balavā hoti, ‘‘vacībhedo nappavattatī’’ti iminā mukhamattameva gacchati pavattati, na vacībhedo ettha janeti mūgoti dasseti. Yassa vacībhedo na pavattati, ayaṃ mūgo nāmāti yojanā. Mammananti khalitavacanaṃ. Yo ekameva akkharaṃ catupañcakkhattuṃ vadati, tassetamadhivacanaṃ.
বধীরোতি সুতিহীনো। সো হি হননং সোতপসাদস্স নাসনং ৰধো, তং ঈরতি গচ্ছতীতি বধীরোতি ৰুচ্চতি। যো সব্বেন সব্বং ন সুণাতি, অযং বধীরো নামাতি যোজনা। ইমিনা নট্ঠপসাদতং দস্সেতি । উভযদোসৰসেনাতি উপলক্খণৰসেন ৰুত্তং অন্ধমূগবধিরপব্বাজনে তিদোসৰসেনপি ৰুত্তত্তা। তেতি হত্থচ্ছিন্নাদযো দ্ৰত্তিংসজনে। ওসারণং অপত্তো পুগ্গলো অত্থি, তং পুগ্গলং সঙ্ঘো ওসারেতি চেতি যোজনা। ওসারেতীতি সঙ্ঘে পৰেসেতি।
Badhīroti sutihīno. So hi hananaṃ sotapasādassa nāsanaṃ vadho, taṃ īrati gacchatīti badhīroti vuccati. Yo sabbena sabbaṃ na suṇāti, ayaṃ badhīro nāmāti yojanā. Iminā naṭṭhapasādataṃ dasseti . Ubhayadosavasenāti upalakkhaṇavasena vuttaṃ andhamūgabadhirapabbājane tidosavasenapi vuttattā. Teti hatthacchinnādayo dvattiṃsajane. Osāraṇaṃ apatto puggalo atthi, taṃ puggalaṃ saṅgho osāreti ceti yojanā. Osāretīti saṅghe paveseti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৫৭. নপব্বাজেতব্বদ্ৰত্তিংসৰারো • 57. Napabbājetabbadvattiṃsavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / হত্থচ্ছিন্নাদিৰত্থুকথা • Hatthacchinnādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / হত্থচ্ছিন্নাদিৰত্থুকথাৰণ্ণনা • Hatthacchinnādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / হত্থচ্ছিন্নাদিৰত্থুকথাৰণ্ণনা • Hatthacchinnādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / হত্থচ্ছিন্নাদিৰত্থুকথাৰণ্ণনা • Hatthacchinnādivatthukathāvaṇṇanā
