| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. ஹத்த²கஸுத்தவண்ணனா
5. Hatthakasuttavaṇṇanā
35. பஞ்சமே ஆளவியந்தி ஆளவிரட்டே², ந ஆளவினக³ரே. தேனாஹ ‘‘ஆளவியந்தி ஆளவிரட்டே²’’தி. அதா²தி அவிச்சே²த³த்தே² நிபாதோ. தத்த² ப⁴க³வதோ நிஸஜ்ஜாய அவிச்சி²ன்னாய ஏவாதி அத்தோ². தேனாஹ ‘‘ஏவ’’ந்திஆதி³. ஹத்த²தோ ஹத்த²ங் க³தத்தாதி ஆளவகஸ்ஸ யக்க²ஸ்ஸ ஹத்த²தோ ஸம்மாஸம்பு³த்³த⁴ஸ்ஸ ஹத்த²ங், ததோ ராஜபுரிஸானங் ஹத்த²ங் க³தத்தா.
35. Pañcame āḷaviyanti āḷaviraṭṭhe, na āḷavinagare. Tenāha ‘‘āḷaviyanti āḷaviraṭṭhe’’ti. Athāti avicchedatthe nipāto. Tattha bhagavato nisajjāya avicchinnāya evāti attho. Tenāha ‘‘eva’’ntiādi. Hatthato hatthaṃ gatattāti āḷavakassa yakkhassa hatthato sammāsambuddhassa hatthaṃ, tato rājapurisānaṃ hatthaṃ gatattā.
மாக⁴ஸ்ஸாதி மாக⁴மாஸஸ்ஸ. ஏவங் ப²க்³கு³னஸ்ஸாதி எத்தா²பி. கு²ரந்தரேஹி கத்³த³மோ உக்³க³ந்த்வா திட்ட²தீதி கத்³த³மோ கு²ரந்தரேஹி உக்³க³ந்த்வா திட்ட²தி. சதூஹி தி³ஸாஹி வாயந்தோ வாதோ வேரம்போ⁴தி வுச்சதி வேரம்ப⁴வாதஸதி³ஸத்தா.
Māghassāti māghamāsassa. Evaṃ phaggunassāti etthāpi. Khurantarehi kaddamo uggantvā tiṭṭhatīti kaddamo khurantarehi uggantvā tiṭṭhati. Catūhi disāhi vāyanto vāto verambhoti vuccati verambhavātasadisattā.
பஞ்சத்³வாரகாயந்தி பஞ்சத்³வாரானுஸாரேன பவத்தங் விஞ்ஞாணகாயங். கோ²ப⁴யமானாதி கிலேஸகோ²ப⁴வஸேன கோ²ப⁴யமானா சித்தங் ஸங்கோ²ப⁴ங் கரொந்தா. சேதஸிகாதி மனொத்³வாரிகசித்தஸன்னிஸ்ஸிதா. தேனாஹ ‘‘மனொத்³வாரங் கோ²ப⁴யமானா’’தி. ஸோ ராகோ³தி தங்ஸதி³ஸோ ராகோ³. ப⁴வதி ஹி தங்ஸதி³ஸே தப்³போ³ஹாரோ யதா² ‘‘ஸா ஏவ தித்திரிகா, தானி ஏவ ஓஸதா⁴னீ’’தி. யாதி³ஸோ ஹி ஏகஸ்ஸ புக்³க³லஸ்ஸ உப்பஜ்ஜனகராகோ³, தாதி³ஸோ ஏவ ததோ அஞ்ஞஸ்ஸ ராக³பா⁴வஸாமஞ்ஞதோ. தேன வுத்தங் ‘‘ததா²ரூபோ ராகோ³’’திஆதி³. இச்சி²தாலாபே⁴ன ரஜனீயேஸு வா நிருத்³தே⁴ஸு வத்தூ²ஸு தோ³மனஸ்ஸுப்பத்தியா தோ³ஸபரிளாஹானங் ஸம்ப⁴வோ வேதி³தப்³போ³.
Pañcadvārakāyanti pañcadvārānusārena pavattaṃ viññāṇakāyaṃ. Khobhayamānāti kilesakhobhavasena khobhayamānā cittaṃ saṅkhobhaṃ karontā. Cetasikāti manodvārikacittasannissitā. Tenāha ‘‘manodvāraṃ khobhayamānā’’ti. So rāgoti taṃsadiso rāgo. Bhavati hi taṃsadise tabbohāro yathā ‘‘sā eva tittirikā, tāni eva osadhānī’’ti. Yādiso hi ekassa puggalassa uppajjanakarāgo, tādiso eva tato aññassa rāgabhāvasāmaññato. Tena vuttaṃ ‘‘tathārūporāgo’’tiādi. Icchitālābhena rajanīyesu vā niruddhesu vatthūsu domanassuppattiyā dosapariḷāhānaṃ sambhavo veditabbo.
ந லிம்பதி அனுபலித்தசித்தத்தா. ஸீதிபூ⁴தோ நிப்³பு³தஸப்³ப³பரிளாஹத்தா. ஆஸத்தியோ வுச்சந்தி தண்ஹாயோ தத்த² தத்த² ஆஸஞ்ஜனட்டே²ன. த³ரத²ந்தி பரிளாஹஜாதங். சேதஸோதி ஸாமிவசனங்.
Na limpati anupalittacittattā. Sītibhūto nibbutasabbapariḷāhattā. Āsattiyo vuccanti taṇhāyo tattha tattha āsañjanaṭṭhena. Darathanti pariḷāhajātaṃ. Cetasoti sāmivacanaṃ.
ஹத்த²கஸுத்தவண்ணனா நிட்டி²தா.
Hatthakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ஹத்த²கஸுத்தங் • 5. Hatthakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. ஹத்த²கஸுத்தவண்ணனா • 5. Hatthakasuttavaṇṇanā
