| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. ஹத்த²கஸுத்தவண்ணனா
5. Hatthakasuttavaṇṇanā
128. பஞ்சமே அபி⁴க்கந்தாய ரத்தியாதி எத்த² அபி⁴க்கந்தஸத்³தோ³ க²யஸுந்த³ராபி⁴ரூபஅப்³ப⁴னுமோத³னாதீ³ஸு தி³ஸ்ஸதி. தத்த² ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴, உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி ஏவமாதீ³ஸு க²யே தி³ஸ்ஸதி. ‘‘அயங் இமேஸங் சதுன்னங் புக்³க³லானங் அபி⁴க்கந்ததரோ ச பணீததரோ சா’’தி ஏவமாதீ³ஸு (அ॰ நி॰ 4.100) ஸுந்த³ரே.
128. Pañcame abhikkantāya rattiyāti ettha abhikkantasaddo khayasundarābhirūpaabbhanumodanādīsu dissati. Tattha ‘‘abhikkantā, bhante, ratti, nikkhanto paṭhamo yāmo, ciranisinno bhikkhusaṅgho, uddisatu, bhante, bhagavā bhikkhūnaṃ pātimokkha’’nti evamādīsu khaye dissati. ‘‘Ayaṃ imesaṃ catunnaṃ puggalānaṃ abhikkantataro ca paṇītataro cā’’ti evamādīsu (a. ni. 4.100) sundare.
‘‘கோ மே வந்த³தி பாதா³னி, இத்³தி⁴யா யஸஸா ஜலங்;
‘‘Ko me vandati pādāni, iddhiyā yasasā jalaṃ;
அபி⁴க்கந்தேன வண்ணேன, ஸப்³பா³ ஓபா⁴ஸயங் தி³ஸா’’தி. (வி॰ வ॰ 857) –
Abhikkantena vaṇṇena, sabbā obhāsayaṃ disā’’ti. (vi. va. 857) –
ஏவமாதீ³ஸு அபி⁴ரூபே. ‘‘அபி⁴க்கந்தங், போ⁴ கோ³தமா’’தி ஏவமாதீ³ஸு (பாரா॰ 15) அப்³ப⁴னுமோத³னே. இத⁴ பன ஸுந்த³ரே. தேன அபி⁴க்கந்தாய ரத்தியாதி இட்டா²ய கந்தாய மனாபாய ரத்தியாதி வுத்தங் ஹோதி. அபி⁴க்கந்தவண்ணாதி இத⁴ அபி⁴க்கந்தஸத்³தோ³ அபி⁴ரூபே, வண்ணஸத்³தோ³ பன ச²விது²திகுலவக்³க³காரணஸண்டா²னபமாணரூபாயதனாதீ³ஸு தி³ஸ்ஸதி. தத்த² ‘‘ஸுவண்ணவண்ணோஸி ப⁴க³வா’’தி ஏவமாதீ³ஸு (ம॰ நி॰ 2.399; ஸு॰ நி॰ 553) ச²வியங். ‘‘கதா³ ஸஞ்ஞூள்ஹா பன தே க³ஹபதி ஸமணஸ்ஸ கோ³தமஸ்ஸ வண்ணா’’தி ஏவமாதீ³ஸு (ம॰ நி॰ 2.77) து²தியங். ‘‘சத்தாரோமே, போ⁴ கோ³தம, வண்ணா’’தி ஏவமாதீ³ஸு (தீ³॰ நி॰ 3.115) குலவக்³கே³. ‘‘அத² கேன நு வண்ணேன, க³ந்த⁴த்தே²னோதி வுச்சதீ’’தி ஏவமாதீ³ஸு (ஸங்॰ நி॰ 1.234) காரணே. ‘‘மஹந்தங் ஹத்தி²ராஜவண்ணங் அபி⁴னிம்மினித்வா’’தி ஏவமாதீ³ஸு (ஸங்॰ நி॰ 1.138) ஸண்டா²னே. ‘‘தயோ பத்தஸ்ஸ வண்ணா’’தி ஏவமாதீ³ஸு (பாரா॰ 602) பமாணே. ‘‘வண்ணோ க³ந்தோ⁴ ரஸோ ஓஜா’’தி ஏவமாதீ³ஸு ரூபாயதனே. ஸோ இத⁴ ச²வியா த³ட்ட²ப்³போ³. தேன அபி⁴க்கந்தவண்ணாதி அபி⁴ரூபச்ச²வி, இட்ட²வண்ணா மனாபவண்ணாதி வுத்தங் ஹோதி.
