| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ஹத்தி²ராஜவண்ணஸுத்தங்
2. Hatthirājavaṇṇasuttaṃ
138. ஏவங் மே ஸுதங் – ஏகங் ஸமயங் ப⁴க³வா உருவேலாயங் விஹரதி நஜ்ஜா நேரஞ்ஜராய தீரே அஜபாலனிக்³ரோத⁴மூலே பட²மாபி⁴ஸம்பு³த்³தோ⁴ . தேன கோ² பன ஸமயேன ப⁴க³வா ரத்தந்த⁴காரதிமிஸாயங் அப்³போ⁴காஸே நிஸின்னோ ஹோதி, தே³வோ ச ஏகமேகங் பு²ஸாயதி. அத² கோ² மாரோ பாபிமா ப⁴க³வதோ ப⁴யங் ச²ம்பி⁴தத்தங் லோமஹங்ஸங் உப்பாதே³துகாமோ மஹந்தங் ஹத்தி²ராஜவண்ணங் அபி⁴னிம்மினித்வா யேன ப⁴க³வா தேனுபஸங்கமி. ஸெய்யதா²பி நாம மஹாஅரிட்ட²கோ மணி, ஏவமஸ்ஸ ஸீஸங் ஹோதி. ஸெய்யதா²பி நாம ஸுத்³த⁴ங் ரூபியங், ஏவமஸ்ஸ த³ந்தா ஹொந்தி. ஸெய்யதா²பி நாம மஹதீ நங்க³லீஸா 1, ஏவமஸ்ஸ ஸொண்டோ³ ஹோதி. அத² கோ² ப⁴க³வா ‘‘மாரோ அயங் பாபிமா’’ இதி விதி³த்வா மாரங் பாபிமந்தங் கா³தா²ய அஜ்ஜ²பா⁴ஸி –
138. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho . Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati. Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ hatthirājavaṇṇaṃ abhinimminitvā yena bhagavā tenupasaṅkami. Seyyathāpi nāma mahāariṭṭhako maṇi, evamassa sīsaṃ hoti. Seyyathāpi nāma suddhaṃ rūpiyaṃ, evamassa dantā honti. Seyyathāpi nāma mahatī naṅgalīsā 2, evamassa soṇḍo hoti. Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāya ajjhabhāsi –
‘‘ஸங்ஸரங் தீ³க⁴மத்³தா⁴னங், வண்ணங் கத்வா ஸுபா⁴ஸுப⁴ங்;
‘‘Saṃsaraṃ dīghamaddhānaṃ, vaṇṇaṃ katvā subhāsubhaṃ;
அலங் தே தேன பாபிம, நிஹதோ த்வமஸி அந்தகா’’தி.
Alaṃ te tena pāpima, nihato tvamasi antakā’’ti.
அத² கோ² மாரோ பாபிமா ‘‘ஜானாதி மங் ப⁴க³வா, ஜானாதி மங் ஸுக³தோ’’தி து³க்கீ² து³ம்மனோ தத்தே²வந்தரதா⁴யீதி.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. ஹத்தி²ராஜவண்ணஸுத்தவண்ணனா • 2. Hatthirājavaṇṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. ஹத்தி²ராஜவண்ணஸுத்தவண்ணனா • 2. Hatthirājavaṇṇasuttavaṇṇanā
