| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. হত্থিরাজৰণ্ণসুত্তং
2. Hatthirājavaṇṇasuttaṃ
১৩৮. এৰং মে সুতং – একং সমযং ভগৰা উরুৰেলাযং ৰিহরতি নজ্জা নেরঞ্জরায তীরে অজপালনিগ্রোধমূলে পঠমাভিসম্বুদ্ধো । তেন খো পন সমযেন ভগৰা রত্তন্ধকারতিমিসাযং অব্ভোকাসে নিসিন্নো হোতি, দেৰো চ একমেকং ফুসাযতি। অথ খো মারো পাপিমা ভগৰতো ভযং ছম্ভিতত্তং লোমহংসং উপ্পাদেতুকামো মহন্তং হত্থিরাজৰণ্ণং অভিনিম্মিনিত্ৰা যেন ভগৰা তেনুপসঙ্কমি। সেয্যথাপি নাম মহাঅরিট্ঠকো মণি, এৰমস্স সীসং হোতি। সেয্যথাপি নাম সুদ্ধং রূপিযং, এৰমস্স দন্তা হোন্তি। সেয্যথাপি নাম মহতী নঙ্গলীসা 1, এৰমস্স সোণ্ডো হোতি। অথ খো ভগৰা ‘‘মারো অযং পাপিমা’’ ইতি ৰিদিত্ৰা মারং পাপিমন্তং গাথায অজ্ঝভাসি –
138. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho . Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati. Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ hatthirājavaṇṇaṃ abhinimminitvā yena bhagavā tenupasaṅkami. Seyyathāpi nāma mahāariṭṭhako maṇi, evamassa sīsaṃ hoti. Seyyathāpi nāma suddhaṃ rūpiyaṃ, evamassa dantā honti. Seyyathāpi nāma mahatī naṅgalīsā 2, evamassa soṇḍo hoti. Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāya ajjhabhāsi –
‘‘সংসরং দীঘমদ্ধানং, ৰণ্ণং কত্ৰা সুভাসুভং।
‘‘Saṃsaraṃ dīghamaddhānaṃ, vaṇṇaṃ katvā subhāsubhaṃ;
অলং তে তেন পাপিম, নিহতো ত্ৰমসি অন্তকা’’তি॥
Alaṃ te tena pāpima, nihato tvamasi antakā’’ti.
অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. হত্থিরাজৰণ্ণসুত্তৰণ্ণনা • 2. Hatthirājavaṇṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. হত্থিরাজৰণ্ণসুত্তৰণ্ণনা • 2. Hatthirājavaṇṇasuttavaṇṇanā