Evamādīsu abhirūpe. ‘‘Abhikkantaṃ, bho gotamā’’ti evamādīsu (pārā. 15) abbhanumodane. Idha pana sundare. Tena abhikkantāya rattiyāti iṭṭhāya kantāya manāpāya rattiyāti vuttaṃ hoti. Abhikkantavaṇṇāti idha abhikkantasaddo abhirūpe, vaṇṇasaddo pana chavithutikulavaggakāraṇasaṇṭhānapamāṇarūpāyatanādīsu dissati. Tattha ‘‘suvaṇṇavaṇṇosi bhagavā’’ti evamādīsu (ma. ni. 2.399; su. ni. 553) chaviyaṃ. ‘‘Kadā saññūḷhā pana te gahapati samaṇassa gotamassa vaṇṇā’’ti evamādīsu (ma. ni. 2.77) thutiyaṃ. ‘‘Cattārome, bho gotama, vaṇṇā’’ti evamādīsu (dī. ni. 3.115) kulavagge. ‘‘Atha kena nu vaṇṇena, gandhatthenoti vuccatī’’ti evamādīsu (saṃ. ni. 1.234) kāraṇe. ‘‘Mahantaṃ hatthirājavaṇṇaṃ abhinimminitvā’’ti evamādīsu (saṃ. ni. 1.138) saṇṭhāne. ‘‘Tayo pattassa vaṇṇā’’ti evamādīsu (pārā. 602) pamāṇe. ‘‘Vaṇṇo gandho raso ojā’’ti evamādīsu rūpāyatane. So idha chaviyā daṭṭhabbo. Tena abhikkantavaṇṇāti abhirūpacchavi, iṭṭhavaṇṇā manāpavaṇṇāti vuttaṃ hoti.
கேவலகப்பந்தி எத்த² கேவலஸத்³தோ³ அனவஸேஸயேபு⁴ய்யாப்³யாமிஸ்ஸானதிரேகத³ள்ஹத்த²விஸங்யோகா³தி³அனேகத்தோ². ததா² ஹிஸ்ஸ ‘‘கேவலபரிபுண்ணங் பரிஸுத்³த⁴ங் ப்³ரஹ்மசரிய’’ந்தி ஏவமாதீ³ஸு (பாரா॰ 1) அனவஸேஸதா அத்தோ². ‘‘கேவலகப்பா ச அங்க³மக³தா⁴ பஹூதங் கா²த³னீயங் போ⁴ஜனீயங் ஆதா³ய உபஸங்கமிஸ்ஸந்தீ’’தி ஏவமாதீ³ஸு (மஹாவ॰ 43) யேபு⁴ய்யதா. ‘‘கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி ஏவமாதீ³ஸு (விப⁴॰ 225) அப்³யாமிஸ்ஸதா. ‘‘கேவலங் ஸத்³தா⁴மத்தகங் நூன அயமாயஸ்மா’’தி ஏவமாதீ³ஸு (மஹாவ॰ 244) அனதிரேகதா. ‘‘ஆயஸ்மதோ, ப⁴ந்தே, அனுருத்³த⁴ஸ்ஸ பா³ஹியோ நாம ஸத்³தி⁴விஹாரிகோ கேவலகப்பங் ஸங்க⁴பே⁴தா³ய டி²தோ’’தி ஏவமாதீ³ஸு (அ॰ நி॰ 4.243) த³ள்ஹத்த²தா. ‘‘கேவலீ வுஸிதவா உத்தமபுரிஸோதி வுச்சதீ’’தி ஏவமாதீ³ஸு (ஸங்॰ நி॰ 3.57) விஸங்யோகோ³. இத⁴ பன அனவஸேஸதா அத்தோ²தி அதி⁴ப்பேதா.
