| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஹத்த²ச்சி²ன்னாதி³வத்து²கதா²வண்ணனா
Hatthacchinnādivatthukathāvaṇṇanā
119. ஹத்த²ச்சி²ன்னாதி³வத்தூ²ஸு கண்ணமூலேதி ஸகலஸ்ஸ கண்ணஸ்ஸ சே²த³ங் ஸந்தா⁴ய வுத்தங். கண்ணஸக்க²லிகாயாதி கண்ணசூளிகாய. யஸ்ஸ பன கண்ணாவித்³தே⁴தி ஹெட்டா² குண்ட³லாதி³ட²பனச்சி²த்³த³ங் ஸந்தா⁴ய வுத்தங். தஞ்ஹி ஸங்க⁴டனக்க²மங். அஜபத³கேதி அஜபத³னாஸிகட்டி²கோடியங். ததோ ஹி உத்³த⁴ங் ந விச்சி²ந்த³தி. ஸக்கா ஹோதி ஸந்தே⁴துந்தி அவிரூபஸண்டா²னங் ஸந்தா⁴ய வுத்தங், விரூபங் பன பரிஸதூ³ஸகதங் ஆபாதே³தி.
119. Hatthacchinnādivatthūsu kaṇṇamūleti sakalassa kaṇṇassa chedaṃ sandhāya vuttaṃ. Kaṇṇasakkhalikāyāti kaṇṇacūḷikāya. Yassa pana kaṇṇāviddheti heṭṭhā kuṇḍalādiṭhapanacchiddaṃ sandhāya vuttaṃ. Tañhi saṅghaṭanakkhamaṃ. Ajapadaketi ajapadanāsikaṭṭhikoṭiyaṃ. Tato hi uddhaṃ na vicchindati. Sakkā hoti sandhetunti avirūpasaṇṭhānaṃ sandhāya vuttaṃ, virūpaṃ pana parisadūsakataṃ āpādeti.
கு²ஜ்ஜஸரீரோதி வங்கஸரீரோ. ப்³ரஹ்முனோ விய உஜுகங் க³த்தங் ஸரீரங் யஸ்ஸ, ஸோ ப்³ரஹ்முஜ்ஜுக³த்தோ, ப⁴க³வா.
Khujjasarīroti vaṅkasarīro. Brahmuno viya ujukaṃ gattaṃ sarīraṃ yassa, so brahmujjugatto, bhagavā.
பரிவடுமோதி ஸமந்ததோ வட்டகாயோ, ஏதேன ஏவரூபா ஏவ வாமனகா ந வட்டந்தீதி த³ஸ்ஸேதி.
Parivaṭumoti samantato vaṭṭakāyo, etena evarūpā eva vāmanakā na vaṭṭantīti dasseti.
கூடகூடஸீஸோதி அனேகேஸு டா²னேஸு பிண்டி³கமங்ஸதங் த³ஸ்ஸேதுங் ஆமேடி³தங் கதங். தேனாஹ ‘‘தாலப²லபிண்டி³ஸதி³ஸேனா’’தி, தாலப²லானங் மஞ்ஜரீ பிண்டி³ நாம. அனுபுப்³ப³தனுகேன ஸீஸேனாதி சேதியதூ²பிகா விய கமேன கிஸேன ஸீஸேன, தூ²லவேளுபப்³ப³ங் விய ஆதி³தோ பட்டா²ய யாவபரியோஸானங் ஸமதூ²லேன உச்சேன ஸீஸேன ஸமன்னாக³தோ நாளிஸீஸோ நாம. கப்பஸீஸோதி க³ஜமத்த²கங் விய த்³விதா⁴ பி⁴ன்னஸீஸோ. ‘‘கண்ணிககேஸோ வா’’தி இமஸ்ஸ விவரணங் ‘‘பாணகேஹீ’’திஆதி³. மக்கடஸ்ஸேவ நளாடேபி கேஸானங் உட்டி²தபா⁴வங் ஸந்தா⁴யாஹ ‘‘ஸீஸலோமேஹீ’’திஆதி³.
Kūṭakūṭasīsoti anekesu ṭhānesu piṇḍikamaṃsataṃ dassetuṃ āmeḍitaṃ kataṃ. Tenāha ‘‘tālaphalapiṇḍisadisenā’’ti, tālaphalānaṃ mañjarī piṇḍi nāma. Anupubbatanukena sīsenāti cetiyathūpikā viya kamena kisena sīsena, thūlaveḷupabbaṃ viya ādito paṭṭhāya yāvapariyosānaṃ samathūlena uccena sīsena samannāgato nāḷisīso nāma. Kappasīsoti gajamatthakaṃ viya dvidhā bhinnasīso. ‘‘Kaṇṇikakeso vā’’ti imassa vivaraṇaṃ ‘‘pāṇakehī’’tiādi. Makkaṭasseva naḷāṭepi kesānaṃ uṭṭhitabhāvaṃ sandhāyāha ‘‘sīsalomehī’’tiādi.
