| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. හත්‌ථිරාජවණ්‌ණසුත්‌තං
2. Hatthirājavaṇṇasuttaṃ
138. එවං මෙ සුතං – එකං සමයං භගවා උරුවෙලායං විහරති නජ්‌ජා නෙරඤ්‌ජරාය තීරෙ අජපාලනිග්‍රොධමූලෙ පඨමාභිසම්‌බුද්‌ධො . තෙන ඛො පන සමයෙන භගවා රත්‌තන්‌ධකාරතිමිසායං අබ්‌භොකාසෙ නිසින්‌නො හොති, දෙවො ච එකමෙකං ඵුසායති. අථ ඛො මාරො පාපිමා භගවතො භයං ඡම්‌භිතත්‌තං ලොමහංසං උප්‌පාදෙතුකාමො මහන්‌තං හත්‌ථිරාජවණ්‌ණං අභිනිම්‌මිනිත්‌වා යෙන භගවා තෙනුපසඞ්‌කමි. සෙය්‍යථාපි නාම මහාඅරිට්‌ඨකො මණි, එවමස්‌ස සීසං හොති. සෙය්‍යථාපි නාම සුද්‌ධං රූපියං, එවමස්‌ස දන්‌තා හොන්‌ති. සෙය්‍යථාපි නාම මහතී නඞ්‌ගලීසා 1, එවමස්‌ස සොණ්‌ඩො හොති. අථ ඛො භගවා ‘‘මාරො අයං පාපිමා’’ ඉති විදිත්‌වා මාරං පාපිමන්‌තං ගාථාය අජ්‌ඣභාසි –
138. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho . Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati. Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ hatthirājavaṇṇaṃ abhinimminitvā yena bhagavā tenupasaṅkami. Seyyathāpi nāma mahāariṭṭhako maṇi, evamassa sīsaṃ hoti. Seyyathāpi nāma suddhaṃ rūpiyaṃ, evamassa dantā honti. Seyyathāpi nāma mahatī naṅgalīsā 2, evamassa soṇḍo hoti. Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāya ajjhabhāsi –
‘‘සංසරං දීඝමද්‌ධානං, වණ්‌ණං කත්‌වා සුභාසුභං;
‘‘Saṃsaraṃ dīghamaddhānaṃ, vaṇṇaṃ katvā subhāsubhaṃ;
අලං තෙ තෙන පාපිම, නිහතො ත්‌වමසි අන්‌තකා’’ති.
Alaṃ te tena pāpima, nihato tvamasi antakā’’ti.
අථ ඛො මාරො පාපිමා ‘‘ජානාති මං භගවා, ජානාති මං සුගතො’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. හත්‌ථිරාජවණ්‌ණසුත්‌තවණ්‌ණනා • 2. Hatthirājavaṇṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. හත්‌ථිරාජවණ්‌ණසුත්‌තවණ්‌ණනා • 2. Hatthirājavaṇṇasuttavaṇṇanā
