Library / Tipiṭaka / តិបិដក • Tipiṭaka / ជាតកបាឡិ • Jātakapāḷi

    ៥០៩. ហត្ថិបាលជាតកំ (១៣)

    509. Hatthipālajātakaṃ (13)

    ៣៣៧.

    337.

    ចិរស្សំ វត បស្សាម, ព្រាហ្មណំ ទេវវណ្ណិនំ;

    Cirassaṃ vata passāma, brāhmaṇaṃ devavaṇṇinaṃ;

    មហាជដំ ខារិធរំ 1, បង្កទន្តំ រជស្សិរំ។

    Mahājaṭaṃ khāridharaṃ 2, paṅkadantaṃ rajassiraṃ.

    ៣៣៨.

    338.

    ចិរស្សំ វត បស្សាម, ឥសិំ ធម្មគុណេ រតំ;

    Cirassaṃ vata passāma, isiṃ dhammaguṇe rataṃ;

    កាសាយវត្ថវសនំ, វាកចីរំ បដិច្ឆទំ។

    Kāsāyavatthavasanaṃ, vākacīraṃ paṭicchadaṃ.

    ៣៣៩.

    339.

    អាសនំ ឧទកំ បជ្ជំ, បដិគណ្ហាតុ នោ ភវំ;

    Āsanaṃ udakaṃ pajjaṃ, paṭigaṇhātu no bhavaṃ;

    អគ្ឃេ ភវន្តំ បុច្ឆាម, អគ្ឃំ កុរុតុ នោ ភវំ។

    Agghe bhavantaṃ pucchāma, agghaṃ kurutu no bhavaṃ.

    ៣៤០.

    340.

    អធិច្ច វេទេ បរិយេស វិត្តំ, បុត្តេ គហេ 3 តាត បតិដ្ឋបេត្វា;

    Adhicca vede pariyesa vittaṃ, putte gahe 4 tāta patiṭṭhapetvā;

    គន្ធេ រសេ បច្ចនុភុយ្យ 5 សព្ពំ, អរញ្ញំ សាធុ មុនិ សោ បសត្ថោ។

    Gandhe rase paccanubhuyya 6 sabbaṃ, araññaṃ sādhu muni so pasattho.

    ៣៤១.

    341.

    វេទា ន សច្ចា ន ច វិត្តលាភោ, ន បុត្តលាភេន ជរំ វិហន្តិ;

    Vedā na saccā na ca vittalābho, na puttalābhena jaraṃ vihanti;

    គន្ធេ រសេ មុច្ចន 7 មាហុ សន្តោ, សកម្មុនា 8 ហោតិ ផលូបបត្តិ។

    Gandhe rase muccana 9 māhu santo, sakammunā 10 hoti phalūpapatti.

    ៣៤២.

    342.

    អទ្ធា ហិ សច្ចំ វចនំ តវេតំ, សកម្មុនា ហោតិ ផលូបបត្តិ;

    Addhā hi saccaṃ vacanaṃ tavetaṃ, sakammunā hoti phalūpapatti;

    ជិណ្ណា ច មាតាបិតរោ តវីមេ 11, បស្សេយ្យុំ តំ វស្សសតំ អរោគំ 12។

    Jiṇṇā ca mātāpitaro tavīme 13, passeyyuṃ taṃ vassasataṃ arogaṃ 14.

    ៣៤៣.

    343.

    យស្សស្ស សក្ខី មរណេន រាជ, ជរាយ មេត្តី នរវីរសេដ្ឋ;

    Yassassa sakkhī maraṇena rāja, jarāya mettī naravīraseṭṭha;

    យោ ចាបិ ជញ្ញា ន មរិស្សំ កទាចិ, បស្សេយ្យុំ តំ វស្សសតំ អរោគំ។

    Yo cāpi jaññā na marissaṃ kadāci, passeyyuṃ taṃ vassasataṃ arogaṃ.

    ៣៤៤.

    344.

