| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஹத்தி²மங்ஸாதி³படிக்கே²பகதா²
Hatthimaṃsādipaṭikkhepakathā
281. ஸுனக²மங்ஸந்தி எத்த² அரஞ்ஞகோகா நாம ஸுனக²ஸதி³ஸா ஹொந்தி, தேஸங் மங்ஸங் வட்டதி. யோ பன கா³மஸுனகி²யா வா கோகேன கோகஸுனகி²யா வா கா³மஸுனகே²ன ஸங்யோகா³ உப்பன்னோ, தஸ்ஸ மங்ஸங் ந வட்டதி, ஸோ ஹி உப⁴யங் ப⁴ஜதீதி. அஹிமங்ஸந்தி கஸ்ஸசி அபாத³கஸ்ஸ தீ³க⁴ஜாதிகஸ்ஸ மங்ஸங் ந வட்டதி. ஸீஹமங்ஸாதீ³னி பாகடானேவ.
281.Sunakhamaṃsanti ettha araññakokā nāma sunakhasadisā honti, tesaṃ maṃsaṃ vaṭṭati. Yo pana gāmasunakhiyā vā kokena kokasunakhiyā vā gāmasunakhena saṃyogā uppanno, tassa maṃsaṃ na vaṭṭati, so hi ubhayaṃ bhajatīti. Ahimaṃsanti kassaci apādakassa dīghajātikassa maṃsaṃ na vaṭṭati. Sīhamaṃsādīni pākaṭāneva.
எத்த² ச மனுஸ்ஸமங்ஸங் ஸஜாதிதாய படிக்கி²த்தங், ஹத்தி²அஸ்ஸமங்ஸங் ராஜங்க³தாய, ஸுனக²மங்ஸஞ்ச அஹிமங்ஸஞ்ச படிகூலதாய, ஸீஹமங்ஸாதீ³னி பஞ்ச அத்தனோ அனுபத்³த³வத்தா²யாதி. இமேஸங் மனுஸ்ஸாதீ³னங் த³ஸன்னங் மங்ஸம்பி அட்டி²பி லோஹிதம்பி சம்மம்பி லோமம்பி ஸப்³ப³ங் ந வட்டதி, யங்கிஞ்சி ஞத்வா வா அஞத்வா வா கா²த³ந்தஸ்ஸ ஆபத்தியேவ. யதா³ ஜானாதி, ததா³ தே³ஸேதப்³பா³. ‘‘அபுச்சி²த்வா கா²தி³ஸ்ஸாமீ’’தி க³ண்ஹதோ படிக்³க³ஹணே து³க்கடங், ‘‘புச்சி²த்வா கா²தி³ஸ்ஸாமீ’’தி க³ண்ஹதோ அனாபத்தி. உத்³தி³ஸ்ஸ கதங் பன ஜானித்வா கா²த³ந்தஸ்ஸேவ ஆபத்தி, பச்சா² ஜானந்தோ ஆபத்தியா ந காரேதப்³போ³தி.
Ettha ca manussamaṃsaṃ sajātitāya paṭikkhittaṃ, hatthiassamaṃsaṃ rājaṅgatāya, sunakhamaṃsañca ahimaṃsañca paṭikūlatāya, sīhamaṃsādīni pañca attano anupaddavatthāyāti. Imesaṃ manussādīnaṃ dasannaṃ maṃsampi aṭṭhipi lohitampi cammampi lomampi sabbaṃ na vaṭṭati, yaṃkiñci ñatvā vā añatvā vā khādantassa āpattiyeva. Yadā jānāti, tadā desetabbā. ‘‘Apucchitvā khādissāmī’’ti gaṇhato paṭiggahaṇe dukkaṭaṃ, ‘‘pucchitvā khādissāmī’’ti gaṇhato anāpatti. Uddissa kataṃ pana jānitvā khādantasseva āpatti, pacchā jānanto āpattiyā na kāretabboti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 169. ஹத்தி²மங்ஸாதி³படிக்கே²பகதா² • 169. Hatthimaṃsādipaṭikkhepakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஹத்தி²மங்ஸாதி³படிக்கே²பகதா²வண்ணனா • Hatthimaṃsādipaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 169. ஹத்தி²மங்ஸாதி³படிக்கே²பகதா² • 169. Hatthimaṃsādipaṭikkhepakathā