Kevalakappanti ettha kevalasaddo anavasesayebhuyyābyāmissānatirekadaḷhatthavisaṃyogādianekattho. Tathā hissa ‘‘kevalaparipuṇṇaṃ parisuddhaṃ brahmacariya’’nti evamādīsu (pārā. 1) anavasesatā attho. ‘‘Kevalakappā ca aṅgamagadhā pahūtaṃ khādanīyaṃ bhojanīyaṃ ādāya upasaṅkamissantī’’ti evamādīsu (mahāva. 43) yebhuyyatā. ‘‘Kevalassa dukkhakkhandhassa samudayo hotī’’ti evamādīsu (vibha. 225) abyāmissatā. ‘‘Kevalaṃ saddhāmattakaṃ nūna ayamāyasmā’’ti evamādīsu (mahāva. 244) anatirekatā. ‘‘Āyasmato, bhante, anuruddhassa bāhiyo nāma saddhivihāriko kevalakappaṃ saṅghabhedāya ṭhito’’ti evamādīsu (a. ni. 4.243) daḷhatthatā. ‘‘Kevalī vusitavā uttamapurisoti vuccatī’’ti evamādīsu (saṃ. ni. 3.57) visaṃyogo. Idha pana anavasesatā atthoti adhippetā.
கப்பஸத்³தோ³ பனாயங் அபி⁴ஸத்³த³ஹனவோஹாரகாலபஞ்ஞத்திசே²த³னவிகப்பலேஸஸமந்தபா⁴வாதி³அனேகத்தோ². ததா² ஹிஸ்ஸ ‘‘ஓகப்பனியமேதங் போ⁴தோ கோ³தமஸ்ஸ, யதா² தங் அரஹதோ ஸம்மாஸம்பு³த்³த⁴ஸ்ஸா’’தி ஏவமாதீ³ஸு (ம॰ நி॰ 1.387) அபி⁴ஸத்³த³ஹனமத்தோ². ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லங் பரிபு⁴ஞ்ஜிது’’ந்தி ஏவமாதீ³ஸு (சூளவ॰ 250) வோஹாரோ. ‘‘யேன ஸுத³ங் நிச்சகப்பங் விஹராமீ’’தி ஏவமாதீ³ஸு (ம॰ நி॰ 1.387) காலோ. ‘‘இச்சாயஸ்மா கப்போ’’தி ஏவமாதீ³ஸு (ஸு॰ நி॰ 1098; சூளனி॰ கப்பமாணவபுச்சா² 117, கப்பமாணவபுச்சா²னித்³தே³ஸோ 61) பஞ்ஞத்தி . ‘‘அலங்கதோ கப்பிதகேஸமஸ்ஸூ’’தி ஏவமாதீ³ஸு (ஜா॰ 2.22.1368; வி॰ வ॰ 1094) சே²த³னங். ‘‘கப்பதி த்³வங்கு³லகப்போ’’தி ஏவமாதீ³ஸு (சூளவ॰ 446) விகப்போ. ‘‘அத்தி² கப்போ நிபஜ்ஜிது’’ந்தி ஏவமாதீ³ஸு (அ॰ நி॰ 8.80) லேஸோ. ‘‘கேவலகப்பங் வேளுவனங் ஓபா⁴ஸெத்வா’’தி ஏவமாதீ³ஸு (ஸங்॰ நி॰ 1.94) ஸமந்தபா⁴வோ. இத⁴ பனஸ்ஸ ஸமந்தபா⁴வோ அத்தோ² அதி⁴ப்பேதோ. தஸ்மா கேவலகப்பங் ஜேதவனந்தி எத்த² அனவஸேஸங் ஸமந்ததோ ஜேதவனந்தி அத்தோ².
