| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
хад̇т̇ажчиннаад̣̇ивад̇т̇угат̇ааван̣н̣анаа
Hatthacchinnādivatthukathāvaṇṇanā
119. хад̇т̇ажчиннаад̣̇ивад̇т̇уусу ган̣н̣амуулзд̇и сагаласса ган̣н̣асса чзд̣̇ам̣ санд̇хааяа вуд̇д̇ам̣. ган̣н̣асагкалигааяаад̇и ган̣н̣ажуул̣игааяа. яасса бана ган̣н̣аавид̣̇д̇хзд̇и хздтаа гун̣д̣алаад̣̇итабанажчид̣̇д̣̇ам̣ санд̇хааяа вуд̇д̇ам̣. д̇ан̃хи сан̇гхаданагкамам̣. аж̇абад̣̇агзд̇и аж̇абад̣̇анаасигадтигодияам̣. д̇ад̇о хи уд̣̇д̇хам̣ на вижчинд̣̇ад̇и. саггаа ход̇и санд̇хзд̇унд̇и авируубасан̣таанам̣ санд̇хааяа вуд̇д̇ам̣, вируубам̣ бана барисад̣̇уусагад̇ам̣ аабаад̣̇зд̇и.
119. Hatthacchinnādivatthūsu kaṇṇamūleti sakalassa kaṇṇassa chedaṃ sandhāya vuttaṃ. Kaṇṇasakkhalikāyāti kaṇṇacūḷikāya. Yassa pana kaṇṇāviddheti heṭṭhā kuṇḍalādiṭhapanacchiddaṃ sandhāya vuttaṃ. Tañhi saṅghaṭanakkhamaṃ. Ajapadaketi ajapadanāsikaṭṭhikoṭiyaṃ. Tato hi uddhaṃ na vicchindati. Sakkā hoti sandhetunti avirūpasaṇṭhānaṃ sandhāya vuttaṃ, virūpaṃ pana parisadūsakataṃ āpādeti.
куж̇ж̇асарийрод̇и ван̇гасарийро. б̣рахмуно вияа уж̇угам̣ г̇ад̇д̇ам̣ сарийрам̣ яасса, со б̣рахмуж̇ж̇уг̇ад̇д̇о, бхаг̇аваа.
Khujjasarīroti vaṅkasarīro. Brahmuno viya ujukaṃ gattaṃ sarīraṃ yassa, so brahmujjugatto, bhagavā.
баривадумод̇и саманд̇ад̇о ваддагааяо, зд̇зна зваруубаа зва вааманагаа на вадданд̇ийд̇и д̣̇ассзд̇и.
Parivaṭumoti samantato vaṭṭakāyo, etena evarūpā eva vāmanakā na vaṭṭantīti dasseti.
гуудагуудасийсод̇и анзгзсу таанзсу бин̣д̣игамам̣сад̇ам̣ д̣̇ассзд̇ум̣ аамзд̣ид̇ам̣ гад̇ам̣. д̇знааха ‘‘д̇аалапалабин̣д̣исад̣̇исзнаа’’д̇и, д̇аалапалаанам̣ ман̃ж̇арий бин̣д̣и наама. анубуб̣б̣ад̇анугзна сийсзнаад̇и жзд̇ияат̇уубигаа вияа гамзна гисзна сийсзна, т̇уулавзл̣убаб̣б̣ам̣ вияа аад̣̇ид̇о бадтааяа яаавабарияосаанам̣ самат̇уулзна ужжзна сийсзна саманнааг̇ад̇о наал̣исийсо наама. габбасийсод̇и г̇аж̇амад̇т̇агам̣ вияа д̣̇вид̇хаа бхиннасийсо. ‘‘ган̣н̣игагзсо ваа’’д̇и имасса виваран̣ам̣ ‘‘баан̣агзхий’’д̇иаад̣̇и. маггадассзва нал̣аадзби гзсаанам̣ удтид̇абхаавам̣ санд̇хааяааха ‘‘сийсаломзхий’’д̇иаад̣̇и.
Kūṭakūṭasīsoti anekesu ṭhānesu piṇḍikamaṃsataṃ dassetuṃ āmeḍitaṃ kataṃ. Tenāha ‘‘tālaphalapiṇḍisadisenā’’ti, tālaphalānaṃ mañjarī piṇḍi nāma. Anupubbatanukena sīsenāti cetiyathūpikā viya kamena kisena sīsena, thūlaveḷupabbaṃ viya ādito paṭṭhāya yāvapariyosānaṃ samathūlena uccena sīsena samannāgato nāḷisīso nāma. Kappasīsoti gajamatthakaṃ viya dvidhā bhinnasīso. ‘‘Kaṇṇikakeso vā’’ti imassa vivaraṇaṃ ‘‘pāṇakehī’’tiādi. Makkaṭasseva naḷāṭepi kesānaṃ uṭṭhitabhāvaṃ sandhāyāha ‘‘sīsalomehī’’tiādi.