    យថាបិ នាវំ បុរិសោ ទកម្ហិ, ឯរេតិ ចេ នំ ឧបនេតិ តីរំ;

    Yathāpi nāvaṃ puriso dakamhi, ereti ce naṃ upaneti tīraṃ;

    ឯវម្បិ ព្យាធី សតតំ ជរា ច, ឧបនេតិ មច្ចំ 15 វសមន្តកស្ស។

    Evampi byādhī satataṃ jarā ca, upaneti maccaṃ 16 vasamantakassa.

    ៣៤៥.

    345.

    បង្កោ ច កាមា បលិបោ ច កាមា, មនោហរា ទុត្តរា មច្ចុធេយ្យា;

    Paṅko ca kāmā palipo ca kāmā, manoharā duttarā maccudheyyā;

    ឯតស្មិំ បង្កេ បលិបេ ព្យសន្នា 17, ហីនត្តរូបា ន តរន្តិ បារំ។

    Etasmiṃ paṅke palipe byasannā 18, hīnattarūpā na taranti pāraṃ.

    ៣៤៦.

    346.

    អយំ បុរេ លុទ្ទមកាសិ កម្មំ, ស្វាយំ គហីតោ ន ហិ មោក្ខិតោ មេ;

    Ayaṃ pure luddamakāsi kammaṃ, svāyaṃ gahīto na hi mokkhito me;

    ឱរុន្ធិយា នំ បរិរក្ខិស្សាមិ, មាយំ បុន លុទ្ទមកាសិ កម្មំ។

    Orundhiyā naṃ parirakkhissāmi, māyaṃ puna luddamakāsi kammaṃ.

    ៣៤៧.

    347.

    គវំវ 19 នដ្ឋំ បុរិសោ យថា វនេ, អន្វេសតី 20 រាជ អបស្សមានោ;

    Gavaṃva 21 naṭṭhaṃ puriso yathā vane, anvesatī 22 rāja apassamāno;

    ឯវំ នដ្ឋោ ឯសុការី មមត្ថោ, សោហំ កថំ ន គវេសេយ្យំ រាជ។

    Evaṃ naṭṭho esukārī mamattho, sohaṃ kathaṃ na gaveseyyaṃ rāja.

    ៣៤៨.

    348.

    ហិយ្យោតិ ហិយ្យតិ 23 បោសោ, បរេតិ បរិហាយតិ;

    Hiyyoti hiyyati 24 poso, pareti parihāyati;

    អនាគតំ នេតមត្ថីតិ ញត្វា, ឧប្បន្នឆន្ទំ កោ បនុទេយ្យ ធីរោ។

    Anāgataṃ netamatthīti ñatvā, uppannachandaṃ ko panudeyya dhīro.

    ៣៤៩.

    349.

    បស្សាមិ វោហំ ទហរំ 25 កុមារិំ, មត្តូបមំ កេតកបុប្ផនេត្តំ;

    Passāmi vohaṃ daharaṃ 26 kumāriṃ, mattūpamaṃ ketakapupphanettaṃ;

    អភុត្តភោគេ 27 បឋមេ វយស្មិំ, អាទាយ មច្ចុ វជតេ កុមារិំ។

    Abhuttabhoge 28 paṭhame vayasmiṃ, ādāya maccu vajate kumāriṃ.

    ៣៥០.

    350.

    យុវា សុជាតោ សុមុខោ សុទស្សនោ, សាមោ កុសុម្ភបរិកិណ្ណមស្សុ;

    Yuvā sujāto sumukho sudassano, sāmo kusumbhaparikiṇṇamassu;

    ហិត្វាន កាមេ បដិកច្ច 29 គេហំ, អនុជាន មំ បព្ពជិស្សាមិ ទេវ។

    Hitvāna kāme paṭikacca 30 gehaṃ, anujāna maṃ pabbajissāmi deva.

    ៣៥១.

    351.

    សាខាហិ រុក្ខោ លភតេ សមញ្ញំ, បហីនសាខំ បន ខាណុមាហុ;

    Sākhāhi rukkho labhate samaññaṃ, pahīnasākhaṃ pana khāṇumāhu;

    បហីនបុត្តស្ស មមជ្ជ ភោតិ, វាសេដ្ឋិ ភិក្ខាចរិយាយ កាលោ។

    Pahīnaputtassa mamajja bhoti, vāseṭṭhi bhikkhācariyāya kālo.

