| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੨. ਹਤ੍ਥਿਰਾਜવਣ੍ਣਸੁਤ੍ਤવਣ੍ਣਨਾ
2. Hatthirājavaṇṇasuttavaṇṇanā
੧੩੮. ਦੁਤਿਯੇ ਰਤ੍ਤਨ੍ਧਕਾਰਤਿਮਿਸਾਯਨ੍ਤਿ ਰਤ੍ਤਿਂ ਅਨ੍ਧਭਾવਕਾਰਕੇ ਮਹਾਤਮੇ ਚਤੁਰਙ੍ਗੇ ਤਮਸਿ। ਅਬ੍ਭੋਕਾਸੇ ਨਿਸਿਨ੍ਨੋ ਹੋਤੀਤਿ ਗਨ੍ਧਕੁਟਿਤੋ ਨਿਕ੍ਖਮਿਤ੍વਾ ਚਙ੍ਕਮਨਕੋਟਿਯਂ ਪਾਸਾਣਫਲਕੇ ਮਹਾਚੀવਰਂ ਸੀਸੇ ਠਪੇਤ੍વਾ ਪਧਾਨਂ ਪਰਿਗ੍ਗਣ੍ਹਮਾਨੋ ਨਿਸਿਨ੍ਨੋ ਹੋਤਿ।
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
ਨਨੁ ਚ ਤਥਾਗਤਸ੍ਸ ਅਭਾવਿਤੋ વਾ ਮਗ੍ਗੋ, ਅਪ੍ਪਹੀਨਾ વਾ ਕਿਲੇਸਾ, ਅਪ੍ਪਟਿવਿਦ੍ਧਂ વਾ ਅਕੁਪ੍ਪਂ, ਅਸਚ੍ਛਿਕਤੋ વਾ ਨਿਰੋਧੋ ਨਤ੍ਥਿ, ਕਸ੍ਮਾ ਏવਮਕਾਸੀਤਿ? ਅਨਾਗਤੇ ਕੁਲਪੁਤ੍ਤਾਨਂ ਅਙ੍ਕੁਸਤ੍ਥਂ। ‘‘ਅਨਾਗਤੇ ਹਿ ਕੁਲਪੁਤ੍ਤਾ ਮਯਾ ਗਤਮਗ੍ਗਂ ਆવਜ੍ਜਿਤ੍વਾ ਅਬ੍ਭੋਕਾਸવਾਸਂ વਸਿਤਬ੍ਬਂ ਮਞ੍ਞਮਾਨਾ ਪਧਾਨਕਮ੍ਮਂ ਕਰਿਸ੍ਸਨ੍ਤੀ’’ਤਿ ਸਮ੍ਪਸ੍ਸਮਾਨੋ ਸਤ੍ਥਾ ਏવਮਕਾਸਿ। ਮਹਾਤਿ ਮਹਨ੍ਤੋ। ਅਰਿਟ੍ਠਕੋਤਿ ਕਾਲ਼ਕੋ। ਮਣੀਤਿ ਪਾਸਾਣੋ। ਏવਮਸ੍ਸ ਸੀਸਂ ਹੋਤੀਤਿ ਏવਰੂਪਂ ਤਸ੍ਸ ਕਾਲ਼વਣ੍ਣਂ ਕੂਟਾਗਾਰਪ੍ਪਮਾਣਂ ਮਹਾਪਾਸਾਣਸਦਿਸਂ ਸੀਸਂ ਹੋਤਿ।
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
ਸੁਭਾਸੁਭਨ੍ਤਿ ਦੀਘਮਦ੍ਧਾਨਂ ਸਂਸਰਨ੍ਤੋ ਸੁਨ੍ਦਰਾਸੁਨ੍ਦਰਂ વਣ੍ਣਂ ਕਤ੍વਾ ਆਗਤੋਸੀਤਿ વਦਤਿ। ਅਥ વਾ ਸਂਸਰਨ੍ਤਿ ਸਂਸਰਨ੍ਤੋ ਆਗਚ੍ਛਨ੍ਤੋ। ਦੀਘਮਦ੍ਧਾਨਨ੍ਤਿ વਸવਤ੍ਤਿਟ੍ਠਾਨਤੋ ਯਾવ ਉਰੁવੇਲਾਯ ਦੀਘਮਗ੍ਗਂ, ਪੁਰੇ ਬੋਧਾਯ વਾ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਸਮਯਸਙ੍ਖਾਤਂ ਦੀਘਕਾਲਂ। વਣ੍ਣਂ ਕਤ੍વਾ ਸੁਭਾਸੁਭਨ੍ਤਿ ਸੁਨ੍ਦਰਞ੍ਚ ਅਸੁਨ੍ਦਰਞ੍ਚ ਨਾਨਪ੍ਪਕਾਰਂ વਣ੍ਣਂ ਕਤ੍વਾ ਅਨੇਕવਾਰਂ ਮਮ ਸਨ੍ਤਿਕਂ ਆਗਤੋਸੀਤਿ ਅਤ੍ਥੋ। ਸੋ ਕਿਰ વਣ੍ਣੋ ਨਾਮ ਨਤ੍ਥਿ, ਯੇਨ વਣ੍ਣੇਨ ਮਾਰੋ વਿਭਿਂਸਕਤ੍ਥਾਯ ਭਗવਤੋ ਸਨ੍ਤਿਕਂ ਨ ਆਗਤਪੁਬ੍ਬੋ। ਤੇਨ ਤਂ ਭਗવਾ ਏવਮਾਹ। ਅਲਂ ਤੇ ਤੇਨਾਤਿ ਅਲਂ ਤੁਯ੍ਹਂ ਏਤੇਨ ਮਾਰવਿਭਿਂਸਾਕਾਰਦਸ੍ਸਨਬ੍ਯਾਪਾਰੇਨ। ਦੁਤਿਯਂ।
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਹਤ੍ਥਿਰਾਜવਣ੍ਣਸੁਤ੍ਤਂ • 2. Hatthirājavaṇṇasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੨. ਹਤ੍ਥਿਰਾਜવਣ੍ਣਸੁਤ੍ਤવਣ੍ਣਨਾ • 2. Hatthirājavaṇṇasuttavaṇṇanā