маггадабхамугод̇и нал̣аадаломзхи авибхад̇д̇аломабхамуго. агкижаггалзхийд̇и ган̣хаман̣д̣алзхи. гзгарод̇и д̇ирияам̣ бассанаго. уд̣̇агад̇аарагаад̇и ологзнд̇аанам̣ уд̣̇агз бадиб̣имб̣игажчааяаа, уд̣̇агабуб̣б̣ул̣анд̇и гзжи. агкид̇аарагаад̇и абхимукз тид̇аанам̣ чааяаа, агкиг̇ан̣д̣агаад̇иби вад̣̇анд̇и. ад̇ибин̇г̇алагкийд̇и маж̇ж̇аарагки. мад̇хубин̇г̇аланд̇и мад̇хуван̣н̣абин̇г̇алам̣. ниббакумагкийд̇и зд̇т̇а бакума-сад̣̇д̣̇о агкид̣̇алаломзсу нируул̣хо, д̇ад̣̇абхааваа ниббакумагки. агкибаагзнаад̇и агкид̣̇ала барияанд̇зсу бууд̇ибхааваабаж̇ж̇анарог̇зна.
Makkaṭabhamukoti naḷāṭalomehi avibhattalomabhamuko. Akkhicakkalehīti kaṇhamaṇḍalehi. Kekaroti tiriyaṃ passanako. Udakatārakāti olokentānaṃ udake paṭibimbikacchāyā, udakapubbuḷanti keci. Akkhitārakāti abhimukhe ṭhitānaṃ chāyā, akkhigaṇḍakātipi vadanti. Atipiṅgalakkhīti majjārakkhi. Madhupiṅgalanti madhuvaṇṇapiṅgalaṃ. Nippakhumakkhīti ettha pakhuma-saddo akkhidalalomesu nirūḷho, tadabhāvā nippakhumakkhi. Akkhipākenāti akkhidala pariyantesu pūtibhāvāpajjanarogena.
жибиданаасигод̇и ануннад̇анаасиго. бадан̇г̇аман̣д̣ууго наама махаамукаман̣д̣ууго. бхиннамукод̇и убаггамукабарияосаано, саб̣б̣ад̣̇аа вивадамуко ваа. ван̇гамукод̇и згабассз абаггамма тид̇ахздтимаханугадтиго. одтажчиннагод̇и убхосу одтзсу яад̇т̇а гад̇т̇ажи ж̇аад̇ияаа ваа бажчаа ваа сад̇т̇аад̣̇инаа абанийд̇амам̣сзна одтзна саманнааг̇ад̇о. зл̣амукод̇и нижжабаг̇гхарид̇алаалаамуко.
Cipiṭanāsikoti anunnatanāsiko. Paṭaṅgamaṇḍūko nāma mahāmukhamaṇḍūko. Bhinnamukhoti upakkamukhapariyosāno, sabbadā vivaṭamukho vā. Vaṅkamukhoti ekapasse apakkamma ṭhitaheṭṭhimahanukaṭṭhiko. Oṭṭhacchinnakoti ubhosu oṭṭhesu yattha katthaci jātiyā vā pacchā vā satthādinā apanītamaṃsena oṭṭhena samannāgato. Eḷamukhoti niccapaggharitalālāmukho.
бхиннаг̇алод̇и аванад̇аг̇ад̇о. бхиннаурод̇и ад̇ининнаурамаж̇жхо. звам̣ бхиннабидтиби. саб̣б̣ан̃жзд̇анд̇и ‘‘гажчуг̇ад̇д̇о’’д̇иаад̣̇им̣ санд̇хааяа вуд̇д̇ам̣. зд̇т̇а жа винижчаяо гудтаад̣̇ийсу вуд̇д̇о зваад̇и ааха ‘‘винижчаяо’’д̇иаад̣̇и.
Bhinnagaloti avanatagato. Bhinnauroti atininnauramajjho. Evaṃ bhinnapiṭṭhipi. Sabbañcetanti ‘‘kacchugatto’’tiādiṃ sandhāya vuttaṃ. Ettha ca vinicchayo kuṭṭhādīsu vutto evāti āha ‘‘vinicchayo’’tiādi.
ваад̇ан̣д̣игод̇и ан̣д̣аваад̇арог̇зна уд̣̇д̇худ̇аб̣ийж̇ан̣д̣агосзна саманнааг̇ад̇о, яасса ниваасанзна бадижчаннамби уннад̇ам̣ багаасад̇и, сова на баб̣б̣ааж̇зд̇аб̣б̣о. вигадод̇и д̇ирияам̣г̇аманабаад̣̇о, яасса жан̇гамад̇о ж̇аан̣угаа б̣ахи ниг̇ажчанд̇и. бан̣ход̇и бажчад̇о баривад̇д̇анагабаад̣̇о, яасса жан̇гамад̇о ж̇аан̣угаа анд̇о бависанд̇и. махааж̇ан̇гход̇и т̇уулаж̇ан̇гхо. махаабаад̣̇од̇и маханд̇зна баад̣̇ад̇алзна яуд̇д̇о. баад̣̇авзмаж̇жхзд̇и бидтибаад̣̇авзмаж̇жхз, зд̇зна аг̇г̇абаад̣̇о жа бан̣хи жа сад̣̇исод̇и д̣̇ассзд̇и.
