| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
হত্থিমংসাদিপটিক্খেপকথাৰণ্ণনা
Hatthimaṃsādipaṭikkhepakathāvaṇṇanā
২৮১. ইমেসং …পে॰… সব্বং ন ৰট্টতীতি ইদং দসন্নম্পি মনুস্সমংসাদীনং অকপ্পিযভাৰমত্তপরিদীপনৰচনং, নাপত্তিৰিভাগদস্সনৰচনং। যং কিঞ্চি ঞত্ৰা ৰা অঞত্ৰা ৰা খাদন্তস্স আপত্তিযেৰাতি ইদম্পি অনিযমিতৰচনমেৰ ‘‘অযং নাম আপত্তী’’তি অৰুত্তত্তা । তদুভযম্পি হেট্ঠা মনুস্সাদীনং মংসাদীসু থুল্লচ্চযদুক্কটাপত্তিযো হোন্তীতি গহিতনযেহি অধিপ্পাযো জানিতুং সক্কাতি এৰং ৰুত্তং। তত্রাযং অধিপ্পাযো – যস্মা এতেসং মনুস্সাদীনং মংসাদীনি অকপ্পিযানি, তস্মা মনুস্সানং মংসাদীসু থুল্লচ্চযাপত্তি। সেসানং সব্বত্থ দুক্কটাপত্তীতি। পাঠেযেৰ হি লোহিতাদিং মংসগতিকং কত্ৰা ‘‘ন, ভিক্খৰে, মনুস্সমংসং…পে॰… থুল্লচ্চযস্সা’’তি ৰুত্তং। তত্থেৰ হত্থাদীনং মংসাদীসুপি দুক্কটাপত্তি পঞ্ঞত্তা। তেন ৰুত্তং সীহল়ট্ঠকথাযং ‘‘মনুস্সমংসে ৰা কেসে ৰা নখে ৰা অট্ঠিম্হি ৰা লোহিতে ৰা থুল্লচ্চযমেৰা’’তি ৰুত্তং। ইমিনা এৰ –
281.Imesaṃ…pe… sabbaṃ na vaṭṭatīti idaṃ dasannampi manussamaṃsādīnaṃ akappiyabhāvamattaparidīpanavacanaṃ, nāpattivibhāgadassanavacanaṃ. Yaṃ kiñci ñatvā vā añatvā vā khādantassa āpattiyevāti idampi aniyamitavacanameva ‘‘ayaṃ nāma āpattī’’ti avuttattā . Tadubhayampi heṭṭhā manussādīnaṃ maṃsādīsu thullaccayadukkaṭāpattiyo hontīti gahitanayehi adhippāyo jānituṃ sakkāti evaṃ vuttaṃ. Tatrāyaṃ adhippāyo – yasmā etesaṃ manussādīnaṃ maṃsādīni akappiyāni, tasmā manussānaṃ maṃsādīsu thullaccayāpatti. Sesānaṃ sabbattha dukkaṭāpattīti. Pāṭheyeva hi lohitādiṃ maṃsagatikaṃ katvā ‘‘na, bhikkhave, manussamaṃsaṃ…pe… thullaccayassā’’ti vuttaṃ. Tattheva hatthādīnaṃ maṃsādīsupi dukkaṭāpatti paññattā. Tena vuttaṃ sīhaḷaṭṭhakathāyaṃ ‘‘manussamaṃse vā kese vā nakhe vā aṭṭhimhi vā lohite vā thullaccayamevā’’ti vuttaṃ. Iminā eva –
‘‘অট্ঠিপি লোহিতং চম্মং, লোমমেসং ন কপ্পতী’’তি॥ –
‘‘Aṭṭhipi lohitaṃ cammaṃ, lomamesaṃ na kappatī’’ti. –
খুদ্দসিক্খাগাথাপদস্স অত্থো চ অধিপ্পাযো চ সুৰিঞ্ঞেয্যোতি। পটিগ্গহণেতি এত্থ অনাদরিযদুক্কটং ৰুত্তং। ‘‘উদকমনুস্সাদিমংসম্পি ন ৰট্টতী’’তি ৰদন্তি। নাগরাজেন ৰুত্তাদীনৰে সতিপি উজ্ঝাযনাধিকারমেৰ গহেত্ৰা ‘‘পটিকূলতাযা’’তি ৰুত্তং।
Khuddasikkhāgāthāpadassa attho ca adhippāyo ca suviññeyyoti. Paṭiggahaṇeti ettha anādariyadukkaṭaṃ vuttaṃ. ‘‘Udakamanussādimaṃsampi na vaṭṭatī’’ti vadanti. Nāgarājena vuttādīnave satipi ujjhāyanādhikārameva gahetvā ‘‘paṭikūlatāyā’’ti vuttaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৬৯. হত্থিমংসাদিপটিক্খেপকথা • 169. Hatthimaṃsādipaṭikkhepakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / হত্থিমংসাদিপটিক্খেপকথা • Hatthimaṃsādipaṭikkhepakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৬৯. হত্থিমংসাদিপটিক্খেপকথা • 169. Hatthimaṃsādipaṭikkhepakathā