மக்கடப⁴முகோதி நளாடலோமேஹி அவிப⁴த்தலோமப⁴முகோ. அக்கி²சக்கலேஹீதி கண்ஹமண்ட³லேஹி. கேகரோதி திரியங் பஸ்ஸனகோ. உத³கதாரகாதி ஓலோகெந்தானங் உத³கே படிபி³ம்பி³கச்சா²யா, உத³கபுப்³பு³ளந்தி கேசி. அக்கி²தாரகாதி அபி⁴முகே² டி²தானங் சா²யா, அக்கி²க³ண்ட³காதிபி வத³ந்தி. அதிபிங்க³லக்கீ²தி மஜ்ஜாரக்கி². மது⁴பிங்க³லந்தி மது⁴வண்ணபிங்க³லங். நிப்பகு²மக்கீ²தி எத்த² பகு²ம-ஸத்³தோ³ அக்கி²த³லலோமேஸு நிரூள்ஹோ, தத³பா⁴வா நிப்பகு²மக்கி². அக்கி²பாகேனாதி அக்கி²த³ல பரியந்தேஸு பூதிபா⁴வாபஜ்ஜனரோகே³ன.
Makkaṭabhamukoti naḷāṭalomehi avibhattalomabhamuko. Akkhicakkalehīti kaṇhamaṇḍalehi. Kekaroti tiriyaṃ passanako. Udakatārakāti olokentānaṃ udake paṭibimbikacchāyā, udakapubbuḷanti keci. Akkhitārakāti abhimukhe ṭhitānaṃ chāyā, akkhigaṇḍakātipi vadanti. Atipiṅgalakkhīti majjārakkhi. Madhupiṅgalanti madhuvaṇṇapiṅgalaṃ. Nippakhumakkhīti ettha pakhuma-saddo akkhidalalomesu nirūḷho, tadabhāvā nippakhumakkhi. Akkhipākenāti akkhidala pariyantesu pūtibhāvāpajjanarogena.
சிபிடனாஸிகோதி அனுன்னதனாஸிகோ. படங்க³மண்டூ³கோ நாம மஹாமுக²மண்டூ³கோ. பி⁴ன்னமுகோ²தி உபக்கமுக²பரியோஸானோ, ஸப்³ப³தா³ விவடமுகோ² வா. வங்கமுகோ²தி ஏகபஸ்ஸே அபக்கம்ம டி²தஹெட்டி²மஹனுகட்டி²கோ. ஒட்ட²ச்சி²ன்னகோதி உபோ⁴ஸு ஒட்டே²ஸு யத்த² கத்த²சி ஜாதியா வா பச்சா² வா ஸத்தா²தி³னா அபனீதமங்ஸேன ஒட்டே²ன ஸமன்னாக³தோ. ஏளமுகோ²தி நிச்சபக்³க⁴ரிதலாலாமுகோ².
Cipiṭanāsikoti anunnatanāsiko. Paṭaṅgamaṇḍūko nāma mahāmukhamaṇḍūko. Bhinnamukhoti upakkamukhapariyosāno, sabbadā vivaṭamukho vā. Vaṅkamukhoti ekapasse apakkamma ṭhitaheṭṭhimahanukaṭṭhiko. Oṭṭhacchinnakoti ubhosu oṭṭhesu yattha katthaci jātiyā vā pacchā vā satthādinā apanītamaṃsena oṭṭhena samannāgato. Eḷamukhoti niccapaggharitalālāmukho.
பி⁴ன்னக³லோதி அவனதக³தோ. பி⁴ன்னஉரோதி அதினின்னஉரமஜ்ஜோ². ஏவங் பி⁴ன்னபிட்டி²பி. ஸப்³ப³ஞ்சேதந்தி ‘‘கச்சு²க³த்தோ’’திஆதி³ங் ஸந்தா⁴ய வுத்தங். எத்த² ச வினிச்ச²யோ குட்டா²தீ³ஸு வுத்தோ ஏவாதி ஆஹ ‘‘வினிச்ச²யோ’’திஆதி³.
Bhinnagaloti avanatagato. Bhinnauroti atininnauramajjho. Evaṃ bhinnapiṭṭhipi. Sabbañcetanti ‘‘kacchugatto’’tiādiṃ sandhāya vuttaṃ. Ettha ca vinicchayo kuṭṭhādīsu vutto evāti āha ‘‘vinicchayo’’tiādi.
வாதண்டி³கோதி அண்ட³வாதரோகே³ன உத்³து⁴தபீ³ஜண்ட³கோஸேன ஸமன்னாக³தோ, யஸ்ஸ நிவாஸனேன படிச்ச²ன்னம்பி உன்னதங் பகாஸதி, ஸோவ ந பப்³பா³ஜேதப்³போ³. விகடோதி திரியங்க³மனபாதோ³, யஸ்ஸ சங்கமதோ ஜாணுகா ப³ஹி நிக³ச்ச²ந்தி. பண்ஹோதி பச்ச²தோ பரிவத்தனகபாதோ³, யஸ்ஸ சங்கமதோ ஜாணுகா அந்தோ பவிஸந்தி. மஹாஜங்கோ⁴தி தூ²லஜங்கோ⁴. மஹாபாதோ³தி மஹந்தேன பாத³தலேன யுத்தோ. பாத³வேமஜ்ஜே²தி பிட்டி²பாத³வேமஜ்ஜே², ஏதேன அக்³க³பாதோ³ ச பண்ஹி ச ஸதி³ஸோதி த³ஸ்ஸேதி.
