| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫. হত্থকসুত্তৰণ্ণনা
5. Hatthakasuttavaṇṇanā
৩৫. পঞ্চমে আল়ৰিযন্তি আল়ৰিরট্ঠে, ন আল়ৰিনগরে। তেনাহ ‘‘আল়ৰিযন্তি আল়ৰিরট্ঠে’’তি। অথাতি অৰিচ্ছেদত্থে নিপাতো। তত্থ ভগৰতো নিসজ্জায অৰিচ্ছিন্নায এৰাতি অত্থো। তেনাহ ‘‘এৰ’’ন্তিআদি। হত্থতো হত্থং গতত্তাতি আল়ৰকস্স যক্খস্স হত্থতো সম্মাসম্বুদ্ধস্স হত্থং, ততো রাজপুরিসানং হত্থং গতত্তা।
35. Pañcame āḷaviyanti āḷaviraṭṭhe, na āḷavinagare. Tenāha ‘‘āḷaviyanti āḷaviraṭṭhe’’ti. Athāti avicchedatthe nipāto. Tattha bhagavato nisajjāya avicchinnāya evāti attho. Tenāha ‘‘eva’’ntiādi. Hatthato hatthaṃ gatattāti āḷavakassa yakkhassa hatthato sammāsambuddhassa hatthaṃ, tato rājapurisānaṃ hatthaṃ gatattā.
মাঘস্সাতি মাঘমাসস্স। এৰং ফগ্গুনস্সাতি এত্থাপি। খুরন্তরেহি কদ্দমো উগ্গন্ত্ৰা তিট্ঠতীতি কদ্দমো খুরন্তরেহি উগ্গন্ত্ৰা তিট্ঠতি। চতূহি দিসাহি ৰাযন্তো ৰাতো ৰেরম্ভোতি ৰুচ্চতি ৰেরম্ভৰাতসদিসত্তা।
Māghassāti māghamāsassa. Evaṃ phaggunassāti etthāpi. Khurantarehi kaddamo uggantvā tiṭṭhatīti kaddamo khurantarehi uggantvā tiṭṭhati. Catūhi disāhi vāyanto vāto verambhoti vuccati verambhavātasadisattā.
পঞ্চদ্ৰারকাযন্তি পঞ্চদ্ৰারানুসারেন পৰত্তং ৰিঞ্ঞাণকাযং। খোভযমানাতি কিলেসখোভৰসেন খোভযমানা চিত্তং সঙ্খোভং করোন্তা। চেতসিকাতি মনোদ্ৰারিকচিত্তসন্নিস্সিতা। তেনাহ ‘‘মনোদ্ৰারং খোভযমানা’’তি। সো রাগোতি তংসদিসো রাগো। ভৰতি হি তংসদিসে তব্বোহারো যথা ‘‘সা এৰ তিত্তিরিকা, তানি এৰ ওসধানী’’তি। যাদিসো হি একস্স পুগ্গলস্স উপ্পজ্জনকরাগো, তাদিসো এৰ ততো অঞ্ঞস্স রাগভাৰসামঞ্ঞতো। তেন ৰুত্তং ‘‘তথারূপো রাগো’’তিআদি। ইচ্ছিতালাভেন রজনীযেসু ৰা নিরুদ্ধেসু ৰত্থূসু দোমনস্সুপ্পত্তিযা দোসপরিল়াহানং সম্ভৰো ৰেদিতব্বো।
Pañcadvārakāyanti pañcadvārānusārena pavattaṃ viññāṇakāyaṃ. Khobhayamānāti kilesakhobhavasena khobhayamānā cittaṃ saṅkhobhaṃ karontā. Cetasikāti manodvārikacittasannissitā. Tenāha ‘‘manodvāraṃ khobhayamānā’’ti. So rāgoti taṃsadiso rāgo. Bhavati hi taṃsadise tabbohāro yathā ‘‘sā eva tittirikā, tāni eva osadhānī’’ti. Yādiso hi ekassa puggalassa uppajjanakarāgo, tādiso eva tato aññassa rāgabhāvasāmaññato. Tena vuttaṃ ‘‘tathārūporāgo’’tiādi. Icchitālābhena rajanīyesu vā niruddhesu vatthūsu domanassuppattiyā dosapariḷāhānaṃ sambhavo veditabbo.
ন লিম্পতি অনুপলিত্তচিত্তত্তা। সীতিভূতো নিব্বুতসব্বপরিল়াহত্তা। আসত্তিযো ৰুচ্চন্তি তণ্হাযো তত্থ তত্থ আসঞ্জনট্ঠেন। দরথন্তি পরিল়াহজাতং। চেতসোতি সামিৰচনং।
Na limpati anupalittacittattā. Sītibhūto nibbutasabbapariḷāhattā. Āsattiyo vuccanti taṇhāyo tattha tattha āsañjanaṭṭhena. Darathanti pariḷāhajātaṃ. Cetasoti sāmivacanaṃ.
হত্থকসুত্তৰণ্ণনা নিট্ঠিতা।
Hatthakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. হত্থকসুত্তং • 5. Hatthakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. হত্থকসুত্তৰণ্ণনা • 5. Hatthakasuttavaṇṇanā