Vātaṇḍikoti aṇḍavātarogena uddhutabījaṇḍakosena samannāgato, yassa nivāsanena paṭicchannampi unnataṃ pakāsati, sova na pabbājetabbo. Vikaṭoti tiriyaṃgamanapādo, yassa caṅkamato jāṇukā bahi nigacchanti. Paṇhoti pacchato parivattanakapādo, yassa caṅkamato jāṇukā anto pavisanti. Mahājaṅghoti thūlajaṅgho. Mahāpādoti mahantena pādatalena yutto. Pādavemajjheti piṭṭhipādavemajjhe, etena aggapādo ca paṇhi ca sadisoti dasseti.
маж̇жхз сан̇гудид̇абаад̣̇ад̇д̇аад̇и гун̣д̣абаад̣̇ад̇ааяа гааран̣авибхааванам̣. аг̇г̇з сан̇гудид̇абаад̣̇ад̇д̇аад̇и гун̣д̣абаад̣̇ад̇ааяа сагун̣абаад̣̇ассзва г̇аманавибхааванам̣. бидтибаад̣̇аг̇г̇зна жан̇гаманд̇од̇и ‘‘баад̣̇асса б̣аахиранд̇знаад̇и жа аб̣бханд̇аранд̇знаа’’д̇и жа ид̣̇ам̣ баад̣̇ад̇аласса убхохи барияанд̇зхи жан̇гаманам̣ санд̇хааяа вуд̇д̇ам̣.
Majjhe saṅkuṭitapādattāti kuṇḍapādatāya kāraṇavibhāvanaṃ. Agge saṅkuṭitapādattāti kuṇḍapādatāya sakuṇapādasseva gamanavibhāvanaṃ. Piṭṭhipādaggena caṅkamantoti ‘‘pādassa bāhirantenāti ca abbhantarantenā’’ti ca idaṃ pādatalassa ubhohi pariyantehi caṅkamanaṃ sandhāya vuttaṃ.
маммананд̇и таанагаран̣ависуд̣̇д̇хияаа абхаавзна аяуд̇д̇агкараважанам̣. важанаанугаран̣зна хи со маммано вуд̇д̇о. яо жа гаран̣асамбанноби згамзвагкарам̣ хиггаараб̣ахусо вад̣̇ад̇и, соби ид̇хзва сан̇г̇аяхад̇и. яо ваа бана хиггам̣ ниг̇г̇ахзд̇вааби анаамзд̣ид̇агкарамзва силидтаважанам̣ вад̇д̇ум̣ самад̇т̇о, со баб̣б̣ааж̇зд̇аб̣б̣о.
Mammananti ṭhānakaraṇavisuddhiyā abhāvena ayuttakkharavacanaṃ. Vacanānukaraṇena hi so mammano vutto. Yo ca karaṇasampannopi ekamevakkharaṃ hikkārabahuso vadati, sopi idheva saṅgayhati. Yo vā pana hikkaṃ niggahetvāpi anāmeḍitakkharameva siliṭṭhavacanaṃ vattuṃ samattho, so pabbājetabbo.
аабад̇д̇ид̇о на мужжад̇ийд̇и н̃ад̇ваа гаронд̇ова на мужжад̇и. ж̇ийвид̇анд̇арааяаад̣̇иаабад̣̇аасу аружияаа гааяасаамаг̇г̇им̣ д̣̇знд̇асса анаабад̇д̇и. аббад̇д̇о осааран̣анд̇и осааран̣ааяа анараход̇и ад̇т̇о.
Āpattito na muccatīti ñatvā karontova na muccati. Jīvitantarāyādiāpadāsu aruciyā kāyasāmaggiṃ dentassa anāpatti. Appatto osāraṇanti osāraṇāya anarahoti attho.
хад̇т̇ажчиннаад̣̇ивад̇т̇угат̇ааван̣н̣анаа нидтид̇аа.
Hatthacchinnādivatthukathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 57. набаб̣б̣ааж̇зд̇аб̣б̣ад̣̇вад̇д̇им̣савааро • 57. Napabbājetabbadvattiṃsavāro
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / хад̇т̇ажчиннаад̣̇ивад̇т̇угат̇аа • Hatthacchinnādivatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / хад̇т̇ажчиннаад̣̇ивад̇т̇угат̇ааван̣н̣анаа • Hatthacchinnādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / хад̇т̇ажчиннаад̣̇ивад̇т̇угат̇ааван̣н̣анаа • Hatthacchinnādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 57. хад̇т̇ажчиннаад̣̇ивад̇т̇угат̇аа • 57. Hatthacchinnādivatthukathā
