| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. ஹத்தி²ராஜவண்ணஸுத்தவண்ணனா
2. Hatthirājavaṇṇasuttavaṇṇanā
138. து³தியே ரத்தந்த⁴காரதிமிஸாயந்தி ரத்திங் அந்த⁴பா⁴வகாரகே மஹாதமே சதுரங்கே³ தமஸி. அப்³போ⁴காஸே நிஸின்னோ ஹோதீதி க³ந்த⁴குடிதோ நிக்க²மித்வா சங்கமனகோடியங் பாஸாணப²லகே மஹாசீவரங் ஸீஸே ட²பெத்வா பதா⁴னங் பரிக்³க³ண்ஹமானோ நிஸின்னோ ஹோதி.
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
நனு ச ததா²க³தஸ்ஸ அபா⁴விதோ வா மக்³கோ³, அப்பஹீனா வா கிலேஸா, அப்படிவித்³த⁴ங் வா அகுப்பங், அஸச்சி²கதோ வா நிரோதோ⁴ நத்தி², கஸ்மா ஏவமகாஸீதி? அனாக³தே குலபுத்தானங் அங்குஸத்த²ங். ‘‘அனாக³தே ஹி குலபுத்தா மயா க³தமக்³க³ங் ஆவஜ்ஜித்வா அப்³போ⁴காஸவாஸங் வஸிதப்³ப³ங் மஞ்ஞமானா பதா⁴னகம்மங் கரிஸ்ஸந்தீ’’தி ஸம்பஸ்ஸமானோ ஸத்தா² ஏவமகாஸி. மஹாதி மஹந்தோ. அரிட்ட²கோதி காளகோ. மணீதி பாஸாணோ. ஏவமஸ்ஸ ஸீஸங் ஹோதீதி ஏவரூபங் தஸ்ஸ காளவண்ணங் கூடாகா³ரப்பமாணங் மஹாபாஸாணஸதி³ஸங் ஸீஸங் ஹோதி.
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
ஸுபா⁴ஸுப⁴ந்தி தீ³க⁴மத்³தா⁴னங் ஸங்ஸரந்தோ ஸுந்த³ராஸுந்த³ரங் வண்ணங் கத்வா ஆக³தோஸீதி வத³தி. அத² வா ஸங்ஸரந்தி ஸங்ஸரந்தோ ஆக³ச்ச²ந்தோ. தீ³க⁴மத்³தா⁴னந்தி வஸவத்திட்டா²னதோ யாவ உருவேலாய தீ³க⁴மக்³க³ங், புரே போ³தா⁴ய வா ச²ப்³ப³ஸ்ஸானி து³க்கரகாரிகஸமயஸங்கா²தங் தீ³க⁴காலங். வண்ணங் கத்வா ஸுபா⁴ஸுப⁴ந்தி ஸுந்த³ரஞ்ச அஸுந்த³ரஞ்ச நானப்பகாரங் வண்ணங் கத்வா அனேகவாரங் மம ஸந்திகங் ஆக³தோஸீதி அத்தோ². ஸோ கிர வண்ணோ நாம நத்தி², யேன வண்ணேன மாரோ விபி⁴ங்ஸகத்தா²ய ப⁴க³வதோ ஸந்திகங் ந ஆக³தபுப்³போ³. தேன தங் ப⁴க³வா ஏவமாஹ. அலங் தே தேனாதி அலங் துய்ஹங் ஏதேன மாரவிபி⁴ங்ஸாகாரத³ஸ்ஸனப்³யாபாரேன. து³தியங்.
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. ஹத்தி²ராஜவண்ணஸுத்தங் • 2. Hatthirājavaṇṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. ஹத்தி²ராஜவண்ணஸுத்தவண்ணனா • 2. Hatthirājavaṇṇasuttavaṇṇanā