Vātaṇḍikoti aṇḍavātarogena uddhutabījaṇḍakosena samannāgato, yassa nivāsanena paṭicchannampi unnataṃ pakāsati, sova na pabbājetabbo. Vikaṭoti tiriyaṃgamanapādo, yassa caṅkamato jāṇukā bahi nigacchanti. Paṇhoti pacchato parivattanakapādo, yassa caṅkamato jāṇukā anto pavisanti. Mahājaṅghoti thūlajaṅgho. Mahāpādoti mahantena pādatalena yutto. Pādavemajjheti piṭṭhipādavemajjhe, etena aggapādo ca paṇhi ca sadisoti dasseti.
மஜ்ஜே² ஸங்குடிதபாத³த்தாதி குண்ட³பாத³தாய காரணவிபா⁴வனங். அக்³கே³ ஸங்குடிதபாத³த்தாதி குண்ட³பாத³தாய ஸகுணபாத³ஸ்ஸேவ க³மனவிபா⁴வனங். பிட்டி²பாத³க்³கே³ன சங்கமந்தோதி ‘‘பாத³ஸ்ஸ பா³ஹிரந்தேனாதி ச அப்³ப⁴ந்தரந்தேனா’’தி ச இத³ங் பாத³தலஸ்ஸ உபோ⁴ஹி பரியந்தேஹி சங்கமனங் ஸந்தா⁴ய வுத்தங்.
Majjhe saṅkuṭitapādattāti kuṇḍapādatāya kāraṇavibhāvanaṃ. Agge saṅkuṭitapādattāti kuṇḍapādatāya sakuṇapādasseva gamanavibhāvanaṃ. Piṭṭhipādaggena caṅkamantoti ‘‘pādassa bāhirantenāti ca abbhantarantenā’’ti ca idaṃ pādatalassa ubhohi pariyantehi caṅkamanaṃ sandhāya vuttaṃ.
மம்மனந்தி டா²னகரணவிஸுத்³தி⁴யா அபா⁴வேன அயுத்தக்க²ரவசனங். வசனானுகரணேன ஹி ஸோ மம்மனோ வுத்தோ. யோ ச கரணஸம்பன்னோபி ஏகமேவக்க²ரங் ஹிக்காரப³ஹுஸோ வத³தி, ஸோபி இதே⁴வ ஸங்க³ய்ஹதி. யோ வா பன ஹிக்கங் நிக்³க³ஹெத்வாபி அனாமேடி³தக்க²ரமேவ ஸிலிட்ட²வசனங் வத்துங் ஸமத்தோ², ஸோ பப்³பா³ஜேதப்³போ³.
Mammananti ṭhānakaraṇavisuddhiyā abhāvena ayuttakkharavacanaṃ. Vacanānukaraṇena hi so mammano vutto. Yo ca karaṇasampannopi ekamevakkharaṃ hikkārabahuso vadati, sopi idheva saṅgayhati. Yo vā pana hikkaṃ niggahetvāpi anāmeḍitakkharameva siliṭṭhavacanaṃ vattuṃ samattho, so pabbājetabbo.
ஆபத்திதோ ந முச்சதீதி ஞத்வா கரொந்தோவ ந முச்சதி. ஜீவிதந்தராயாதி³ஆபதா³ஸு அருசியா காயஸாமக்³கி³ங் தெ³ந்தஸ்ஸ அனாபத்தி. அப்பத்தோ ஓஸாரணந்தி ஓஸாரணாய அனரஹோதி அத்தோ².
Āpattito na muccatīti ñatvā karontova na muccati. Jīvitantarāyādiāpadāsu aruciyā kāyasāmaggiṃ dentassa anāpatti. Appatto osāraṇanti osāraṇāya anarahoti attho.
ஹத்த²ச்சி²ன்னாதி³வத்து²கதா²வண்ணனா நிட்டி²தா.
Hatthacchinnādivatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 57. நபப்³பா³ஜேதப்³ப³த்³வத்திங்ஸவாரோ • 57. Napabbājetabbadvattiṃsavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஹத்த²ச்சி²ன்னாதி³வத்து²கதா² • Hatthacchinnādivatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஹத்த²ச்சி²ன்னாதி³வத்து²கதா²வண்ணனா • Hatthacchinnādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஹத்த²ச்சி²ன்னாதி³வத்து²கதா²வண்ணனா • Hatthacchinnādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 57. ஹத்த²ச்சி²ன்னாதி³வத்து²கதா² • 57. Hatthacchinnādivatthukathā
