| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. হত্থিরাজৰণ্ণসুত্তৰণ্ণনা
2. Hatthirājavaṇṇasuttavaṇṇanā
১৩৮. দুতিযে রত্তন্ধকারতিমিসাযন্তি রত্তিং অন্ধভাৰকারকে মহাতমে চতুরঙ্গে তমসি। অব্ভোকাসে নিসিন্নো হোতীতি গন্ধকুটিতো নিক্খমিত্ৰা চঙ্কমনকোটিযং পাসাণফলকে মহাচীৰরং সীসে ঠপেত্ৰা পধানং পরিগ্গণ্হমানো নিসিন্নো হোতি।
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
ননু চ তথাগতস্স অভাৰিতো ৰা মগ্গো, অপ্পহীনা ৰা কিলেসা, অপ্পটিৰিদ্ধং ৰা অকুপ্পং, অসচ্ছিকতো ৰা নিরোধো নত্থি, কস্মা এৰমকাসীতি? অনাগতে কুলপুত্তানং অঙ্কুসত্থং। ‘‘অনাগতে হি কুলপুত্তা মযা গতমগ্গং আৰজ্জিত্ৰা অব্ভোকাসৰাসং ৰসিতব্বং মঞ্ঞমানা পধানকম্মং করিস্সন্তী’’তি সম্পস্সমানো সত্থা এৰমকাসি। মহাতি মহন্তো। অরিট্ঠকোতি কাল়কো। মণীতি পাসাণো। এৰমস্স সীসং হোতীতি এৰরূপং তস্স কাল়ৰণ্ণং কূটাগারপ্পমাণং মহাপাসাণসদিসং সীসং হোতি।
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
সুভাসুভন্তি দীঘমদ্ধানং সংসরন্তো সুন্দরাসুন্দরং ৰণ্ণং কত্ৰা আগতোসীতি ৰদতি। অথ ৰা সংসরন্তি সংসরন্তো আগচ্ছন্তো। দীঘমদ্ধানন্তি ৰসৰত্তিট্ঠানতো যাৰ উরুৰেলায দীঘমগ্গং, পুরে বোধায ৰা ছব্বস্সানি দুক্করকারিকসমযসঙ্খাতং দীঘকালং। ৰণ্ণং কত্ৰা সুভাসুভন্তি সুন্দরঞ্চ অসুন্দরঞ্চ নানপ্পকারং ৰণ্ণং কত্ৰা অনেকৰারং মম সন্তিকং আগতোসীতি অত্থো। সো কির ৰণ্ণো নাম নত্থি, যেন ৰণ্ণেন মারো ৰিভিংসকত্থায ভগৰতো সন্তিকং ন আগতপুব্বো। তেন তং ভগৰা এৰমাহ। অলং তে তেনাতি অলং তুয্হং এতেন মারৰিভিংসাকারদস্সনব্যাপারেন। দুতিযং।
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. হত্থিরাজৰণ্ণসুত্তং • 2. Hatthirājavaṇṇasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. হত্থিরাজৰণ্ণসুত্তৰণ্ণনা • 2. Hatthirājavaṇṇasuttavaṇṇanā