Kappasaddo panāyaṃ abhisaddahanavohārakālapaññattichedanavikappalesasamantabhāvādianekattho. Tathā hissa ‘‘okappaniyametaṃ bhoto gotamassa, yathā taṃ arahato sammāsambuddhassā’’ti evamādīsu (ma. ni. 1.387) abhisaddahanamattho. ‘‘Anujānāmi, bhikkhave, pañcahi samaṇakappehi phalaṃ paribhuñjitu’’nti evamādīsu (cūḷava. 250) vohāro. ‘‘Yena sudaṃ niccakappaṃ viharāmī’’ti evamādīsu (ma. ni. 1.387) kālo. ‘‘Iccāyasmā kappo’’ti evamādīsu (su. ni. 1098; cūḷani. kappamāṇavapucchā 117, kappamāṇavapucchāniddeso 61) paññatti . ‘‘Alaṅkato kappitakesamassū’’ti evamādīsu (jā. 2.22.1368; vi. va. 1094) chedanaṃ. ‘‘Kappati dvaṅgulakappo’’ti evamādīsu (cūḷava. 446) vikappo. ‘‘Atthi kappo nipajjitu’’nti evamādīsu (a. ni. 8.80) leso. ‘‘Kevalakappaṃ veḷuvanaṃ obhāsetvā’’ti evamādīsu (saṃ. ni. 1.94) samantabhāvo. Idha panassa samantabhāvo attho adhippeto. Tasmā kevalakappaṃ jetavananti ettha anavasesaṃ samantato jetavananti attho.
ஓபா⁴ஸெத்வாதி ஆபா⁴ய ப²ரித்வா. வாலுகாயாதி ஸண்ஹாய வாலுகாய. ந ஸண்டா²தீதி ந பதிட்டா²தி. ஓளாரிகந்தி ப்³ரஹ்மதே³வதாய ஹி பத²வியங் பதிட்டா²னகாலே அத்தபா⁴வோ ஓளாரிகோ மாபேதுங் வட்டதி பத²வீ வா, தஸ்மா ஏவமாஹ. த⁴ம்மாதி இமினா புப்³பே³ உக்³க³ஹிதபு³த்³த⁴வசனங் த³ஸ்ஸேதி. நப்பவத்தினோ அஹேஸுந்தி ஸஜ்ஜா²யமூள்ஹகா வாசா பரிஹீனாயேவ அஹேஸுங். அப்படிவானோதி அனிவத்தோ அனுக்கண்டி²தோ.
Obhāsetvāti ābhāya pharitvā. Vālukāyāti saṇhāya vālukāya. Na saṇṭhātīti na patiṭṭhāti. Oḷārikanti brahmadevatāya hi pathaviyaṃ patiṭṭhānakāle attabhāvo oḷāriko māpetuṃ vaṭṭati pathavī vā, tasmā evamāha. Dhammāti iminā pubbe uggahitabuddhavacanaṃ dasseti. Nappavattino ahesunti sajjhāyamūḷhakā vācā parihīnāyeva ahesuṃ. Appaṭivānoti anivatto anukkaṇṭhito.
த³ஸ்ஸனஸ்ஸாதி சக்கு²விஞ்ஞாணேன த³ஸ்ஸனஸ்ஸ. உபட்டா²னஸ்ஸாதி சதூஹி பச்சயேஹி உபட்டா²னஸ்ஸ. அதி⁴ஸீலந்தி த³ஸவித⁴ங் ஸீலங். தஞ்ஹி பஞ்சஸீலங் உபாதா³ய அதி⁴ஸீலந்தி வுச்சதி. அவிஹங் க³தோதி அவிஹப்³ரஹ்மலோகே நிப்³ப³த்தொஸ்மீதி த³ஸ்ஸேதி.
Dassanassāti cakkhuviññāṇena dassanassa. Upaṭṭhānassāti catūhi paccayehi upaṭṭhānassa. Adhisīlanti dasavidhaṃ sīlaṃ. Tañhi pañcasīlaṃ upādāya adhisīlanti vuccati. Avihaṃ gatoti avihabrahmaloke nibbattosmīti dasseti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ஹத்த²கஸுத்தங் • 5. Hatthakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. ஹத்த²கஸுத்தவண்ணனா • 5. Hatthakasuttavaṇṇanā