    ៣៥២.

    352.

    អឃស្មិ កោញ្ចាវ យថា ហិមច្ចយេ, កតានិ 31 ជាលានិ បទាលិយ 32 ហំសា;

    Aghasmi koñcāva yathā himaccaye, katāni 33 jālāni padāliya 34 haṃsā;

    គច្ឆន្តិ បុត្តា ច បតី ច មយ្ហំ, សាហំ កថំ នានុវជេ បជានំ។

    Gacchanti puttā ca patī ca mayhaṃ, sāhaṃ kathaṃ nānuvaje pajānaṃ.

    ៣៥៣.

    353.

    ឯតេ ភុត្វា វមិត្វា ច, បក្កមន្តិ វិហង្គមា;

    Ete bhutvā vamitvā ca, pakkamanti vihaṅgamā;

    យេ ច ភុត្វាន វមិំសុ, តេ មេ ហត្ថត្ត 35 មាគតា។

    Ye ca bhutvāna vamiṃsu, te me hatthatta 36 māgatā.

    ៣៥៤.

    354.

    អវមី ព្រាហ្មណោ កាមេ, សោ 37 ត្វំ បច្ចាវមិស្សសិ;

    Avamī brāhmaṇo kāme, so 38 tvaṃ paccāvamissasi;

    វន្តាទោ បុរិសោ រាជ, ន សោ ហោតិ បសំសិយោ។

    Vantādo puriso rāja, na so hoti pasaṃsiyo.

    ៣៥៥.

    355.

    បង្កេ ច 39 បោសំ បលិបេ ព្យសន្នំ, ពលី យថា ទុព្ពលមុទ្ធរេយ្យ;

    Paṅke ca 40 posaṃ palipe byasannaṃ, balī yathā dubbalamuddhareyya;

    ឯវម្បិ មំ ត្វំ ឧទតារិ ភោតិ, បញ្ចាលិ គាថាហិ សុភាសិតាហិ។

    Evampi maṃ tvaṃ udatāri bhoti, pañcāli gāthāhi subhāsitāhi.

    ៣៥៦.

    356.

    ឥទំ វត្វា មហារាជា, ឯសុការី ទិសម្បតិ;

    Idaṃ vatvā mahārājā, esukārī disampati;

    រដ្ឋំ ហិត្វាន បព្ពជិ, នាគោ ឆេត្វាវ ពន្ធនំ។

    Raṭṭhaṃ hitvāna pabbaji, nāgo chetvāva bandhanaṃ.

    ៣៥៧.

    357.

    រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

    Rājā ca pabbajjamarocayittha, raṭṭhaṃ pahāya naravīraseṭṭho;

    តុវម្បិ នោ ហោតិ យថេវ រាជា, អម្ហេហិ គុត្តា អនុសាស រជ្ជំ។

    Tuvampi no hoti yatheva rājā, amhehi guttā anusāsa rajjaṃ.

    ៣៥៨.

    358.

    រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

    Rājā ca pabbajjamarocayittha, raṭṭhaṃ pahāya naravīraseṭṭho;

    អហម្បិ ឯកា 41 ចរិស្សាមិ លោកេ, ហិត្វាន កាមានិ មនោរមានិ។

    Ahampi ekā 42 carissāmi loke, hitvāna kāmāni manoramāni.

    ៣៥៩.

    359.

    រាជា ច បព្ពជ្ជមរោចយិត្ថ, រដ្ឋំ បហាយ នរវីរសេដ្ឋោ;

    Rājā ca pabbajjamarocayittha, raṭṭhaṃ pahāya naravīraseṭṭho;

    អហម្បិ ឯកា ចរិស្សាមិ លោកេ, ហិត្វាន កាមានិ យថោធិកានិ។

    Ahampi ekā carissāmi loke, hitvāna kāmāni yathodhikāni.

    ៣៦០.

    360.

    អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

    Accenti kālā tarayanti rattiyo, vayoguṇā anupubbaṃ jahanti;

    អហម្បិ ឯកា ចរិស្សាមិ លោកេ, ហិត្វាន កាមានិ មនោរមានិ។

    Ahampi ekā carissāmi loke, hitvāna kāmāni manoramāni.

    ៣៦១.

    361.

    អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

    Accenti kālā tarayanti rattiyo, vayoguṇā anupubbaṃ jahanti;

    អហម្បិ ឯកា ចរិស្សាមិ លោកេ, ហិត្វាន កាមានិ យថោធិកានិ។

    Ahampi ekā carissāmi loke, hitvāna kāmāni yathodhikāni.

    ៣៦២.

    362.

    អច្ចេន្តិ កាលា តរយន្តិ រត្តិយោ, វយោគុណា អនុបុព្ពំ ជហន្តិ;

    Accenti kālā tarayanti rattiyo, vayoguṇā anupubbaṃ jahanti;

    អហម្បិ ឯកា ចរិស្សាមិ លោកេ, សីតិភូតា 43 សព្ពមតិច្ច សង្គន្តិ។

    Ahampi ekā carissāmi loke, sītibhūtā 44 sabbamaticca saṅganti.

    ហត្ថិបាលជាតកំ តេរសមំ។

    Hatthipālajātakaṃ terasamaṃ.




    Next: ៥១០. អយោឃរជាតកំ • 510. Ayogharajātakaṃ




    Footnotes:
    1. ភារធរំ (បី.)
    2. bhāradharaṃ (pī.)
    3. គេហេ (សី. ស្យា. បី.)
    4. gehe (sī. syā. pī.)
    5. បច្ចនុភោត្វ (ស្យា.), បច្ចនុភុត្វ (បី.)
    6. paccanubhotva (syā.), paccanubhutva (pī.)
    7. មុញ្ចន (សី. ក.)
    8. សកម្មនា (សី. បី.)
    9. muñcana (sī. ka.)
    10. sakammanā (sī. pī.)
    11. តវេមេ (សី.), តវ យិមេ (ស្យា. បី.)
    12. អរោគ្យំ (ស្យា. ក.)
    13. taveme (sī.), tava yime (syā. pī.)
    14. arogyaṃ (syā. ka.)
    15. មច្ចុ (ស្យា. បី.)
    16. maccu (syā. pī.)
    17. វិសន្នា (ស្យា. ក.)
    18. visannā (syā. ka.)
    19. គាវំវ (សី.)
    20. បរិយេសតី (សី. បី.)
    21. gāvaṃva (sī.)
    22. pariyesatī (sī. pī.)
    23. ហីយោតិ ហីយតិ (សី.)
    24. hīyoti hīyati (sī.)
    25. ទហរី (ស្យា. បី. ក.)
    26. daharī (syā. pī. ka.)
    27. អភុត្វ ភោគេ (ស្យា. ក. អដ្ឋ.), អភុត្វ ភោគេ (បី.), ភោគេ អតុត្វា (ក.)
    28. abhutva bhoge (syā. ka. aṭṭha.), abhutva bhoge (pī.), bhoge atutvā (ka.)
    29. បដិគច្ច (សី.), បដិគច្ឆ (ស្យា. បី.)
    30. paṭigacca (sī.), paṭigaccha (syā. pī.)
    31. តន្តានិ (សី. បី.)
    32. បទាលេយ្យ (សី.)
    33. tantāni (sī. pī.)
    34. padāleyya (sī.)
    35. ហត្ថត្ថ (សី. ស្យា. បី.)
    36. hatthattha (sī. syā. pī.)
    37. តេ (សី. បី.)
    38. te (sī. pī.)
    39. បង្កេវ (សី. បី.)
    40. paṅkeva (sī. pī.)
    41. ឯកាវ (សី.)
    42. ekāva (sī.)
    43. សីតីភូតា (សី.)
    44. sītībhūtā (sī.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៥០៩] ១៣. ហត្ថិបាលជាតកវណ្ណនា • [509] 13. Hatthipālajātakavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact