| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৬৯. হত্থিমংসাদিপটিক্খেপকথা
169. Hatthimaṃsādipaṭikkhepakathā
২৮১. তেন খো পন সমযেন রঞ্ঞো হত্থী মরন্তি । মনুস্সা দুব্ভিক্খে হত্থিমংসং পরিভুঞ্জন্তি , ভিক্খূনং পিণ্ডায চরন্তানং হত্থিমংসং দেন্তি। ভিক্খূ হত্থিমংসং পরিভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা হত্থিমংসং পরিভুঞ্জিস্সন্তি। রাজঙ্গং হত্থী, সচে রাজা জানেয্য, ন নেসং অত্তমনো অস্সা’’তি। ভগৰতো এতমত্থং আরোচেসুং। ন, ভিক্খৰে, হত্থিমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সাতি।
281. Tena kho pana samayena rañño hatthī maranti . Manussā dubbhikkhe hatthimaṃsaṃ paribhuñjanti , bhikkhūnaṃ piṇḍāya carantānaṃ hatthimaṃsaṃ denti. Bhikkhū hatthimaṃsaṃ paribhuñjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthimaṃsaṃ paribhuñjissanti. Rājaṅgaṃ hatthī, sace rājā jāneyya, na nesaṃ attamano assā’’ti. Bhagavato etamatthaṃ ārocesuṃ. Na, bhikkhave, hatthimaṃsaṃ paribhuñjitabbaṃ. Yo paribhuñjeyya, āpatti dukkaṭassāti.
তেন খো পন সমযেন রঞ্ঞো অস্সা মরন্তি। মনুস্সা দুব্ভিক্খে অস্সমংসং পরিভুঞ্জন্তি, ভিক্খূনং পিণ্ডায চরন্তানং অস্সমংসং দেন্তি। ভিক্খূ অস্সমংসং পরিভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা অস্সমংসং পরিভুঞ্জিস্সন্তি। রাজঙ্গং অস্সা, সচে রাজা জানেয্য, ন নেসং অত্তমনো অস্সা’’তি। ভগৰতো এতমত্থং আরোচেসুং। ন, ভিক্খৰে, অস্সমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সাতি।
Tena kho pana samayena rañño assā maranti. Manussā dubbhikkhe assamaṃsaṃ paribhuñjanti, bhikkhūnaṃ piṇḍāya carantānaṃ assamaṃsaṃ denti. Bhikkhū assamaṃsaṃ paribhuñjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā assamaṃsaṃ paribhuñjissanti. Rājaṅgaṃ assā, sace rājā jāneyya, na nesaṃ attamano assā’’ti. Bhagavato etamatthaṃ ārocesuṃ. Na, bhikkhave, assamaṃsaṃ paribhuñjitabbaṃ. Yo paribhuñjeyya, āpatti dukkaṭassāti.
তেন খো পন সমযেন মনুস্সা দুব্ভিক্খে সুনখমংসং পরিভুঞ্জন্তি, ভিক্খূনং পিণ্ডায চরন্তানং সুনখমংসং দেন্তি। ভিক্খূ সুনখমংসং পরিভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সুনখমংসং পরিভুঞ্জিস্সন্তি, জেগুচ্ছো সুনখো পটিকূলো’’তি। ভগৰতো এতমত্থং আরোচেসুং। ন, ভিক্খৰে, সুনখমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সাতি।
Tena kho pana samayena manussā dubbhikkhe sunakhamaṃsaṃ paribhuñjanti, bhikkhūnaṃ piṇḍāya carantānaṃ sunakhamaṃsaṃ denti. Bhikkhū sunakhamaṃsaṃ paribhuñjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā sunakhamaṃsaṃ paribhuñjissanti, jeguccho sunakho paṭikūlo’’ti. Bhagavato etamatthaṃ ārocesuṃ. Na, bhikkhave, sunakhamaṃsaṃ paribhuñjitabbaṃ. Yo paribhuñjeyya, āpatti dukkaṭassāti.
তেন খো পন সমযেন মনুস্সা দুব্ভিক্খে অহিমংসং পরিভুঞ্জন্তি, ভিক্খূনং পিণ্ডায চরন্তানং অহিমংসং দেন্তি। ভিক্খূ অহিমংসং পরিভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা অহিমংসং পরিভুঞ্জিস্সন্তি, জেগুচ্ছো অহি পটিকূলো’’তি। সুপস্সোপি 1 নাগরাজা যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতো খো সুপস্সো নাগরাজা ভগৰন্তং এতদৰোচ – ‘‘সন্তি, ভন্তে, নাগা অস্সদ্ধা অপ্পসন্না। তে অপ্পমত্তকেহিপি ভিক্খূ ৰিহেঠেয্যুং। সাধু, ভন্তে, অয্যা অহিমংসং ন পরিভুঞ্জেয্যু’’ন্তি। অথ খো ভগৰা সুপস্সং নাগরাজানং ধম্মিযা কথায সন্দস্সেসি…পে॰… পদক্খিণং কত্ৰা পক্কামি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, অহিমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সা’’তি।
Tena kho pana samayena manussā dubbhikkhe ahimaṃsaṃ paribhuñjanti, bhikkhūnaṃ piṇḍāya carantānaṃ ahimaṃsaṃ denti. Bhikkhū ahimaṃsaṃ paribhuñjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā ahimaṃsaṃ paribhuñjissanti, jeguccho ahi paṭikūlo’’ti. Supassopi 2 nāgarājā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho supasso nāgarājā bhagavantaṃ etadavoca – ‘‘santi, bhante, nāgā assaddhā appasannā. Te appamattakehipi bhikkhū viheṭheyyuṃ. Sādhu, bhante, ayyā ahimaṃsaṃ na paribhuñjeyyu’’nti. Atha kho bhagavā supassaṃ nāgarājānaṃ dhammiyā kathāya sandassesi…pe… padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘na, bhikkhave, ahimaṃsaṃ paribhuñjitabbaṃ. Yo paribhuñjeyya, āpatti dukkaṭassā’’ti.
তেন খো পন সমযেন লুদ্দকা সীহং হন্ত্ৰা সীহমংসং 3 পরিভুঞ্জন্তি, ভিক্খূনং পিণ্ডায চরন্তানং সীহমংসং দেন্তি। ভিক্খূ সীহমংসং পরিভুঞ্জিত্ৰা অরঞ্ঞে ৰিহরন্তি। সীহা সীহমংসগন্ধেন ভিক্খূ পরিপাতেন্তি। ভগৰতো এতমত্থং আরোচেসুং। ন, ভিক্খৰে, সীহমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সাতি।
Tena kho pana samayena luddakā sīhaṃ hantvā sīhamaṃsaṃ 4 paribhuñjanti, bhikkhūnaṃ piṇḍāya carantānaṃ sīhamaṃsaṃ denti. Bhikkhū sīhamaṃsaṃ paribhuñjitvā araññe viharanti. Sīhā sīhamaṃsagandhena bhikkhū paripātenti. Bhagavato etamatthaṃ ārocesuṃ. Na, bhikkhave, sīhamaṃsaṃ paribhuñjitabbaṃ. Yo paribhuñjeyya, āpatti dukkaṭassāti.
তেন খো পন সমযেন লুদ্দকা ব্যগ্ঘং হন্ত্ৰা…পে॰… দীপিং হন্ত্ৰা…পে॰… অচ্ছং হন্ত্ৰা…পে॰… তরচ্ছং হন্ত্ৰা তরচ্ছমংসং পরিভুঞ্জন্তি, ভিক্খূনং পিণ্ডায চরন্তানং তরচ্ছমংসং দেন্তি। ভিক্খূ তরচ্ছমংসং পরিভুঞ্জিত্ৰা অরঞ্ঞে ৰিহরন্তি। তরচ্ছা তরচ্ছমংসগন্ধেন ভিক্খূ পরিপাতেন্তি। ভগৰতো এতমত্থং আরোচেসুং। ন, ভিক্খৰে, তরচ্ছমংসং পরিভুঞ্জিতব্বং। যো পরিভুঞ্জেয্য, আপত্তি দুক্কটস্সাতি।
Tena kho pana samayena luddakā byagghaṃ hantvā…pe… dīpiṃ hantvā…pe… acchaṃ hantvā…pe… taracchaṃ hantvā taracchamaṃsaṃ paribhuñjanti, bhikkhūnaṃ piṇḍāya carantānaṃ taracchamaṃsaṃ denti. Bhikkhū taracchamaṃsaṃ paribhuñjitvā araññe viharanti. Taracchā taracchamaṃsagandhena bhikkhū paripātenti. Bhagavato etamatthaṃ ārocesuṃ. Na, bhikkhave, taracchamaṃsaṃ paribhuñjitabbaṃ. Yo paribhuñjeyya, āpatti dukkaṭassāti.
হত্থিমংসাদিপটিক্খেপকথা নিট্ঠিতা।
Hatthimaṃsādipaṭikkhepakathā niṭṭhitā.
সুপ্পিযভাণৰারো নিট্ঠিতো দুতিযো।
Suppiyabhāṇavāro niṭṭhito dutiyo.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / হত্থিমংসাদিপটিক্খেপকথা • Hatthimaṃsādipaṭikkhepakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / হত্থিমংসাদিপটিক্খেপকথাৰণ্ণনা • Hatthimaṃsādipaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৬৯. হত্থিমংসাদিপটিক্খেপকথা • 169. Hatthimaṃsādipaṭikkhepakathā
